Hanggang P200-K ang puwedeng utangin ng pensiyunado sa SSS

@Buti na lang may SSS | September 25, 2022

Dear SSS,

Magandang araw! Ako ay pensyunado ng SSS. Kamakailan ay nabalitaan ko na mayroong pautang para sa aming mga pensyunado. Paano ba mag-apply dito? - Eileen

Sagot

Mabuting araw sa iyo, Eileen!

Totoong may pautang na ibinibigay ang SSS para sa mga retiradong pensyunado nito at ito ang Pension Loan Program (PLP), na binuksan mula pa noong Setyembre 2018. Layunin ng programa ang makapagbigay ng tulong-pinansyal sa pamamagitan ng pautang na may mas mababang interest. Batid naman natin sa panahong ito na nasa gitna tayo ng pandemya ay kailangan n’yo ng karagdagang financial assistance para sa inyong mga pangangailangang medikal, atbp.

Ang PLP ay nagsisilbing alternatibo sa mga private lending institutions, kung saan mas mababa ang interes at hindi nila kailangang gamiting kolateral ang kanilang ATM cards.

Upang makahiram sa ilalim ng PLP kinakailangang matugunan ninyo ang sumusunod na kondisyon:

• hindi dapat hihigit sa 85 taong gulang sa katapusan ng termino ng pautang;

• walang ibinabawas sa kanyang buwanang pensyon, tulad ng natitirang balanse sa ibang pautang ng SSS o kaya’y sobrang benepisyong binayaran ng SSS;

• walang utang sa ilalim ng SSS Calamity Assistance Package; at

• tumatanggap na ng regular na pensyon na hindi bababa sa isang buwan.

Halimbawa, nag-apply kayo ngayong Setyembre, ang simula ng inyong pagbabayad ay sa Oktubre pa.

Sa kasalukuyan, maaari kayong makahiram ng katumbas ng tatlo hanggang 12 beses ng inyong tinatanggap na basic monthly pension (BMP) kasama ang P1,000 additional benefit na ibinigay noong 2017. Subalit, hindi ito hihigit sa P200,000 na siyang maximum loanable amount na ipinahihiram sa ilalim ng PLP. Dagdag pa rito, ang net take-home pension o matitira sa inyong buwanang pensyon ay hindi dapat bababa sa 47.25%.

Samantala, ang pension loan na katumbas ng tatlong beses ng inyong tinatanggap na buwanang pensyon ay babayaran ninyo sa loob ng anim na buwan; kung katumbas naman ng anim na beses ng inyong buwang pensyon, maaari ninyo itong bayaran sa loob ng 12-buwan. Kung ang nahiram ninyong pension loan ay katumbas ng siyam o 12 beses ng buwanang pensyon, maaari ninyo itong bayaran ng hanggang 24-buwan o sa loob ng dalawang taon.

Online na rin ang pag-file ng application sa PLP maging kayo man ay first-time borrower o magre-renew ng pension loan. Kinakailangan lamang na kayo ay nakarehistro sa My.SSS na matatagpuan sa SSS website, www.sss.gov.ph. Hinihingi rin namin ang inyong contact number o aktibong mobile number, kabilang ang inyong SSS UMID-ATM o kaya’y ang Union Bank Quick Cash Card para rito.

Mag-log in kayo sa inyong My.SSS account at magtungo sa E-Services tab, kung saan makikita ninyo ang “Apply for Pension Loan.” I-click ninyo ito upang simulan ang iyong aplikasyon. Sunod, piliin ang halaga ng iyong uutangin at kung gaano mo ito katagal babayaran. Matapos nito, i-click ang “I agree sa mga terms and conditions of the program.”

Maaari naman ninyong i-download o kaya’y i-print ang kopya ng Disclosure Statement at makatatanggap na kayo ng kumpirmasyon sa pamamagitan ng e-mail o text tungkol sa iyong aplikasyon. Papasok naman ang halaga ng iyong inutang sa inyong UMID-ATM o UnionBank Quick Cash Card.

