Kahalagahan ng paghuhulog ng kontribusyon sa SSS

@Buti na lang may SSS | March 27, 2022

Dear SSS,

Magandang araw, SSS! Ako ay isang office clerk dito sa Ortigas. Nais kong itanong kung bakit kailangang maghulog ng kontribusyon sa SSS ang isang empleyado? Salamat po.

— Mia

SAGOT:

Mabuting araw sa iyo, Mia!

Marami tayong miyembro na may ganyang katanungan subalit para sa iyong kaalaman, Mia, ang paghuhulog ng kontribusyon sa SSS ay alinsunod sa Republic Act 11199 o Social Security Act of 2018 kung saan obligado ang isang pribadong employer na i-remit ang kontribusyon ng kanyang mga manggagawa ayon sa nakatakdang araw ng buwanang pagbabayad nito.

Napakahalaga na maghulog ng kontribusyon sa SSS dahil ito ay paraan na rin ng pag-iimpok upang mapaghandaan ang panahon ng iyong pagreretiro.

Bukod sa buwanang pensyon na iyong tatanggapin sa oras ng iyong pagreretiro, maaasahan mo rin ang SSS sa anumang oras ng iyong pangangailangan sa sandaling ikaw ay magkaroon ng pagkakasakit, panganganak, pagkabalda, pagkawala ng trabaho, pagreretiro, pagkamatay at pagpapalibing. Kinakailangan lamang na nakatugon ka sa mga kwalipikasyon sa bawat benepisyong ito.

Bukod sa mga nabanggit na benepisyo, nagkakaloob din ang SSS ng iba’t ibang pautang sa mga miyembro at pensyonado tulad ng Salary Loan at Pension Loan Program.

Nagbibigay din ang SSS ng iba pang tulong pinansyal sa mga miyembro at pensyonado nito na naapektuhan ng mga kalamidad tulad ng Calamity Loan Assistance Program, Direct House Repair and/or Improvement Loan, at three-month advance pension. Kinakailangan lamang din na nakatugon ka sa mga kondisyon sa ilalim ng alinmang pautang mula sa SSS.

May kasabihan tayo na “once a member, always a member” dahil panghabambuhay ang pagiging miyembro sa SSS. Kahit nga nakapagbayad lamang ng isang hulog ang isang miyembro at hindi na ito naipagpatuloy ay mananatili pa rin siyang miyembro ng SSS. Ngunit mas makakabuti kung habang may pinagkakakitaan ang ating mga miyembro ay tuluy-tuloy pa rin ang paghuhulog sa SSS para anumang oras niya kailanganing mag-apply ng mga benepisyo ay maaari siyang makakuha at makinabang dito.

Sa kasalukuyan, ang contribution rate ay 13% kung saan naghahati ang employer at manggagawa sa hulog sa SSS. Ang share ng employer ay 8.5% at 4.5% naman ang sa empleyado. Ang isang miyembro ng SSS ay naghuhulog mula sa minimum na kontribusyon na P390 hanggang P3,250 na buwanang kontribusyon. Samantala, Mia ang halaga ng bawat hulog ay nakadepende sa iyong kinikita kada buwan.

Halimbawa, ikaw ay isang empleyado na sumasahod ng P10,000 kada buwan. Ang total SSS contributions mo kada buwan ay P1,300. Ang P850 nito ay ang share ng iyong employer at ang P450 naman ay employee share.

Kaugnay nito, ang Employee’s Compensation (EC) contributions naman ay buong binabayaran ng employer para sa kanyang empleyado na may kaugnayan sa mga work-related accidents. Ito ay mula P10 hanggang P30 kada buwan na naaayon sa monthly salary credit (MSC) ng miyembro.

