Protektado na rin ng gobyerno ang delivery rider kontra abusado

ni Bong Go - @Bisyo Magserbisyo | August 25, 2022

Nagsumite tayo sa Senado ng panibagong isang dosenang panukalang batas na kung makapasa at maisabatas ay malaki ang maitutulong sa ating lahat. Bukod pa ito sa naunang 20 bills na ating inilatag sa pagsisimula ng 19th Congress.

Kabilang sa mga ito ang Senate Bill Number (SBN) 1180 o ang Medical Reserve Corps. Sa ilalim nito, papayagan ang mga doktor, nurse, medical technologist at mga nakapagtapos sa mga kursong may kinalaman sa medisina na tumulong sa pamahalaan kapag may national emergencies. Tugma ito sa isa sa mga prayoridad na panukalang batas ni Pangulong Ferdinand Marcos, Jr. na binanggit niya sa kanyang unang State of the Nation Address. Bahagi rin ito ng adhikaing mapalakas pa ang healthcare system.

Isinumite rin ang SBN 1181 o ang Philippine Building Act para sa mas maayos at ligtas na konstruksyon at disenyo ng mga pribado at pampublikong gusali. Importante ito dahil madalas dalawin ng lindol at iba pang kalamidad ang ating bansa, maliban sa halos apat na dekada na ang nakaraan mula naging batas ang kasalukuyang National Building Code of the Philippines.

Ang SBN 1182 o ang Government Financial Institutions Unified Initiatives to Distressed Enterprises (GUIDE) ay naglalayon namang mapagkalooban ng loan assistance program ng Development Bank of the Philippines (DBP) ang ating mga maliliit na negosyante (MSMEs) na naapektuhan ng pandemya para maipagpatuloy ang kanilang pagnenegosyo.

Bilang suporta at proteksyon naman sa ating mga kapatid sa media at entertainment, nariyan ang SBN 1183 o ang Media and Entertainment Workers Welfare. Dahil karamihan sa mga nasa media at entertainment industry ay hindi regular employees, magiging mandatory na ang pagkakaroon nila ng detalyadong kontrata bago sila magsimula ng trabaho. Kasama ang mga dapat nilang matanggap na benepisyo.

At dahil marami ngayon ang pinapasok ang pagiging delivery rider, isinumite ko ang SBN 1184 o ang Delivery Riders’ Protection Act. Sa pamamagitan nito, protektado na sila laban sa mga mapang-abusong consumers, lalo na ang mga umo-order ng pagkain, grocery at gamot.

Kailangan din ng ating mga marino ng proteksyon kaya ang SBN 1191 o ang Magna Carta of Seafarers ang nangangalaga naman sa kanila para matiyak ang kanilang kapakanan at mga karapatan habang nagtatrabaho pa sila sa mga malalayong lugar at maging kapag tapos na ang kanilang employment.

Para naman mas mapaganda ang serbisyo ng ating Bureau of Immigration ay isinumite natin ang SBN 1185 o ang Bureau of Immigration Modernization Act. Matagal nang ipinaglalaban na i-modernize ang mga proseso sa gobyerno upang mas mapabilis ang serbisyo sa tao at matanggal ang korapsyon sa sistema.

Para naman hindi nakabinbin at nagpapatung-patong ang mga kaso sa ating mga hukuman, inihain natin ang SBN 1186 o ang Additional Divisions of Court of Appeals Act. Layon nito na magkaroon ng tatlong karagdagang dibisyon ng Court of Appeals mula sa dating 23 para maging 26 dibisyon, na lahat ay may tatlong miyembro.

Kaugnay nito, isinumite natin ang SBN 1187 o ang Additional Divisions in the National Labor Relations Commission para madagdagan ang bilang ng NLRC commissioners mula sa 23 para maging 26 at bumilis naman ang pagresolba sa mga labor disputes.

Kabilang ang mga kabataang Pilipino sa dapat protektado ng ating mga batas, at dahil dito ay nariyan ang aking SBN 1188 o ang Amendments to Special Protection of Children Against Abuses. Layunin nito na amyendahan ang Section 5 ng Republic Act No. 7610 para mas protektado pa ang ating mga kabataan sa pang-aabuso, pagsasamantala at diskriminasyon.

Para mapangalagaan ang ating kapaligiran at kalikasan, isinumite natin ang SBN 1189 o ang Mandatory Environmental Insurance Coverage Act. Sa pamamagitan nito ay itatatag ang National Framework for Mandatory Environmental Insurance Coverage. Lahat ng may-ari at operator ng environmentally critical projects (ECPs) ay dapat magbigay ng insurance para may proteksyon tayo kung sakaling magkaroon ng masamang epekto sa kapaligiran, kalikasan at mga tao ang kanilang proyekto.

