Magkano ang maaaring mahiram mula sa SSS Pension Loan Program?

@Buti na lang may SSS | January 16, 2022

Dear SSS,

Ako ay pensiyunado ng SSS. Kamakailan ay nabalitaan ko na mayroong pautang ang SSS para sa aming mga pensiyunado. Magkano ang maaari kong mahiram SSS Pension Loan Program? - Arnold

Sagot

Mabuting araw sa iyo, Lolo Tonio!

Ang Pension Loan Program (PLP) ay inilunsad ng SSS noong Setyembre 2018 upang makapagbigay ng tulong-pinansiyal sa mga retiradong pensiyunado ng SSS. Ang PLP ay isa sa may pinakamababang interest na pautang para sa mga pensiyunado. Dagdag pa rito, layunin nitong mabigyan ng alternatibong mauutangan ang mga pensiyunado upang hindi na sila pumunta sa mga private lending companies na mas malaki ang patubo at ginagawang collateral ang mga ATM cards.

Sa kasalukuyan, makahihiram kayo ng hanggang P200,000 bilang maximum loanable amount na maaaring bayaran hanggang 24-months o dalawang taon. Malaking tulong ang nasabing halaga, lalo na sa panahon ngayong nasa ng pandemya. Ito ay karagdagang tulong-pinansiyal upang matugunan ang inyong mga pangangailangang medikal tulad ng pagbili ng inyong mga maintenance medicines, atbp.

Ang kagandahan pa nito ay magsisimula lamang ang inyong pagbabayad ng utang o monthly amortization makalipas ang dalawang buwan matapos maibigay ang inyong loan. Halimbawa, ang loan ninyo ay naibigay ngayong Agosto. Kakaltasin ng SSS ang una ninyong monthly amortization sa inyong buwanang pensiyon sa Oktubre.

Kuwalipikado ang mga pensiyunado kung sila ay ang mga sumusunod:

hindi dapat hihigit sa 85 taong gulang sa katapusan ng termino ng pautang;

walang ibinabawas sa kanyang buwanang pensiyon, tulad ng natitirang balanse sa ibang pautang ng SSS o kaya’y sobrang benepisyong binayaran ng SSS; walang utang sa ilalim ng SSS Calamity Assistance Package; at tumatanggap na ng regular na pensiyon na hindi bababa sa isang buwan.

Arnold, ang mga first-time applicants na tulad mo sa PLP ay kinakailangang i-file ang loan application sa pamamagitan ng drop box system. Para sa renewal naman, ito ay maaari nang gawin sa pamamagitan ng online gamit ang kanilang My.SSS accounts.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Educational loan assistance sa miyembro ng SSS

@Buti na lang may SSS | January 09, 2022

Dear SSS,

Ako ay college student at kasalukuyang naghahanap ng scholarship. Dati akong nagtatrabaho sa iba’t ibang fast food company. Mayroon bang scholarship na ibinibigay ang SSS? - Janae Louise

Sagot

Mabuting araw sa iyo, Janae Louise!

Ikinalulungkot naming ipaalam sa ‘yo na kasalukuyan ay walang scholarship program ang SSS.

Subalit, ang magandang balita ay nagbibigay ito ng educational loan sa mga miyembro nito. Ito ay ang Educational Assistance Loan Program (EALP) na naglalayong mapagkalooban ng tulong-pinansiyal ang mga benepisaryo ng aming miyembro hinggil sa gastusin nila sa pag-aaral.

Inilunsad ang programa noong 2012 sa pakikipagtulungan ng national government na nagbigay ng bahagi ng pondo para rito.

Ang mga miyembro na nais mag-apply sa EALP ay dapat matugunan ang mga kondisyon sa ilalim ng programa. Una, ang edad ng miyembro ay hindi lalagpas ng 60-taong gulang.

Pangalawa, ang kanyang buwanang kita o monthly basic income ay hindi hihigit sa P25,000.

