Mga schools humihirit pa rin ng miscellaneous fees, eh, online class na nga, ano ba ‘yan CHED?!

ni Imee Marcos - @Buking | August 7, 2020

Nakakapikon ang reklamong nakarating sa atin ng mga magulang at mga estudyante na naniningil pa rin daw ng miscellaneous fee ang mga top universities. Hello! Online classes na kaya!

Plis, Commission on Higher Education, ‘wag n’yo namang payagan ‘yan! Aba, sa hirap ng buhay ngayon, dagdag-gastos ‘yan sa ating mga kababayang naghihirap. Krisis ho ngayon! Pambili nga ng pagkain, problemado na ang mga magulang, eh! Mas lalo pa sila mababaon sa hirap, ‘di ba, mga besh?

Hay nako, hindi tama na maningil pa ng sobra o isingit sa matrikula ang miscellaneous fee na ‘yan sa mga school facilities na tulad ng paggamit umano sa classroom-based internet, kuryente, laboratoryo, libraries, medical at dental clinic. Heler! Online classes na tayo! Hindi magagamit ang mga pasilidad na ‘yan!

Mga friendship, ‘yung below 21, eh, ‘di na yan sila gagamit ng school facilities base sa guidelines ng IATF noong Hunyo, dapat silang manatili sa kani-kanilang bahay sa kahit ano’ng quarantine level na umiiral, remember? Kaya jusko, plis lang ‘wag naman pagkakitaan ang mga magulang at estudyante.

Calling the attention ng CHED, aksiyunan n’yo ang kontrobersiyang ito. Santambak na nga ang ating problema sa COVID-19 pa lang kung paano sistema sa pagbubukas ng klase, idaragdag pa ang pasanin na ‘yan sa mga magulang!

Hindi dapat magbulag-bulagan ang mga eskuwelahan para lang kumita sa mga serbisyong hindi nila maibibigay sa mga estudyante. Mas mababa o mas kaunti na lang ang dapat bayaran sa mga eskuwelahan ng mga magulang at mga estudyante.

Hindi tayo matatahimik ng ganyan, para makasiguro, may Senate Resolution 480 tayo ikinasa para busisiin ‘yan, santisima, ‘di natin ‘yan palulusutin!

Awang-awa na tayo sa ating mga kababayan lalo na sa mga magulang na hirap na hirap na nga para igapang ang anak sa pag-aaral sa gitna ng pandemya, may dagdag-pasanin pa! Ano na CHED? Kilos na!

6 months kulong at P50-K multa sa mga inggrata’t inggratong nangdi-discriminate sa mga frontliner!

ni Imee Marcos - @Buking | August 5, 2020

‘Kaloka ang umiiral na diskriminasyon sa ating mga medical frontliners tulad ng mga nurses, doktor at iba pang medical practitioner ngayong panahon ng COVID-19.

Kung natatandaan n’yo, mga besh, noong unang bahagi pa lang ng pananalasa ng COVID-19, magkakasunod na napaulat na diskriminasyon sa mga health workers at meron pang mga nasaktan. Grabe to the max ang hindi magandang trato. ‘Kalokah!

Kabilang dito ‘yung mga nai-report na dahil sa takot na makapanghawa sila ng virus, mayroong mga health workers ang pinalayas sa kani-kanilang tirahan ng mga may-ari ng bahay na kanilang nirerentahan, meron ding insidente na pinalabas sila ng restoran dahil sa pangamba na makapanghawa sila ng ibang mga kustomer.

Nakalulunos dahil naiulat din ang kawalan nila ng maayos na access sa mga pangunahing serbisyo sa publiko na tulad ng transportasyon, laundry, hinaharang at pinagmumulta sa mga checkpoint.

Masaklap din ang dinanas ng mga medical workers natin na dahil sa walang mapuwestuhan at matulugan sa mga ospital napilitan na rin silang matulog sa mga funeral chapels na pansamantala nilang tinigilan habang nasa kasagsagan ng pagkalat ng COVID-19.

Pinakamatinding diskriminasyon na dinanas ng mga health workers noong Abril kung saan nabalitang may sinaktan ng pisikal, sinabuyan ng bleach at winisikan ng chlorine dahil sa pag-aakalang sila’y COVID-19 positive.

Buwis-buhay na nga sila sa paglaban sa deadly virus, buwis-buhay pa rin sa pagsalag sa mga pasaway. Eh, hindi lang sila, mga besh, ang nadi-discriminate, pati na rin ‘yung mga hinihinala pa lang na tinamaan ng virus at iba pang frontliners na tulad ng mga pulis, tindero, basurero, etc. magpahanggang ngayon!

Kaya naman, mega-push tayo sa ating Senate Bill 1430 na inihain kontra sa ganyang mga diskriminasyon, na magpaparusa sa mga inggrata’t inggratong nangdi-discriminate ng frontliners at health workers, tulad ng pagkakabilanggo nang hindi bababa ng anim na buwan at multang P50, 000. Oh, ano na, discriminate pa more? May katapat na kayong parusa!

Tuldukan ang diskriminasyon sa mga babaeng empleyado, plis lang!

ni Imee Marcos - @Buking | August 3, 2020

Bagama’t kinikilala na ang women empowerment mula pa noong 18th century, hanggang ngayon, hindi maitatangging malaki pa rin ang diskriminasyon sa pagitan ng mga babae at lalaki. Kalerki, ‘di ba?

Eh, ‘di ba nga mga besh, maging ang United Nations, nagpahayag na dapat kilalanin ang karapatan ng bawat kababaihan sa bawat panig ng mundo. Pero meron pa ring umiiral hanggang ngayon ng diskriminasyon sa kababaihan na siyang malaking hadlang sa pag-unlad ng ekonomiya ng mga developing countries tulad ng Pilipinas.

Tulad na lang sa employment. Eh, ‘di ba mga frennie, may mangilan-ngilan pa ring mga kumpanya ang hindi patas ang trato sa mga babae at lalaki. Madalas ang mga kumpanya, prayoridad nila ang mga lalaking empleyado, bakit kamo? Eh, nakikita kasi ng mga company o employer na liability ang babae kasi nabubuntis. ‘Kalokah!

Eh, siyempre, mga besh, kapag nabuntis, may ilalaan sila riyan na mga benefits para sa pagbubuntis at kapag nag-leave na sa trabaho dahil manganganak ay hahanap ng pansamantalang papalit sa kanila. Meaning, ayaw nila maistorbo kaya mas prefer nila ang mga boys sa kumpanya. Hay naku! malaki talagang diskriminasyon.

Lalo na meron nang 105-day maternity leave para sa mga babae. Kaya nga ba sa public hearing ng ating komite, na pinamumunuan na Cultural Communities hinggil sa anti-discrimination bills, binanggit ko na maghahain ako ng panukalang-batas o amyenda para magkaroon ng Parental Leave para pati ‘yung tatay may leave rin para patas naman ang laro. Agree?

Maraming magagaling at mahuhusay na babae, kailangan lang maging pantay ang trato sa babae at lalaki. Aminado tayong sa lakas, eh, mas lamang ang mga lalaki, pero ;di ba mga seestra, hindi matatawaran ang husay ng mga babae saan mang aspeto?

Apela naman natin sa mga employer, plis naman bigyan n’yo ng mas maraming chance ang mga babae at huwag i-discriminate, dahil hindi sa gender o kasarian nakikita ang husay ng isang empleyado kundi sa kanyang pag-iisip, talino, diskarte at abilidad!