Para naman sa sektor ng edukasyon, nariyan ang SBN 1190 o ang Expanding the Special Education Fund (SEF). Ang SEF ay magmumula sa karagdagang one percent (1%) na buwis sa real property. Dagdag na pondo ito para sa mga eskwelahan na magiging mas malawak ang puwedeng paggamitan upang masuportahan ang kanilang operasyon at mga programa na makatutulong para mas mahasa ang kaisipan ng mga estudyanteng Pilipino.

Umaasa tayong maisasabatas ang mga panukalang ito na napapanahon at kailangang-kailangan ng ating bansa.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Aksyon sa Senado, tuloy ang serbisyo

ni Bong Go - @Bisyo Magserbisyo | August 19, 2022

Sumabak tayo ngayong linggo sa mga gawain sa Senado dahil sinimulan na ng iba’t ibang committee ang kani-kanilang organizational meeting and briefing. Mahalaga ito dahil nasusubaybayan natin ang mga ginagawang aksyon ng pamahalaan, natutukoy natin ang mga isyu na kailangan ng legislative action at nakakakuha tayo ng mga tamang impormasyon para makapaghanda at magkaroon ng karampatang aksyon sa Senado.

Bilang Chair ng Senate Committee on Health and Demography, sa ating komite ay tinalakay namin—kabilang ang mga health officials at iba pang stakeholders—ang public health situation, implementasyon ng Universal Health Care Law at kung paano tuluyang makokontina ang COVID-19, dengue at ang banta ng monkeypox at Langya virus, maging ang pagpapalakas pa sa ginagawang vaccine rollout ng pamahalaan at walang dapat masayang na bakuna.

Tiniyak din na ang magiging aksyon ng Health Committee ay naaayon sa mga prayoridad na panukalang batas ng kasalukuyang administrasyon gaya ng mga nabanggit ni Pangulong Ferdinand "Bongbong" Marcos, Jr. sa kanyang unang SONA. Tumutugma naman ang karamihan sa ating prayoridad na panukalang batas sa gustong mangyari ng Pangulo tulad ng paglikha sa Center for Disease Control and Prevention, ng Virology Science and Technology Institute of the Philippines at pagbuo ng Medical Reserve Corps.

Kabilang din sa ating ginagawang paghahanda ang patuloy na pagtatayo ng mga Super Health Centers sa buong bansa. Sinilip din natin kung maayos na naiimplementa ang Malasakit Centers Act na aking iniakda at inisponsor noong nakaraang 18th Congress.

Bilang Vice-Chair naman ng Senate Committee on Public Order and Dangerous Drugs, masaya tayo na ipagpapatuloy ng kasalukuyang administrasyon ang kampanya laban sa ilegal na droga. Isinumite na natin sa Senado ang Senate Bill No. 428, na kung maisasabatas ay magtatayo ng drug abuse treatment and rehabilitation center sa bawat probinsya na tutulong at gagabay sa mga nalulong sa droga para makaalis sa bisyo at makabalik sa normal na pamumuhay, sa kanilang pamilya at sa ating lipunan.

At dahil miyembro tayo ng Senate Committee on Public Information and Mass Media, na pinamumunuan ng ating kaibigan na si Sen. Robinhood Padilla, umapela tayo sa publiko na sama-samang labanan ang paglaganap ng fake news. Napakarami pong fake news ngayon, at tungkulin natin na pigilan ito para ang mga nakararating na balita at impormasyon sa mga tao ay totoo, makabuluhan at makatutulong sa kanila.

Samantala, noong Miyerkules, Agosto 17 ay sinegundahan natin ang privilege speech ng aking butihing kapwa senador, Raffy Tulfo, na siyang chair ng bagong Senate Committee on Migrant Workers. Ilang dekada ring ipinaglaban ng mga OFWs ang pagkakaroon ng sariling departamentong mangangalaga sa kanila. Kaya mabuti na naisabatas natin noong nakaraang 18th Congress ang pagtatayo ng Department of Migrant Workers na ating iniakda at naging co-sponsor.

Sa pagkakaroon ng bagong Senate committee on Migrant Workers, mas matututukan ang mga kababayan nating OFWs na itinuturing na ating modern-day heroes. Hangad nating maiiwasan na ang mga pang-aabuso sa kanila at mapait na karanasan, katulad ng mga tinulungan natin noon na sina Roderick Aguinaldo, Rose Policarpio, Malik Darimbang, mga masahistang inabuso sa Kuwait, at iba pang mga kababayan na tinugunan natin ang kanilang mga suliranin sa malalayong lugar.

