Alamin: Dapat gawin ng mga OFW na gustong ituloy ang kanilang SSS

@Buti na lang may SSS | October 24, 2021

Dear SSS,

Ako ay overseas Filipino worker sa Dubai. Noong nasa Pilipinas ako ay nagtatrabaho ako sa kilalang department store at nakapaghuhulog sa SSS. Subalit, mula nang ako ay magtungo sa Dubai ay hindi na ako nakapaghulog ng kontribusyon sa SSS. Maaari ko ba itong ipagpatuloy? – Pauline

Sagot

Mabuting araw sa ‘yo, Pauline!

Malugod nating ibinabalita na maaaring maipagpatuloy ang paghuhulog sa SSS bilang overseas Filipino worker (OFW) member. Sa kasalukuyan, ang minimum Monthly Salary Credit (MSC) para sa mga land-based OFWs na tulad mo ay P8, 000, ito ay katumbas naman ng P1, 040 kada buwan na kontribusyon.

Para sa iyong kaalaman, 1995 pa noong ipinagtibay ng SSS ang pagsakop sa mga OFWs, ngunit noong Marso 2019 sa bisa ng Republic Act 11199 o Social Security Act of 2018, mandatory na ito para sa lahat ng sea at land based OFWs na hindi pa umaabot sa edad 60.

Sa binanggit mo na ikaw ay dati ng nakapagtrabaho, maaari mo itong ituloy bilang voluntary member. Ang iyong coverage naman ay magsisimula muli sa unang buwan ng iyong pagbabayad ng kontribusyon sa SSS. Samantala, maaari mong bayaran ang iyong kontribusyon para sa Enero hanggang Setyembre alinmang buwan sa kasalukuyang taon kung saan ang last quarter mula Oktubre hanggang Disyembre naman ay maaari mo namang bayaran hanggang sa huling araw ng Enero sa susunod na taon.

Kinakailangan lamang, Pauline na ikaw ay nakarehistro at may account sa My.SSS na matatagpuan sa SSS website (www.sss.gov.ph). Upang magamit naman ang SSS Mobile App, kinakailangan mo itong i-install sa iyong smartphone.

Para makapagbayad ng iyong kontribusyon, kailangan munang makakuha ng Payment Reference Number (PRN) para sa iyong gagawing pagbabayad. Maaari kang makapag-generate ng PRN gamit ang SSS Mobile App. Kinakailangang mag-log in sa nasabing mobile app gamit ang iyong existing na My.SSS username at password.

Sunod, i-tap mo ang “Generate PRN/SOA” icon na iyong makikita sa iyong mobile screen.

Matapos nito, i-tap mo ang “Create” at punuan mo ang hinihinging impormasyon tulad ng buwan at halaga ng babayarang kontribusyon. Maaari ring palitan ang type ng membership sa pamamagitan ng pagpili ng OFW. Kapag naibigay na ang lahat ng kailangang impormasyon, i-tap mo ang “SUBMIT” at lalabas ang iyong PRN/SOA. Maaari mo itong i-download bilang PDF o magtuloy na sa pagbabayad.

Dahil mayroon ka nang PRN, maaari ka ng magbayad. I-tap mo ang “Pay.” Lalabas sa screen ang payment methods. Maaaring mamili sa PayMaya, BPI at GCash. Tiyaking mayroong existing account sa iyong napiling online payment channel.

Bukod sa My.SSS at SSS Mobile App, maaari ring magbayad sa mga overseas banks tulad ng Asia United Bank, Bank of Commerce, at Philippine National Bank. Maaari ring gamitin ang website at mobile app ng ilang bangko sa pagbabayad ng iyong kontribusyon gaya ng Security Bank Corp.-Digibanker/Security Bank Online at Union Bank of the Philippines-UnionBank Online. Makapagbabayad din ng kontribusyon sa Cashpinas, I-Remit, Inc., Pinoy Express Hatid Padala Services, Inc., Ventaja International Corp., at LMI Express Delivery Inc.

Dapat ding tandaan na sa patuloy mong paghuhulog ng SSS, kuwalipikado kang makatanggap ng pitong benepisyo tulad ng sickness, maternity, unemployment, disability, retirement, funeral, death, gayundin ang mga pribilehiyo sa pautang tulad ng salary, calamity, atbp.

Sa pagdaan ng mga taon, ang paghuhulog sa SSS ay pamamaraan ng iyong investment o pag-iimpok bilang paghahanda sa iyong pagreretiro. Ang kontribusyon na inihuhulog mo ngayon sa SSS ay babalik sa iyo bilang pensyon sa katapusan ng mga produktibong taon ng inyong buhay.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Alamin: Pinadaling pag-claim ng funeral benefit ng SSS

@Buti na lang may SSS | October 17, 2021

Dear SSS,

Nais kong malaman kung ano ang tinatawag na funeral benefit ng SSS? – Alice ng Taguig

Sagot

Mabuting araw sa iyo, Alice!

Ang Social Security System (SSS) ay mayroong pitong benefit programs na ipinagkakaloob sa mga miyembro nito, gayundin sa kanilang mga legal na benepisaryo. Isa na ang funeral benefit kasama ng sickness, maternity, unemployment, disability, retirement at death.