***

Nais din nating ipaalala sa mga pensyunado ng SSS na kailangan nilang tumugon sa Annual Confirmation of Pensioners (ACOP) Program hanggang Hunyo 30, 2022. Pinapaalalahan naman natin ang mga retirement pensioners na nasa abroad, total disability pensioners, survivor pensioners (death), at dependent (minor/incapacitated) pensioners sa ilalim ng guardianship na mag-comply dito.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "MYSSSPH" at sumali sa SSS Viber Community, “MYSSSPH Updates." Maaari din ninyong bisitahin ang uSSSap Tayo Portal sa https://crms.sss.gov.ph/.

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Mga OFWs, maaaring maging miyembro ng SSS

@Buti na lang may SSS | September 24, 2022

Dear SSS,

Magandang araw! Ako ay overseas Filipino worker sa Dubai. Noong nasa Pilipinas ako ay nagtatrabaho ako sa kilalang mall sa Taguig at nakapaghuhulog sa SSS. Subalit, mula nang ako ay magtungo sa Dubai ay hindi na ako nakapaghulog pa. Maaari ko bang ituloy ang aking kontribusyon sa SSS? — Pamela

Sagot

Mabuting araw sa iyo, Pamela!

Malugod naming ibinabalita sa iyo na maaari mong maipagpatuloy ang paghuhulog sa SSS bilang overseas Filipino worker (OFW) member. Sa kasalukuyan, ang minimum Monthly Salary Credit (MSC) para sa mga land-based OFWs na kagaya mo ay P8,000, ito ay katumbas naman ng P1,040 kada buwan na kontribusyon.

Para sa iyong kaalaman, 1995 pa ipinagtibay ng SSS ang pagsakop sa mga OFWs, ngunit noong Marso 2019 sa bisa ng Republic Act 11199 o Social Security Act of 2018, mandatory na ito para sa lahat ng sea at land based OFWs na hindi pa umaabot sa 60 taong gulang.

Sa binanggit mo na ikaw ay dati ng nakapagtrabaho, maaari mo itong ituloy bilang voluntary member. Ang iyong coverage naman ay magsisimula muli sa unang buwan ng iyong pagbabayad ng kontribusyon sa SSS. Samantala, maaari mong bayaran ang kontribusyon mo para sa Enero hanggang Setyembre alinmang buwan sa kasalukuyang taon kung saan ang last quarter mula Oktubre hanggang Disyembre naman ay maaari mong bayaran hanggang sa huling araw ng Enero sa susunod na taon.

Kinakailangan lamang, Pamela na ikaw ay nakarehistro at may account sa My.SSS na matatagpuan sa SSS website (www.sss.gov.ph). Upang magamit naman ang SSS Mobile App, kinakailangan mo itong i-install sa iyong smartphone.

Para makapagbayad ka ng iyong kontribusyon, kailangan mo munang makakuha ng Payment Reference Number (PRN) para sa iyong gagawing pagbabayad. Maaari kang makapag-generate ng PRN gamit ang SSS Mobile App. Kinakailangan mong mag-log in sa nasabing mobile app gamit ang iyong existing na My.SSS username at password.

Sunod, i-tap mo ang “Generate PRN/SOA” icon na iyong makikita sa iyong mobile screen. Matapos nito, i-tap mo ang “Create” at punuan mo ang mga hinihinging impormasyon, tulad ng buwan at halaga ng babayarang kontribusyon. Maaari mo ring palitan ang type ng membership mo sa pamamagitan ng pagpili ng OFW. Kapag naibigay mo na ang lahat ng kailangang impormasyon, i-tap mo ang “SUBMIT” at lalabas ang iyong PRN/SOA. Maaari mo itong i-download bilang PDF o hindi kaya’y magtuloy na sa pagbabayad.

Dahil mayroon ka nang PRN, maaari ka ng magbayad. I-tap mo ang “Pay.” Lalabas sa screen ang payment methods. Maaari kang mamili sa pagitan ng PayMaya at BPI. Tiyakin mo na mayroon kang existing account sa iyong napiling online payment channel.