Sa kabila ng ating pagiging abala sa tungkulin, tuluy-tuloy ang isinasagawang relief effort sa mga kababayan nating higit na nangangailangan.

Tulad ng dati ay maagap nating inabutan ng tulong ang mga naging biktima ng sunog. Sinaklolohan natin ang humigit-kumulang 200 pamilya sa Bacoor City, Cavite na aking personal na pinuntahan noong Linggo; 46 na residenteng nasunugan sa Buenavista, Quezon; gayundin ang 43 pamilya sa Brgy. Duljo-Fatima, pito sa Bgy. Barrio Luz, at isa sa Bgy. Capitol Site sa Cebu City; siyam sa Bgy. Zamora, at walo sa Brgy. Zamora-Melliza sa Iloilo City; dalawa pa sa Bgy. Pispis at Linab, Maasin, Iloilo; 11 sa Malaybalay, Bukidnon; at 23 naman sa Taguig City.

Maagap din tayong umalalay sa 104 benepisaryo na biktima naman ng diarrhea outbreak sa Bgy. Toril Proper, Davao City. Sumaklolo tayo sa 30 residente ng Talaingod, Davao del Norte na biktima ng landslide, habang 935 na biktima ng lindol ang naayudahan sa San Emilio at Santa Maria sa Ilocos Sur.

Hindi rin natin kinalimutan ang paghahatid ng ayuda sa mga kababayan nating nakararanas ng iba’t ibang krisis sa buhay. Napagaan natin ang dalahin ng 1,667 mahihirap na residente ng Angeles City, at 350 sa Mexico, Pampanga; 1,053 sa Taytay, Rizal; 1,000 sa Dasmariñas City, Cavite; at 1,604 sa Danao, Bohol. Sa Iloilo ay napasaya natin ang 600 benepisyaryo mula sa Dumangas, 302 sa Sara, 68 sa Pavia at 63 pa sa Leon.

Sinuportahan din natin ang kabuhayan ng 100 micro-entrepreneurs sa Alimodian, Iloilo, habang 1,600 na benepisyaryo naman ang nakatanggap ng tulong mula sa San Andres, Gumaca at Calauag sa probinsya ng Quezon.

Tuluy-tuloy ang serbisyo ng inyong Kuya Bong Go para sama-sama at walang maiiwang Pilipino sa pagkakamit natin ng mas komportableng buhay.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Med student, kahit wala pang lisensya, puwedeng tumulong sa health emergency ng bansa

ni Bong Go - @Bisyo Magserbisyo | August 17, 2022

Noong Lunes, Agosto 15, 2022, pinangunahan natin ang organizational meeting at briefing ng Committee on Health and Demography bilang Chairman ng nasabing committee sa ating 19th Congress ngayon. Dinaluhan ito ng ating mga health officials at iba pang stakeholders.

Noong unang dumating ang pandemya sa ating bansa, nahirapan ang healthcare system na ilang dekadang napabayaan. Wala tayong masyadong alam noon sa bagong kalabang hindi naman nakikita—ang COVID-19.

Pero imbes hayaan lang na tuluyang bumagsak ang healthcare system at mamatay ang marami nating kababayan na hindi man lang natingnan ng mga doktor, naghanap tayo ng mga solusyon. Dahil sa bawat minutong lumilipas noon, buhay ng mga Pilipino ang nalalagay sa panganib, gumawa agad tayo ng mga agarang aksyon.

Kaya sa kasalukuyang 19th Congress, pinag-usapan nating muli ang pangkalahatang sitwasyon ng kalusugan sa bansa lalo pa at patuloy tayong nakikipaglaban sa pandemya at iba pang banta sa kalusugan, kasama na riyan ang monkeypox, dengue, langya virus at iba pa.

Tinalakay natin ang ginagawang pagsisikap ng pamahalaan upang tuluyang makontina ang COVID-19. Sa mga nakalipas na araw ay nakapagtatala pa rin ng mahigit 4,000 bagong kaso. Kailangan nating makatiyak na ginagawa ang mga nararapat na hakbang para maiwasan ang patuloy na paglaganap ng virus lalo pa at magbabalik na ang ating mga estudyante sa kanilang face-to-face classes.