Pangatlo, nakapaghulog ang miyembro ng hindi bababa sa 36-buwanang kontribusyon, kung saan ang anim dito ay naihulog sa loob ng huling 12-buwan bago ang buwan ng pagpa-file ng aplikasyon.

Mahalaga rin na updated ang pagbabayad ng kanyang salary o housing loan at iba pang pautang kung mayroon man. Kung mayroong siyang overdue na utang, hindi maaaprubahan ang kanyang aplikasyon.

Ang kuwalipikadong humiram sa ilalim ng EALP ay ang mismong SSS member, ang kanyang legal na asawa at kanyang mga anak maging ito man ay lehitimo, hindi lehitimo o legally adopted. Kung walang asawa ang miyembro, bukod sa kanya ay kuwalipikado rin sa programa ang kanyang mga kapatid maging ito man ay kapatid niya sa ama o ina.

Isang benepisaryo lamang kada miyembro ang papayagan para sa EALP. Ito ay dapat naka-enroll sa anumang undergraduate course sa alinmang unibersidad o kolehiyo na kinikilala ng ng Commission on Higher Education (CHED), Technical Education and Skills Development Authority (TESDA), Civil Aviation Authority of the Philippines (CAAP) o institusyong kinikilala ng Pamahalaan ng Pilipinas.

Ang pagbibigay ng EALP ay kada program term ng paaralan, kung kaya’t kailangang muling mag-apply ang miyembro para sa mga susunod na term hanggang sa makatapos o magamit na niya ang full allocation ng programa.

Sa EALP, ang termino ng pagbabayad ay hanggang limang (5) taon para sa mga degree course, at tatlong taon naman para sa kumuha ng vocational o technical courses.

Matapos ang huling pagbibigay ng pautang ay susumahin ang lahat ng nautang sa ilalim ng EALP. Sisimulan ang pagbabayad matapos ang 18-buwan mula sa huling petsa ng pagbigay ng pautang para sa semestral na kurso samantala, 15-buwan naman para sa trimestral na kurso, at 14-buwan at 15-araw para sa quarter programs. Anumang natitirang utang sa ilalim ng EALP na hindi mababayaran ay ikakaltas naman sa final claim ng miyembro tulad ng retirement at death benefits.

Nais din naming linawin na ang EALP ay revolving fund. Ibig sabihin ang pondo ay inilalaan sa mga kasalukuyang benepisaryo. Kapag nakatapos na sila sa pag-aaral at nabayaran ang EALP, babalik ito sa pondo para maipautang naman sa ibang aplikante na nais mag-aral. Sa mga interesadong mag-apply sa EALP tulad mo Janae Louise, ikaw ay ilalagay sa waiting list hanggang magkaroon na ng available na pondo para sa iyo.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Paano makatutugon sa ACOP ang pensiyunadong nasa ibang Bansa?

@Buti na lang may SSS | January 04, 2022

Dear SSS

Ang mother-in-law ko ay SSS pensioner. Sa kasalukuyan, siya ay naninirahan sa Canada. Nais sana niyang malaman ng kung paano siya magkakapag-comply sa ACOP?

Kailangan bang umuwi siya sa Pilipinas para sa kanyang ACOP? – Olivia

Sagot

Mabuting araw sa iyo, Olivia!

Simula noong Oktubre 2021, muling ibinalik ang Annual Confirmation of Pensioners (ACOP) Program o ang taunang pagre-report ng mga pensiyunado sa SSS. Layunin nitong masiguro na ang tamang benepisaryo ang tumatanggap ng pensiyon at maprotektahan ang pondo ng SSS. Kinakailangang maaaring mag-comply sa ACOP mula Oktubre 2021 ang mga sumusunod na uri ng pensiyunado hanggang Marso 31, 2022 upang hindi maputol ang pagtanggap nila ng kanilang buwanang pensiyon:

• retirement pensioners na naninirahan sa ibang bansa;

• total disability pensioners;

• survivor pensioners; at

• dependent (minor/incapacitated) pensioners na nasa pangangalaga sa ilalim ng guardianship

Dati, kailangang magtungo pa ng pensiyunado sa mga opisina ng SSS para sa kanyang ACOP.

