Dagdag-proteksiyon na, may benepisyo pa…

@Buti na lang may SSS | January 30, 2022

Dear SSS,

Ako ay delivery rider ng food delivery app. Batid ko sa araw-araw na pagde-deliver ng mga orders ng aming mga customer ay lubhang napakadelikado at malapit sa aksidente. Kaya nais kong malaman kung maaari rin ba akong makapaghulog sa SSS? - Theo

Sagot

Mabuting araw sa iyo, Theo!

Malugod naming ipinaaalam sa iyo na maaari kang maging miyembro ng SSS bilang self-employed. Mula pa noong 1980 ay itinatakda ng SSS Law ang pagsakop sa mga self-employed na indibidwal na may buwanang kita na P1,000 o higit pa mula sa kanyang sariling negosyo o propesyon at walang employer, kung hindi pa siya umaabot sa 60 taong gulang.

Kabilang sa mga self-employed ay ang mga propesyunal, tulad ng abogado o doktor, may sariling opisina man o wala, nagmamay-ari o magkasosyo sa negosyo, artista, direktor o manunulat ng pelikula na hindi itinuturing na empleyado, propesyunal na atleta, coaches, hinete at tagapagsanay, magsasaka at mangingisda, nagtitinda sa palengke, tricycle o jeepney drivers, o contractual at job order na empleyado na nagtatrabaho sa mga ahensiya ng pamahalaan.

Mula naman noong October 2021 ay ipinaigting natin ang pagsakop ng mga katulad mong delivery riders ng mga digital platform companies, tulad ng Angkas, DingDong, FoodPanda, Grab, JoyRide, LalaMove, atbp.

Sa kasalukuyan, ang contribution rate ay 13% ng monthly salary credit na hindi hihigit sa P25,000.

Maaaring ibatay ang halaga ng iyong magiging buwanang kontribusyon sa monthly salary credit o ang salary level, kung saan nakabase ang iyong buwanang kita na idineklara mo sa registration form o SS Form E-1 (Personal Record). Ang 2021 Schedule of Contributions ay makikita sa SSS website, www.sss.gov.ph o kaya’y sa Facebook page nito sa Philippine Social Security System.

Samantala, ang buwanang kontribusyon ng self-employed ay maaaring tumaas o bumaba sa idineklara sa registration form ayon sa iyong aktuwal na kinikita.

Halimbawa, ang idineklara mong buwanang kita sa registration form ay P8,300. Batay sa Schedule of Contributions, ito ay katumbas sa 8,500 monthly salary credit at may kaukulang kontribusyon na P1,105 kada buwan kasama na ang P10 ay nakalaan naman para sa iyong Employee’s Compensation (EC) contributions na may kabuuang halaga na P1,115 kada buwan.

Ang EC Program ay para sa mga work-related contingencies bunsod ng pagkakasakit, pagkabalda, o kaya’y pagkamatay na maaaring mangyari sa self-employed na tulad mo habang nagtatrabaho.

Dagdag-proteksiyon ito bukod sa regular SSS benefits na matatanggap mo sa hinaharap.

Maaari ka nang kumuha ng SS number online. Magtungo lamang sa SSS website (www.sss.gov.ph) at i-click ang link sa No SS Number Yet? Apply Online! Kung ikaw ay may SS number, maaari na ring i-update ang membership mo sa online. Kinakailangan lamang na nakapagrehistro ka sa My.SSS na matatagpuan din sa SSS website. Dagdag rito, kailangan mo rin ang mga dokumentong tulad ng certified true copy ng iyong birth certificate upang mabigyan ka ng SS number. Kung wala kang birth certificate, maaaring isumite ang alinman sa mga sumusunod: baptismal certificate; driver’s license, passport; Professional Regulation Commission (PRC) card; o Seaman’s Book. Kung wala ang mga nasabing cards o dokumento, maaaring magpasa ng dalawang valid IDs gaya ng postal, senior citizen, voter’s ID, atbp.

