Hindi pagpapasahod...

kawalan ng separation benefits at iba pang pang-aabuso sa mga empleyado ng BPO sa gitna ng pandemya, aksiyunan!

ni Imee Marcos - @Buking | July 01, 2020

Nakakapikon ang mga sumbong sa ating tanggapan lately ng ilang mga kababayan natin na nagtatarabaho sa mga call center company. Alam n’yo ba ang sumbong nila? Samu’t saring pang-aabuso habang nasa kasagsagan tayo ng krisis dulot ng COVID-19.

Knows naman nating maraming nawalan ng trabaho, pero ang masakit nito, daragdag pa ‘yung mga problema at kaso ng pang-aabuso ng mga kumpanya sa mga maliliit na manggagawa tulad sa mga call center agents.

Sumbong sa atin ng ilang mga empleyado sa Business Process Outsourcing (BPO) na call center, eh, lantaran ang pang-aabuso sa kanila bunsod ng flexible na oras ng trabaho na ipinatutupad sa kanilang mga kumpanya dahil sa pandemya.

Biruin n’yo, mga frennie, ikinakatwiran ng mga walang konsensiyang call center ang advisory ng Department of Labor and Employment (DOLE) bago ipatupad ang lockdown noong Marso para ipitin ang sahod ng kanilang mga empleyado o kaya ay ipasa sa mga ito ang operational costs ng kumpanya para hindi malugi? Santisima!

Isa sa mga reklamo nitong mga nakakaawa nating call center agents ay ‘yung hindi sila pinasahod ng 60 hanggang 90 days? Hindi lang ‘yan, wala rin daw separation benefits na ibinigay sa mga sinibak at hindi binayaran ang kuryente at internet access sa mga panggabing kawani na naka-work from home. Nakakalokah!

Meron pa mga beshy, daing rin ng call center agents ang mas mahabang oras ng trabaho para sa mga work-from-home na walang dagdag na bayad sakaling bumigay ang kanilang system tools, at sapilitang maternity leave na walang kasiguraduhan kung makababalik pa sa trabaho. Grabe ha!

Take note, mga seestra, hindi lang sa maliliit na kumpanya nanggagaling ang mga reklamo, kundi pati sa mga nangungunang call center na kumikita halos ng bilyon kada taon. ‘Yung isang kumpanya nga, halos kalahati ang tinanggal nila sa kanilang mga empleyado! Que Horror!

Hay naku! Dapat dumaan muna sa konsultasyon ang mga empleyado sa anumang pagbabago sa kanilang kumpensasyon bunsod ng flexible na oras ng trabaho, batay sa Labor advisory 9-20, at dapat i-report ng kumpanya sa pinakamalapit na opisina ng DOLE na nakasasakop sa lugar. Ganern!

DOLE, plis lang bantayan n’yo ang mga abusado at mapagsamantalang kumpanyang ‘yan kung sumusunod ba sila sa batas, hindi malayong lumaki pa ang problema ng unfair labor practice na ‘yan ng BPOs, por diyos por santo! Huwag n’yo silang palusutin! Gigil much ako sa kanila, busisiin na ‘yan!

Pagtulong sa mga seafarers o tripulante na nawalan ng kabuhayan dahil sa COVID-19, now na!

ni Imee Marcos - @Buking | June 29, 2020

Sangkaterbang seafarers o mga Pinoy na tripulante ang nagsisibalik sa bansa dahil sila mismo ay mga casualty rin sa kani-kanilang mga trabaho dulot ng pananalasa nitong COVID-19 sa buong mundo.

Kamakailan lang mga besh, mahigit 200 seafarers ang umuwi galing Hamburg, Germany sa inisyatibo na rin ng ilang manning agency. Halos matuliro na raw sa kakaisip ang mga nasabing seaman noong na-lockdown sila sa karagatan dahil sa COVID-19. Talagang nakakaawa naman!