Bukod sa My.SSS at SSS Mobile App, maaari ka ring magbayad sa mga overseas bank gaya ng Asia United Bank, Bank of Commerce, at Philippine National Bank. Maaari mo ring gamitin ang website at mobile app ng ilang bangko sa pagbabayad ng iyong kontribusyon gaya ng Security Bank Corp.-Digibanker/Security Bank Online at Union Bank of the Philippines-UnionBank Online. Makakapagbayad ka rin ng kontribusyon sa Cashpinas, I-Remit, Inc., Pinoy Express Hatid Padala Services, Inc., Ventaja International Corp., at LMI Express Delivery Inc.

Dapat mo ring tandaan na sa patuloy mong paghuhulog ng SSS, kuwalipikado kang makatanggap ng pitong benepisyo tulad ng sickness, maternity, unemployment, disability, retirement, funeral, death, gayundin ang mga prebilehiyo sa pautang tulad ng salary, calamity, atbp.

Sa pagdaan ng mga taon, ang paghuhulog mo sa SSS ay isang pamamaraan ng iyong investment o pag-iimpok bilang paghahanda sa iyong pagreretiro. Ang kontribusyon na inihuhulog mo ngayon sa SSS ay babalik sa iyo bilang pensyon sa katapusan ng mga produktibong taon ng inyong buhay.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "MYSSSPH" at sumali sa SSS Viber Community, “MYSSSPH Updates." Maaari din ninyong bisitahin ang uSSSap Tayo Portal sa https://crms.sss.gov.ph/.

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Disability benefits ng SSS

@Buti na lang may SSS | September 18, 2022

Dear SSS,

Magandang araw SSS! Nais kong itanong kung paano makakuha ng SSS disability benefit ang mga miyembrong tulad ko? — Shaina

Sagot

Mabuting araw sa iyo, Shaina!

Sa ilalim ng World Health Organization (WHO), ang kahulugan ng pagkabalda o disability ay tumutukoy sa “anumang kawalan o kakulangan (sanhi ng pinsala o impairment) ng kakayahang gampanan ang isang gawain sa paraang angkop sa isang indibidwal.” Ang depinisyong ito ay patuloy na sinusunod ng SSS. Subalit, nagpatupad ng pagbabago ang SSS sa paraan ng pagbibigay ng benepisyo sa pagkabalda sa mga miyembro upang mas mapabuti ang pagbibigay ng serbisyo habang isinasaalang-alang ang tamang benepisyo ay ibinabayad sa miyembrong nangangailangang tumanggap nito.

Ang benepisyo sa pagkabalda o disability benefit ay ibinabayad din sa isang miyembro na nawalan ng kakayahang magtrabaho o ang kanyang kakayahang kumita ay nabawasan dahil sa kanyang kapansanan na sanhi ng karamdaman o pagkapinsala. Isasailalim siya sa pagsusuri ng mga doktor ng SSS upang malaman kung ang kanyang pagkabalda ay kuwalipikadong mabigyan ng nasabing benepisyo.

Samantala, may dalawang uri ng pagkabalda:

1. Permanent Partial Disability. Maituturing na permanent partial disability ay ang pagkawala ng kakayahang gamitin o lubusang pagkawala ng alinman sa mga sumusunod na bahagi ng katawan:

isang hinlalaki ng kamay o paa;

isang hintuturo;

isang hinlalato;

isang palasingsingan;

isang hinliliit;

isang kamay;

isang braso;

isang paa;

isang binti;

isa o dalawang tainga;

pagkawala ng pandinig ng isa o dalawang tainga; at

pagkawala ng paningin o pagkatanggal ng isang mata.

Samantala, may iba pang mga uri ng pagkabalda na maaaring apruban o bayaran ng SSS bukod sa mga nabanggit.

