Alamin: Pagbabago sa patakaran at programa ng SSS

@Buti na lang may SSS | May 09, 2021

Dear SSS,

Matagal na akong miyembro ng SSS. Nais kong malaman ang mga pagbabago sa patakaran at programa ng SSS. Ano ba ‘yung online training platform ng SSS? – James

Sagot

Mabuting araw sa iyo, James!

Lalong pinagbubuti ng SSS ang pagbibigay-serbisyo sa mga miyembro, employer at pensiyunado nito. Isa na rito ang mga ginagawang digital transformation ng SSS sa pamamagitan ng kampanya nito sa ilalim ng ExpreSSS — mas pinadali, pinabilis at pinasimpleng mga transaksiyon sa SSS.

Dahil dito, inilunsad ng SSS noong Nobyembre 2020 ang ExpreSSS e-Learning Portal o ExSSSeL. Ito ay online learning platform na dinevelop ng SSS upang patuloy na turuan ang mga miyembro, employer at iba pang stakeholders tungkol sa iba’t ibang programa at serbisyo ng SSS.

Sa dating pamamaraan, kinakailangan ang pagtitipun-tipon ng mga tao sa iisang lugar upang malaman ang mga pagbabago sa patakaran at programa ng SSS. Subalit, dahil na rin sa kasalukuyang pandemyang ating kinahaharap, sinikap ng SSS na gumawa ng sariling online learning platform — ang ExSSSeL. Bunga nito, matututunan ng mas nakararaming miyembro, employer at iba pang stakeholders sa ating bansa ang mga updates sa SSS ng libre, sa maginhawa at ligtas na pamamaraan.

Maaaring i-access ang nasabing portal gamit ang link na ito https://bit.ly/ExSSSeL_Portal. Kapag nasa portal na, maaaring pumili sa limang training modules tulad ng mga sumusunod:

• Module 1: Sickness Benefit

• Module 2: Maternity Benefit

• Module 3: Unemployment Benefit

• Module 4: Disability Benefit

• Module 5: Salary Loan

Kapag nakapili na ng training module, kailangang punan ang online registration sa pamamagitan ng pagbibigay ng kumpletong pangalan, e-mail address, pangalan ng kompanya at ang pinakamalapit na sangay ng SSS. Para naman sa mga employer, dapat nilang ilagay ang bilang ng mga empleyado na kinatawan nila.

Maaaring mag-enroll ng higit sa isang module at pag-aralan ito batay sa oras at iskedyul. Dagdag pa rito, maaaring buksan ng sabay-sabay ang mga napiling modules.

Tulad ng ibang online course, kapag natapos ang bawat module ay mayroong post-examination o pagsusulit. Kaya kailangang pag-aralan at unawain ang nilalaman ng bawat module.

Ang kagandahan pa rito ay maaaring mag-enroll sa maraming modules ng sabay-sabay.

Kinakailangan lamang na makakakuha ng marka na hindi bababa sa 80% upang mabigyan ng SSS ng e-certificate. Ito ang itinakdang passing rate para sa nasabing pagsusulit. Ipapadala ng SSS ang e-certificate sa e-mail address sa loob ng pitong araw. Kung hindi naabot ang passing rate, hinihikayat naming pag-aralan muli ang module at kumuha ulit ng pagsusulit.

Kaya, mag-enroll na sa ExSSSeL Portal upang mapalawak ang iyong kaalaman tungkol sa SSS.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "Philippine Social Security System" at sumali sa SSS Viber Community, “MYSSSPH Updates."

◘◘◘

Kung mayroon kayong mga katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Mahalagang maging miyembro sa SSS ang mga manggagagawa sa pribadong sektor

@Buti na lang may SSS | April 25, 2021

Dear SSS,

Ako ay construction worker sa Taguig City. Nais kong itanong kung bakit mahalaga ang maging miyembro ng Social Security System (SSS) para sa aming mga manggagawa? Maaari rin bang i-withdraw ang pagiging miyembro sa SSS? – Roderick

Sagot

Mabuting araw sa iyo, Roderick!

Napapanahon ang iyong katanungan sapagkat ipinagdiwang natin kahapon ang Labor Day o Araw ng Paggawa bilang pagkilala sa kontribusyon ng mga manggagawa sa ating bansa. Ito rin ang dahilan kaya minabuti ng ating mga mambabatas na isulong ang pagkakatatag ng Social Security System (SSS). Kaya naman tatalakayin natin ngayon ang kahalagahan ng pagiging miyembro ng SSS lalo na sa mga manggagawang tulad mo na nagtatrabaho sa pribadong sektor.

Ang SSS ay itinatag noong Setyembre 1, 1957 sa bisa ng Republic Act No. 1161 o ang Social Security Act of 1954. Nilalayon ng batas na bigyan ng proteksiyon ang mga manggagawa sa pribadong sektor maging mga propesyunal at nasa informal sector. Bilang tugon dito, pinangasiwaan din ng SSS at iba’t ibang benepisyo tulad ng sickness, maternity, disability, unemployment, retirement, death at funeral benefits para sa mga miyembro nito.

Hinihikayat ka namin na ipagpatuloy ang paghuhulog sa SSS sapagkat ito ay paraan ng forced savings o sapilitang pag-iimpok bilang paghahanda sa iyong pagreretiro. Ang kontribusyon na inihuhulog mo ngayon sa SSS ay babalik sa iyo bilang pensiyon sa katapusan ng mga produktibong taon ng inyong buhay.

