Mandatory face shield, dagdag-proteksiyon pero mas dagdag-gastos…

face shield na dating P20, P100 na ngayon, calling DTI!

ni Imee Marcos - @Buking | August 14, 2020

Matapos ang barrier sa motorsiklo, may bago na namang pakulo ang DOTr. Mandatory face shield naman sa lahat ng mga mananakay sa bus, tren, jeep at iba pang pampublikong sasakyan! ‘Kalokah!

Dagdag-proteksiyon daw ito, kontra sa COVID-19, pero maraming naghihikahos ang nagsasabing anti-poor ito! Bakit kamo? Eh, kasi nga naman, dagdag-gastos ito sa kanila sa halip na ibibili na lang nila ng noodles, eh, mapupunta pa sa face shield. Hay nako!

Hindi pa ba sapat ang physical distancing at pagsusuot ng face mask? DOTr, hindi n’yo maiiaalis sa ating mga kababayan na umangal, eh, biruin n’yo naman, bigla-bigla ‘yan, ang dami nga raw nilang nakahilerang gastusin, kapos na sila sa pangkain, walang trabaho, may gastusan pa sa nalalapit na pagbubukas ng online classes ngayong August 24, tapos may ganito pa?!

Eh, kaunting preno naman sa gastusan, pahingahin natin nang kaunti ang ating mga kababayan, baka naman mas okay na huwag itong gawing mandatory kundi sa mga may kakayanan lang.

Pero kung talagang ayaw papigil ng DOTr, bakit kaya hindi na lang kayo mamigay nang libreng face shield? Eh, di ba ang saya ‘pag nakatulong kayo sa ating mga kababayan?

Balita natin, mga besh, biglang-sirit na rin ang presyuhan ng face shield na dati ay P20 lang, eh, umabot na raw sa P50 hanggang P100?! Santisima, puwede ba, plis lang DTI, pakibantayan n’yo ang presyo niyan, aba, eh, maraming abangers na mga ganid na negosyante hayan na, pihadong mas tataas pa ang presyo niyan. Juskoday!

‘Wag hayaang umeksena ang mga buwitreng negosyante, ipatupad ang price freeze, now na!

ni Imee Marcos - @Buking | August 12, 2020

Modified Enhance Community Quarantine (MECQ) ulit ang Metro Manila, kaya hindi naiwasan ng ating mga kababayan na mag-panic buying na naman. Nakakalokah!

Aba, eh, shock to death daw ‘yung mga grocery owners nang bigla na naman silang dinumog ng mga mamimili at ‘susmarya halos maubos ang laman ng kanilang estante. Eh, siniguro naman nilang meron silang mapagkukunan ng supplies.

Pero hindi ‘yan ang inaalala natin, eh, alam na mga besh ang kalakaran sa ganyan, siguradong mamamayagpag na naman ang mga ganid na negosyante. Jusko, knows na natin ang likaw ng bituka nila, na abangers sila para magtaas sa presyo ng mga bilihin! Eh, ano pa nga ba, me pattern na ‘yan ever since. Hay nako!

Kaya naman, Department of Trade and Industry (DTI) plis lang, kilos na agad, ‘wag ninyong hintayin ang mga ganid na businessmen na mamayapagpag na naman sa tindi ng krisis na dinaranas natin ngayon nagagawa pa nila ‘yan. Plis magpatupad na kayo ng price freeze!

‘Wag ninyong hayaang umeksena na naman ang mga buwitreng negosyante. Igtingan n’yo pa ang pagmo-monitor at pagbabantay sa mga presyo ng mga pangunahing bilihin!

Pakiusap, panagutin n’yo naman sila kapag nag-overprice, walang kadala-dala ang mga ‘yan, eh! Walang mga konsensiya alam naman nilang super hirap ng buhay ngayon dahil sa COVID-19, eh, manlalamang pa! Que horror!

Pansin ko lang, tila manhid na ang maraming negosyanteng Pinoy sa lagay ng kahirapan ng mga mahihirap na Pinoy, wala na silang puso, kita na lang ang nasa utak.

Dapat mapigilan mga ‘yan. Kaya naman DTI, gamitan n’yo na kasi ng kamay na bakal ang mga ‘yan. Hindi na sila nakukuha sa pakiusapan. Kung kailangang pagmultahin at kasuhan, gawin na para naman madala sila! Agree?

Istayl ng DOH na puro na lang palusot, nakakaimbyerna!

ni Imee Marcos - @Buking | August 10, 2020

Namumuro na ang Department of Health sa istilo nitong puro na lang palusot! Nakakaimbyerna’t nakakaloka na!

Sa tagal ng pamiminsala ng COVID -19 pandemic, mga besh, tila iisa ang sayaw ng DOH kapag napag-uusapan ang bilang ng tinatamaan ng virus. Napa-flatten na raw ang curve?! Juskoday, bakit ba hindi amining mas dumami ang may virus lalo na sa hanay ng mga health workers?

Pakonsuwelo-de-bobo ang report ng DOH na kesyo 90 porsiyento raw ng health care workers ang naka-recover mula sa virus. Eh, kita namang palusot ‘yan sa dami ng health workers na may virus. Porke dumami ang nakarekober, eh, pantakip na ito sa mga tinatamaan ng virus? Ano ba?

Eh, ‘di ba, mga besh, nito lamang Abril ay idineklara ng World Health Organization ang ‘Pinas bilang “outlier” o pinakamalala sa dami ng mga kaso ng impeksiyon sa mga health care workers? At ngayon, tayo na ang pinakamataas ang bilang sa Southeast Asia, tinalbugan na natin ang Indonesia!

Base sa tala, ang China kung saan nagmula ang virus ay nasa 2% hanggang 3% lang ang kabuuang kaso, gayung sa ‘Pinas 13% at sa datos ng DOH nitong Hunyo ang nagsabi na umakyat pa sa 15% ang infection rate sa ating health care workers.

Dapat atupagin ng DOH paano maisasalba ang ating mga health workers, ‘di ba, mga frennie? Kaya sa Senado mega-push tayo sa Senate Bill 1644 para awtomatikong magkaroon ang mga healthcare worker ng P10, 000 na allowance at hazard pay na katumbas ng 25% ng kanilang sahod sa panahong may pandemya o public health emergency.

Sa ilalim nitong Healthcare Frontline Workers Welfare Act, push din natin libreng surgical face masks at personal protective equipment (PPE), free testing at bakuna. Itinulak din natin ang Anti-Coronavirus 2019 Discrimination Act, para naman hindi sila ma-discriminate, ‘di ba?!

One more thing, mga friendship, dapat bumuo ng permanent medical reserve corps ang bansa na back up ng mga healthcare frontliners.