Bagong halaman, natuklasan sa Mt. Arayat

ni Thea Janica Teh | September 18, 2020

Isang bagong plant species ang natuklasan sa Mount Arayat National Park sa Pampanga ng research team mula sa Angeles University Foundation at University of Sto. Tomas at pinangalanang Pyrostria arayatensis.

Ito ay inilabas sa international scientific journal Annales Botanici Fennici noong August 10.

Sa pagkakatuklas sa bagong halaman, sinabi ni Department of Environment and Natural Resources (DENR)-Central Luzon Office Executive Director Paquito Moreno Jr. na napapanatili ng Mt. Arayat ang healthy biological diversity dahil patuloy na nabubuhay at lumalaki ang mga rare native plants dito.

Kaya naman, pinaalalahanan din ni Moreno na protektahan ang lugar na ito dahil ito ay importante sa ecosystem ng rehiyon at nakapaloob sa Expanded National Integrated Protected Areas System Act na ipinagbabawal ang pagwasak sa biodiversity sa naturang lugar.

Bukod pa rito, dito rin natuklasan ang 49 species ng halaman at puno, 86 species ng ibon, 14 species ng mammals at 11 species ng reptiles. Ilan sa mga natuklasan at iniingatang halaman at puno sa lugar na ito ay ang Flame Trees (Brachychiton acerifolius) at Chamberlain’s Pitogo (Cycas chamberlaini).

2 nagbebenta ng bayawak, arestado

ni Lolet Abania | September 9, 2020

Nasagip ng mga tauhan ng Department of Environment and Natural Resources (DENR) Region III at pulisya ang 11 bayawak na ibebenta sana sa Pampanga.

Inaresto rin ng awtoridad ang dalawang tindero matapos na maaktuhang nagbebenta ang mga ito ng bayawak na nagkakahalaga ng P300 hanggang P900 kada isa depende sa laki. Wala namang binanggit na pagkakakilanlan sa mga suspek.

Ayon sa dalawang suspek, galing umano sa palaisdaan ang mga bayawak. Subali’t tinanggalan na ang mga ito ng mga ngipin. Gayunman, sasampahan ng kaukulang kaso ang mga naturang tindero.

Samantala, dinala na ang mga bayawak sa isang rehabilitation center sa Clark, Pampanga bago ito tuluyang pakawalan.

Ayon sa Republic Act 9147 of 2001 o Wildlife Resources Conservation and Protection Act, nakapaloob dito ang pag-iingat at proteksiyon sa wildlife species at sa mga tirahan nito. May karampatang parusa sa sinumang lalabag sa batas.

Itinuturing na endangered species ang bayawak kaya ipinagbabawal ang panghuhuli, pagbebenta at pag-aalaga ng mga ito.

Chemical ng insect repellent, nakapapatay ng coronavirus

ni Ronalyn Seminiano Reonico | August 27, 2020

Napag-alaman ng mga siyentipiko mula sa Defence Science and Technology Laboratory (DSTL) ng Britain sa kanilang preliminary study na nakapapatay umano ng coronavirus ang chemical na ginagamit sa insect repellent.

Ang Citriodiol na active ingredient ng insect repellents katulad ng Mosi-guard ay mayroon umanong anti-viral properties.

Ayon sa pag-aaral, "Mixing a virus suspension with Mosi-guard spray or selected constituent components resulted in a reduction in SARS-CoV-2.

"Mosi-guard gave a significant decrease... resulting in no recoverable virus.”

Saad ng DSTL, "DSTL is hopeful that the findings in this research can be used as a springboard for other organizations to expand and develop the research, as well as to confirm the findings in this publication.”