Bakit hindi pensiyon ang natanggap sa retirement benefit?

@Buti na lang may SSS | August 01, 2021

Dear SSS,

Kamakailan ay nag-file ako ng retirement claim at ang natanggap ko ay lump sum amount. Batay sa records, ako ay nakapaghulog ng 92-buwanang kontribusyon sa SSS. Nais kong itanong kung bakit hindi pensiyon ang natanggap ko sa aking retirement claim? – Luna ng Lucena City

Sagot

Mabuting araw sa ‘yo, Nanay Luna!

Ang benepisyo sa pagreretiro o ang retirement benefit ay ipinagkakaloob ng SSS sa mga miyembrong umabot na sa kanilang retirement age na 60. Upang maging kuwalipikado sa programang ito, kinakailangang siya ay separated na sa kanyang trabaho at may kaukulang 120-buwanang kontribusyon o higit pa upang makapag-pensiyon. Kung lagpas 60-taong gulang naman at kasalukuyan pang nagtatrabaho siya ay may hanggang 65-taong gulang pa upang makapaghulog sa SSS dahil ito ang compulsory age ng retirement sa ilalim ng Republic Act 11199 o Social Security Act of 2018. Subalit, para sa mga professional racehorse jockeys o hinete, sila ay kuwalipikado na sa kaukulang benepisyo kapag tumuntong na sa 55-taong gulang at 50-taong gulang naman para sa mga underground at surface mineworkers o minero.

Dalawang uri naman ang pagbabayad ng benepisyo sa pagreretiro. Ito ay ang buwanang pensiyon o lump sum benefit kung saan ang ibibigay sa retiradong miyembro ay naaayon sa bilang ng naihulog niyang kontribusyon batay sa kanyang monthly salary credit (MSC) at credited years of service (CYS) na bilang o haba ng taon ng kanyang paghuhulog sa SSS.

Kung nakapaghulog ng hindi bababa sa 120-buwanang kontribusyon bago ang semestre ng pagreretiro, makatatanggap ang miyembro ng buwanang pensiyon. Ang lump sum benefit naman ay ibinibigay kapag hindi umabot sa 120-buwan ang naihulog ng miyembro.

Sa iyong kaso, Nanay Luna ay lump sum benefit ang iyong natanggap bilang inyong benepisyo dahil hindi ninyo natugunan ang isa sa pangunahing kuwalipikasyon upang makatanggap kayo ng buwanang pensiyon. Ibig sabihin, kulang kayo ng 28-months upang mabuo ang 120-months para sa monthly pension. Samantala, kung ito ay binuo n’yo upang umabot sa 120-months ay magkakaroon kayo ng pensiyon sa SSS. Paalala rin sa mga miyembro na siguruhing makaabot kayo sa minimum required number of contributions para sa retirement upang makatanggap kayo ng pensiyon.

Mahalagang i-check ng miyembro na malapit ng magretiro kung sapat na ang naihulog ninyo upang makatanggap ng buwanang pensiyon mula sa SSS. Sa ngayon, madaling i-monitor ang kanilang naihuhulog sa SSS sa pamamagitan ng paggawa ng inyong sariling My.SSS na matatagpuan sa SSS website. Kung hindi pa nakapagrehistro Nanay Luna, maaaring magtungo sa aming website (www.sss.gov.ph) at i-click ang “MEMBER.” Dadalhin ka nito sa member login portal at i-click mo ang “Not yet registered in My.SSS?” Punan mo ang lahat ng kinakailangang impormasyon at magpapadala ng link sa iyong e-mail address upang mai-activate mo ang iyong account.

◘◘◘

Nais nating ipaalam sa mga retiree pensioners na bukas pa rin ang Pension Loan Program ng SSS para sa kanilang panandaliang pangangailangang pampinansiyal. Mula Setyembre 15, 2020, maaaring magsumite ng aplikasyon online sa pamamagitan ng My.SSS na matatagpuan sa SSS website (www.sss.gov.ph). Kinakailangan lamang mag-log in ang retiree-pensioner sa kanyang My.SSS account at piliin ang E-services sa tab nito at i-click ang “Apply for Pension Loan.” Punan ang lahat ng hinihinging impormasyon at isumite ang aplikasyon. Makahihiram kayo ng hanggang P200, 000 bilang maximum loanable amount na maaaring bayaran ng hanggang 24-months o dalawang taon.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Tamang pagko-compute ng maternity benefit sa SSS

@Buti na lang may SSS | July 25, 2021

Dear SSS,

Magandang araw! Nais ko sanang malaman kung paano kino-compute ang SSS maternity benefit? Magkano naman ang benefit na maaari kong makuha para rito? Salamat. – Shiela ng Malolos, Bulacan

Sagot

Mabuting araw sa ‘yo, Shiela!