Napag-usapan din ang napaulat na nasayang na mga bakuna, na binanggit ni Sen. Risa Hontiveros sa kanyang isinumiteng Senate Resolution 92. Naging matagumpay tayo sa pagkakaroon ng sapat na suplay ng bakuna, pero kailangang maging agresibo rin tayo sa pagbabakuna lalo na sa mga lugar na kakaunti ang bilang ng mga bakunado para matiyak na walang bakunang masasayang.

Nababahala rin tayo dahil naiulat sa ilang talaan na 15% lamang ng mga bakunado ang nagpapa-booster. Ang Pilipinas ang isa sa may pinakamababang booster rate sa buong Asya. Kailangan itong maisaayos dahil ang proteksyon ng bakuna ang tanging solusyon para makabalik tayo sa normal na pamumuhay.

Tinalakay rin ang banta ng monkeypox, na hindi ito dapat balewalain dahil may napaulat nang kaso sa ating bansa. Nauna rito, ako at ang aking kapwa mambabatas na si Sen. Robinhood Padilla ay nagsumite ng panukalang Senate Resolution 85, na nag-aatas sa Committee on Health and Demography na magsagawa ng inquiry sa ginagawang paghahanda ng ating bansa para makontina ang monkeypox, na idineklara ng World Health Organization na isang “public health emergency of international concern”.

Kabilang din sa dapat tugunan ang patuloy na pagtaas ng kaso ng dengue. Batay sa ulat ng DOH, nakapagtala na ang Pilipinas ng 92,343 kaso ng dengue mula Enero 1 hanggang Hulyo 23. Ang bilang na ito ay 118 porsyentong mas mataas kumpara sa mga naiulat na kaso sa katulad na panahon noong 2021.

Pinakaimportante sa atin ang kaligtasan at kalusugan ng bawat Pilipino, at bilang Chair ng Senate Committee on Health, tinitiyak ko na ang mga pagsisikap ng komite ay naaayon sa mga prayoridad na panukalang batas ng kasalukuyang administrasyon.

Sa katunayan, tumutugma ang karamihan sa ating 20 na prayoridad na panukalang batas na nakasumite sa Senado, tulad ng paglikha sa Philippine Center for Disease Control and Prevention at ng Virology Science and Technology Institute of the Philippines—sa mga binanggit naman ni Pangulong Ferdinand Marcos, Jr. sa kanyang unang SONA.

Isa rin sa nabanggit ni Pangulong Marcos sa kanyang SONA ay ang pagbuo ng Medical Reserve Corps. Suportado ko rin ito dahil noong 2020 ay isinumite natin ang Senate Bill No. 1451, o ang “Medical Reserve Corps Act of 2020,” na naglalayong ang mga nagtapos ng kursong may kinalaman sa medisina pero hindi pa lisensyado ay maaaring tumulong sa pamahalaan sa pagtugon sa health emergencies.

Samantala, ipagpapatuloy rin natin ang pagpapatayo ng Super Health Centers sa buong bansa, na kailangang-kailangan, lalo na sa malalayong komunidad. Ang Super Health Centers ay improved version ng rural health center na ang serbisyong ipagkakaloob at mga pasilidad ay kahalintulad ng modernong ospital sa urban areas.

Bahagi rin ng aking tungkulin bilang senador ang subaybayan ang patuloy na implementasyon ng Malasakit Centers Act at makapagpatayo ng marami pang Malasakit Centers sa buong bansa. Napakalaking tulong nito sa mahihirap na kababayan dahil madaling nalalapitan kapag kailangan nila ng tulong medikal at de-kalidad na serbisyong pangkalusugan.

Bago pa man nagkaroon ng pandemya ay naakda at naisponsoran natin ito at tuluyang naging batas. Sa ngayon ay mahigit tatlong milyong kababayan na natin ang napagkalooban ng tulong ng 151 Malasakit Center sa iba’t ibang parte ng ating bansa.

At dahil sinisikap ng pamahalaan na manatiling ligtas at protektado ang kalusugan ng ating mga kababayan, umaapela tayo na samantalahin ang isinasagawang vaccine rollout at patuloy na sumunod sa ipinatutupad na health protocols.

Mas malaki ang tsansa natin na tuluyang makontina ang pandemya kung mas maraming kababayan natin ang mababakunahan at mabibigyan ng booster shots. Huwag kayong magpatumpik-tumpik pa dahil ligtas ang bakuna at nakabatay ito sa agham. Ang bakuna ang susi para tuluyan na nating malampasan ang krisis.

Magtulungan tao sa pagresolba sa ating problema at krisis na kinahaharap, para tuluyan na tayong makabangon tungo sa sama-samang pag-unlad. Proteksyunan natin ang buhay ng bawat Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.