Mahalagang updated ang record ng miyembro sa SSS

@Buti na lang may SSS | June 23, 2022

Dear SSS,

Mahalaga ba na i-update ang record ko sa SSS? Bagong kasal ako at nais kong ilagay na beneficiary ang aking asawa. - Sanya

Sagot

Mabuting araw sa iyo, Sanya!

Sadyang napakahalagang updated at tama ang impormasyon ng iyong pangalan, petsa ng kapanganakan at iba pang detalye na nakatala sa iyong record sa SSS. Ang pagkakaroon ng hindi tugmang impormasyon sa personal record ay maaaring magdulot ng problema sa miyembro, lalo na kung mag-apply ng loan application at benefit claims. Maaari kasing maantala ang pagpoproseso ng iyong mga transaksyon sa SSS kung mayroong hindi tugma o discrepancies sa iyony record. Kaya patuloy ang aming paghikayat na i-update ng mga miyembro ang kanilang rekord sa SSS, lalo na sa pagpapalit ng pangalan, petsa ng kapanganakan, higit lalo ang pagdagdag ng mga bagong benepisaryo. Tulad sa iyong kaso, dapat mong i-update ang iyong civil status sa kadahilanang ikaw ay nag-asawa na.

Simple lamang ang pag-update ng rekord sa SSS. Maaari itong gawin gamit ang iyong My.SSS account at hindi na kailangan pang magsadya sa pinakamalapit na sangay ng SSS. Kinakailangan lamang na ikaw ay nakarehistro na at may sariling My.SSS account.

Upang makapagrehistro, maaaring magtungo sa SSS website at i-click ang “MEMBER.”

Dadalhin ka nito sa member login portal at i-click mo ang “Not yet registered in My.SSS?” upang masimulan ang iyong pagrerehistro rito. Punan ang lahat ng kinakailangang impormasyon. Tandaan, ang irerehistro mong e-mail address ay aktibo at nagagamit mo pa dahil dito ipadadala ng SSS ang link para mai-activate at magamit ang iyong account.

Kung ikaw ay mayroon ng My.SSS account, i-click mo ang “Member.” Mag-login ka gamit ang iyong user ID at password. Sunod, i-click ang “I’m not a robot” at i-click ang “Submit.” Makikita mo ang mga tab ng “HOME,” “MEMBER INFO,” “INQUIRY,” E-SERVICES,” at “PAYMENT REFERENCE NUMBER (PRN).” I-click mo ang “E-SERVICES” tab at hanapin mo ang “Request for Member Data Change (Simple Correction).” Piliin ang “CIVIL STATUS” upang mai-update ang iyong civil status mula Single ito ay magiging Married.

Gamit ito ay maaaring i-update ang iyong apelyido mula sa apelyido mo sa iyong pagkadalaga ay maaari na itong palitan iyong apelyido ng iyong napangasawa. Sunod, dapat i-upload ang supporting document bilang patunay ng pagbabago ng iyong civil status sa pag-upload ng iyong Marriage Certificate.

Sunod, i-click mo ang “This is to certify that all information and documents are true” at isumite ito sa pamamagitan ng pag-click sa “SUBMIT.” Kapag successful ang iyong transaction, lilitaw ang transaction number. Mahalaga na tandaan mo ito. I-check mo ang iyong email na nakarehistro sa SSS sapagkat dito ipapadala ang Notice of Approval o Rejection sa iyong request.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Deadline ng pag-comply sa ACOP ng mga pensiyunado sa ibang bansa

@Buti na lang may SSS | June 12, 2022

Dear SSS,

Magandang araw. Ang mother-in-law ko ay SSS pensioner. Sa kasalukuyan, siya ay naninirahan sa Tring, Hertfordshire, United Kingdom. Nais sana niyang malaman kung paano siya magkakapag-comply sa ACOP? Kailangan pa bang umuwi siya sa Pilipinas para gawin ito? - Alexa

Sagot

Mabuting araw sa iyo, Alexa!

Muling ibinalik ang Annual Confirmation of Pensioners (ACOP) Program o ang taunang pagre-report ng mga pensiyunado sa SSS noong Oktubre 2021. Layunin nitong masiguro na ang tamang benepisaryo ang tumatanggap ng pensiyon at maprotektahan din ang pondo ng SSS. Samantala, nais naming ipaalam sa iyo na pinalawig ng SSS ang deadline sa compliance sa ACOP hanggang Hunyo 30, 2022 para sa 2021.