Kaya mga friends, super-duper ang paghirit natin sa Department of Labor and Employment (DOLE) na sana naman ay bigyan sila ng ayuda, ‘yung iba ay humihingi ng tulong para makauwi ng probinsiya, gayundin ng pansamantalang ikabubuhay habang nasa Pilipinas. Hirit din nilang sagutin na ng pamahalaan ang mga gastos sa safety protocols para masigurong wala silang COVID-19.

Dapat pa bang sabihan ang ating gobyerno sa mga bagay na ganito, hindi na uy! Alam naman nating kabilang sila sa nagpapasok sa bansa ng mga dolyares na remittance. So, hindi na dapat i-memorize ‘yan na kailangan silang tulungan!

Request naman ng seafarers na papunta sa Germany at iba pang bansa kapalit ng mga umuwi nilang kasamahan, luwagan na rin ang restriksiyon ng kaunti sa pagbiyahe nila palabas ng bansa.

Remind ko lang sa ating pamahalaan na obligasyon nating mga nasa gobyerno na ayudahan ang ating mga OFW. Ano pang silbi na gawin silang mga bayani kung hindi man lang natin sila matulungan?

Malaking pera ang maiiambag ng mga papaalis na seafarers sa ating ekonomiya, kaya plis lang dapat palagi tayong full support sa kanila. Huwag naman nating menosin ang kanilang mga kontribusyon sa kabang-bayan lalo na ngayong may krisis!

Superbagal na internet connection sa ‘Pinas, kailangang solusyunan agad ng DICT, ngayon na!

ni Imee Marcos - @Buking | June 24, 2020

Pagdating sa internet connection, iisa ang daing ng mga Pinoy, superbagal!

Nakakapikon talaga at mapapasigaw ka ng why, oh why my Wi-Fi?! Lalo na kung nagmamadali ka at may hinahabol na deadline. ‘Kalokah!

Juskoday naman Department of Information and Communications Technology (DICT)! Ano na mga amigo, may pag-asa pa ba tayo?

Knows ba ninyo mga friendship na ang ‘Pinas ang kulelat sa buong Asya pagdating sa internet speed? Ang masakit na katotohanan, dinaig pa tayo ng mas maliliit na bansa kaysa sa atin in terms of economy, tulad ng Laos, Cambodia and Myanmar? Matagal na dapat tayong nag-upgrade pero hanggang ngayon ay 3.5 mbps pa lang tayo! Kawawa lang ang peg.

Level up na dapat ang ‘Pinas at siguruhing prayoridad ang digital infrastructure tulad ng pagbibigay-importansiya sa public works at transport projects sa ilalim ng programang Build-Build-Build.

At kung ikukumpara naman ang ating bansa sa mauunlad na estado tulad ng Singapore at Hong Kong, halos 19 hanggang 22 times na mas mabilis sila kesa sa atin. Hindi lang ‘yan sabi-sabi dahil base ‘yan sa datos ng Ookla Net Index na kilala sa buong mundo pagdating sa internet-performance test.

Plis naman DICT! Kilus-kilos pa more, santisima! Dapat prayoridad ng ating pamahalaan ang internet speed ngayong nasa gitna tayo ng pandemya at nahaharap sa tinatawag na new normal kung saan nakabase ang halos lahat ng transaksiyon sa paggamit ng internet.

Mabagal na internet connection dagdag pa ang limitadong pag-access online resulta niyan mga besh, makupad na ekonomiya at mababang uri ng pamumuhay, pahirap lalo sa mga lokal na pamahalaan na nasa mga liblib na lugar sa bansa! Ano bah?

Eh tanong ko nga pala, anyare sa ikatlong telco player? Tila natabunan na sila, ha?

Natutulog na ba sa pansitan? ‘Wag naman, maraming naghihintay sa project n’yo!

Take note, mas magiging matagumpay ang gobyerno sa contact tracing, online education, e-commerce at e-jobs at maging pagresolba ng krimen at mga eleksiyon sa hinaharap kung mapagbubuti at mapaghuhusay ang digital infrastructure ng bansa.

Ganern! Kaya plis lang, DICT, kilos na, bilisan na!