Pagkakasunud-sunod ng mga benepisaryo ng miyembro ng SSS

@Buti na lang may SSS | August 21, 2022

Dear SSS,

Nais kong itanong ang SSS death benefit claim ng tatay ko. Namatay siya noong January 19, 2022. Makukuha ba ng Nanay ko ang pensyon ni Tatay? May una siyang pinakasalan, gayundin si Nanay. – Sonia

Sagot

Mabuting araw, Sonia!

Ang pagkakasunud-sunod o order of preference ng mga benepisaryo ng miyembro ng SSS ay ang mga sumusunod: Una, primary beneficiaries o pangunahing benepisaryo na tumutukoy sa legal na asawa at menor-de-edad na anak, kasama ang legal na ampon at incapacitated; ikalawa, secondary beneficiaries na binubuo ng mga magulang ng namayapang miyembro kung siya ay single o walang asawa; ikatlo, designated beneficiaries o ang at itinalaga ng miyembro bilang kanyang benepisaryo sa SS Form E-1/E4; at ikaapat, ang Legal heirs o mga legal na tagapagmana ng namatay na miyembro na naaayon sa Civil Code of the Philippines.

Sa ilalim ng Republic Act 11199 o ang Social Security of 2018, ang may karapatan sa batas na makatanggap ng death benefit ng miyembro ay tanging ang mga legal na benepisaryo ng SSS, tulad ng ating nabanggit.

Kung ang namatay na miyembro ay pensiyunado, ililipat ang pensiyon nito sa kanyang legal na asawa na katumbas ng 100 porsyento na tinatanggap ng namayapang miyembro. Kung may anak naman siya na wala pang 21 taong gulang, makatatanggap ang kanyang anak ng dependents’ pension. Ito ay katumbas ng P250 kada bata o 10% ng basic monthly pension, alinman ang mas mataas. Samantala, maaari itong ipagkaloob sa limang menor-de-edad na anak, simula sa pinakabata, ngunit walang kaukulang substitution. Matitigil lamang ang benepisyong ito kapag umabot na siya ng sa 21 taong gulang, nakapag-asawa, nakapagtrabaho o kaya ay namatay.

Sa kaso ng iyong namayapang ama, Sonia, hindi maituturing na benepisaryo ang iyong nanay dahil hindi siya ang legal na asawa ng iyong tatay. Idagdag pa rito, may ibang asawa rin ang iyong nanay. Kaya hindi siya kuwalipikadong tumanggap ng pensiyon mula sa SSS.

Kung wala nang menor-de-edad sa inyong magkakapatid, maaari kayong makatanggap ng nalalabing balanse ng inyong tatay na nakapaloob sa five-year guaranteed period kung hindi pa nakalalagpas ng limang taon ang pagtanggap ng pensyon ng miyembro. Sa ilalim ng five-year guaranteed period, kapag ang miyembro ng SSS na nakatatanggap ng retirement pension o total permanent disability pension ay mamatay bago pa umabot sa limang taon ng kanyang pagtanggap ng pensyon, ang balanse nito ay ibibigay sa mga secondary, designated o legal heirs na babayaran sa pamamagitan ng lumpsum benefit.

***

Nais naming ipaalam sa ating mga miyembro na noong Nobyembre 15, 2021 ay binuksan na ang aplikasyon para sa Short-Term Member Loan Penalty Condonation Program o ang Pandemic Relief and Restructuring Program 5. Sa ilalim nito, hindi na kailangang bayaran ng miyembro ang mga naipong multa o penalties sa hindi niya nabayarang utang sa SSS tulad ng salary loan, Calamity loan, Salary Loan Early Renewal Program (SLERP), Emergency loan at restructured loans sa ilalim ng Loan Restructuring Program (LRP) na ipinatupad noong 2016 hanggang 2019.

Maaaring mag-apply ang interesadong miyembro hanggang Pebrero 14, 2022 at mag-file ng application gamit ang kanilang My.SSS account.

Bukod dito, binuksan din ng SSS ang Housing Loan Restructuring and Penalty Condonation Program o ang Pandemic Relief and Restructuring Program 4 noong Nobyembre 22, 2021. Sa ilalim nito, hindi na kailangang bayaran ng miyembro o mga tagapagmana nito ang mga naipong multa o penalties sa hindi nabayarang housing loan. Maaari silang mag-file ng aplikasyon sa SSS Housing and Acquired Asset Management Department na nasa SSS Main Office sa Quezon City at sa Housing and Acquired Asset Management Section ng piling sangay ng SSS sa labas ng Metro Manila. Tatagal ang pagtanggap ng aplikasyon hanggang Pebrero 21, 2022.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Calamity loan ng SSS para sa mga apektado ng lindol sa Luzon

@Buti na lang may SSS | August 21, 2022

Dear SSS,

Magandang araw! Nais ko sanang malaman kung mayroon bang calamity loan ang SSS para sa mga naapektuhan ng malakas na lindol sa Abra noong Hulyo? Paano ba mag-apply? - Michael ng Tayum, Abra

Sagot

Mabuting araw sa iyo, Michael!