Buwanang pensyon naman ang ibinabayad sa miyembro na may permanent partial disability kung siya ay nakapaghulog ng hindi bababa sa 36 buwanang kontribusyon sa SSS bago ang semestre ng pagkabalda. Ang bilang ng buwan na tatanggap siya ng pensyon ay nakabatay sa resulta ng pagsusuri ng Medical Evaluation Section ng SSS.

Samantala, lump sum amount naman ang ibinabayad kung ikaw, Shaina ay hindi nakapaghulog ng 36 buwanang kontribusyon.

2. Permanent Total Disability. Itinuturing naman na permanent total disability ang mga sumusunod:

ganap na pagkabulag ng dalawang mata;

pagkaputol ng dalawang kamay o dalawang paa;

permanente at ganap na pagkaparalisa ng dalawang kamay o dalawang paa;

pagkapinsala ng utak na naging sanhi ng pagkasira ng isip; at

iba pang mga kaso na itinuturing ng SSS na lubusang pagkabalda.

Buwanang pensyon ang ibinabayad sa miyembro na may permanent total disability kung siya ay nakapaghulog ng hindi bababa sa 36 buwanang kontribusyon sa SSS bago ang semestre ng kanyang pagkabalda. Ang benepisyong ito ay katumbas na rin ng SSS Retirement Benefit kung saan mas pabor sa mga miyembrong wala pang 60 taong gulang dahilan sa karagdagang P500 kada buwan na kanilang tinatanggap bilang supplemental allowance.

Pinapaalalahanin din natin ang mga miyembro at pensyonado na magkaroon ng kanilang bank account na kinakailangang i-enroll sa Disbursement Account Enrollment Module ng SSS para sa crediting ng kanilang mga benepisyo at loan privileges mula sa SSS.Kaugnay nito, kailangan din na may sarili kang My.SSS account, Shaina, na matatagpuan naman sa SSS website. Ito’y upang ganap na ma-iaccess ang iba’t-ibang online service facilities ng SSS lalo na sa pagpa-file ng iyong mga application para sa loans at benefit claims mo sa SSS.

***

Nais naming ipaalam sa aming mga pensyonado na maaari silang mag-comply sa Annual Confirmation of Pensioners (ACOP) Program o ang taunang pagrereport ng mga pensyonado sa SSS hanggang Oktubre 31, 2022. Ang mga pensyonado na dapat tumugon sa ACOP ay mga retirement pensioners na naninirahan sa ibang bansa, total disability pensioner, survivor pensioner (death), at dependent (minor/incapacitated) pensioner sa ilalim ng guardianship.

***

Binuksan din ng SSS noong Agosto 15, 2022 ang Calamity Assistance Package (CAP) para sa mga miyembro at pensyonado na naapektuhan ng Magnitude 7 na lindol na tumama sa Abra noong Hulyo 27, 2022.

Ang CAP ay magbibigay ng tulong pinansyal sa mga miyembro at pensyonado sa lalawigan ng Abra at Mountain Province. Sa Abra, sakop ng programa ang mga bayan ng Bangued, Boliney, Bucay, Bucloc, Daguioman, Danglas, Dolores, Lacub, Lagangilang, Lagayan, Langiden, La Paz, Licuan, Luba, Malibcong, Manabo, Penarrubia, Pidigan, Pilar, Sallapadan, San Isidro, San Juan, San Quintin, Tayum, Tineg, Tubo, at Villaviciosa. Samantala, sa Mountain Province naman, kasama ang mga bayan ng Bauko at Besao.

Ang CAP ay binubuo ng Calamity Loan Assistance Program (CLAP) para sa SSS members at ang Three-month advance pension para sa mga SSS at Employee’s Compensation (EC) pensioners. Tatanggap ang SSS ng aplikasyon para sa naturang programa hanggang Nobyembre 14, 2022.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "MYSSSPH" at sumali sa SSS Viber Community, “MYSSSPH Updates." Maaari din ninyong bisitahin ang uSSSap Tayo Portal sa https://crms.sss.gov.ph/.

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.