SSS Sickness Benefit Reimbursement Application (SBRA), online na rin

@Buti na lang may SSS | February 12, 2022

Dear SSS,

Ako ay employer sa Taguig. Nabalitaan ko na may bagong patakaran ang SSS sa pagbabayad ng sickness benefit reimbursement para sa mga employer. Totoo ba ito at ano ang mga kailangan kong gawin? - Marife

Sagot

Mabuting araw sa iyo, Marife!

Para sa kaalaman ng lahat, ang SSS Sickness Benefit o benepisyo sa pagkakasakit ay cash allowance na ibinabayad sa miyembro para sa bawat araw na hindi siya nakapagtrabaho dahil sa sakit o pagkapinsala ng katawan. Sa ilalim ng Republic Act 11199 o Social Security Act of 2018, ang benepisyong ito ay pinapaunang bayaran ng employer batay sa bilang ng araw at halaga ng aprubadong sickness benefit ng kanyang empleyado. Samantala, ang employer naman ang babayaran ng SSS matapos maisumite nito ang SSS Sickness Benefit Reimbursement Application (SBRA) Form.

Dati, kinakailangang magpunta ang employer o awtorisadong kinatawan nito sa pinakamalapit na sangay ng SSS upang isumite ang SBRA nito. Sa kasalukuyang krisis pangkalusugan na ating kinahaharap, sinikap ng SSS na gawing simple, maayos at mabilis ang pagpa-file ng SBRA. Simula noong Hulyo 2020, ay ipinatupad ng SSS ang online filing ng SBRA sa pamamagitan ng My.SSS web portal na matatagpuan sa website (www.sss.gov.ph).

Sa pamamagitan ng My.SSS, maaari ng mag-file ang mga employer ng a kanilang sickness benefit reimbursement claims kahit sila ay nasa bahay o opisina lamang.

Makatutulong din ito upang maingatan ang mga employer at miyembro sa lumalaganap na pandemya ng COVID-19.

Para magamit ang online facility, dapat rehistrado sa My.SSS account. Kung wala pa, magtungo sa SSS website at i-click ang “EMPLOYER”. Matapos nito, may makikitang “Not yet registered in My.SSS?” I-click mo ang “Regular Employer” o ang “Household Employer” kung alinman ang kategorya mo, Sonny bilang employer.

Kinakailangan ding enrolled ang iyong bank account sa Disbursement Account Enrollment Module (DAEM) at mayroon kang aprubado na sickness notification ng iyong empleyado na nag-claim ng sickness benefit. Dagdag pa rito, dapat mayroon kang sertipikasyon na pinanghahawakan bilang patunay na paunang nabayaran mo ang sickness benefit ng iyong empleyado.

Upang isumite ang iyong SBRA, mag-log in sa iyong My.SSS account. Sunod, magtungo ka sa E-Services tab at i-click ang "Submit SS Sickness Benefit Reimbursement Application (SBRA)." Dapat ipasok ang SS number ng iyong empleyado na nag-claim ng sickness benefit. Matapos nito, lilitaw ang listahan ng aprubadong SSS sickness notifications. Piliin dito ang tamang claim reference number at i-click ang proceed.

Lilitaw din ang isang form tungkol sa karagdagang impormasyon na dapat mong punuan. Sunod, markahan mo ang certification checkbox upang sertipikahan na tama ang inilagay mong impormasyon maging ang halaga ng benepisyo, at i-click mo ang submit at sunod ang OK.

Kapag naisumite mo na, may makikita kang mensahe na submitted successfully ang iyong aplikasyon. Makikita mo rin ang detalye ng iyong transaksiyon at magpapadala naman ng notipikasyon ang SSS sa rehistrado mong e-mail address.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

SSS Calamity Assistance Package (CAP) para sa mga nasalanta ng bagyong Odette

@Buti na lang may SSS | February 06, 2022

Dear SSS,

Nais ko sanang malaman ang mga kondisyon tungkol sa calamity loan para sa mga naapektuhan ng Bagyong Odette. Paano ba mag-apply dito? - Tessie ng Liloan, Southern Leyte

Sagot

Mabuting araw sa iyo, Tessie!

Maaasahan ng ating mga miyembro ang tulong mula sa SSS sa panahon ng mga kalamidad tulad ng mga biktima ng Bagyong Odette. Simula noong Enero 14, 2022 ay binuksan na ng SSS ang Calamity Assistance Package (CAP) upang mabigyan ng tulong-pinansiyal ang mga miyembro at pensiyunado na lubhang naapektuhan ng Bagyong Odette sa MIMAROPA, Western Visayas, Central Visayas, Eastern Visayas, Northern Mindanao, at CARAGA at sa iba pang lugar na maaaring ideklara ng National Disaster Risk Reduction and Management Council (NDRRMC) na nasa ilalim ng state of calamity dulot ng nasabing bagyo.