Tunay na maaasahan ng aming mga miyembro at mga pensyonado ang tulong ng SSS sa panahon ng mga kalamidad, tulad ng paglindol. Mula noong Lunes, Agosto 15, 2022, binuksan ng SSS ang Calamity Assistance Package (CAP) para sa mga miyembro at pensyonado na naapektuhan ng Magnitude 7 na lindol na tumama sa Abra noong Hulyo 27, 2022.

Ang CAP ay magbibigay ng tulong pinansyal sa mga miyembro at pensyonado sa lalawigan ng Abra at Mountain Province. Sa Abra, sakop ng programa ang mga bayan ng Bangued, Boliney, Bucay, Bucloc, Daguioman, Danglas, Dolores, Lacub, Lagangilang, Lagayan, Langiden, La Paz, Licuan, Luba, Malibcong, Manabo, Penarrubia, Pidigan, Pilar, Sallapadan, San Isidro, San Juan, San Quintin, Tayum, Tineg, Tubo, at Villaviciosa. Samantala, sa Mountain Province naman, kasama ang bayan ng Bauko at Besao.

Ang CAP ay binubuo ng Calamity Loan Assistance Program (CLAP) para sa SSS members at ang Three-month advance pension para sa mga SSS at Employee’s Compensation (EC) pensioners.

Talakayin muna natin ang hinggil sa calamity loan. Kinakailangan lamang na matugunan mo, Michael ang sumusunod na kondisyon:

• Mayroong My.SSS account;

• Nakapaghulog ng hindi bababa sa 36 buwanang kontribusyon, kung saan ang anim na hulog ay naibayad sa huling 12-buwan bago ang buwan ng pagpa-file ng aplikasyon;

• Naninirahan ka sa lugar o bayan na kabilang sa nabanggit sa itaas na lubhang naapektuhan ng lindol;

• Hindi pa nabibigyan ng final benefit, tulad ng permanent total disability o retirement benefit; at

• Walang outstanding na utang sa ilalim ng Loan Restructuring Program (LRP) o sa mga naunang CLAP.

Ang filing ng aplikasyon sa CLAP ay sa pamamagitan ng online gamit ang My.SSS ng miyembro. Kung ikaw naman ay empleyado ng kumpanya, dapat isertipika ng iyong employer ang iyong CLAP application gamit din ang My.SSS.

Bukas ang naturang program sa loob ng tatlong (3) buwan na magtatapos hanggang Nobyembre 14, 2022.

Makahihiram ka ng katumbas ng average ng iyong monthly salary credit (MSC) sa huling 12-buwan. Ang monthly salary credit naman ay ang batayan ng kabuuang kinikita ng miyembro sa loob ng isang buwan.

Halimbawa, kung ikaw ay kumikita ng P19, 250 bawat buwan at naghuhulog ng P2,565 kada buwan bilang iyong SSS contribution, ang iyong MSC ay 19,500. Kung ikaw ay nag-file sa calamity loan ngayong Agosto 21, 2022, iko-compute ang average MSC mo mula Agosto 2021 hanggang Hulyo 2022. Ipagpalagay natin na ang iyong MSC mula Agosto 2021 hanggang Disyembre 2021 ay nasa 18,500 at ang iyong MSC mula Enero 2022 hanggang Hulyo 2022 ay nasa 19,500 naman. Ang magiging average MSC mo ay 19,083.33. Ito rin ang magiging halaga ng calamity loan na maaari mong utangin.

Ang nasabing pautang ay maaari mong bayaran ng installment s sa loob ng 24-buwan. Ang amortisasyon ay magsisimula sa ikalawang buwan mula sa petsa na naaprubahan ang iyong calamity loan. Halimbawa, nanghiram ka noong Agosto 16, 2022, ibig sabihin nito ang iyong pagbabayad ay magsisimula sa Oktubre 2022. Samantala, ito ay may interest na 10% kada taon hanggang sa ito ay mabayaran, na kinukwenta sa lumiliit na balanse ng loan sa loob ng 24 buwan. Ang 1% na service fee ay hindi na ibabawas sa loan maliban sa interes na pro-rated mula sa petsa ng pag-apruba ng utang hanggang sa katapusan ng buwan bago ang unang amortisasyon.

Ang crediting ng nasabing calamity loan ay sa pamamagitan ng account ng miyembro sa Unified Multi-Purpose Identification (UMID) – Automated Teller Machine (ATM) Card o account nito sa alinmang bangko na kabilang sa Philippine Electronic Fund Transfer System and Operations Network (PESONet) o di kaya’y sa kanilang Union Bank of the Philippines (UBP) Quick Cards na nakarehistro sa Disbursement Account Enrollment Module (DAEM) na matatagpuan sa My.SSS.

