Maaaring gamitin ang SSS mobile app sa pagbabayad ng kontribusyon

@Buti na lang may SSS | July 3, 2022

Dear SSS,

Magandang araw! Ako ay self-employed member ng SSS. Nais kong ituloy ang aking pagbabayad ng kontribusyon, subalit natatakot akong magpunta sa sangay ng SSS dahil sa COVID-19. Mayroon bang paraan upang makapagbayad ako ng aking kontribusyon sa pamamagitan ng online? - Tessie

Sagot

Mabuting araw sa ‘yo, Tessie!

Maaaring makapagbayad ng iyong kontribusyon sa pamamagitan ng mga online payment channels ng SSS. Taong 2018 nang inilunsad ang SSS Mobile App na maaaring i-download ng libre sa App Store, Google Play Store o Huawei AppGallery gamit ang iyong smartphone o Android tablet o cellphone. Layunin nitong maging mas maginhawa ang pagbabayad ng kontribusyon ng mga miyembro. Patuloy na sinisikap ng SSS na maging available ang mga online payment channels nito sa pamamagitan ng ating mga bank, non-bank bank partners para sa iba’t ibang uri ng transaksyon sa SSS sa kapakanan ng ating mga miyembro at employer.

Samantala, ang mga individual paying members tulad ng self-employed, voluntary at Overseas Filipino Workers (OFWs) ay maaaring magbayad ng kontribusyon gamit ang kanilang PayMaya at BPI account sa pamamagitan ng SSS Mobile App.

Kinakailangan lamang na ikaw, Tessie ay nakarehistro at may account sa My.SSS na matatagpuan sa SSS website (www.sss.gov.ph). Upang magamit naman ang SSS Mobile App, kinakailangan mo itong i-install sa iyong smartphone.

Para makapagbayad ng iyong kontribusyon, kailangan munang makakuha ng Payment Reference Number (PRN) para sa iyong gagawing pagbabayad. Maaaring makapag-generate ng PRN gamit ang SSS Mobile App. Kinakailangang mag-log in sa nasabing mobile app gamit ang iyong existing na My.SSS username at password.

Sunod, i-tap mo ang “Generate PRN/SOA” icon na iyong makikita sa iyong mobile screen. Matapos nito, i-tap mo ang “Create” at punuan mo ang mga hinihinging impormasyon tulad ng type ng membership mo, gayundin ang buwan at halaga ng babayarang kontribusyon. Kapag naibigay na ang lahat ng kailangang impormasyon, i-tap ang “SUBMIT” at lalabas ang iyong PRN/SOA. Maaari itong i-download bilang PDF o hindi kaya’y magtuloy na sa pagbabayad.

Dahil mayroon nang PRN, maaari ka ng magbayad. I-tap ang “Pay.” Lalabas sa screen ang payment methods. Maaaring mamili sa pagitan ng PayMaya at BPI. Tiyakin mo na mayroon kang existing account sa iyong napiling online payment channel.

Kung PayMaya ang nais gamitin, i-tap mo ang "Pay with PayMaya Account." Suriin ang detalye ng iyong babayaran bago i-click ang "OK." Mag-log in sa iyong PayMaya account details. Ipadadala sa iyong mobile number ang one-time pin (OTP). Ilagay mo ang iyong OTP at i-click ang "Proceed." Tiyaking tama ang payment details bago i-click ang "OK." Kapag naiproseso na Tessie ang iyong pagbabayad, may lilitaw na kompirmasyon ng iyong transaksyon.

Samantala, kung pinili naman ang BPI, i-tap ang “BPI” at sunod mong i-tap ang “OK” at “PROCEED.” Dadalhin ka nito sa authentication page ng BPI. Kinakailangan mong mag-log in gamit ang iyong credentials sa BPI at piliin kung aling BPI account ang gagamitin mo. Magpapadala ang BPI ng 6 na numero bilang OTP sa iyong mobile number at ilagay ito sa blankong espasyo sa BPI site upang makumpleto ang proseso ng iyong pagbabayad. Kung naging matagumpay ang iyong pagbabayad, makikita mo ang isang notipikasyon sa iyong screen kung saan nakalagay ang petsa at oras ng pagbabayad, PRN, binayarang buwan, halaga ng ibinayad na kontribusyon, at transaction reference number. Kakaltasan naman ng P15 convenience fee ang iyong BPI account sa bawat matagumpay na transaksyon.

