No hugs, no kiss muna tayo dahil sa COVID-19, jusko!

ni Imee Marcos - @Buking | July 24, 2020

Hello, sa mga lovers d’yan! Kumusta naman kayo? Hay naku, bakit ba itong COVID-19 pandemic, bukod sa krisis sa ating ekonomiya at sariling kabuhayan pati, pati ba naman sa loving-loving ay krisis pa rin? Petmalu ka talaga, COVID!

Kalokah, mga frennie, diyeta na tayo sa lahat ng bagay, pati sa affection sa ating mga jowa, eh, diyeta rin! Juskoday! Wala tayong magagawa dahil siyempre, mas importante ang ating buhay sa ngayon, safety protocol first bago ang loving-loving! A big no sa kiss muna sa ating mga jowawits, especially kung kayo ay nasa labas!

Gayundin naman, no hugs! Jusko, kung ayaw n’yo magkasakit, eh, medyo, distansiya amiga at amigo sa ating mga kapakner at dabarkads. Alam na, unahin ang social distancing, ang pagsusuot ng face mask at face shield kung talagang gusto natin pare-parehong mabuhay!

Masakit man sa ating kalooban, eh, dito natin mas maipapakita sa ating mga minamahal na ka-boy-prenan at ka-girl-prenan ang ating true love. Opkors ayaw natin sila magka-virus noh! Mahirap na malay ba natin kung tayo, eh, asymptomatic kung hindi pa tayo nagpapa-checkup maigi nang makasiguro, layo-layo muna tayo.

Ang true love, mas mapi-feel natin ngayon, kahit tila tayo L-D-R sabi nga ng mga bagets...as in Long Distance Relationship, meaning isang metro o dalawang metro ang pagitan pag nakasama natin sila. Makuntento na muna tayo sa pakyut-kyut at malalantik na tinginan o ‘yung pa-twinkle twinkle eyes na muna ‘ika nga!

Eh, kung titingnan naman ninyo pati nga mga social gathering sa mga weddings, kung ay limitado na rin. Meron ngang mga ikakasal ang nagkansela na dahil siyempre gusto nila ang bonggacious na wedding at parang hindi puwedeng mangyari ito sa panahon ngayon. Pahupain na muna natin ang pesteng si COVID, bago tayo makipag-date sa ating boyfriend.

Mga frennie, kung talagang mahal kayo ng inyong mga boypren at girlpren, makaka-intindi sila na mas prayoridad ngayon ang kaligtasan at kalusugan ng inyong mga jowa. Makuntento na muna tayo sa virtual love. Konting tiis-tiis, no hugs no kiss muna tayo!

Patung-patong na ang problems... good news ni P-Digong sa SONA, wish ko lang!

ni Imee Marcos - @Buking | July 22, 2020

Malaking hamon ang kinakaharap ng ating pamahalaan sa ngayon lalo na at samu’t sari at patung-patong na ang problemang idinudulot nitong COVID-19 pandemic.

Kaya nga ang ating mga kababayan ay umaasa at talaga namang nakaabang na sa State of the Nation Address (SONA) ni Pangulong Rodrigo Duterte ngayong Lunes. Para makabawas sa mga alalahanin ng ating Pangulo, tayo ay nakikiusap sa iba’t ibang ahensiya ng ating pamahalaan na paigtingin pa ang pagtutulungan para masolusyunan ang problema ngayong pandemya.

Pakiusap natin mga frennie sa Department of Labor and Employment (DOLE), eh, bilisan ang aksiyon sa mga trabahong kailangang ibigay sa mga manggagawang nasibak at ipaliwanag ang mga tulong na naibigay na sa iba ng gobyerno. Dahil tiyak na aasahan ng taumbayan na mababanggit ng Pangulo ang solusyon sa unemployment sa kanyang SONA.

‘Yung Department of Trade and Industry (DTI) naman, plis i-update na ang listahan ng standard retail price sa mga basic goods at palawakin pa ito o isama ang mga in-demand na produkto ngayong umiiral na ang new normal at palakasin ang kapasidad ninyo sa pagmo-monitor ng mga mapagsamantalang negosyante! Juicekoday!

Hirit pa natin sa DTI, dapat maging agresibo kontra sa mga mapagsamantalang negosyante at kasuhan agad!

Maalala rin natin itong Meralco at mga water concessionaires, eh, dapat na kalusin ang mga pang-aabuso sa mga konsyumer nila! Eh, dapat mga frennie, managot na ang mga abusadong ‘yan, nasa gitna tayo ng pandemya kita pa rin ang inaatupag!

‘Susko no, mga friendship, tama bang singilin tayo ng doble o triple sa Meralco bill at pati water bill ng ganu’n na lang base sa estimate? Hello, ano sila, manghuhula? Kakapikon!

Sana mga kaberks sa mga ahensiyang ‘yan, plis lang paspasan na ang kilos para merong mailalatag na solusyon ang ating Pangulo sa malawakang kawalan ng trabaho, nakaririmarim na mataas na singil sa kuryente at tubig at tumataas na presyo ng bilihin! Wish ko lang na may makarinig tayong good news sa darating na SONA.

‘Di pa man tapos ang COVID-19 pandemic, krisis sa tubig, next!

ni Imee Marcos - @Buking | July 20, 2020

Bukod sa COVID-19, worried to death ako sa napipintong krisis sa tubig na kakaharapin ng ating bansa sa mga susunod na buwan, Juicekoday!

Tumaas kasi mga besh ang demand sa paggamit ng tubig para sa personal hygiene pati public sanitation dahil sa pandemya kaya talagang namemeligro na ang tubig sa Angat dam at walang masyadong ulan!

Alam n’yo ba mga seestra, halos masaid na ang pangunahing source ng tubig ng mga taga-Metro Manila sa Angat Dam? Aba, eh, mula sa dating 200 meters mula nang magsimula ang lockdown, eh, pumalo na sa pinakamababang antas ng tubig ang dam na naitala sa 186 meters noong July 14. ‘Kalokah, ‘di ba?!

At ngayon, halos 20 meters na mas mababa ito kesa sa normal na operating level na 205 meters, at konti na lang o 6 meters na lang bago ang minimum operating level nito na 180 meters. Que horror!

Hay naku mga frennie, baka umabot na tayo sa critical level na 160 meters pagpasok ng Oktubre, kung magpapatuloy ito. Alangan naman itigil ang paghuhugas ng kamay pati paglilinis ng paligid? Divah?

Eh, wala naman kasi tayong water security, bakit kamo? Paano hindi tumupad ang mga kompanya ng tubig sa obligasyon nila sa publiko batay sa napagkasunduan noong 1997. Palpakish talaga sila! Kaimbyerna!

Hindi ba, mga besh, halos 20th anibersaryo ng kapalpakan nila na tugunan ang pangakong magbigay ng 24-oras na suplay ng malinis na inuming tubig sa Metro Manila at mga karatig-lungsod sa Cavite at Rizal! Remember?

Kakapusin na nga sa tubig, eh, kapalmuks pa mga besh ang mga water concessionaire na ‘yan dahil sa taas ng singil sa tubig kahit pa may COVID-19 pandemic, mapagsamantala, dapat talaga ay managot sila! Ewan ko ba, dapat yata, gobyerno na ang mamahala sa serbisyo ng tubig! Agree?