Kinakailangang mag-comply ang mga sumusunod na uri ng pensiyunado upang hindi maputol ang pagtanggap ng kanilang buwanang pensyon:

• retirement pensioners na naninirahan sa ibang bansa;

• total disability pensioners;

• survivor pensioners; at

• dependent (minor/incapacitated) pensioners na nasa pangangalaga sa ilalim ng guardianship.

Noon, kailangang magpunta pa ng pensiyunado sa mga opisina ng SSS para sa kanyang ACOP. Subalit, sa pamamagitan ng pinaigting na digitalization effort ng SSS, mas pinadali, mas pinasimple at mas pinabilis ang pag-comply sa programang ito.

Nagpatupad ang SSS ng mas ligtas at mabilis na alternatibong pamamaraan upang makasunod dito na hindi na nangangailangan pa ng personal appearance sa SSS.

Alexa, para sa mga pensiyunado na naninirahan sa ibang bansa, tulad ng iyong mother-in-law, may tatlong paraan upang isagawa ang ACOP.

Option 1: Sa pamamagitan ng video conference (Microsoft Teams). Mag-send siya ng appointment request sa ofw.relations@sss.gov.ph. Hintayin ang e-mail confirmation mula sa SSS na naglalaman ng transaction reference number (TRN) at ng link sa Microsoft Teams. Sa scheduled video conferencing, dapat siyang mag-present ng isang (1) primary ID card o dalawang (2) secondary ID cards.

Option 2: Maaaring ipadala ang mga required na dokumento sa e-mail address ng pinakamalapit na SSS foreign office. Sa United Kingdom, ang aming foreign office ay matatagpuan sa No. 11 Embassy of the Philippines, Suffolk St., London, SW1Y 4HG at may e-mail address na london@sss.gov.ph.

Option 3: Maaari ring ipadala ang mga required na dokumento sa pamamagitan ng koreo sa SSS OFW-Contact Services Section, Social Security System Main Office, East Avenue, Diliman, Quezon City 1100.

Para sa Option 2 at 3, dapat ihanda ng mother-in-law mo ang sumusunod na mga dokumento:

• duly-accomplished ACOP Form;

• isang primary o dalawang secondary ID cards;

• half-body photo ng pensyonado na may hawak na kasalukuyang dyaryo o di kaya’y nasa background niya ang TV news crawler o ticker kung saan makikita ng malinaw ang news headline at kasalukuyang petsa.

Alexa, maaari mo ring i-download ang ACOP form sa link na ito https://bit.ly/3mC8TkE.

Nais naming ipaalala na kung hindi magkakapag-comply sa ACOP ang iyong mother-in-law hanggang Hunyo 30, 2022, maaaring maputol ang pagtanggap niya ng buwanang pensyon mula sa Setyembre 2022.

***

Para sa mga delinquent housing loan borrowers, mula Mayo 25, 2022 ay binuksan ng SSS ang Housing Loan Restructuring and Penalty Condonation Program. Sa ilalim nito, hindi na kailangang bayaran ng miyembro o tagapagmana nito ang mga naipong multa o penalties sa hindi nila nabayarang housing loan. Maaari silang mag-file ng aplikasyon sa SSS Housing and Acquired Asset Management Department na nasa 12/F, SSS Building, East Avenue, Diliman, Quezon City at sa Housing and Acquired Asset Management Section ng mga piling sangay ng SSS sa labas ng Metro Manila. Tatanggap ng aplikasyon para dito hanggang Hunyo 30, 2022.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Hanggang P200-K ang puwedeng utangin ng pensiyunado sa SSS

@Buti na lang may SSS | June 5, 2022

Dear SSS,

Magandang araw! Ako ay pensiyunado ng SSS. Kamakailan ay nabalitaan ko na mayroong pautang para sa aming mga pensiyunado. Paano ba mag-apply dito? Salamat. — Eileen

Sagot

Mabuting araw sa iyo, Eileen!

Totoong may pautang na ibinibigay ang SSS para sa mga retiradong pensiyunado nito at ito ang Pension Loan Program (PLP) na binuksan simula pa noong Setyembre 2018. Layunin ng programa ang makapagbigay ng tulong-pinansiyal sa pamamagitan ng pautang na may mas mababang interes. Batid naman natin sa panahong ito na nasa gitna tayo ng pandemya ay kailangan n’yo ng karagdagang financial assistance para sa inyong mga pangangailangang medikal, atbp.

