Online na ang aplikasyon para sa first-time borrowers ng SSS pension loan program

@Buti na lang may SSS | January 15, 2023

Dear SSS,

Magandang araw! Ako ay pensyonado ng SSS. Kamakailan ay nabalitaan ko na mayroong pautang para sa aming mga pensyonado. Paano ba mag-apply dito? - Zeny

Sagot

Mabuting araw sa iyo, Zeny!

Totoong may pautang na ibinibigay ang SSS para sa mga retiradong pensyonado nito at ito ang Pension Loan Program (PLP) na binuksan mula pa noong Setyembre 2018. Layunin ng programa ang makapagbigay ng tulong-pinansyal sa pamamagitan ng pautang na may mas mababang interest. Batid naman natin sa panahong ito na nasa gitna tayo ng pandemya ay kailangan n’yo ng karagdagang financial assistance para sa inyong mga pangangailangang medikal, atbp.

Ang PLP ay nagsisilbing alternatibo sa mga private lending institutions, kung saan mas mababa ang interes at hindi nila kailangang gamiting kolateral ang kanilang ATM cards.

Upang makahiram sa ilalim ng PLP kinakailangan na matugunan ninyo ang sumusunod na kondisyon:

• hindi dapat hihigit sa 85 taong gulang sa katapusan ng termino ng pautang;

• walang ibinabawas sa kanyang buwanang pensyon, tulad ng natitirang balanse sa ibang pautang ng SSS o kaya’y sobrang benepisyong binayaran ng SSS;

• walang utang sa ilalim ng SSS Calamity Assistance Package;

• tumatanggap na ng regular na pensyon na hindi bababa sa isang (1) buwan; at

• kinakailangan na naka-enroll ang bank account sa Disbursement Account Enrolment Module (DAEM) na nasa My.SSS portal.

Halimbawa, nag-apply kayo ngayong Enero, ang simula ng inyong pagbabayad ay sa Marso pa.

Sa kasalukuyan, maaari kayong makahiram ng katumbas ng tatlo hanggang 12 beses ng inyong tinatanggap na basic monthly pension (BMP) kasama ang P1,000 additional benefit na ibinigay noong 2017. Subalit, hindi ito hihigit sa P200,000 na siyang maximum loanable amount na ipinapahiram sa ilalim ng PLP. Dagdag pa rito, ang net take-home pension o matitira sa inyong buwanang pensyon ay hindi dapat bababa sa 47.25%.

Samantala, ang pension loan na katumbas ng tatlong beses ng inyong tinatanggap na buwanang pensyon ay babayaran ninyo sa loob ng anim na buwan; kung katumbas naman ng anim na beses ng inyong buwang pensyon, maaari ninyo itong bayaran sa loob ng 12 buwan, Lola Zeny. Kung ang nahiram ninyong pension loan ay katumbas ng siyam o 12 beses ng buwanang pensyon, maaari ninyo itong bayaran ng hanggang 24 buwan o sa loob ng dalawang taon.

Online na rin ang pag-file ng application sa PLP maging kayo man ay first-time borrower o magre-renew ng pension loan. Kinakailangan lamang na kayo ay nakarehistro sa My.SSS na matatagpuan sa SSS website, www.sss.gov.ph. Hinihingi rin namin ang inyong contact number o aktibong mobile number, kabilang ang inyong SSS UMID-ATM o kaya’y ang Union Bank Quick Cash Card para rito.

Dati, ang disbursement channels lamang para sa pension loan ay Unified Multi-Purpose Identification (UMID) cards na enrolled bilang ATM at Union Bank of the Philippines (UBP) Quick Card, kung kaya’t ang mga initial borrowers sa ilalim ng PLP ay kinakailangan pang magtungo sa SSS branch para mag-apply at kumuha ng disbursement account na ito.

Simula noong Mayo 30, 2022, sa bago nating programang Pension Loan Releases thru-the-Bank DBP (Development Bank of the Philippines) via PESONet, ginawa na nating electronic ang disbursements ng pension loan releases na diretsong i-credit sa mga bank accounts ng pensioners, kung saan pumapasok ang kanilang pension o bank account na enrolled sa DAEM sa My.SSS. Pagkatapos ng kanilang online application at real-time approval, maaari nang makuha ang loan sa kanilang pension loan account sa loob ng three banking days.

Mag-log in kayo sa inyong My.SSS account at magtungo kayo sa Loans tab kung saan makikita ninyo ang “Apply for Pension Loan.” I-click ninyo ito upang simulan ang iyong aplikasyon. Sunod, piliin ang halaga ng iyong uutangin at kung gaano mo ito katagal babayaran. Matapos nito, i-click ang “I agree sa mga terms and conditions of the program.”

Maaari naman ninyong i-download o kaya’y i-print ang kopya ng Disclosure Statement at makatatanggap na kayo ng kompirmasyon sa pamamagitan ng email o text tungkol sa iyong aplikasyon.