Subalit, dahil sa kasalukuyang pandemya, nagpatupad ang SSS na mas ligtas at mabilis na alternatibong pamamaraan upang makasunod dito sa ACOP na hindi na nangangailangan ng personal appearance sa SSS.

Olivia, para sa mga pensiyunado na naninirahan sa ibang bansa, tulad ng iyong mother-in-law, may tatlong pamamaraan upang isagawa ang ACOP.

Option 1: Sa pamamagitan ng video conference (Microsoft Teams). Mag-send siya ng appointment request sa ofw.relations@sss.gov.ph. Hintayin ang e-mail confirmation mula sa SSS na naglalaman ng transaction reference number (TRN) at ng link sa Microsoft Teams. Sa scheduled video conferencing, dapat siyang mag-present ng isang primary ID card o dalawang secondary ID cards.

Option 2: Maaaring ipadala ang mga required na dokumento sa e-mail address ng pinakamalapit na SSS foreign office. Sa Canada may tatlong offices na matatagpuan sa Philippine Overseas Labor Office sa Vancouver, sa Philippine Consulate General sa Calgary at sa Philippine Consulate General sa Toronto.

Option 3: Maaari ring ipadala ang mga required na dokumento sa pamamagitan ng koreo sa SSS OFW-Contact Services Section, Social Security System Main Office, East Avenue, Diliman, Quezon City 1100.

Para sa options 2 at 3, dapat ihanda ng mother-in-law mo, ang sumusunod na mga dokumento:

• duly-accomplished ACOP Form;

• primary o dalawang secondary ID cards;

• half-body photo ng pensyonado na may hawak na kasalukuyang diyaryo o nasa background niya ang TV news crawler o ticker, kung saan makikita ng malinaw ang news headline at kasalukuyang petsa

Maaaring i-download ang SSS ACOP form sa link na ito https://bit.ly/3mC8TkE.

Nais nating ipaalala na kung hindi makakapag-comply sa ACOP ang iyong mother-in-law hanggang Marso 31, 2022, maaaring maputol ang pagtanggap niya ng buwanang pensiyon.

Samantala, mula Abril 1, 2022, susunduin na ulit ang dating schedule ng ACOP para sa 2022 at mga susunod na taon. Para sa mga pensiyunado na naninirahan sa ibang bansa, ang kanilang pag-comply sa ACOP ay kailangang gawin tuwing birth month nila o tatlong buwan bago sumapit ito.

***

Nais nating ipaalam sa mga miyembro na noong Nobyembre 15, 2021 ay binuksan na ang aplikasyon para sa Short-Term Member Loan Penalty Condonation Program o ang Pandemic Relief and Restructuring Program 5. Sa ilalim nito, hindi na kailangang bayaran ng miyembro ang mga naipong multa o penalties sa hindi niya nabayarang utang sa SSS tulad ng salary loan, Calamity loan, Salary Loan Early Renewal Program (SLERP), Emergency loan at restructured loans sa ilalim ng Loan Restructuring Program (LRP) na ipinatupad noong 2016 hanggang 2019.

Maaaring mag-apply ang interesadong miyembro hanggang Pebrero 14, 2022 at mag-file ng application gamit ang kanilang My.SSS account.

Bukod dito, binuksan din ng SSS ang Housing Loan Restructuring and Penalty Condonation Program o ang Pandemic Relief and Restructuring Program 4 noong Nobyembre 22, 2021. Sa ilalim nito, hindi na kailangang bayaran ng miyembro o mga tagapagmana nito ang mga naipong multa o penalties sa hindi nabayarang housing loan. Maaari silang mag-file ng aplikasyon sa SSS Housing and Acquired Asset Management Department na nasa SSS Main Office sa Quezon City at sa Housing and Acquired Asset Management Section ng piling sangay ng SSS sa labas ng Metro Manila.

Tatagal ang pagtanggap ng aplikasyon hanggang Pebrero 21, 2022.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.