◘◘◘

Nais naming ipaalala sa mga survivor (death), total disability, dependent’s pensioners at retirement pensioners residing abroad o naninirahan sa ibang bansa na hanggang Marso 31, 2022 na lamang ang pag-comply nila sa Annual Confirmation of Pensioners’ Program (ACOP) para sa taong 2021. Maaari silang makapag-comply sa ACOP sa pamamagitan ng pagpapadala ng mga kinakailangang dokumento sa corporate e-mail address ng pinakamalapit na SSS branch, o kaya’y ipadala ito gamit ang koreo sa pinakamalapit na SSS branch o foreign representative office. Maaaring mag-request ng video conferencing gamit ang Microsoft Teams ang mga pensioners na naninirahan sa ibang bansa at home visit naman para sa mga total disability pensioners.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Mga paraan para makapag-comply ang pensyonadong nasa ibang bansa sa ACOP

@Buti na lang may SSS | March 20, 2022

Dear SSS,

Magandang araw po. Ang mother-in-law ko ay isang SSS pensioner. Sa kasalukuyan, siya ay naninirahan sa Canada. Nais sana niyang malaman kung paano siya makakapag-comply sa ACOP. Kailangan pa bang umuwi siya rito sa Pilipinas? Salamat po. —Sonia

SAGOT:

Mabuting araw sa iyo, Sonia!

Simula noong Oktubre 2021, muling ibinalik ang Annual Confirmation of Pensioners (ACOP) Program o ang taunang pagre-report ng mga pensyonado sa SSS. Layunin nito na masiguro na ang tamang benepisyaryo pa rin ang tumatanggap ng pensyon sa SSS at para maprotektahan na rin ang pondo nito kung saan mayroong mga pagkakataon na nagbago na ang estado ng isang surviving spouse na kinakailangang malaman ng SSS, tulad halimbawa ng kanilang pag-aasawa at iba pang mga kadahilanan.

Ang mga sumusunod na uri ng pensyonado ang mga kinakailangang tumugon hanggang Marso 31, 2022 upang hindi maputol ang pagtanggap nila ng kanilang buwanang pensyon:

• retirement pensioners na naninirahan sa ibang bansa;

• total disability pensioners;

• survivor pensioners (death); at

• dependent (minor/incapacitated) pensioners sa ilalim ng guardianship.

Nais naman nating banggitin na ang mga retiradong pensyonado ng SSS na naninirahan dito sa Pilipinas ay exempted mula sa ACOP simula noong Oktubre 2017 kaya hindi na nila kailangang mag-report sa SSS para dito.

Samantala, Sonia, para sa mga pensyonado na naninirahan sa ibang bansa, tulad ng iyong mother-in-law, may tatlong pamamaraan upang isagawa ang ACOP.

Option 1: Sa pamamagitan ng video conference (Microsoft Teams). Mag-send siya ng appointment request sa ofw.relations@sss.gov.ph. Hintayin ang e-mail confirmation mula sa SSS na naglalaman ng transaction reference number (TRN) at ng link sa Microsoft Teams. Sa scheduled video conferencing, dapat mayroon siyang maipakitang isang (1) primary ID card o dalawang (2) secondary ID cards gaya ng Senior Citizens Card, Voter’s at Postal ID, atbp.

Option 2: Maaaring ipadala ang mga required na dokumento sa e-mail address ng pinakamalapit na SSS foreign office. Sa Canada, matatagpuan ang mga opisinang ito sa Philippine Overseas Labor Office sa Vancouver, Philippine Consulate General sa Calgary, at sa Philippine Consulate General naman sa Toronto.

Option 3: Maaari ding ipadala ang mga required na dokumento sa pamamagitan ng koreo sa SSS OFW-Contact Services Section, SSS Bldg., East Avenue, Diliman, Quezon City 1100.

Para sa Option 2 at 3, dapat ihanda ng mother-in-law mo, Sonia ang sumusunod na mga dokumento:

• duly-accomplished ACOP Form;

• isang primary o dalawang secondary ID cards;

• half-body photo ng pensyonado na may hawak na kasalukuyang dyaryo o kaya’y nasa background niya ang TV news crawler o ticker kung saan makikita nang malinaw ang news headline at kasalukuyang petsa.

Maaari mong i-download ang SSS ACOP form sa link na ito https://bit.ly/3mC8TkE.

Nais naming ipaalala na kung hindi makakapag-comply sa ACOP ang iyong mother-in-law hanggang Marso 31, 2022, maaaring maputol ang pagtanggap niya ng buwanang pensyon simula sa buwan ng Mayo 2022.