Bukod sa pensiyon, nagbibigay din ang SSS ng mga pautang para sa mga panandaliang pangangailangan ng mga miyembro tulad ng salary, calamity at emergency loans batay sa mga kontribusyong inyong naihulog. Kahit ang pensiyunado ay maaari pa ring mag-apply sa Pension Loan Program bilang suporta sa mga medikal at iba pang mga pangangailangan ng ating mga pensyonado.

May kasabihan tayo na “once a member, always a member” dahil habambuhay ang pagiging miyembro sa SSS. Dahil dito, hindi mo maaaring bawiin ang pagiging miyembro mo. Kahit nga nakapagbayad lamang ng isang hulog ang miyembro at hindi na ito naipagpatuloy ay mananatili pa rin siyang miyembro ng SSS. Kahit din sa mahabang panahon na siyang hindi nakapaghulog ay hindi mawawala ang naihulog niya at mananatiling nasa rekord niya ang mga ito.

Sa panahon na wala kang naihulog sa SSS, maaari ka pa ring makakuha ng mga benepisyo hangga’t natutugunan mo ang lahat ng kondisyon sa alinmang benepisyo. Sa katunayan, kahit isa lamang ang iyong naihulog na kontribusyon ay kuwalipikadong tumanggap ang iyong mga benepisaryo ng benepisyo ng pagpapalibing o funeral benefit.

Malaki ang bentahe ng manggagawa na tulad mo, Roderick kaya patuloy kang maghulog ng kontribusyon sa SSS hanggang sa oras ng iyong pagreretiro. Ikaw rin at ang iyong pamilya ang makikinabang sa kontribusyong inihuhulog mo sa hinaharap.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "Philippine Social Security System" at sumali sa SSS Viber Community, “MYSSSPH Updates."

◘◘◘

Kung mayroon kayong mga katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Maaaring iwasto ang inyong rekord sa SSS gamit ang My.SSS

@Buti na lang may SSS | April 25, 2021

Dear SSS,

Magandang araw! Bagong kasal ako at nais kong i-update ang civil status ng aking rekord sa SSS. Paano ko ito magagawa? – Shane ng Malolos

Sagot

Napakahalaga na updated at tama ang impormasyon tungkol sa iyo na nasa record ng SSS. Ang pagkakaroon ng hindi tama o hindi updated na personal record sa SSS ay maaaring magdulot ng problema sa miyembro, lalo na kung mag-a-apply siya ng benefit claim. Maaari kasing maantala ang pagpoproseso ng benefit claim kung mayroong hindi tugma o discrepancies sa rekord ng miyembro. Kaya, hinihimok namin ang mga miyembro na i-update ang kanilang rekord sa SSS. Katulad sa iyong kaso, dapat i-update ang iyong civil status.

Ang mabuting balita ay maaari mong maisagawa ang simple correction sa iyong rekord online gamit ang account sa My.SSS. Kaya dapat tiyakin na ikaw ay nakarehistro na sa My.SSS. Kung hindi pa, maaaring magtungo sa website (www.sss.gov.ph) at i-click ang “MEMBER.” Dadalhin ka nito sa member login portal at i-click mo ang “Not yet registered in My.SSS?” upang masimulan ang iyong pagrerehistro dito. Punan mo ang lahat ng kinakailangang impormasyon. Tandaan na ang irerehistrong e-mail address ay aktibo at nagagamit mo pa dahil dito ipadadala ng SSS ang link para mai-activate at magamit mo na ang iyong account.

Kapag mayroon nang My.SSS account, mag-login gamit ang iyong user ID at password. Sunod, i-click mo ang “I’m not a robot” at i-click mo ang “Submit.” Makikita mo ang mga tab ng “E-SERVICES.” Hanapin mo rito ang “Request for Member Data Change (Simple Correction)” at i-click mo ito.

I-tick mo ang kahon sa tabi ng “CIVIL STATUS.” Makikita mo sa iyong screen na ang civil status ay magiging “Single to Married.” Paalala na maaari lamang i-update ang iyong civil status ng married mula sa pagiging single. Bukod dito, maaari mo ring i-update ang iyong pangalan dahil dadalhin mo na ang apelyido o surname ng iyong asawa.

Sunod nito, i-upload ang supporting document bilang patunay sa pagbabago mo ng iyong rekord tulad ng marriage contract. Tiyakin mo lang na nababasa ang nai-upload mong dokumento. Maaaring image o PDF file ang iyong i-upload na may file size na hindi hihigit sa 2MB. Maaari ring i-click ang “Required Supporting Documents” para sa kumpletong talaan ng tinatanggap na supporting documents.

Matapos nito, i-click mo sa ibabang bahagi ang “This is to certify that all information and documents presented are true.” Ito ay pagsang-ayon na tama at wasto ang lahat ng impormasyon at dokumento na ibinigay mo. Tandaan ang transaction number. Magpapadala sa iyong e-mail address ang SSS ng Notice of Approval o Rejection tungkol dito. Paalala rin namin na hindi maaaring gawin ang simple correction na ito ng mga miyembro na may claim tungkol sa pagkamatay, pagpapalibing, pagreretiro at pagkabalda.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "Philippine Social Security System" at sumali sa SSS Viber Community, “MYSSSPH Updates."

◘◘◘

Kung mayroon kayong mga katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.