Ang SSS Maternity Benefit ay cash allowance na ibinabayad ng SSS sa kababaihang miyembro nito para sa bawat araw na hindi siya makapagtrabaho dahil sa panganganak. Sa ilalim ng Republic Act 11210 o mas kilala sa Expanded Maternity Leave Law (EMLL), 105-araw na ang ibinabayad na maternity leave sa miyembro ng SSS, maging ito ay normal o caesarian delivery mula Marso 11, 2019. Samantala, binibigyan naman ng 60-araw na bayad na maternity leave ang kababaihan na nakunan o sumailalim sa emergency termination of pregnancy (ETP).

Paano nga ba maging kuwalipikado sa programang ito? Una, dapat alamin natin ang semestre ng panganganak. Ito ay binubuo ng dalawang magkasunod na kuwarter o katumbas ng anim na buwan at nagtatapos sa kuwarter kung saan nakapaloob ang buwan ng panganganak. Kapag alam na ang semestre ng panganganak, tingnan ang 12-month period matapos ang semester at alamin kung may hindi bababa sa tatlong hulog ang miyembro. Kung mayroon siyang tatlong hulog (o higit pa) sa loob ng 12-month period na ito, qualified siya sa benepisyo sa panganganak.

Sunod, alamin mo ang iyong average daily salary credit. Kinukuwenta ang average daily salary credit (ADSC) sa pamamagitan ng pagpili ng anim na pinakamatataas na monthly salary credit sa loob ng 12-month period. Kunin mo ang kabuuang halaga ng anim na MSC na ito at i-divide sa 180 (constant divisor). Anumang halaga na makuwenta rito ay ang iyong average daily salary credit.

Panghuli, i-multiply ang average daily salary credit sa 105 kung normal o caesarian delivery o kaya sa 60 kung nakunan o emergency termination of pregnancy upang makuha kung magkano ang maternity benefit na iyong matatanggap.

Halimbawa, ang miyembro ay nanganak noong Hunyo 26, 2021 at sumusuweldo ng P20,000 kada buwan. Ang semester of contingency niya ay mula Enero hanggang Hunyo 2021. Kaya ang 12-month period niya ay magsisimula sa Enero 2020 hanggang Disyembre 2020. Dito pipiliin ang anim na pinakamataas na monthly salary credit. Ipagpalagay natin na P20, 000 ang suweldo niya kada buwan sa loob 12-month period. Kukunin natin ang total ng anim na napiling MSC at makukuha natin ang 120,000, tapos idi-divide ang 120,000 sa 180. Ang lalabas na average daily salary credit ay P666.67. Ang P666.67 ay i-mu-multiply sa 105 kung normal o caesarian delivery at ang makukuha niyang benefit ay nagkakahalaga ng P70, 000.

Subalit kung nakunan o sumailalim sa emergency termination of pregnancy, i-multiply ang P666.67 sa 60 at ang makukuha niyang benefit ay nagkakahalaga ng P40, 000.

Dapat palaging siguruhin ng miyembro na updated ang kanyang kontribusyon sa SSS upang maging kuwalipikado sa maternity benefit program. Samantala, wala nang kaukulang limit ang anumang pagdadalang-tao ng miyembro mula noong ipatupad ang EMLL.

◘◘◘

Nais naming ipaalam sa mga retiree pensioners na bukas pa rin ang Pension Loan Program ng SSS para sa kanilang panandaliang pangangailangang pampinansiyal. Mula Setyembre 15, 2020, maaari ng magsumite ng aplikasyon online sa pamamagitan ng My.SSS na matatagpuan sa SSS website (www.sss.gov.ph). Kinakailangan lamang na mag-log in ang retiree-pensioner sa kanyang My.SSS account at piliin ang E-services sa tab nito at i-click ang “Apply for Pension Loan.” Punan ang lahat ng hinihinging impormasyon at isumite ang aplikasyon. Makahihiram kayo ng hanggang P200, 000 bilang maximum loanable amount na maaaring bayaran ng hanggang 24-months o dalawang taon.

◘◘◘

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

◘◘◘

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Alamin: Paraan para maging SSS member ang self-employed

@Buti na lang may SSS | July 18, 2021

Dear SSS,

Magandang araw, SSS! Simula pa noong una ay hindi ako namasukan o nagtrabaho sa kompanya kaya hindi ako naging miyembro ng SSS. Sa kasalukuyan ay mayroon akong mini grocery store. Nais kong malaman kung maaari ba akong makapaghulog sa SSS?

Sheena ng Pandi, Bulacan

Sagot

Mabuting araw sa ‘yo, Sheena!