Matapos nito, maaari ng magbayad ng kontribusyon kada buwan o kaya’y quarterly. Para makapagbayad ng iyong kontribusyon, kailangan munang makakuha ng Payment Reference Number (PRN) para sa iyong gagawing pagbabayad. Maaaring makapag-generate ng PRN gamit ang SSS Mobile App. Kinakailangan mong mag-log in sa nasabing mobile app gamit ang iyong existing na My.SSS username at password.

Sunod, i-tap ang “Generate PRN/SOA” icon na iyong makikita sa iyong mobile screen.

Matapos nito, i-tap mo ang “Create” at punuan mo ang hinihinging impormasyon tulad ng buwan, halaga ng babayarang kontribusyon at type ng membership. Kapag naibigay na ang lahat ng kailangang impormasyon, i-tap ang “SUBMIT” at lalabas ang iyong PRN/SOA. Maaari itong i-download bilang PDF o di kaya’y magtuloy na sa pagbabayad.

Maaari ring magbayad ng iyong kontribusyon gamit ang My.SSS at SSS Mobile App maging sa alinmang sangay ng SSS, bangko at Bayad Centers. Samantala, makikita ang kumpletong listahan ng SSS payment partners sa official Facebook page nito sa Philippine Social Security System.

***

Nais nating ipaalam sa mga miyembro na noong Nobyembre 15, 2021 ay binuksan na ang aplikasyon para sa Short-Term Member Loan Penalty Condonation Program o ang Pandemic Relief and Restructuring Program 5. Sa ilalim nito, hindi na kailangang bayaran ng miyembro ang mga naipong multa o penalties sa hindi niya nabayarang utang sa SSS gaya ng salary loan, Calamity loan, Salary Loan Early Renewal Program (SLERP), Emergency loan at restructured loans sa ilalim ng Loan Restructuring Program (LRP) na ipinatupad noong 2016 hanggang 2019.

Maaaring mag-apply ang interesadong miyembro hanggang Pebrero 14, 2022 at mag-file ng application gamit ang kanilang My.SSS account.

Bukod dito, binuksan din ng SSS ang Housing Loan Restructuring and Penalty Condonation Program o ang Pandemic Relief and Restructuring Program 4 noong Nobyembre 22, 2021. Sa ilalim nito, hindi na kailangang bayaran ng miyembro o mga tagapagmana nito ang mga naipong multa o penalties sa hindi nabayarang housing loan. Maaari silang mag-file ng aplikasyon sa SSS Housing and Acquired Asset Management Department na nasa SSS Main Office sa Quezon City at sa Housing and Acquired Asset Management Section ng piling sangay ng SSS sa labas ng Metro Manila.

Tatagal ang pagtanggap ng aplikasyon hanggang Pebrero 21, 2022.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Good news sa mga miyembro na may utang sa SSS!

@Buti na lang may SSS | January 23, 2022

Dear SSS,

Mayroon akong SSS salary loan sa previous employer ko at hindi ko ito naipakaltas sa kasalukuyang employer ko. Dahil dito, hindi ko nabayaran ang aking loan mula noong 2018. Kaya nag-aalala ako na baka malaki na ang penalty nito. Mayroon bang condonation program ang SSS ngayon? – Sandra

Sagot

Mabuting araw sa iyo, Sandra!

Para sa iyong kaalaman, naglunsad ang SSS ng mga programa sa ilalim ng Pandemic Relief and Restructuring Programs (PRRP) upang matulungan ang mga miyembro at employer na may pagkakautang sa SSS na higit na naapektuhan ng pandemya.

Isa nga rito ang Short-Term Member Loan Penalty Condonation Program o PRRP 5. Sa ilalim ng nasabing programa, hindi na kailangang bayaran ang mga naipong multa o penalties sa hindi nabayarang utang sa SSS tulad ng salary loan. Maliban sa salary loan, saklaw din nito ang Calamity loan, Salary Loan Early Renewal Program (SLERP), Emergency loan at restructured loans sa ilalim ng Loan Restructuring Program (LRP) na ipinatupad noong 2016 hanggang 2019.