Ang PLP ay nagsisilbing alternatibo sa mga private lending institutions, kung saan mas mababa ang interes at hindi nila kailangang gamiting kolateral ang kanilang ATM cards.

Upang makahiram sa ilalim ng PLP kinakailangang matugunan ninyo ang sumusunod na kondisyon:

• hindi dapat hihigit sa 85 taong gulang sa katapusan ng termino ng pautang;

• walang ibinabawas sa kanyang buwanang pensyon, tulad ng natitirang balanse sa ibang pautang ng SSS o kaya’y sobrang benepisyong binayaran ng SSS;

• walang utang sa ilalim ng SSS Calamity Assistance Package; at

• tumatanggap na ng regular na pensyon na hindi bababa sa isang buwan.

Halimbawa, nag-apply kayo ngayong Hunyo, ang simula ng inyong pagbabayad ay sa Agosto pa.

Sa kasalukuyan, maaari kayong makahiram ng katumbas ng tatlo hanggang 12 beses ng inyong tinatanggap na basic monthly pension (BMP) kasama ang P1,000 additional benefit na ibinigay noong 2017. Subalit, hindi ito hihigit sa P200,000 na siyang maximum loanable amount na ipinahihiram sa ilalim ng PLP. Dagdag pa rito, ang net take-home pension o matitira sa inyong buwanang pensyon ay hindi dapat bababa sa 47.25%.

Samantala, ang pension loan na katumbas ng tatlong beses ng inyong tinatanggap na buwanang pensyon ay babayaran ninyo sa loob ng anim na buwan; kung katumbas naman ng anim na beses ng inyong buwang pensyon, maaari ninyo itong bayaran sa loob ng 12-buwan. Kung ang nahiram ninyong pension loan ay katumbas ng siyam o 12 beses ng buwanang pensyon, maaari ninyo itong bayaran ng hanggang 24-buwan o sa loob ng dalawang taon.

Online na rin ang pag-file ng application sa PLP maging kayo man ay first-time borrower o magre-renew ng pension loan. Kinakailangan lamang na kayo ay nakarehistro sa My.SSS na matatagpuan sa SSS website, www.sss.gov.ph. Hinihingi rin namin ang inyong contact number o aktibong mobile number, kabilang ang inyong SSS UMID-ATM o kaya’y ang Union Bank Quick Cash Card para rito.

Mag-log in kayo sa inyong My.SSS account at magtungo sa E-Services tab, kung saan makikita ninyo ang “Apply for Pension Loan.” I-click ninyo ito upang simulan ang iyong aplikasyon. Sunod, piliin ang halaga ng iyong uutangin at kung gaano mo ito katagal babayaran. Matapos nito, i-click ang “I agree sa mga terms and conditions of the program.”

Maaari naman n’yong i-download o kaya’y i-print ang kopya ng Disclosure Statement at makatatanggap na kayo ng kumpirmasyon sa pamamagitan ng e-mail o text tungkol sa iyong aplikasyon. Papasok naman ang halaga ng iyong inutang sa inyong UMID-ATM o UnionBank Quick Cash Card.

◘◘◘

Para sa mga delinquent housing loan borrowers, simula Mayo 25, 2022 ay binuksan ng SSS ang Housing Loan Restructuring and Penalty Condonation Program. Sa ilalim nito, hindi na kailangang bayaran ng miyembro o mga tagapagmana nito ang mga naipong multa o penalties sa hindi nila nabayarang housing loan. Maaari silang mag-file ng aplikasyon sa SSS Housing and Acquired Asset Management Department na nasa 12/F, SSS Building, East Avenue, Diliman, Quezon City at sa Housing and Acquired Asset Management Section ng mga piling sangay ng SSS sa labas ng Metro Manila. Tatanggap ng aplikasyon para dito hanggang Hunyo 30, 2022.

Nais din nating ipaaalala sa mga pensiyunado ng SSS na kailangan nilang tumugon sa Annual Confirmation of Pensioners (ACOP) Program hanggang Hunyo 30, 2022. Pinapaalalahan naman natin ang mga retirement pensioners na nasa abroad, total disability pensioners, survivor pensioners (death), at dependent (minor/incapacitated) pensioners sa ilalim ng guardianship na mag-comply dito.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.