May tatlong kategorya sa ilalim ng programang ito na binubuo ng Calamity Loan, Direct House Repair and Improvement Loan para sa mga miyembro at ang Three-month advance pension para sa lahat ng mga SSS at EC pensioners.

Talakayin muna natin ang hinggil sa calamity loan. Kinakailangan lamang na matugunan mo, Tessie, ang sumusunod na kondisyon:

• ikaw ay nakapaghulog ng hindi bababa sa 36-buwanang kontribusyon, kung saan ang anim na hulog ay naibayad sa huling 12-buwan bago ang buwan ng pagpa-file ng aplikasyon;

• naninirahan ka sa lugar na kabilang sa idineklara ng NDRRMC na nasa ilalim ng state of calamity;

• mayroong account sa My.SSS;

• hindi pa nabibigyan ng final benefit tulad ng permanent total disability o retirement benefit;

• walang outstanding na utang sa ilalim ng Loan Restructuring Program (LRP) o sa mga naunang CLAP; at

• nakarehistro ang UMID-ATM card o bank account na nasa bangkong kabilang sa Philippine Electronic Fund Transfer System and Operations Network (PESONet) o Union Bank of the Philippines (UBP) Quick Card sa Disbursement Account Enrollment Module (DAEM) na matatagpuan sa My.SSS.

Ang filing ng aplikasyon sa CLAP ay online gamit ang iyong My.SSS account. Kung ikaw naman ay empleyado ng kompanya, dapat isertipika ng iyong employer ang iyong CLAP application gamit din ang My.SSS. Ang pagtanggap ng aplikasyon para rito ay hanggang Abril 13, 2022. Kasabay din nito ang deadline para sa Three-month advance pension sa mga pensiyunado ng SSS maliban sa Direct House Repair and Improvement Loan na tatagal naman ng isang taon.

Makahihiram ka, Tessie, ng katumbas ng average ng iyong monthly salary credit (MSC) sa huling 12-buwan na hindi hihigit sa P20,000 o ang halaga na nilagay sa iyong aplikasyon, kung alinman ang mas mababa rito. Ang monthly salary credit naman ay ang batayan ng kabuuang kinikita ng miyembro sa loob ng isang buwan.

Ang nasabing pautang ay maaaring bayaran ng installment sa loob ng 24 buwan. Ang amortisasyon ay magsisimula sa ikalawang buwan mula sa petsa na naaprubahan ang iyong calamity loan. Ito rin ay may interest na 10% kada taon hanggang sa ito ay mabayaran, na kinukuwenta sa lumiliit na balanse ng loan sa loob ng 24-buwan. Ang 1% na service fee ay hindi na ibabawas sa loan maliban sa interest na prorated mula sa petsa ng pag-apruba ng utang hanggang sa katapusan ng buwan bago ang unang amortisasyon.

***

Nais nating ipaalala sa mga miyembro na hanggang Pebrero 14, 2022 na lamang maaaring mag-file ng aplikasyon para sa Short-Term Member Loan Penalty Condonation Program o ang Pandemic Relief and Restructuring Program 5. Sa ilalim nito, hindi na kailangang bayaran ng miyembro ang mga naipong multa o penalties sa hindi niya nabayarang utang sa SSS, tulad ng salary loan, Calamity loan, Salary Loan Early Renewal Program (SLERP), Emergency loan at restructured loans sa ilalim ng Loan Restructuring Program (LRP) na ipinatupad noong 2016 hanggang 2019. Maaaring mag-apply ang interesadong miyembro gamit ang kanilang My.SSS account.

Bukod dito, hanggang Pebrero 21, 2022 na din lamang tatanggap ng aplikasyon ang SSS para sa SSS ang Housing Loan Restructuring and Penalty Condonation Program o ang Pandemic Relief and Restructuring Program 4. Sa ilalim nito, hindi na kailangang bayaran ng miyembro o mga tagapagmana nito ang mga naipong multa o penalties sa hindi nabayarang housing loan. Maaari mag-file ng aplikasyon ang mga interesadong miyembro sa SSS Housing and Acquired Asset Management Department na nasa SSS Main Office sa Quezon City at sa Housing and Acquired Asset Management Section ng piling sangay ng SSS sa labas ng Metro Manila.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Kaalaman tungkol sa Real-Time Processing Of Loans (RTPL) Program ng SSS

@Buti na lang may SSS | February 03, 2022

Dear SSS,

Nabalitaan ko na magkakaroon ng pagbabago sa pagbabayad ng loan sa SSS. Ano ba ang tinatawag na Real-Time Processing of Loans (RTPL) Program ng SSS? - Susan

Sagot

Mabuting araw sa iyo, Susan!