Ang babayaran na lamang ay ang prinsipal at interest, kung saan maaaring bayaran ito ng buo o one-time full payment o kaya’y bayaran ang 50% nito bilang down payment at ang natitirang balanse sa pamamagitan ng installment sa loob ng anim na buwan.

Kinakailangan lamang na matugunan ang mga sumusunod na kondisyon:

· hindi nabayaran ang short-term member loan sa loob ng anim na buwan bago ang implementasyon ng programa;

· hindi pa nabibigyan ng final benefit claim, tulad ng permanent total disability o retirement benefit; at

· hindi na-disqualify dahil sa panloloko o fraud laban sa SSS;

Kuwalipikado rin sa nasabing programa maging ang mga tagapagmana o benepisaryo ng namatay na miyembrong nag-file ng aplikasyon para sa final benefit claim tulad ng death, permanent total disability o retirement, kung saan ang kanilang contingency date ay nakapaloob sa panahon ng application period para sa naturang condonation program.

Dagdag pa rito, ang mga miyembrong magbabayad sa ilalim ng installment basis ay kinakailangang hindi lalagpas sa 65 taong gulang sa pagtatapos ng kanilang installment term.

Nais nating ipaalala na hanggang Pebrero 14, 2022 na lamang tatanggap ng aplikasyon sa nasabing programa. Hindi na kailangang magtungo sa sangay ng SSS sa pag-file nito sapagkat maaari na itong gawing online gamit ang iyong account sa My.SSS. Kaya dapat tiyaking may account na nakarehistro sa My.SSS.

Upang makapagrehistro sa My.SSS, maaaring magtungo sa SSS website (www.sss.gov.ph) at i-click ang “MEMBER.” Dadalhin ka nito sa member login portal at i-click ang “Not yet registered in My.SSS?” upang masimulan ang pagrerehistro rito.

Kailangang punan ang lahat ng kinakailangang impormasyon. Tandaan, ang irerehistrong e-mail address ay aktibo at nagagamit pa dahil dito ipadadala ng SSS ang link para i-activate at magamit ang My.SSS account ng miyembro.

***

Nais nating ipaalam sa ating mga miyembro na binuksan din ng SSS ang Housing Loan Restructuring and Penalty Condonation Program o ang Pandemic Relief and Restructuring Program 4 noong Nobyembre 22, 2021. Sa ilalim nito, hindi na kailangang bayaran ng miyembro o mga tagapagmana nito ang mga naipong multa o penalties sa hindi nabayarang housing loan.

Maaari silang mag-file ng aplikasyon sa SSS Housing and Acquired Asset Management Department na nasa SSS Main Office sa Quezon City at sa Housing and Acquired Asset Management Section ng piling sangay ng SSS sa labas ng Metro Manila. Tatagal naman ang pagtanggap ng aplikasyon hanggang Pebrero 21, 2022.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

SSS Unemployment Benefit (UB) Program

@Buti na lang may SSS | January 17, 2022

Dear SSS,

Dahil sa kasalukuyang pandemya ay maraming manggagawa ang lubhang naapektuhan nito. Kaya nais kong itanong kung mayroon bang benepisyong maibibigay ang SSS sa mga manggagawang nawalan ng trabaho? — Marah

Sagot

Malugod naming ibinabalita sa iyo na mayroong benepisyo ang SSS na ipinagkakaloob sa mga manggagawang inboluntaryong nawalan ng trabaho. Simula Marso 5, 2019 noong ipinatupad ang Republic Act 11199 o Social Security Act of 2018, maaaring mag-claim ng unemployment benefit ang mga miyembro ng SSS na katumbas ng 50% ng kanilang monthly salary sa loob ng dalawang buwan. Katulad ng ibang mga benepisyo, ito ay cash allowance na ibinabayad ng SSS upang masuportahan ang kanilang sarili para muli silang makahanap ng panibagong trabaho. Maaari kang makatanggap ng hanggang P20,000 na maximum benefit, na magagamit habang wala pang bagong trabaho.