Ang benepisyo sa pagpapalibing o funeral benefit ay ibinabayad ng SSS sa sinumang gumastos sa pagpapalibing ng namayapang miyembro o pensiyunado nito. Maaaring makatanggap ng benepisyo na nagkakahalaga mula P20, 000 hanggang P40, 000 ang sinumang mag-claim para rito. Samantala, ang halaga ay nakabatay sa average monthly salary credit (AMSC) ng miyembro at ang credited years of service o haba ng paghuhulog niya sa SSS. Kinakailangan din na nakapaghulog ng kahit isang kontribusyon ang namatay na SSS member upang maging kuwalipikado sa nasabing benepisyo.

Paalala, dapat nakapangalan sa claimant ang mga dokumento sa pagpapalibing tulad ng resibo sa funeral parlor, service at iba pa.

Noong nakaraang taon, ipinatupad ng SSS ang online application para sa funeral claim. Ito ay available na ngayon sa mga claimant na SSS member din na mayroong My.SSS account at naka-enroll sa Disbursement Account Enrollment Module o DAEM ang kanilang bank account o UMID-ATM card. Para sa mga claimant na hindi naman miyembro ng SSS at miyembro ng SSS na walang UMID-ATM card, maaari nilang ihulog ang kanilang aplikasyon sa mga drop box na matatagpuan sa mga sangay ng SSS.

Simula rin noong nakaraang taon, hindi na tseke ang ginagamit sa pagbabayad ng funeral benefit sa mga claimant. Ito ay i-credit na sa bank account ng claimant. Sa ganitong pamamaraan, mas mabilis at ligtas ng matatanggap ang nasabing benepisyo bilang pag-iingat din sa kalusugan at kaligtasan ng ating mga benepisaryo at claimant mula sa COVID-19.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Kahalagahan at kaalaman tungkol sa Disbursement Account Enrollment Module ang SSS members

@Buti na lang may SSS | October 10, 2021

Dear SSS,

Nais ko malaman kung ano ang tinatawag na Disbursement Account Enrollment Module ng SSS? Bakit ito mahalaga para sa mga miyembro at paano mag-enroll dito? —Thelma, Naga City

Sagot

Mabuting araw sa iyo Thelma! Bunsod ng pandemyang ating kinahaharap ngayon, nakita ng SSS ang malaking hamon ng pagre-release ng benepisyo at pautang gamit ang nakagawiang pagpapadala ng tseke sa pamamagitan ng koreo. Dahil dito, naglatag ang SSS ng mga pamamaraan upang mapabilis ang pagre-release ng benepisyo at pautang sa mga miyembro nito. Layunin din natin ang masiguro ang kaligtasan at kalusugan ng aming mga miyembro, lalo na ngayong may pandemya. Simula noong 2020, ipinatupad ng SSS ang alternatibong pagbabayad ng benepisyo o kaya’y pautang sa pamamagitan ng Disbursement Account Enrollment Module o DAEM.

Sa pamamagitan nito, diretso nang papasok sa iyong enrolled account ang anumang benepisyo o pautang mula sa SSS. Maaari mong i-rehistro sa DAEM ang iyong bank account na nasa mga bangkong kabilang sa Philippine Electronic Fund Transfer System and Operations Network (PESONet).

Mahalaga ito dahil hindi mo na kailangang magtungo pa sa bangko upang i-encash o ideposito ang tseke na iyong tinanggap mula sa SSS.

Bago makapag-enrol sa DAEM, dapat tiyaking mayroon ng account sa My.SSS. Kung wala pa, maaari kang magtungo sa aming website (www.sss.gov.ph) at i-click mo ang “Member.” Dadalhin ka nito sa member login portal at i-click ang “Not yet registered in My.SSS?” upang mag-rehistro dito. Punan mo ang lahat ng kinakailangang impormasyon at magpapadala ang SSS sa iyong inirehistrong e-mail address ng link upang magamit mo na ang iyong account.

Dahil mayroon ka ng My.SSS account, maaari ka ng mag-enroll sa DAEM. Una, mag-login ka sa iyong My.SSS account. Makikita mo ang DAEM sa E-Services Tab at i-click mo ito. Basahin mong mabuti ang mga paalala. I-tick mo ang box ng “I certify that I have read and understood the foregoing reminders on account enrollment,” at sunod i-click mo ang “Proceed.”

Piliin ang bank option at lilitaw sa screen ang mga pangalan bangko at piliin mo ang iyong bangko. Sunod, i-click mo ang “Select Document Type.” Sa bahaging ito, dapat kang mag-attach ng dokumento o katunayan ng iyong inirehistrong bank account. Maaari mong i-upload ang alinman sa sumusunod: kopya ng iyong ATM card na makikita ang account number at pangalan mo, bank certificate o statement kung naiisyu ito bago ang taong 2019, foreign remittance receipt, passbook, screenshot ng iyong online o mobile banking account, o validated deposit slip.

Tiyakin mo na malinaw ang kuha o pagkaka-scan ng dokumento. Dapat din na nababasa ang impormasyon na nakalagay dito. Maaari namang magsagawa ng karagdagang beripikasyon ang SSS upang matiyak na ikaw ang may-ari ng iyong account.

Sunod, i-tick mo ang box ng “I agree that the information…” Tapos, i-click mo ang “Enroll Disbursement Account.” Magpapadala ang SSS ng magkahiwalay na mensahe sa iyong e-mail address na natanggap na ang iyong account enrollment at ang status o resulta nito.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.