***

Nais naming ipaalam sa aming mga pensyonado na maaari silang mag-comply sa Annual Confirmation of Pensioners (ACOP) Program o ang taunang pagre-report ng mga pensyonado sa SSS hanggang Oktubre 31, 2022. Ang mga pensyonado na dapat tumugon sa ACOP ay mga retirement pensioners na naninirahan sa ibang bansa, total disability pensioner, survivor pensioner (death) at dependent (minor/incapacitated) pensioner sa ilalim ng guardianship.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Hanggang October 31, 2022 puwedeng makapag-comply sa ACOP ang mga pensyunadong nasa ibang bansa

@Buti na lang may SSS | August 17, 2022

Dear SSS,

Magandang araw. Ang mother-in-law ko ay SSS pensioner. Sa kasalukuyan, siya ay naninirahan sa Canada. Nais sana niyang malaman kung paano siya makakapag-comply sa ACOP. Kailangan pa bang umuwi siya sa Pilipinas? - Boyong

Sagot

Mabuting araw sa iyo, Boyong!

Mula noong Oktubre 2021, muling ibinalik ang Annual Confirmation of Pensioners (ACOP) Program o ang taunang pagrereport ng mga pensyonado sa SSS. Layunin nitong masiguro na ang tamang benepisaryo pa rin ang tumatanggap ng pensyon sa SSS at para maprotektahan na rin ang pondo nito, kung saan mayroong pagkakataon na nagbago na ang estado ng surviving spouse na kinakailangang malaman ng SSS, halimbawa ng kanilang pag-aasawa at iba pang kadahilanan.

Ang mga sumusunod na uri ng pensyunado ang mga kinakailangang tumugon hanggang Oktubre 31, 2022 upang hindi maputol ang pagtanggap nila ng kanilang buwanang pensyon:

retirement pensioners na naninirahan sa ibang bansa;

total disability pensioners;

survivor pensioners (death); at

dependent (minor/incapacitated) pensioners sa ilalim ng guardianship.

Nais naman nating banggitin na ang mga retiradong pensyunado ng SSS na naninirahan sa Pilipinas ay exempted pa rin mula sa ACOP simula noong Oktubre 2017, kaya hindi na nila kailangang mag-report sa SSS para rito.

Samantala, Boyong, para sa mga pensyunado na naninirahan sa ibang bansa, tulad ng iyong mother-in-law, may tatlong pamamaraan upang isagawa ang ACOP.

Option 1: Sa pamamagitan ng video conference (Microsoft Teams). Mag-send siya ng appointment request sa ofw.relations@sss.gov.ph. Hintayin ang email confirmation mula sa SSS na naglalaman ng transaction reference number (TRN) at ng link sa Microsoft Teams. Sa scheduled video conferencing, dapat mayroon siyang maipakitang isang (1) primary ID card o dalawang (2) secondary ID cards gaya ng Senior Citizens Card, Voter’s at Postal ID, atbp.

Option 2: Maaaring ipadala ang mga required na dokumento sa e-mail address ng pinakamalapit na SSS foreign office. Sa Canada, matatagpuan ang mga opisinang ito sa Philippine Overseas Labor Office sa Vancouver, Philippine Consulate General sa Calgary at sa Philippine Consulate General naman sa Toronto.

Option 3: Maaari ring ipadala ang mga required na dokumento sa pamamagitan ng koreo sa SSS OFW-Contact Services Section, SSS Bldg., East Avenue, Diliman, Quezon City 1100.

Para sa Option 2 at 3, dapat ihanda ng mother-in-law mo, Shiela ang sumusunod na mga dokumento:

duly-accomplished ACOP Form;

isang primary o dalawang secondary ID cards;

half-body photo ng pensyunado na may hawak na kasalukuyang diyaryo o kaya’y nasa background niya ang TV news crawler o ticker kung saan makikita ng malinaw ang news headline at kasalukuyang petsa.

Samantala, ang mga pensyunado na makatutugon sa compliance ng ACOP bago ang nabanggit na deadline ay exempted na para sa taong 2022, kung saan ang compliance nila ay sa susunod na taon na o sa 2023.

Boyong, maaari mo ring i-download ang ACOP form sa link na ito https://bit.ly/3mC8TkE.

Nais naming ipaalala na kung hindi makakapag-comply sa ACOP ang iyong mother-in-law hanggang Oktubre 31, 2022 maaaring maputol ang pagtanggap niya ng buwanang pensyon.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa “Philippine Social Security System” at sumali sa SSS Viber Community, “MYSSSPH Updates.”

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.