Disability benefit ng SSS

@Buti na lang may SSS | July 16, 2023

Dear SSS,

Magandang araw! Nais kong itanong kung ano ang disability benefit na ibinibigay ng SSS at paano makaka-avail nito ang isang miyembro na tulad ko? Salamat. - Shawn

Mabuting araw sa iyo, Shawn!

Napapanahon ang iyong katanungan sapagkat simula bukas, Hulyo 17, hanggang Hulyo 23 ay ipagdiriwang ang 45th National Disability Prevention and Rehabilitation Week na may temang “Aksesibilidad at Karapatan ng mga Taong may Kapansanan: Daan Tungo sa Sustenableng Kinabukasan na Walang Maiiwan.” Kaya sa pagkakataong ito ay ating tatalakayin ang isa sa benepisyong ipinagkakaloob ng SSS sa mga miyembro nito – ang disability benefit.

Ang benepisyo sa pagkabalda o disability benefit ay ibinabayad ng SSS sa isang miyembro na nawalan ng kakayahang magtrabaho o ang kanyang kakayahang kumita ay nabawasan dahil sa kanyang kapansanan na sanhi ng karamdaman o pagkapinsala. Isasailalim siya sa pagsusuri ng mga doktor ng SSS upang malaman kung ang kanyang pagkabalda ay kuwalipikadong mabigyan ng nasabing benepisyo.

Para sa iyong kaalaman, Shawn, may dalawang uri ng pagkabalda:

1. Permanent Partial Disability

Maituturing na permanent partial disability ang pagkawala ng kakayahang gamitin o lubusang pagkawala ng alinman sa mga sumusunod na bahagi ng katawan:

• isang hinlalaki ng kamay o paa;

• isang hintuturo;

• isang hinlalato;

• isang palasingsingan;

• isang hinliliit;

• isang kamay;

• isang braso;

• isang paa;

• isang binti;

• isa o dalawang tainga;

• pagkawala ng pandinig ng isa o dalawang tainga;

• pagkawala ng paningin o pagkatanggal ng isang mata.

Samantala, may iba pang mga uri ng pagkabalda na maaaring aprubahan o bayaran ng SSS bukod sa mga nabanggit.

Buwanang pensyon naman ang ibinabayad sa miyembro na may permanent partial disability kung siya ay nakapaghulog ng hindi bababa sa 36 buwanang kontribusyon sa SSS bago ang semestre ng pagkabalda. Ang bilang ng buwan na tatanggap siya ng pensyon ay nakabatay sa resulta ng pagsusuri ng Medical Evaluation Section ng SSS.

Samantala, lump sum amount naman ang ibinabayad kung ikaw ay hindi nakapaghulog ng 36 buwanang kontribusyon.

2. Permanent Total Disability

Itinuturing naman na permanent total disability ang mga sumusunod:

• ganap na pagkabulag ng dalawang mata;

• pagkaputol ng dalawang kamay o dalawang paa;

• permanente at ganap na pagkaparalisa ng dalawang kamay o dalawang paa;

• pagkapinsala ng utak na naging sanhi ng pagkasira ng isip;

• iba pang mga kaso na itinuturing ng SSS na lubusang pagkabalda.

Buwanang pensyon ang ibinabayad sa miyembro na may permanent total disability kung siya ay nakapaghulog ng hindi bababa sa 36 buwanang kontribusyon sa SSS bago ang semestre ng kanyang pagkabalda. Halimbawa, pagkabalda ng isang miyembro ay noong Pebrero 2022. Ang semestre ng kanyang pagkabalda ay mula Oktubre 2021 hanggang Marso 2022.

Ang permanent total disability pension ay lifetime na matatanggap ng isang miyembro.

Bukod dito, may matatanggap din siya na P500 na supplemental allowance kada buwan.

Pinapaalalahanan din natin ang mga miyembro at pensyonado na magkaroon ng kanilang bank account na kinakailangang i-enroll sa Disbursement Account Enrollment Module (DAEM) para sa crediting ng kanilang mga benepisyo at loan privileges mula sa SSS.