Pagsapit ng Abril 1, 2022, susundin na muli ang dating schedule ng ACOP para sa taong 2022 at sa mga susunod na taon. Paalala rin sa mga pensyonado na naninirahan sa ibang bansa, ang kanilang pag-comply sa ACOP ay kailangang gawin tuwing birth month nila o tatlong buwan bago sumapit ito.

Dagdag dito, ang kasalukuyang ACOP Compliance ay para sa taong 2021 lamang. Kinakailangang muling mag-report ang mga pensyonadong nabanggit para sa taong 2022 gamit ang bagong sistema para sa kanilang kaginhawahan at proteksyon at hindi na kailangan pang magtungo sa mga branches ng SSS.

◘◘◘

Mabuting balita! Bukas ang lahat ng sangay ng SSS sa National Capital Region mula 6:00 a.m. hanggang 6:00 p.m. tuwing Lunes hanggang Biyernes. Samantala, bukas din tuwing Sabado ang mga SSS branch sa Diliman, Cubao, San Francisco Del Monte, Batasan Hills, New Panaderos, Makati-JP Rizal, Pasig-Pioneer, Parañaque, Taguig, Las Piñas, Alabang-Muntinlupa, Binondo, and Manila mula 8:00 a.m. hanggang 5:00 p.m.

◘◘◘

Nais naming ipaalam sa ating mga miyembro na pinalawig ang application period ng Short-Term Member Loan Penalty Condonation Program o ang Pandemic Relief and Restructuring Program 5 hanggang May 14, 2022. Sa ilalim nito, hindi na kailangang bayaran ng miyembro ang mga naipong multa o penalties sa hindi niya nabayarang utang sa SSS gaya ng salary loan, Calamity loan, Salary Loan Early Renewal Program (SLERP), Emergency loan at restructured loans sa ilalim ng Loan Restructuring Program (LRP) na ipinatupad noong 2016 hanggang 2019.

Bukod dito, pinalawig din ang application period para sa Housing Loan Restructuring and Penalty Condonation Program o ang Pandemic Relief and Restructuring Program 4.

Tatanggap ang SSS ng aplikasyon para dito hanggang Mayo 21, 2022. Sa ilalim nito, hindi na kailangang bayaran ng miyembro o mga tagapagmana nito ang mga naipong multa o penalties sa hindi nabayarang housing loan. Maaari silang mag-file ng aplikasyon sa SSS Housing and Acquired Asset Management Department na nasa SSS Main Office sa Quezon City at sa Housing and Acquired Asset Management Section ng piling sangay ng SSS sa labas ng Metro Manila.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

SSS maternity benefit, puwedeng i-file online

@Buti na lang may SSS | March 13, 2022

Dear SSS,

Magandang araw, SSS! Ako ay isang freelancer at kasalukuyang naghuhulog bilang self-employed member. Sa ngayon, ako ay nagdadalang-tao kaya nais kong malaman kung maaari na akong mag-file ng maternity benefit application sa pamamagitan ng online. Salamat po. —Angelie

SAGOT:

Mabuting araw sa 'yo, Angelie!

Simula noong Mayo 31, 2021, maaari nang mag-file ng maternity benefit application online ang mga kababaihang miyembro ng SSS na katulad mong self-employed, maging ang mga employed, voluntary, overseas Filipino worker (OFW) at non-working spouse (NWS). Dahil dito, hindi mo na kinakailangang magpunta sa alinmang sangay ng aming mga tanggapan upang makapag-file ng iyong claim.

Bahagi ito ng pinaigting na digitalization efforts ng SSS upang gawing online ang iba’t ibang transakyon ng mga miyembro, employer, pensyonado at claimant sa SSS sa ilalim ng brand campaign nitong ExpreSSS – mas pinadali, mas pinabilis at mas pinasimpleng mga transaksyon sa SSS. Isa nga rito ang pagpa-file ng maternity benefit application gamit ang iyong account sa My.SSS na nasa SSS website (www.sss.gov.ph).