◘◘◘

Mula Mayo 30, 2022, nais naming ipaalam sa ating mga retiree-pensioners na ang mga first-time borrowers sa ilalim ng SSS Pension Loan Program (PLP) ay maaari nang magsumite ng kanilang aplikasyon online sa pamamagitan ng My.SSS na matatagpuan sa SSS website (www.sss.gov.ph). Kinakailangan lamang na mag-log in ang retiree-pensioner sa kanyang My.SSS account at piliin ang E-services sa tab nito at i-click ang “Apply for Pension Loan.” Punan ang lahat ng hinihinging impormasyon at isumite ang aplikasyon.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Maililipat ba sa nanay ko ang pensyon ng namatay kong tatay?

@Buti na lang may SSS | June 27, 2022

Dear SSS,

Nais kong itanong ang SSS death benefit claim ng tatay ko. Namatay siya noong January 19, 2021. Makukuha ba ng Nanay ko ang pensyon ni Tatay? May una siyang pinakasalan, gayundin si Nanay. Maililipat ba ang pensiyon ni Tatay sa kanya? – Maribeth

Sagot

Mabuting araw, Maribeth!

Ang pagkakasunud-sunod o order of preference ng mga benepisyaryo ng miyembro ng SSS ay ang mga sumusunod: Una, primary beneficiaries o pangunahing benepisyo na tumutukoy sa legal na asawa at menor-de-edad na anak, kasama ang legal na ampon at incapacitated; ikalawa, secondary beneficiaries na binubuo ng mga magulang ng namayapang miyembro kung siya ay single o walang asawa; ikatlo, designated beneficiaries o ang at itinalaga ng miyembro bilang kanyang benepisyo sa SS Form E-1/E4; at ikaapat, ang legal heirs o mga legal na tagapagmana ng namatay na miyembro na naaayon sa Civil Code of the Philippines.

Sa ilalim ng Republic Act 11199 o ang Social Security of 2018, ang may karapatan sa batas na makatanggap ng death benefit ng miyembro ay tanging ang mga legal na benepisaryo ng SSS, tulad ng ating nabanggit.

Kung ang namatay na miyembro ay pensyonado, ililipat ang pensyon nito sa kanyang legal na asawa na katumbas ng 100% na tinatanggap ng namayapang miyembro. Kung may anak naman siya na wala pang 21 taong gulang, makatatanggap ang kanyang anak ng dependents’ pension. Ito ay katumbas ng P250 kada bata o 10% ng basic monthly pension, alinman ang mas mataas. Samantala, maaari itong ipagkaloob sa limang menor-de-edad na anak, simula sa pinakabata, ngunit walang kaukulang substitution. Matitigil lamang ang benepisyong ito kapag umabot na siya ng 21 taong gulang, nakapag-asawa, nakapagtrabaho o kaya’y namatay.

Sa kaso ng iyong namayapang ama, hindi maituturing na benepisyaryo ang iyong nanay dahil hindi siya ang legal na asawa ng iyong tatay. Idagdag pa rito, may ibang asawa rin ang iyong nanay. Kaya hindi siya kuwalipikadong tumanggap ng pensiyon mula sa SSS.

Kung wala nang menor-de-edad sa inyong magkakapatid, maaari kayong makatanggap ng nalalabing balanse ng inyong tatay na nakapaloob sa five-year guaranteed period kung hindi pa nakalalagpas ng limang taon ang pagtanggap ng pensyon ng miyembro.

Sa ilalim ng five-year guaranteed period, kapag ang miyembro ng SSS na nakatatanggap ng retirement pension o total permanent disability pension ay mamatay bago pa umabot sa limang taon ng kanyang pagtanggap ng pensyon, ang balanse nito ay ibibigay sa mga secondary, designated o legal heirs na babayaran sa pamamagitan ng lump sum benefit.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Alamin: Mas pinadaling pag-update ng info sa SSS

@Buti na lang may SSS | June 26, 2022

Dear SSS,

Magandang araw. Nais ko sanang itanong kung kailangan ko bang magpunta sa SSS branch upang i-update ang aking contact details? Salamat. - Marko

Sagot

Mabuting araw sa iyo, Marko!

Malugod naming ibinabalita sa iyo na maaari na muling mag-update ng contact details sa pamamagitan ng online simula May 16, 2022. Ito ay para masiguro ang kaligtasan at kaginhawahan ng ating mga miyembro at pensyonado sa gitna ng kasalukuyang pandemya sanhi ng COVID-19.