Mula Hulyo 1, 2021 ay mandatory na ang implementasyon ng Real-Time Processing of Loans (RTPL) Program. Para sa iyong kaalaman, kinakailangang kumuha na ikaw ng payment reference number o PRN tuwing magbabayad ng iyong monthly loan amortization para sa loan payments sa SSS. Halimbawa, noong Hulyo ang inyong payment billing para sa Hunyo ay kailangan na ng Payment Reference Number (PRN) kung saan kailangan itong ipakita tuwing kayo ay magbabayad ng iyong loan sa alinmang sangay ng SSS na may Automated Tellering System (ATS) o kaya’y sa alinmang collecting partners ng SSS na compliant sa RTPL.

Samantala, magkaiba ang PRN para sa loan payment at ang PRN na ginagamit sa pagbabayad ng iyong SSS contributions. Kung ikaw ay pupunta sa SSS branch upang magbayad ng iyong salary loan at contributions sa SSS, dapat ay dalawang PRN ang dala mo.

Sakop ng nasabing programang ito ang mga short-term loans tulad ng salary, calamity emergency at restructured loans gaya ng Loan Restructuring Program. Ngunit, hindi kasama ang pagbabayad sa Educational Assistance Loan Program. Maaari itong bayaran gamit ang payment form sa pagbabayad ng EALP.

Ang mga non-PRN loan payments naman ay hindi na tatanggapin matapos ang Hunyo 30, 2021 kabilang ang mga loan payments na isinagawa sa pamamagitan ng Electronic Data Interchange (EDINet) facility para sa mga employers.

Ipinatupad ang RTPL para sa kapakinabangan ng mga nagbabayad na miyembro. Una, mapadadali nito ang agarang pagpo-post ng inyong loan payment sa inyong rekord sa SSS.

Ikalawa, matitiyak na tama ang pagpo-post ng inyong bayad sa inyong loan account.

Ikatlo, maiiwasang i-post sa maling account ang bayad mo. Ang PRN ay natatanging set ng numero na nakaugnay lamang sa inyong loan payment para sa partikular na payment period. Bunga nito, maiiwasan na ang problema sa non-posting sapagkat ang PRN na ibinigay sa inyo ay uniquely generated para sa iyong loan payments.

Tuwing unang araw hanggang anim na araw kada buwan, ang SSS ay nag-generate ng loan billing statements at notices na may PRNs at ito ay ipinadadala sa registered email addresses at mobile numbers ng mga miyembro at employers, kaya hinihikayat sila na may rehistrado at sariling account sa My.SSS na matatagpuan sa SSS website www.sss.gov.ph.

Mula noong Nobyembre 2020, nagpapadala na ang SSS ng loan billing notices sa mga miyembrong nangutang gayundin sa mga employer nila. Nakapaloob sa nasabing billing notice ang PRN na ipapakita sa sangay ng SSS o RTPL-compliant collecting partner.

Ipinadadala naman sa mga employer ang loan billing notice ng miyembro na kasalukuyang employed. Sa pamamagitan ng e-mail o SMS text message sa mga individual paying members tulad ng self-employed, voluntary at overseas Filipino workers. Kaya mahalagang updated ang inyong contact details gaya ng email address at mobile number sa inyong My.SSS.

Kabilang sa collecting partner na RTPL-compliant ay ang Security Bank at Union Bank of the Philippines. Tatangggap ang mga bangkong ito ng loan repayment na may PRN mula sa miyembro at employer. Maaari ring magbayad ng PRN loan payment ang individual paying members sa mga sangay ng Philippine National Bank na nasa ibang bansa.

Para naman sa mga employer, maaaring magbayad ng loan payment ng kanilang mga empleyado gamit ang BancNet’s eGov facility sa pamamagitan ng Asia United Bank, Bank of Commerce, China Bank Corporation, CTBC Bank, Metropolitan Bank, and Trust Company, MUFG Bank, Philippine Bank of Communications, Philippine National Bank, Rizal Commercial Banking Corporation, Robinsons Bank, Standard Chartered Bank, at United Coconut Planters Bank.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.