Kaya Angelie, dapat tiyakin mo na ikaw ay nakarehistro na sa My.SSS. Kung hindi pa, maaari kang magtungo sa aming website (www.sss.gov.ph) o di kaya’y i-click mo ang link na ito, https://bit.ly/3tKSo8v, upang masimulan ang iyong pagrerehistro dito. Punan mo ang lahat ng kinakailangang impormasyon. Nais naming ipaalala na ang dapat irehistro mong e-mail address ay aktibo at nagagamit mo pa dahil dito ipadadala ng SSS ang link para ma-activate at magamit mo na ang iyong account.

Mahalaga rin na i-enroll mo ang iyong bank account sa Disbursement Account Enrollment Module (DAEM) kung saan nais mong matanggap ang iyong benepisyo. Kailangan lamang na ang iyong account ay kabilang sa Philippine Electronic Fund Transfer System and Operations Network (PESONet) participating banks.

Upang makapag-enroll sa DAEM, mag-login sa iyong My.SSS account. I-click ang “E-SERVICES” at pagkatapos ay i-click mo ang Disbursement Account Enrollment Module. Sundin mo ang lahat ng procedures at punan mo ang lahat ng kailangang impormasyon. Matapos ito, i-attach mo ang malinaw na kopya ng napili mong dokumento na nagpapatunay na lehitimong sa 'yo ang iyong account. Magpapadala ang SSS ng magkahiwalay na mensahe sa iyong e-mail address na natanggap na ang iyong account enrollment at ang status o resulta ng iyong enrollment. Kapag mayroon ka nang My.SSS account, mag-login ka gamit ang iyong user ID at password.

Samantala, kung ikaw ay nakapag-enroll na sa DAEM, i-click mo ang “Member”. Mag-login ka gamit ang iyong user ID at password. Sunod, i-click mo ang “I’m not a robot” at i-click ang “Submit”. Makikita ang mga tab ng “HOME", “MEMBER INFO", “INQUIRY”, “E-SERVICES" at “PAYMENT REFERENCE NUMBER (PRN)”. Para mag-file ng maternity benefit application, i-click ang “E-SERVICES” tab at sunod mong i-click ang maternity benefit application.

Angelie, kailangan mong i-upload ang mga supporting documents hinggil sa iyong maternity benefit application tulad ng Maternity Notification Form na may tatak na natanggap ito ng SSS, pinunuang Maternity Reimbursement Form, UMID o 2 valid IDs.

Susuriin naman ng SSS ang mga dokumento na iyong isusumite. Samantala, maaari pa ring humingi ang SSS ng mga karagdagang dokumento, kung kinakailangan para dito.

Magpapadala naman ang SSS ng magkahiwalay na mensahe sa iyong e-mail address na natanggap na ang iyong aplikasyon at kung ito ay aprubado o kaya’y denied.

◘◘◘

Nais naming ipaalam sa ating mga miyembro na pinalawig ang application period ng Short-Term Member Loan Penalty Condonation Program o ang Pandemic Relief and Restructuring Program 5 hanggang May 14, 2022. Sa ilalim nito, hindi na kailangang bayaran ng miyembro ang mga naipong multa o penalties sa hindi niya nabayarang utang sa SSS gaya ng Salary loan, Calamity loan, Salary Loan Early Renewal Program (SLERP), Emergency loan at restructured loans sa ilalim ng Loan Restructuring Program (LRP) na ipinatupad noong 2016 hanggang 2019.

Bukod dito, pinalawig din ang application period para sa Housing Loan Restructuring and Penalty Condonation Program o ang Pandemic Relief and Restructuring Program 4. Tatanggap ang SSS ng aplikasyon para dito hanggang Mayo 21, 2022.

Sa ilalim nito, hindi na kailangang bayaran ng miyembro o mga tagapagmana nito ang mga naipong multa o penalties sa hindi nabayarang housing loan.

Maaari silang mag-file ng aplikasyon sa SSS Housing and Acquired Asset Management Department na nasa SSS Main Office sa Quezon City at sa Housing and Acquired Asset Management Section ng piling sangay ng SSS sa labas ng Metro Manila.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.