Kaugnay nito, kailangan din na may sariling My.SSS account, na matatagpuan naman sa SSS website. Ito’y upang ganap na i-access ang iba’t ibang online service facilities ng SSS lalo na sa pagpa-file ng iyong mga application para sa loans at benefit claims mo.

Kabilang ang filing ng disability benefit claim sa mga benepisyong maaaring mai-file online gamit ang My.SSS Portal. Ito ay batay sa SSS Circular 2022-039 o ang Online Filing of Social Security (SS) Disability Claim Application (DCA) Through the MY.SSS Portal. Para sa iba pang detalye ukol sa online filing ng disability benefit claim, maaari mong bisitahin ang link na ito: https://bit.ly/3ZdYwou.

***

Mula Hunyo 22 hanggang Setyembre 21, 2023 ay tatanggap ang SSS ng aplikasyon para sa Calamity Assistance Package (CAP) na inilunsad nito para sa mga miyembro at pensyonado na na naapektuhan ng kasalukuyang volcanic activity ng Bulkang Mayon sa Bicol Region na nagsimula noong Hunyo 5, 2023. Ito ay binubuo ng Calamity Loan Assistance Program (CLAP) para sa SSS members at ang Three-month advance pension para sa lahat ng SSS at Employee’s Compensation (EC) pensioners.

Ang CAP ay magbibigay ng tulong pinansyal sa mga miyembro at pensyonado sa lalawigan ng Albay na ngayon ay nasa ilalim ng state of calamity bunga ng pag-aalburoto ng nasabing bulkan. Kasama dito ang mga bayan ng Bacacay; Camalig, Daraga (Locsin), Guinobatan, Jovellar, Libon, Ligao, Malilipot, Malinao, Manito, Oas, Pio Duran (Malacbalac), Polangui, Rapu-Rapu, Sto. Domingo, Tabaco at Tiwi, at ang lungsod ng Legazpi.

***

Patuloy pa ring tumatanggap ng aplikasyon ang SSS para sa loan penalty condonation program nito. Inilunsad ang Consolidation of Past Due Short-Term Member Loans with Condonation of Penalty Program (ConsoLoan) para tulungan ang mga miyembro na mayroong past-due loans sa SSS. Sa ilalim ng programa, hindi na sisingilin ang kaukulang penalties o multa ng kanilang past-due loans. Sa halip, ang tangi na lamang nilang babayaran ay ang orihinal o principal amount at interes nito.

Sakop ng ConsoLoan ang salary loan, calamity loan, Salary Loan Early Renewal Program (SLERP), emergency loan at restructured loans gaya ng Loan Restructuring Program (LRP) noong mga nakaraang taon.

Samantala, maaari nilang bayaran ang prinsipal at interes sa pamamagitan ng one-time full payment, o kaya’y bayaran kahit 10% nito bilang down payment at ang natitirang balanse ay babayaran ng installment sa loob ng hanggang 60 buwan o 5 taon, depende sa halaga ng kanilang pagkakautang.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "MYSSSPH" at sumali sa SSS Viber Community, “MYSSSPH Updates." Maaari din ninyong bisitahin ang uSSSap Tayo Portal sa https://crms.sss.gov.ph/.

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

3-month advance pension sa mga biktima ng Mayon

@Buti na lang may SSS | July 9, 2023

Dear SSS,

Magandang araw! Ako ay isang SSS pensioner na nakatira sa Camalig, Albay. Nais kong itanong kung paano mag-apply para sa three-month advance pension para sa aming mga pensioner na naapektuhan ng volcanic activity ng Mayon Volcano. Salamat. - Lolo Chad

Mabuting araw sa iyo, Lolo Chad!

Noong nakaraang Linggo ay ating tinalakay ang Calamity Loan Assistance Program (CLAP) na bahagi ng SSS Calamity Assistance Package (SSS Circular No. 2023-002) na binuksan noong Hunyo 22, 2023 at tatagal nang hanggang Setyembre 21, 2023 para tulungan ang mga miyembro at pensyonado na naapektuhan ng kasalukuyang volcanic activity ng Bulkang Mayon sa Bicol Region na nagsimula noong Hunyo 5, 2023.

