Mga maybahay, maaaring maging miyembro ng SSS

@Buti na lang may SSS | March 28, 2021

Dear SSS,

Ako ay housewife at ang aking asawa ay nagtatrabaho sa isang kumpanya. Ang asawa ko ay naghuhulog sa SSS. Nais ko sanang maghulog sa SSS, ngunit ako ay hindi empleyado. May paraan ba na maging miyembro ako ng SSS? – Pia

Sagot

Mabuting araw sa ‘yo, Pia!

Maaaring makapaghulog sa SSS ang legal na maybahay ng aktibong nagbabayad na miyembro ng SSS na hindi nagtatrabaho at ginugugol ang buong oras sa pag-aasikaso sa kanilang pamilya bilang Non-Working Spouse (NWS). Ngunit dapat may pahintulot ito ng kanyang asawa.

Dapat nakalipas ay hindi ka kailanman miyembro o naghulog sa SSS at ikaw ay wala pang 60 taong gulang. Ang halaga ng iyong magiging kontribusyon ay ibabatay sa 50% ng huling monthly salary credit o ang salary level kung saan ibinase ang buwanang inihuhulog ng iyong asawa sa SSS, ngunit hindi ito dapat bababa sa P1, 000.

Halimbawa, si Pedring ay manggawa na naghuhulog ng regular sa SSS. Nakabatay ang hulog niya sa P3, 000 monthly salary credit at ito ay katumbas ng P330 kontribusyon kada buwan. Si Melanie na kanyang asawa ay maaaring maghulog ng P165 na kontribusyon kada buwan bilang NWS na ibinatay sa P1, 500 monthly salary credit (kalahati ng monthly salary credit ni Pedring).

Kung natugunan mo ang mga kuwalipikasyong nabanggit, kinakailangang punan at isumite ang Personal Record (E-1 Form) na may pirma ng iyong asawa sa pinakamalapit na sangay ng SSS. Dapat ilakip sa E-1 Form ang certified true copy ng inyong marriage certificate. Kung wala pang SS number, dapat isumite rin kasama ng E-1 Form ang certified true copy ng birth certificate o 2 valid ID upang magbigyan ng SS number. Matapos nito, maaaring magbayad ng kontribusyon ng kada buwan o kaya quarterly.

Mahalaga na ang NWS ay regular na naghuhulog ng kontribusyon upang maging kuwalipikado siya sa mga benepisyo ng SSS para sa panganganak, pagkakasakit, pagkabalda, pagreretiro at pagkamatay gayundin sa pautang ng SSS tulad ng salary loan.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

◘◘◘

Kung mayroon kayong mga katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Kaalaman tungkol sa Expanded Maternity Leave Law

@Buti na lang may SSS | March 21, 2021

Dear SSS,

Sa ilalim ng Expanded Maternity Leave Law, ano ang obligasyon ng employer sa pagbibigay ng benepisyo sa manggagawa nitong kababaihan? At paano ito naiiba sa dating batas? – Sheila

Sagot

Napapanahon ang iyong katanungan ngayong ipinagdiriwang natin ang Women’s Month. Ang maternity benefit ang isa sa pinakakilalang benepisyo ng SSS para sa kababaihang miyembro nito. Sa ilalim ng Republic Act 11210 o mas kilala sa tawag na 105-day Expanded Maternity Leave Law, pinalawig ang bilang ng araw ng maternity leave. Sa ilalim ng lumang batas tungkol sa maternity leave, 60 araw ang ibinibigay na maternity leave para sa normal delivery at 78 araw naman para sa caesarian delivery. Subalit sa bagong batas, magiging 105 araw na ang maternity leave ng mga nanganak, normal man o caesarian ang delivery. Bukod dito, may opsiyon din ang mga nanganak na palawigin pa ito ng karagdagang 30 araw ngunit wala na itong bayad. Nagbibigay din ng karagdagang 15 araw para naman sa mga single mothers.

Samantala, binibigyan naman ng 60 araw na maternity leave ang kababaihan na nakunan o sumailalim sa emergency termination of pregnancy.

Nasasaklaw ng bagong batas ang lahat ng kababaihang manggagawa sa gobyerno at pribadong sektor, kabilang na ang nasa informal sector, anuman ang kanilang civil status at legitimacy ng kanilang anak.

Kung sa dati ay limitado lamang ang maternity benefit sa unang apat na pagbubuntis, ngayon ay wala nang limitasyon ang bilang ng pagbubuntis na mabibigyan ng benepisyo sa panganganak. Makatatanggap ang babaeng miyembro ng SSS ng benepisyo sa bawat pagbubuntis nito.

Para sa mga employer, responsibilidad nilang abisuhan ang SSS tungkol sa pagbubuntis ng kanilang empleyado at dapat paunang bayaran ang kabuuang maternity benefit sa loob ng 30 araw matapos i-file ang maternity benefit claim application.