Malugod naming ipinaaalam sa ‘yo na maaaring maging miyembro ng SSS. Simula pa noong 1980 ay itinatakda ng SSS Law ang pagsakop sa mga self-employed na indibidwal na may buwanang kita na P1, 000 o higit pa mula sa kanyang sariling negosyo o propesyon at walang employer, kung hindi pa siya umaabot sa edad 60.

Kabilang sa mga self-employed ay ang mga propesyunal tulad ng abogado o doktor, may sariling opisina man o wala, nagmamay-ari o magkasosyo sa negosyo, artista, direktor o manunulat ng pelikula na hindi itinuturing na empleyado, propesyunal na atleta, coaches, hinete at tagapagsanay, magsasaka at mangingisda, nagtitinda sa palengke, tricycle o jeepney drivers, o contractual at job order na empleyado na nagtatrabaho sa mga ahensiya ng pamahalaan.

Sa kasalukuyan, ang contribution rate ay 13% ng monthly salary credit na hindi hihigit sa P25, 000. Maaaring ibatay ang halaga ng iyong magiging buwanang kontribusyon sa monthly salary credit o ang salary level kung saan nakabase ang iyong buwanang kita na idineklara mo sa registration form o SS Form E-1 (Personal Record). Ang 2021 Schedule of Contributions ay makikita sa SSS website, www.sss.gov.ph o kaya’y sa Facebook page nito sa Philippine Social Security System.

Samantala, ang buwanang kontribusyon ng self-employed ay maaaring tumaas o bumaba sa idineklara sa registration form ayon sa iyong aktuwal na kinikita.

Halimbawa, ang idineklara mong buwanang kita sa registration form ay P8, 300. Batay sa Schedule of Contributions, ito ay katumbas sa 8,500 monthly salary credit at may kaukulang kontribusyon na P1,105 kada buwan kasama na ang P10 para sa iyong Employee’s Compensation (EC) contributions na may kabuuang halaga na P1,115 kada buwan.

Ang EC Program naman ay para sa mga work-related contingencies bunsod ng pagkakasakit, pagkabalda, o kaya’y pagkamatay na maaaring mangyari sa self-employed na tulad mo habang nagtatrabaho. Dagdag-proteksiyon naman ito bukod sa regular SSS benefits na matatanggap mo sa hinaharap.

Maaari nang kumuha ng SS number online. Magtungo lamang sa SSS website (www.sss.gov.ph) at i-click ang link sa No SS Number Yet? Apply Online! Kung ikaw ay may SS number, maaari na ring i-update ang membership mo sa online.

Kinakailangan lamang na nakapagrehistro ka sa My.SSS na matatagpuan din sa SSS website. Dagdag rito, kailangan mo rin ang mga dokumentong tulad ng certified true copy ng iyong birth certificate upang mabigyan ka ng SS number. Kung walang birth certificate, maaaring isumite ang alinman sa mga sumusunod: baptismal certificate; driver’s license, passport; Professional Regulation Commission (PRC) card; o Seaman’s Book. Kung wala ang mga nasabing cards o dokumento, maaaring magpasa ng dalawang valid IDs gaya ng postal, senior citizen at voter’s ID, atbp.

Matapos nito, maaaring magbayad ng iyong kontribusyon kada buwan o kaya ay quarterly. Para makapagbayad ng iyong kontribusyon, kailangan munang makakuha ng Payment Reference Number (PRN) para sa iyong gagawing pagbabayad. Maaaring makapag-generate ng PRN gamit ang SSS Mobile App. Kinakailangan mong mag-log in sa nasabing mobile app gamit ang iyong existing na My.SSS username at password.

Sunod, i-tap mo ang “Generate PRN/SOA” icon na iyong makikita sa iyong mobile screen. Matapos nito, i-tap mo ang “Create” at punuan ang hinihinging impormasyon tulad ng buwan, halaga ng babayarang kontribusyon at type ng membership. Kapag naibigay mo na ang lahat ng kailangang impormasyon, i-tap mo ang “SUBMIT” at lalabas ang iyong PRN/SOA. Maaari mo itong i-download bilang PDF o di kaya’y magtuloy na sa pagbabayad.

Maaari kang magbayad ng iyong kontribusyon gamit ang My.SSS at SSS Mobile App maging sa alinmang sangay ng SSS, sa bangko o Bayad Centers.

◘◘◘

Para sa tamang impormasyon at updates sa mga programa at benepisyo ng SSS, hinihikayat namin ang mga miyembro at employer na bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "Philippine Social Security System" at sumali sa SSS Viber Community, “MYSSSPH Updates."

◘◘◘

Kung mayroon kayong mga katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.