Sa panahon ng kalamidad gaya ng pagputok ng bulkan, ang SSS ay nagbibigay ng financial assistance hindi lamang sa mga naapektuhang miyembro kundi pati rin sa mga pensyonado na naninirahan sa affected areas. Kaya ating tatalakayin ngayon ang ikalawang bahagi ng SSS Calamity Assistance Package. Ito ang three-month advance pension para sa lahat ng mga SSS at Employee’s Compensation (EC) pensioners.

Kuwalipikado sa nasabing programa ang mga pensyonado na naninirahan sa lalawigan ng Albay na ngayon ay nasa ilalim ng state of calamity. Kasama rito ang mga bayan ng Bacacay; Camalig, Daraga (Locsin), Guinobatan, Jovellar, Libon, Ligao, Malilipot, Malinao, Manito, Oas, Pio Duran (Malacbalac), Polangui, Rapu-Rapu, Sto. Domingo, Tabaco at Tiwi, at ang lungsod ng Legazpi.

Sa ilalim ng three-month advance pension, paunang ibinibigay ng SSS ang 3 buwang pensyon ng isang pensyonado. Layunin din ng SSS na makatulong sa dagliang pangangailangan ng mga pensyonado nito tulad ng pagbili ng mga gamot at pagkain kasama na ang pagpapaayos ng inyong nasirang kabahayan, kung mayroon man.

Lolo Chad, halimbawa, kung maaprubahan ngayong buwan ng Hulyo ang aplikasyon ninyo, maaari mong makuha ang pensyon para sa mga buwan ng Agosto hanggang Oktubre 2023.

Hindi ito pautang kaya wala kayong babayaran dito. Subalit, kung i-advance na sa inyo ang inyong pensyon, ang muling pagtanggap n’yo ng inyong regular na buwanang pensyon ay magsisimula muli sa buwan ng Nobyembre 2023 o makalipas ang 3 buwan.

Dagdag pa rito, ang mga pensyonado na nakakuha ng advance pension mula sa mga nakaraang Calamity Assistance Package at kasalukuyang suspendido ang kanilang pensyon dahil dito ay maaari pa ring mag-avail ng three-month advance pension para sa volcanic activity, sa kondisyon na ang paunang pensyon ay hindi lalampas sa tatlong buwan sa anumang oras.

Samantala, hindi naman maaaring mag-apply ang mga pensyonadong may kasalukuyang pagkakautang sa ilalim ng Pension Loan Program.

Para makapag-apply, kinakailangan lamang na punan ang Application for Assistance Due to Calamity/Disaster Form na maaari n’yong i-download sa aming website (www.sss.gov.ph). Dapat ding sertipikahan ng Barangay Chairman ng inyong lugar ang form bilang patunay na kayo ay naninirahan sa mga apektadong lugar na ating mga nabanggit. Subalit, kung hindi ito nalagdaan ng inyong Barangay Chairman, maaari kayong magsumite ng sertipikasyon mula sa Department of Social Welfare and Development (DSWD) o NDRRMC na kayo ay naninirahan sa isa sa ating mga nabanggit na apektadong lugar. Maaari n’yo namang ipasa ang accomplished form sa pinakamalapit na sangay ng SSS.

Ipapadala ang tseke para sa nasabing benepisyo sa sangay ng SSS kung saan kayo nag-file. Maaari mong i-claim ang tseke sa nasabing SSS branch sa loob ng 10 araw. Subalit, kung lagpas na sa 10 araw at hindi ito na-claim, ipapadala ng SSS ang tseke sa inyong mailing address sa pamamagitan ng koreo.