Marko, ang mga miyembrong tulad mo na mayroong My.SSS account ay maaari nang mag-update o magpalit ng kanilang contact details tulad ng numero sa telepono, mobile number, mailing address, foreign address at e-mail address, nang hindi na kailangan magpunta pa sa anumang sangay ng SSS upang magsumite ng kanilang member data change request o SSS Form E-4.

Sa mga wala pang contact information maliban sa kanilang mobile number, maaari silang mag-update ng kanilang contact details. Samantala, kung wala namang rehistradong mobile number ang miyembro sa SSS, kinakailangan niyang magsadya sa anumang sangay ng SSS para i-submit ang kanilang mobile number sa pamamagitan ng Member Data Change Request Form at mag-set ng appointment sa pamamagitan ng kanilang My.SSS account, o kaya naman mag-walk in batay sa number coding scheme na ipinatutupad ng SSS. Ito ay ang mga sumusunod batay sa last digit ng kanilang SS Numbers:

• 1-2 - Lunes;

• 3-4 - Martes;

• 5-6 - Miyerkules;

• 7-8 - Huwebes; at

• 9-0 - Biyernes.

Matatandaang pansamantalang sinuspinde ng SSS ang online updating ng contact details sa My.SSS noong August 3, 2021 upang bigyang-daan ang pagpapahusay ng SSS online portal at mapalakas ang security features nito para maprotektahan ang mga confidential na impormasyon ng mga miyembro at pensyonado ng SSS.

Samantala, maaaring gawin ito sa pamamagitan ng pag-log-in sa kanilang My.SSS account at piliin ang “Update Contact Info” na makikita sa ilalim ng “Member Info” menu. Maaari rin silang mag-update o magpalit ng kanilang contact numbers, e-mail addresses at mailing addresses, maliban sa kanilang home address at isumite ito online.

Magpapadala naman ang SSS ng notification sa e-mail at mobile number ng miyembro. Kinakailangan lamang kumpirmahin ang request sa pamamagitan ng pag-click sa link na ipinadala sa kanilang e-mail address upang i-update ang kanilang contact details.

May tatlong araw lamang ang mga miyembro para kumpirmahin ang request dahil awtomatikong mawawalan ng bisa ang link pagkatapos ng nasabing araw at kinakailangang ulitin ang proseso. Matapos kumpirmahin ang request, makikita na ang updated contact information ng miyembro sa system makalipas ng dalawang araw at ipagbibigay-alam naman ito sa miyembro.

Mahalagang matiyak ng miyembro na updated ang kanyang contact information dahil dito ipadadala ng SSS ang anumang mensahe at updates hinggil sa kanyang mga transaksyon mula sa SSS.

◘◘◘

Simula Mayo 30, 2022, nais naming ipaalam sa ating mga retiree-pensioners na ang mga first-time borrowers sa ilalim ng SSS Pension Loan Program (PLP) ay maaari nang magsumite ng kanilang aplikasyon online sa pamamagitan ng My.SSS na matatagpuan sa SSS website (www.sss.gov.ph). Kinakailangan lamang mag-log in ang retiree-pensioner sa kanyang My.SSS account at piliin ang E-services sa tab nito at i-click ang “Apply for Pension Loan.” Punan ang lahat ng hinihinging impormasyon at isumite ang aplikasyon.

Para sa mga delinquent housing loan borrowers, mula Mayo 25, 2022 ay binuksan ng SSS sa huling pagkakataon ang Housing Loan Restructuring and Penalty Condonation Program. Sa ilalim nito, hindi na kailangang bayaran ng miyembro o mga tagapagmana nito ang mga naipong multa o penalties sa hindi nabayarang housing loan. Maaari silang mag-file ng aplikasyon sa SSS Housing and Acquired Asset Management Department na nasa 12/F, SSS Building, Diliman, Quezon City at sa Housing and Acquired Asset Management Section ng piling sangay ng SSS sa labas ng Metro Manila. Tatanggapin ang mga aplikasyon hanggang Hunyo 30, 2022.

Nais din naming ipaalala sa aming mga pensyonado na kailangan nilang tumugon sa Annual Confirmation of Pensioners (ACOP) Program o ang taunang pagrereport ng mga pensyonado sa SSS hanggang Hunyo 30, 2022. Ang mga pensyonado na dapat tumugon sa ACOP ay mga retirement pensioner na naninirahan sa ibang bansa, total disability pensioner, survivor pensioner (death) at dependent (minor/incapacitated) pensioner sa ilalim ng guardianship.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.