Plasma ng mga COVID-19 survivors, nagkakabentahan na!

ni Imee Marcos - @Buking | July 15, 2020

Isa sa pinakamagandang asal ng mga Pinoy, eh, ‘yung hindi sumusuko, hindi nawawalan ng pag-asa. At kitang-kita natin ‘yan sa paglaban natin sa COVID-19.

Effort to the max sa paghahanap ng gamot sa virus ang buong mundo. At dahil wala pa ngang nadidiskubre, ang ganap na lang ay paigtingin na muna ‘yung remedyo na ginagamit ngayon sa mga ospital para makarekober ang mga pasyenteng tinamaan ng nakamamatay na sakit.

At dahil d’yan mga besh, suhestiyon natin ay agapan at samantalahin ang nakagagaling na plasma, ito ‘yung colorless fluid na makikitang sangkap sa dugo na matatagpuan sa mga gumaling sa COVID-19.

May chika na meron talagang nananamantala rito. As in may bentahan daw na nangyayari ng plasma sa Central Visayas. Nakakalokah! Palibhasa, base sa mga medical research, talagang nakatutulong ang plasma para mapababa ang tsansa na mamatay ang pasyente na tinamaan ng COVID-19 at mismong World Health Organization (WHO), nagbigay permiso sa paggamit nito.

Pero kung ganyan ang nangyayari, marapat lang na agapan at bumuo ng plasma banks sa lahat ng pampubliko at pribadong ospital sa bansa habang naghihintay ng epektibong bakuna. Ito ay para maiwasan na rin ang bentahan at pagbili ng plasma.

Kailangan rin ayusin ng Department of Health (DOH) ang sistema ng pagbuo ng mga alituntunin kung sino ang maaaring maging donor at mga pamamaraan sa maayos na pagkuha ng plasma upang maiwasan ang mga naipapasang sakit.

At para mas matibay ang ating suhestiyon, push natin ang Senate bill 1648, o ang Plasma Donation and Collection Act, para pasimulan ang pagkuha ng plasma sa mga donor at magkaroon ng pasilidad para rito ang mga ospital sa buong bansa.

Kailangan ang long term solution sa ganitong uri ng problema, lalo pa’t hindi natin tiyak kung hanggang kalian tatagal ang pandemyang ito. Kaya please lang, aksiyon na!

“Manok” ni P-Digong, nganga ‘pag ‘di nasolusyunan ang super-mahal na singil sa tubig at kuryente...

period!

ni Imee Marcos - @Buking | July 13, 2020

Sanay ang mga Pinoy sa “kuyog” at palaging naghahanap nang maituturo kung sino ang dapat managot. Kaya nga, nakini-kinita ko na hindi malayong dahil sa mga kapalpakan ng mga kumpanya ng elektrisidad at tubig, hindi lang si Pangulong Rodrigo Duterte ang tatamaaan ng sisi, kundi maging ang mga kandidato ng administrasyon sa darating na eleksiyon.

Naku, mga besh, ‘wag naman sanang ganu’n, eh ako man mga frennie, shock to death at buryok sa sobrang taas ng singil sa kuryente at singil sa tubig. Ano ba talaga kasi ang naging basehan sa super-mahal na electric at water bill? ‘Kalokah!

Dapat talaga hindi sila basta-basta maniningil na base lamang sa “estimate”, kailangang magkaroon muna ng aktuwal na “meter reading” sa mga kuntador ng bawat konsyumer bago maningil ang Meralco, Maynilad at Manila Water na siyang pagbabatayan ng billing ng tatlong kumpanya. Juskoday! Chika ng mga friends, wala nga raw silang nakitang taga-Meralco na nagbasa ng kanilang metro!

Bago pa ma-high blood nang husto, dahil sa tuloy-tuloy na pambibiktima ng mga tatlong kumpanyang ito sa publiko, baka puwedeng panagutin na ang mga ‘yan. Sobra na ang dinaranas na paghihirap ng ating mga kababayan!

At matiyak din sanang hindi basta-bastang makakapagputol ang mga ito sa mga kabahayan na hindi makabayad agad. Panawagan natin kay Manong Digong na huwag hayaang makaperwisyo ang mga ito lalo na ngayong hirap na hirap ang ating mga kababayan.

Ang hindi pag-aksiyon ng gobyerno sa mga panawagan ng ating mga kababayan ay posibleng maging daan para malagay sa kangkungan ang mga kandidato ng administrasyon sa susunod na halalan. Posibleng maging barometro ito sa kung sino ang dapat ihalal at dapat ibasura sa next elections.

Tatandaan ng mga tao kung sino sa kanila ang tumulong para labanan ang mga pananamantala ng mga service utilities at kung sino rin ang nandedma at nag-abandona sa kanila.

Pagbabalik-eskuwela, ‘wag ipilit kung ‘di keri, paghandaan munang mabuti!

ni Imee Marcos - @Buking | July 10, 2020

Nakow! Papalapit na nang papalapit ang itinakdang pagbabalik-eskuwela ng Department of Education (DepEd) ngayong Agosto 24. Kaya naman pressured na talaga ang mga guro, school personnel pati na rin ang mga magulang at mga bagets na papasok dahil patuloy pa rin ang pagtaas ng bilang ng mga tinatamaan ng COVID-19.

Imbes na ma-flatten ang sinasabing curve ay patuloy ang pagtaas ng bilang ng mga nadadale ng virus!

Ngayon, wala pa ring malinaw at solid na plano ang DepEd lalo pa’t talagang kakarampot lang ang enrollees. Kaya nga dapat tulungan ang mga taga-DepEd.

Maganda sigurong ikonsiderang huwag pairalin ang “one size fits all” dahil hindi nga ito akma sa panahon. Meaning, dapat nakadepende ang school opening kada lugar. Kung zero ang kaso ng COVID-19 sa isang lugar, baka puwedeng i-apply ang face-to-face learning na paiiralin pa rin ang health safety protocols habang blended learning naman sa mga lugar na mataas ang kaso ng COVID-19.

Ang mga LGUs ang nakakaalam sa sitwasyon ng bawat lugar, kaya dapat tulungan nito ang kani-kanilang school board para sa sistemang gagawin bago pa tuluyang magbukas ang kalse.

And speaking of school board na binubuo ng mga konsehal, presidente ng parents-teacher association (PTA) at kinatawan mula sa non-academic personnel mula sa public school, baka puwedeng i-expand ang membership ng board at isama ang pribadong paaralan at barangay officials.

Knows naman nating matinding tinamaan ng pandemya ang mga private school at marami-rami sa kanila ang magsasara na. Isa pa, may dalawang milyong estudyante from private schools ang lilipat sa pampublikong paaralan. Kaya dapat talagang i-address ang isyung ito. Join din dapat ang mga taga-barangay dahil sila ang higit na nakakaalam sa sitwasyon ng mga paaralan sa kani-kanilang komunidad kaya malaking tulong ang kanilang insights.

Sa ganang akin naman, eh, kung hindi talaga makabuo ng maayos na plano ang DepEd sa school opening, baka mas mabuting i-postpone at paghandaan muna itong mabuti, magtulungan na ang DepEd, Department of the Interior and Local Government (DILG), Department of Health (DOH) at Department of Information and Communications Technology (DICT) bago buksan ang mga klase. Huwag ipilit kung hindi pa puwede dahil baka lalo lang maging sanhi ng pagkakahawahan at pagdami ng infected ng virus. Agree?