***

Patuloy na tumatanggap ng aplikasyon ang SSS para sa loan penalty condonation program nito. Inilunsad ang Consolidation of Past Due Short-Term Member Loans with Condonation of Penalty Program (ConsoLoan) para tulungan ang mga miyembro na mayroong past-due loans sa SSS. Sa ilalim ng programa, hindi na sisingilin ang kaukulang penalties o multa ng kanilang past-due loans. Sa halip, ang tangi na lamang nilang babayaran ay ang orihinal o principal amount at interes nito.

Sakop ng ConsoLoan ang salary loan, calamity loan, Salary Loan Early Renewal Program (SLERP), emergency loan at restructured loans gaya ng Loan Restructuring Program (LRP) noong mga nakaraang taon.

Samantala, maaari nilang bayaran ang prinsipal at interes sa pamamagitan ng one-time full payment, o kaya’y bayaran kahit 10% nito bilang down payment at ang natitirang balanse ay babayaran ng installment sa loob ng hanggang 60 buwan o 5 taon, depende sa halaga ng kanilang pagkakautang.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "MYSSSPH" at sumali sa SSS Viber Community, “MYSSSPH Updates." Maaari din ninyong bisitahin ang uSSSap Tayo Portal sa https://crms.sss.gov.ph/.

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Filing ng SSS Calamity Loan para sa mga biktima ng Mayon, puwede na

@Buti na lang may SSS | July 2, 2023

Dear SSS,

Magandang araw! Nais ko sanang malaman kung mayroon bang calamity loan na ibinibigay ang SSS para sa mga naapektuhan ng pagputok ng Mayon Volcano. Paano ba mag-apply dito? Salamat. - Selena ng Guinobatan, Albay

SAGOT:

Mabuting araw sa iyo, Selena!

Simula noong nakaraang Huwebes, Hunyo 22, 2023, binuksan ng SSS ang Calamity Assistance Package (CAP) para sa mga miyembro at pensyonado na naapektuhan ng kasalukuyang volcanic activity ng Bulkang Mayon sa probinsya ng Bicol.

Ang CAP ay magbibigay ng tulong pinansyal sa mga miyembro at pensyonado sa buong lalawigan ng Albay na ngayon ay nasa ilalim ng state of calamity. Kasama rin sa mga lugar na ito ang mga bayan ng Bacacay; Camalig, Daraga (Locsin), Guinobatan, Jovellar, Libon, Ligao, Malilipot, Malinao, Manito, Oas, Pio Duran (Malacbalac), Polangui, Rapu-Rapu, Sto.Domingo, Tabaco at Tiwi, at ang lungsod ng Legazpi.

Makakakuha rin ng financial assistance mula sa CAP ang mga lugar na maaari pang ideklara ng National Disaster and Risk Reduction Management Council (NDRRMC) na nasa ilalim ng state of calamity dahil sa nasabing volcanic activity.

Ang CAP ay binubuo ng Calamity Loan Assistance Program (CLAP) para sa miyembro at ang three-month advance pension para sa lahat ng SSS at Employee’s Compensation (EC) pensioners.

Talakayin muna natin ang hinggil sa calamity loan. Upang mag-qualify ka, Selena, sa CLAP, kinakailangan na matugunan mo ang sumusunod na kondisyon:

· Mayroong My.SSS account sa www.sss.gov.ph;

· Nakapaghulog ng hindi bababa sa 36 monthly contributions, anim (6) dito ay dapat posted na sa loob ng huling 12 buwan bago ang buwan ng filing ng aplikasyon;

· Mayroong hindi bababa sa 6 na posted monthly contributions sa kasalukuyang coverage o membership type bago ang buwan ng filing ng kaniyang loan application;

· Kasalukuyang employed, self-employed, voluntary kabilang na ang non-working spouses, o land-based overseas Filipino workers members;

· Kung ikaw ay employed, kinakailangang i-certify ng iyong employer ang CLAP application sa pamamagitan ng My.SSS account nito;

· Residente ng NDRRMC-declared calamity area na may pag-aari sa nabanggit na mga lugar;

· Hindi pa nabibigyan ng anumang final benefit gaya ng permanent total disability o retirement;

· Walang outstanding loan sa Loan Restructuring Program at nakaraang CLAP.

