3,249 push up, ginawa sa loob ng isang oras

nina Mabel Vieron at Jenny Rose Albason @World News | July 17, 2023

Nabawi ng Australian fitness fanatic na si Daniel Scali, 30, ang record para sa pinakamaraming push up sa loob ng isang oras.

Nakagawa si Daniel ng 3,249 push up, na na-break ang record na 3,206 na nakamit ng kapwa Aussie, si Lucas Helmke, noong Nobyembre 2022.

Dati nang naitakda ni Daniel ang record noong Abril 2022 na may 3,182 na push up.

Alinsunod sa Guinness World Records guidelines, ang isang kumpletong push up ay binubuo ng pagbaba ng katawan hanggang sa maabot ang at least 90-degree na anggulo sa siko, pagkatapos ay itaas hanggang ang mga braso ay matuwid. Taliwas sa popular na paniniwala, ang dibdib ay hindi kinakailangang dumikit sa sahig.

Ang higit na kahanga-hanga kay Daniel ay ang katotohanang dumaranas siya ng complex regional syndrome (CRPS), ibig sabihin, ang kanyang kaliwang braso ay halos laging sumasakit.

Sinisikap ni Daniel na ma-break pa ang ibang fitness records sa taong ito, at target niya ring bawiin ang isa pang record na dati na niyang hawak, ang ‘longest time in an abdominal plank position’.

Dambuhalang planeta na parang salamin, nadiskubre

nina Mabel Vieron at Jenny Rose Albason @World News | July 17, 2023

Mayroong bagong planeta na malahiganteng salamin ang hitsura at napakainit ng temperatura ang nadiskubre ng mga nagsasaliksik sa loob ng ating galaxy.

Ayon sa ulat ng Next Now, sinabing pinangalanang LTT9779b ang planeta, na nag-o-orbit sa isang star kada 19 oras na mas malaki nang bahagya sa Neptune. May layo itong 264 light years mula sa Earth, na halos limang beses ang laki sa ating mundo.

May temperatura itong umaabot sa 1,800 Celsius, o mas mainit pa sa molten lava.

Base sa James Webb Space Telescope, napalilibutan ang LTT9779b ng mala-metal na ulap na binubuo ng titanium at silicates. 80 percent umano ng ilaw ang nagre-reflect sa atmosphere ng planeta kaya tila isa itong higanteng salamin. Ito umano ang itinuturing na "most reflective object" sa universe ngayon.

Mga hakbang para mapalawak ang kaalaman sa pagsasalita at pagsusulat nang ingles

ni Loraine Fuasan @Life & Style | March 19, 2023

Sa malawak na hanay ng mga industriya, kabilang ang computer coding, international business, at higher education, ang modernong Ingles ay itinuturing na pangkaraniwang lengguwahe sa mundo.

Ang Ingles ang pinakagamit na wika sa 67 bansa at 27 non-sovereign entity sa buong mundo, kabilang ang mga katutubo at hindi katutubo. Tulad ng Latin o Griyego, ang Ingles ay naging karaniwang wika sa buong mundo.

Ang Estados Unidos at India ang may pinakamaraming nagsasalita ng Ingles, kung saan pumapatak na 283 milyon sa U.S, at 125 milyon naman sa huli. Sumunod ang Pakistan na may 108 milyon, 79 milyon sa Nigeria, at 64 milyon naman sa Pilipinas.

Gayunman, alam natin na hindi lahat ng Pilipino ay mahusay magsalita at magsulat nang Ingles.

May mga ilan na marunong magsulat, ngunit hindi kayang makipag-usap gamit ang naturang wika. Kaya ito ang mga tips upang matutong mag-Ingles:

1. SANAYIN ANG SARILI NA MAGSALITA NANG INGLES. Ang pagsisikap na matuto ay paraan para mas mahasa pa ang ating utak at masanay tayong mag-Ingles. Gayundin, sanayin ang sarili na makipag-usap gamit ang naturang wika.

2. GUMAMIT NG APPS SA PAGTUKLAS NG MGA SALITA NA KAILANGANG ISALIN SA SALITANG INGLES. Ito ang paraan upang mapadali ang paghahanap ng mga salitang hindi na kayang isalin sa Ingles. Maraming magagamit na apps sa pag-aaral, at piliin ang pinakamagandang uri nito para sa iyong sariling mga paraan sa pag-aaral ng wikang Ingles.

3. PAG-ARALAN KUNG PAANO BIGKASIN ANG BAWAT SALITA NA SASABIHIN. Sa pag-aaral ng Ingles, hindi lang kailangang matuto kung paano magsalita at magsulat gamit ang wikang ito kundi kakailanganin mo ring pag-aralan kung paano bigkasin ang mga salita na iyong natutunan. Sa ganitong paraan, mas mauunawaan ka ng iyong kausap at hindi ka pagtatawanan ng iba na mas marunong sa iyo.

4.UNAWAIN ANG BUONG PANGUNGUSAP. Kailangan mong alamin kung naiitindihan ng kausap mo ang iyong sasabihin, lalo na kung ito ay buong pangungusap, hindi lang ang isang salita. Kung hindi mo pag-aaralan ang iyong sasabihin o isusulat, hindi ito maiitindihan ng iba at mababalewala ang lahat. Ang tamang pagbigkas ng bawat salita ay nakakatulong bumuo ng pangungusap nang walang pag-aalinlangan.

5. MANOOD NG MGA PALABAS NA MAY ENGLISH SUBTITLE. Manood ng mga palabas na Ingles at pag-aralan ito. Makakatulong ito na sanayin ang ating sarili sa pagsasalita at pagsusulat nang Ingles tulad ng mga tamang pagbigkas ng mga salita at tamang pagbuo ng mga pangungusap.

Ang mga hakbang na ito ay simula pa lamang para maitama ang mga salita at pagbigkas, makakatulong din talaga ang mga ito na matuto ang mga Pilipino sa wikang Ingles. Mas magandang gamitin ang Ingles bilang midyum ng pagtuturo dahil mas maipapaliwanag ang mga ideya at konsepto sa mas madaling paraan, sapagkat karamihan sa mga Pilipino ay madalas ng gumagamit ng internet, na ang lingguwahe ay Ingles.