Sa ilalim ng bagong batas, nais naming ipaalala na dapat bayaran ng mga employer ang difference sa pagitan ng kabuuang kita ng mangagawang babae at ang aktuwal na tinanggap nitong cash benefits mula sa SSS. Halimbawa, kumikita ang babaeng mangagawa ng P1,000 kada araw, lalabas na ang kabuuang kita niya sa 105 araw ay P105,000. Kung ang natanggap niyang maternity benefit mula sa SSS ay P70,000, ibibigay pa rin ng employer ang P35,000 na kakulangan sa pagitan ng P105,000 at P70,000.

Ipinaaalala namin na ang sinumang employer na lalabag sa Expanded Maternity Leave Law ay pagbabayarin ng kaukulang multa na nagkakahalaga ng hindi bababa sa P20,000 at hindi hihigit sa P200,000.

Maaari rin siyang makulong ng mula anim (6) na taon at isang (1) araw hanggang 12 taon. Hindi na rin sila maaaring maisyuhan ng kaukulang business permit sa pagpapatakbo ng kanilang mga negosyo.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

◘◘◘

Kung mayroon kayong mga katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Pag-verify ng hulog sa SSS, online na!

@Buti na lang may SSS | March 14, 2021

Dear SSS,

Nais ko sanang i-verify ang aking hulog sa SSS, subalit wala akong oras upang magsadya sa branch. Mayroon bang paraan na ma-verify ko ang aking hulog ng hindi kinakailangang magsadya sa inyong sangay? – Sally

Sagot

Unti-unti nang inililipat ng SSS ang iba’t ibang transaksiyon nito gamit ang online platform tulad ng My.SSS na matatagpuan sa SSS website. Kaya hinihikayat natin ang mga miyembro na magrehistro sa My.SSS para mas mabilis at mas ligtas na paraan ng pakikipagtransaksiyon sa SSS. Isa sa mga transaksiyon na maaaring gawin gamit ang My.SSS ay ang pag-verify ng iyong hulog sa SSS. Gamit ang nasabing platform ay maaaring makita kung updated ba o nai-post na ang hulog sa SSS.

Upang makapagrehistro sa My.SSS, maaaring magtungo sa ating website at i-click ang “MEMBER.” Dadalhin ka nito sa member login portal at i-click ang “Not yet registered in My.SSS?” upang masimulan ang iyong pagrerehistro rito. Punan ang lahat ng kinakailangang impormasyon. Tandaan na ang irerehistro mong e-mail address ay aktibo at nagagamit mo pa dahil dito ipadadala ng SSS ang link para mai-activate at magamit mo na ang iyong account.

Kung ikaw ay mayroon ng My.SSS account, i-click mo ang “Member.” Mag-login ka gamit ang iyong user ID at password. Sunod, i-click mo ang “I’m not a robot” at i-click mo ang “Submit.” Makikita mo ang mga tab ng “HOME,” “MEMBER INFO,” “INQUIRY,” E-SERVICES,” at “PAYMENT REFERENCE NUMBER (PRN).” Para i-verify ang iyong contribution record, i-click mo ang “INQUIRY” tab. May dalawa kang pagpipilian dito: “Benefits” at “Contributions.” I-click mo ang “Contributions”.

Dadalhin ka nito sa “MONTHLY CONTRIBUTIONS” kung saan makikita ang lahat ng iyong hulog mula sa taon ng unang paghuhulog mo sa SSS. Naka-breakdown ang hulog mo ng kada buwan at bawat taon ng iyong pagiging miyembro sa SSS. Makikita mo rito ang mga buwan na mayroon at wala kang naihulog na contribution. Dahil dito ma-momonitor mo kung nagre-remit o hindi ang iyong employer ng iyong contribution.

At kung mayroong mga buwan na hindi nag-remit ang iyong employer ngunit kinaltasan ka ng SSS contributions, maaari mo itong i-report sa SSS para sa kaukulang aksyon.

Sa ibabang bahagi ng “MONTHLY CONTRIBUTIONS” ay makikita mo ang Total Number of Contributions Posted o ang kabuuang bilang ng buwan na nakapaghulog ka sa SSS. Mahalaga ang bilang ng buwan na iyong naipaghulog sa SSS sapagkat ito ang unang tinitignan kung naabot mo na ang tamang bilang ng buwanang kontribusyon para mag-qualify sa loans at mga benepisyo sa SSS. Makikita mo rin dito ang Total Amount of Contributions o ang kabuuang halaga ng naihulog mo na sa SSS.

Paulit ulit na pinapayuhan ng SSS ang mga empleyado na palagiang i-check ang kanilang contribution record sa SSS upang mabilis nilang mai-report ang anumang iregularidad sa kanilang record.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "Philippine Social Security System" at sumali sa SSS Viber Community, “MYSSSPH Updates."

◘◘◘

Kung mayroon kayong mga katanungan ukol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.