***

Hanggang Pebrero 16, 2023 na lamang tatanggap ng aplikasyon para sa Calamity Assistance Package (CAP) na inilunsad ng SSS para sa mga miyembro at pensyonado na naapektuhan ng Severe Tropical Storm ‘Paeng’ noong Oktubre 2022. Ito ay binubuo ng Calamity Loan Assistance Program (CLAP) para sa SSS members at ang Three-month advance pension para sa lahat ng SSS at Employee’s Compensation (EC) pensioners.

Ang CAP ay magbibigay ng tulong-pinansyal sa mga miyembro at pensyonado sa mga lalawigan ng Cavite, Laguna, Batangas, Rizal, Quezon, Albay, Camarines Norte, Camarines Sur, Sorsogon, Catanduanes, Masbate, Aklan, Antique, Capiz, Guimaras, Iloilo, Negros Occidental, Basilan, Lanao del Sur, Tawi-Tawi, Sulu, Maguindanao del Norte at Maguindanao del Sur.

Kasama rin dito ang Cagayan lalo na sa bayan ng Amulung, Enrile at Tuguegarao. Sa Marinduque, ito ay ang mga bayan ng Mogpog, Santa Cruz at Buenavista, at sa Cotabato, ay ang bayan ng Pigcawayan, Libungan at Midsayap.

Dagdag pa rito ang Muntinlupa City, Calbayog sa Samar, Sirawai sa Zamboanga del Norte, at Zamboanga City sa Zamboanga del Sur.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "MYSSSPH" at sumali sa SSS Viber Community, “MYSSSPH Updates." Maaari din ninyong bisitahin ang uSSSap Tayo Portal sa https://crms.sss.gov.ph/.

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Kaalaman tungkol sa disability benefits

@Buti na lang may SSS | January 11, 2023

Dear SSS,

Magandang araw SSS! Paano ba makakuha ng SSS disability benefit ang mga miyembro na tulad ko? - Julia

Sagot

Sa ilalim ng World Health Organization (WHO), ang kahulugan ng pagkabalda o disability ay tumutukoy sa “anumang kawalan o kakulangan (sanhi ng pinsala o impairment) ng kakayahang gampanan ang isang gawain sa paraang angkop sa indibidwal.” Ang depinisyong ito ay patuloy na sinusunod ng SSS. Subalit, nagpatupad ng pagbabago ang SSS sa paraan ng pagbibigay ng benepisyo sa pagkabalda sa mga miyembro upang mas mapabuti ang pagbibigay ng serbisyo habang isinasaalang-alang ang tamang benepisyo ay ibinabayad sa miyembrong nangangailangang tumanggap nito.

Ang disability benefit ay ibinabayad din sa miyembro na nawalan ng kakayahang magtrabaho o ang kanyang kakayahang kumita ay nabawasan dahil sa kapansanan na sanhi ng karamdaman o pagkapinsala. Isasailalim siya sa pagsusuri ng mga doktor ng SSS upang malaman kung ang kanyang pagkabalda ay kuwalipikadong mabigyan ng nasabing benepisyo.

Samantala, may dalawang uri ng pagkabalda:

1. Permanent Partial Disability. Maituturing na permanent partial disability ay ang pagkawala ng kakayahang gamitin o lubusang pagkawala ng alinman sa mga sumusunod na bahagi ng katawan:

isang hinlalaki ng kamay o paa;

isang hintuturo;

isang hinlalato;

isang palasingsingan;

isang hinliliit;

isang kamay;

isang braso;

isang paa;

isang binti;

isa o dalawang tainga;

pagkawala ng pandinig ng isa o dalawang tainga; at

pagkawala ng paningin o pagkatanggal ng isang mata.

Samantala, may iba pang mga uri ng pagkabalda na maaaring apruban o bayaran ng SSS bukod sa mga nabanggit.

Buwanang pensyon naman ang ibinabayad sa miyembro na may permanent partial disability kung siya ay nakapaghulog ng hindi bababa sa 36 buwanang kontribusyon sa SSS bago ang semestre ng pagkabalda. Ang bilang ng buwan na tatanggap siya ng pensyon ay nakabatay sa resulta ng pagsusuri ng Medical Evaluation Section ng SSS.

Samantala, lump sum amount naman ang ibinabayad kung hindi nakapaghulog ng 36 buwanang kontribusyon.

2. Permanent Total Disability. Itinuturing naman na permanent total disability ang mga sumusunod:

ganap na pagkabulag ng dalawang mata;

pagkaputol ng dalawang kamay o dalawang paa;

permanente at ganap na pagkaparalisa ng dalawang kamay o dalawang paa;

pagkapinsala ng utak na naging sanhi ng pagkasira ng isip; at

iba pang mga kaso na itinuturing ng SSS na lubusang pagkabalda.