Upang mag-qualify, kinakailangang hindi lalagpas sa 60-taong gulang sa panahon ng iyong aplikasyon. Kung underground o surface mineworker, hindi dapat higit sa 50-taong gulang at 55-taong gulang naman kung racehorse jockey. Dapat nakapaghulog din ng hindi bababa sa 36-buwang kontribusyon kung saan ang 12-kontribusyon ay naibayad sa loob ng 18-buwan bago ang buwan na nawalan ng trabaho ang isang miyembro.

Bukod dito, maaari lamang bigyan ng unemployment benefit ang mga empleyadong inboluntaryong natanggal sa trabaho kung legal ang kanilang pagkakatanggal na naaayon sa Labor Code of the Philippines, tulad ng paglalagay ng labor-saving devices ng kumpanya, redundancy, retrenchment, pagsasara o pagtigil ng kanilang operasyon o negosyo, at pagkakaroon ng sakit o karamdamang hindi na pinahihintulutan ng batas na makapagtrabaho pa. Kasama rito ang pagkakatanggal sa trabaho bunsod ng pagbagsak ng ekonomiya, pagtama ng kalamidad at mga kahalintulad na dahilan na maaaring tukuyin ng SSS at Department of Labor and Employment (DOLE).

Maaaring mag-apply ng unemployment benefit sa pamamagitan ng My.SSS na nasa SSS website. Mag-log in sa iyong My.SSS account at magtungo sa E-SERVICES upang i-click ang “apply for the unemployment benefit claim.” Pagkatapos mapunan ang lahat ng kinakailangang impormasyon, at magpapadala ng abiso o notification ang SSS sa iyong registered e-mail address. Mag-reply sa nasabing e-mail at i-attach dito ang scanned copies ng sertipikasyon na magpapatunay ng dahilan at araw ng pagkatanggal sa trabaho mula sa Department of Labor and Employment (DOLE) sa pamamagitan ng Philippine Overseas Labor Offices (POLO) o regional offices nito, kung OFW naman ang miyembro. Isasama rin ang Notice of Termination mula sa Employer o Affidavit of Termination of Employment, kung alinman ang available.

Matapos nito, magpapadala ulit ng e-mail message ang SSS upang kumpirmahin na successful ang iyong aplikasyon.

Paalala namin sa iyo na maaari lamang i-file ang iyong aplikasyon sa loob ng isang taon mula sa araw ng pagkatanggal mo sa trabaho.

Maraming miyembro na ang natulungan ng unemployment benefit mula sa SSS. Sa katunayan noong 2020, mahigit sa P1.71 bilyon unemployment benefit ang nabigyan ng SSS sa sa mahigit 135,000 kwalipikadong miyembro. Ang nasabing halaga ay siyam na beses na mas mataas sa naibigay na unemployment benefit noong 2019.

***

Nais naming ipaalam sa mga retiree pensioners na bukas pa rin ang Pension Loan Program (PLP) ng SSS para sa kanilang panandaliang pangangailangang pampinansiyal.

Simula Setyembre 15, 2020, maaaring magsumite ng aplikasyon online sa pamamagitan ng My.SSS na matatagpuan sa SSS website (www.sss.gov.ph). Kinakailangan lamang na mag-log in ang isang retiree-pensioner sa kanyang My.SSS account at piliin ang E-services sa tab nito ati-click ang “Apply for Pension Loan.” Punan ang lahat ng hinihinging impormasyon at isumite ang aplikasyon. Makakahiram kayo ng hanggang P200,000 bilang maximum loanable amount na maaaring bayaran ng hanggang 24-months o dalawang taon.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.