Pagbabalik-eskuwela, ‘wag ipilit kung ‘di keri, paghandaan munang mabuti!

ni Imee Marcos - @Buking | July 10, 2020

Nakow! Papalapit na nang papalapit ang itinakdang pagbabalik-eskuwela ng Department of Education (DepEd) ngayong Agosto 24. Kaya naman pressured na talaga ang mga guro, school personnel pati na rin ang mga magulang at mga bagets na papasok dahil patuloy pa rin ang pagtaas ng bilang ng mga tinatamaan ng COVID-19.

Imbes na ma-flatten ang sinasabing curve ay patuloy ang pagtaas ng bilang ng mga nadadale ng virus!

Ngayon, wala pa ring malinaw at solid na plano ang DepEd lalo pa’t talagang kakarampot lang ang enrollees. Kaya nga dapat tulungan ang mga taga-DepEd.

Maganda sigurong ikonsiderang huwag pairalin ang “one size fits all” dahil hindi nga ito akma sa panahon. Meaning, dapat nakadepende ang school opening kada lugar. Kung zero ang kaso ng COVID-19 sa isang lugar, baka puwedeng i-apply ang face-to-face learning na paiiralin pa rin ang health safety protocols habang blended learning naman sa mga lugar na mataas ang kaso ng COVID-19.

Ang mga LGUs ang nakakaalam sa sitwasyon ng bawat lugar, kaya dapat tulungan nito ang kani-kanilang school board para sa sistemang gagawin bago pa tuluyang magbukas ang kalse.

And speaking of school board na binubuo ng mga konsehal, presidente ng parents-teacher association (PTA) at kinatawan mula sa non-academic personnel mula sa public school, baka puwedeng i-expand ang membership ng board at isama ang pribadong paaralan at barangay officials.

Knows naman nating matinding tinamaan ng pandemya ang mga private school at marami-rami sa kanila ang magsasara na. Isa pa, may dalawang milyong estudyante from private schools ang lilipat sa pampublikong paaralan. Kaya dapat talagang i-address ang isyung ito. Join din dapat ang mga taga-barangay dahil sila ang higit na nakakaalam sa sitwasyon ng mga paaralan sa kani-kanilang komunidad kaya malaking tulong ang kanilang insights.

Sa ganang akin naman, eh, kung hindi talaga makabuo ng maayos na plano ang DepEd sa school opening, baka mas mabuting i-postpone at paghandaan muna itong mabuti, magtulungan na ang DepEd, Department of the Interior and Local Government (DILG), Department of Health (DOH) at Department of Information and Communications Technology (DICT) bago buksan ang mga klase. Huwag ipilit kung hindi pa puwede dahil baka lalo lang maging sanhi ng pagkakahawahan at pagdami ng infected ng virus. Agree?

Say ng WHO, Pilipinas ang nangunguna sa paglobo ng may COVID-19 sa Western Pacific! que horror!

ni Imee Marcos - @Buking | July 8, 2020

Mas tumindi pa ang dami ng mga tinatamaan ng COVID-19 at nakakatakot talaga. Mas nakakapangamba ngayon ay ang kaligtasan ng mga manggagawa na struggle to the max sa pagpasok sa trabaho dahil sa limitadong pampublikong transportasyon. ‘Kalokah!

Nakakaloka rin ‘yung pahayag ng World Health Organization o WHO na ang Pilipinas daw ang may pinakamabilis na paglobo ng mga tinatamaan ng Coronavirus Disease 2019 sa Western Pacific! Que Horror!

Kaya naman mga besh, mega-push ako at naghain ako ng Senate Bill 1448 o Telecommuting Act na nagbibigay-probisyon para magkaroon ng flexible work arrangement ang mga employer sa kanilang mga empleyado.

Sa ilalim niyan ay papayagan ang isang empleyado na magtrabaho sa mga alternatibong lugar tulad ng work-from-home gamit ang telecommunication o computer technology.

Eh kasi, puwede namang gawin ng isang empleyado ang kanyang trabaho sa kanilang bahay at kung kailangan sa trabaho ng pisikal na presensiya ng isang empleyado sa opisina, dapat papasukin ng employer ang kanilang mga tauhan kapag office hours at tuwing weekdays pero hindi lalampas ng dalawang beses sa isang linggo.

Well, ganyan na talaga mga besh, tanggapin na natin ang katotohanan na malabo na tayong makabalik pa sa normal, new normal na talaga ang iiral!

Ibig sabihin lang, magpapatuloy na ang mga safety protocols ng new normal na may social distancing, bagong hygiene standard at may limitadong physical contact.

Gora na sa work-from-home dahil malaking bagay ito sa mga manggagawa, aminin man sa hindi, may advantage talaga ‘yan bukod sa safe sa COVID-19, menos gastos pa sa pamasahe at pagkain and mga frennie most of all, nagkakaroon pa ng mas maraming time ang mga magulang sa kanilang mga anak kahit pasingit-singit lang divah! Bongga!

Presyo ng mga purified water at iba pang pangunahing produkto, bantayan!

ni Imee Marcos - @Buking | July 6, 2020

Nasa gitna na nga tayo ng krisis at maraming nawalan ng trabaho, nagmahal ang singil sa kuryente at tubig, pati ba naman ‘yung basic na purified water, nagmahal na rin?

‘Kalokah mga frennie, wala nang mura ngayon at wala nang konsiderasyon kahit na katiting ang mga ganid na negosyante! Nagtataka naman ako, ‘yung kalimitang ibinibentang 5-gallon na water container ng purified water, eh, tumaas ang presyo, nasa P30 hanggang P35 pesos na ngayon!

Ang nakakaloka pa, meron din namang water refilling station na nagbebenta ng P25 lang. Ang tanong, ano naman ba ang pinagkaiba? Saka isa pang tanong, malinis ba talaga ‘yan?

Heler, dami akong reklamong nalaman sa mga water refilling station na hindi lang sa mataas ng presyo ng purified water, kundi ang maruming lalagyan ng tubig kasi nga mukhang hindi maayos ang pagkakahugas. Naku ha, nakakabahala naman ‘yan!

Sana naman ay remedyuhan agad ito ng Department of Trade and Industry (DTI). Nasa gitna tayo ng pandemic at ang kalusugan ng bawat isa ang mahalaga, kaya dapat sugurado rin tayo sa binibili at iniinom nating tubig mula sa mga water refilling station. Dapat sigurong magtakda na rin ng SRP para sa tubig.

Hiling din natin na dapat magsagawa ng regular na inspeksiyon sa mga water refilling station para matiyak na sumusunod ang mga ito sa kautusan tulad ng pagpapaskil ng sanitary permit kabilang na ang resulta ng monthly bacteriology water examinations. Dapat masigurong regular na pinapalitan ang kanilang mga filter sa tubig dahil talagang delikado ‘yun sa kalusugan ng kanilang mga customers.

Bigyan din dapat ng proper seminar at training ang mga empleyado ng mga water refilling station lalo na ngayong panahon na patuloy ang COVID-19. Super important ang maayos na paghuhugas ng water container, pagsusuot ng proper working garment at personal protective gear tulad ng hairnets, face mask at apron sa loob ng water refilling station.

Ang tubig ay buhay, kaya siguraduhin nating malinis ang ating inuming tubig at dapat masigurong hindi nasusuba ang bayan sa presyo nito lalo ngayong dumaranas tayo ng matinding kahirapan. DTI, plis lang, tugunan nyo agad ang problemang ito!