Buwanang pensyon ang ibinabayad sa miyembro na may permanent total disability kung siya ay nakapaghulog ng hindi bababa sa 36 buwanang kontribusyon sa SSS bago ang semestre ng kanyang pagkabalda. Ang benepisyong ito ay katumbas na rin ng SSS Retirement Benefit kung saan mas pabor sa mga miyembrong wala pang 60 taong gulang dahilan sa karagdagang P500 kada buwan na kanilang tinatanggap bilang supplemental allowance.

Pinapaalalahanin din natin ang mga miyembro at pensyonado na magkaroon ng kanilang bank account na kinakailangang i-enroll sa Disbursement Account Enrollment Module ng SSS para sa crediting ng kanilang mga benepisyo at loan privileges mula sa SSS.Kaugnay nito, kailangan din na may sariling My.SSS account, na matatagpuan naman sa SSS website. Ito’y upang ganap na ma-iaccess ang iba’t ibang online service facilities ng SSS, lalo na sa pagpa-file ng application para sa loans at benefit claims sa SSS.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "MYSSSPH" at sumali sa SSS Viber Community, “MYSSSPH Updates." Maaari din ninyong bisitahin ang uSSSap Tayo Portal sa https://crms.sss.gov.ph/.

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

May 'K’' ang housewife na maging SSS member

@Buti na lang may SSS | January 9, 2023

Dear SSS,

Magandang araw SSS! Ako ay housewife at ang aking asawa ay nagtatrabaho sa kumpanya at naghuhulog sa SSS. Nais ko rin sanang maghulog sa SSS, ngunit ako ay hindi empleyado. May paraan pa ba na maging miyembro ako? - Selena

Sagot

Mabuting araw sa iyo, Selena!

Sa katunayan, noong 1995 ay sinimulan na ng SSS ang pagsaklaw o pagbibigay ng social security coverage para sa ating mga maybahay na ang kanilang buong oras ay inilalaan sa pamamahala ng kanilang mga tahanan at pag-aasikaso sa pamilya.

Selena, maaaring makapaghulog sa SSS ang legal na maybahay na katulad mo na aktibong nagbabayad na miyembro ng SSS bilang Non-Working Spouse (NWS). Ngunit kinakailangan na ito ay may kaukulang pahintulot ng iyong asawa.

Ibabatay ang iyong monthly salary credit na ihuhulog mo sa SSS sa kalahati o 50% ng monthly salary credit ng iyong asawa na hindi naman bababa sa P1,000.

Kung sa nakalipas na mga taon ay hindi ka kailanman naging miyembro o naghulog sa SSS at wala ka pang 60 taong gulang, maaari kang kumuha ng iyong SS number online. Magtungo ka lamang sa SSS website, www.sss.gov.ph.

Subalit kung ikaw ay SSS member na, maaari ka magpalit ng membership upang ikaw ay mapabilang sa Non-Working Spouse sa pamamagitan ng pagsusumite ng Member Data Change Request Form sa SSS.

Halimbawa, ang iyong asawa ay manggagawa na naghuhulog ng regular sa SSS, kung saan kumikita at naghuhulog siya batay sa P16,000 monthly salary credit. Katumbas naman nito ay ang P 2,080 na kontribusyon kada buwan. Ikaw naman bilang kanyang asawa ay maaaring maghulog ng P1,040 na kontribusyon kada buwan bilang NWS na ibinatay sa P1,500 monthly salary credit (kalahati ng monthly salary credit ng iyong asawa).

At tulad ng ibang SSS member, kinakailangan mo ring magrehisto sa My.SSS portal na nasa SSS website at mag-generate ng Payment Reference Number (PRN) na kailangan sa pagbabayad.

Kung natugunan mo ang mga kuwalipikasyong nabanggit, kinakailangan mong punan at isumite ang Personal Record o ang dating tinatawag na E-1 Form na may pirma ng iyong asawa sa pinakamalapit na sangay ng SSS. Dapat ilakip sa Personal Record Form ang certified true copy ng inyong marriage certificate. Kung wala ka pang SS number, dapat isumite mo rin kasama ng E-1 Form ang certified true copy ng birth certificate o 2 valid ID upang magbigyan ka ng SS number mo. Matapos nito, maaari ka ng magbayad ng kontribusyon ng kada buwan o kaya ay quarterly.

Mahalaga na ang NWS ay regular na naghuhulog ng kontribusyon upang maging kuwalipikado siya sa mga benepisyo ng SSS para sa panganganak, pagkakasakit, pagkabalda, pagreretiro, pagpapalibing at pagkamatay gayundin sa mga pautang na programa nito, tulad ng salary, calamity loans, atbp.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "MYSSSPH" at sumali sa SSS Viber Community, “MYSSSPH Updates." Maaari din ninyong bisitahin ang uSSSap Tayo Portal sa https://crms.sss.gov.ph/.

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.