Ang filing ng aplikasyon sa CLAP ay sa pamamagitan ng online gamit ang My.SSS ng miyembro. Kung ikaw naman ay isang empleyado ng kumpanya, dapat isertipika ng iyong employer ang iyong CLAP application gamit din ang kanilang My.SSS account.

Bukas ang naturang programa sa loob ng tatlong (3) buwan simula Hunyo 22 hanggang Setyembre 21, 2023.

Selena, makakahiram ka naman ng katumbas ng average ng iyong monthly salary credit (MSC) sa huling 12 buwan. Ang monthly salary credit naman ay ang batayan ng kabuuang kinikita ng miyembro sa loob ng isang buwan.

Halimbawa, kung ikaw ay kumikita ng P19,250.00 bawat buwan at naghuhulog ng P 2,730.00 kada buwan bilang iyong SSS contribution, ang iyong MSC ay 19,500.00. Kung ikaw ay nag-file sa calamity loan ngayong Hulyo 2, 2023, iko-compute ang average na MSC mo mula Hulyo 2022 hanggang Hunyo 2023. Ipagpalagay natin na ang iyong MSC mula Hulyo hanggang Disyembre 2022 ay nasa 18,000 at ang iyong MSC mula Enero hanggang Hunyo 2023 ay nasa 19,500 naman. Ang magiging average MSC mo ay 18,750.00 kaya ang magiging halaga na iyong matatanggap para sa iyong calamity loan ay P18,000.

Ang nasabing pautang ay maaari mong bayaran nang installment sa loob ng 24 buwan.

Ang amortisasyon ay magsisimula sa ikalawang buwan mula sa petsa na naaprubahan ang iyong calamity loan. Halimbawa, nanghiram ka ngayong Hulyo 2, 2023, ibig sabihin nito ang iyong pagbabayad ay magsisimula sa Setyembre 2023. Samantala, ito ay may interes na 10% kada taon hanggang sa ito ay mabayaran, na kinukwenta sa lumiliit na balanse ng loan sa loob ng 24 buwan. Hindi na rin ibabawas ang 1% na service fee.

Ang crediting ng nasabing calamity loan ay sa pamamagitan ng account ng miyembro sa Unified Multi-Purpose Identification (UMID) - Automated Teller Machine (ATM) Card, o account nito sa alinmang bangko na kabilang sa Philippine Electronic Fund Transfer System and Operations Network (PESONet), o kaya’y sa kanilang Union Bank of the Philippines (UBP) Quick Cards na nakarehistro sa Disbursement Account Enrollment Module (DAEM) na matatagpuan sa My.SSS.

Sa isang linggo naman ay ating tatalakayin ang three-month advance pension para sa ating mga pensyonado.

***

Patuloy na tumatanggap ng aplikasyon ang SSS para sa bagong loan penalty condonation program nito. Inilunsad ang Consolidation of Past Due Short-Term Member Loans with Condonation of Penalty Program (ConsoLoan) para tulungan ang mga miyembro na mayroong past-due loans sa SSS. Sa ilalim ng programa, hindi na sisingilin ang kaukulang penalties o multa ng kanilang past-due loans. Sa halip, ang tangi na lamang nilang babayaran ay ang orihinal o principal amount at interes nito.

Sakop ng ConsoLoan ang salary loan, calamity loan, Salary Loan Early Renewal Program (SLERP), emergency loan at restructured loans gaya ng Loan Restructuring Program (LRP) noong mga nakaraang taon.

Samantala, maaari nilang bayaran ang prinsipal at interes sa pamamagitan ng one-time full payment, o kaya’y bayaran kahit 10% nito bilang down payment at ang natitirang balanse ay babayaran ng installment sa loob ng hanggang 60 buwan o limang (5) taon, depende sa halaga ng kanilang pagkakautang.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "MYSSSPH" at sumali sa SSS Viber Community, “MYSSSPH Updates." Maaari din ninyong bisitahin ang uSSSap Tayo Portal sa https://crms.sss.gov.ph/.

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.