Hikayatin ang kabataan na mag-sports para iwas pa more sa ilegal na droga

ni Bong Go - @Bisyo Magserbisyo | September 2, 2022

Noong Miyerkules, Agosto 31, 2022 ay nagkaroon ang Senate Committee on Public Order—na pinamumunuan ni Sen. Ronald “Bato” dela Rosa—ng public hearing at tinalakay ang pagpapalawak sa Anti-Drug Abuse Council Law na naglalayong magtatag ng Anti-Drug Abuse Councils sa bawat local government unit. Sang-ayon tayo sa panukalang ito at sa hangarin ng ating gobyerno na mapanatili ang peace and order sa ating bansa sa pamamagitan ng pagsugpo sa ilegal na droga.

Isa sa adbokasiya ng nakaraang administrasyon ni dating pangulong Rodrigo Duterte ay ang mapanatili ang kaayusan tungo sa kaginhawahan sa ating bansa. Mahalaga na hindi masayang ang ating nasimulan at maipagpatuloy ang pagsugpo sa mga nasa likod ng ilegal na droga, tulad nang ginawa ng Administrasyong Duterte para masolusyunan din ang problema sa kriminalidad at katiwalian.

Sa ating naobserbahan, kapag bumalik ang droga, babalik ang kriminalidad at babalik din ang korapsyon kaya damay-damay 'yan. Sa kampanya ni Tatay Digong mula noong 2016, isa sa kanyang ipinangako ay labanan ang kriminalidad, ilegal na droga at korapsyon. Hindi man natupad ang mga ito nang buong-buo, pero sinikap niya na ibaba to the barest minimum ang crime rate natin.

Sa katunayan, ang crime rate sa Pilipinas ay bumaba ng 73.76% mula 2016 hanggang 2021, batay sa tala ng Philippine National Police. Kaya isa sa kanyang inuna, ipinangako at ipinatupad ay doblehin ang sahod ng mga pulis, kasama na ang ibang mga uniformed personnel. Hindi maisasakatuparan ang ipinangako niyang kapayapaan kundi sa tulong ng mga pulis, at sa tulong na rin ng Anti-Drug Abuse Councils.

Dati, takot ang tao sa mga durugista. Noong panahon ni Tatay Digong, ang mga durugista na ang takot. Naramdaman ng mga Pilipino na ligtas silang maglakad sa gabi at may peace of mind ang mga magulang na nakakauwi ang kanilang mga anak nang hindi nababastos.

Malaki ang tiwala at buo ang suporta ko sa bagong administrasyon sa pangunguna ni Pangulong Ferdinand “Bongbong” Marcos, Jr. na mas mapapalakas pa ang kampanya natin laban sa ilegal na droga at kriminalidad upang tuluyang mabigyan ng mas ligtas at komportableng buhay ang mga Pilipino na gustong mamuhay nang tahimik at ligtas.

Sa parte natin bilang Chair ng Senate Committee on Sports, patuloy ako sa paghikayat sa kabataan na umiwas sa ilegal na droga. Kapag bumibisita tayo sa mga komunidad, palagi nating ipinapayo na ibuhos ang oras sa eskuwela at iba pang produktibong gawain, tulad ng sports. Get into sports, stay away from drugs.

Samantala, tuloy naman ang ating tanggapan sa paghahatid ng ayuda sa mga kababayan nating hindi pa rin tuluyang nakakabawi sa epekto sa kanilang kabuhayan ng pandemya at iba pang krisis.

Tulad ng dati ay inuuna nating tulungan ang mga biktima ng sunog dahil napakahirap ng kanilang katayuan, lalo na ‘yung may mga sanggol at senior citizen sa pamilya—at wala agad pagkukunan ng pangunahing pangangailangan.

Napagaan natin ang dalahin ng mga pamilyang nasunugan gaya ng 210 residente ng Bgy. 76-A Bucana, at 20 pa sa Brgy. Agdao Proper sa Davao City; at 2,126 sa Mariveles, Bataan.

Para naman sa 350 estudyante ng Payatas B Elementary School, tuwang-tuwa ang mga bata sa ating ipinagkaloob sa kanila na bagong sapatos, bags at school supplies.

Nabigyan din natin ng ayuda ang 269 na mahihirap na estudyante ng Cabanatuan City, Nueva Ecija.

Pinagkalooban din natin ng tulong ang 300 na residente ng Nueva Valencia, at 285 pa sa Sibunag sa Guimaras; 107 sa City of San Jose del Monte, Bulacan; 100 sa Murcia, 296 sa Pontevedra, at 100 pa sa Talisay City sa Negros Occidental.

Umaasa rin tayo na sa nalalapit na pagtatapos ng taon ay tuluyan na tayong makalampas sa mga krisis na ating kinahaharap. At bukod sa pag-unlad ng ating ekonomiya at pag-angat ng buhay ng bawat Pilipino, hangad kong tuluyang lumaganap sa bawat dako ng ating bansa ang kapayapaan at kaayusan—na tunay na biyaya ng demokrasya sa ating lahat.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Karapat-dapat sa benepisyo, anumang klase ng empleyado

ni Bong Go - @Bisyo Magserbisyo | September 1, 2022

Binabati natin ang Gilas Pilipinas na nagwagi laban sa koponan ng Saudi Arabia sa ginanap na FIBA World Cup Qualifiers noong Agosto 29, 2022 sa Mall of Asia Arena. Personal nating sinaksihan ang laban kasama ang mga kapwa natin senador, upang iparamdam ang suporta kasama ang buong sambayanang Pilipino sa kanila.

Nakatutuwa dahil nagwagi ang ating koponan na mismo sa ating bansa ginanap ang laro at eksakto pa sa pagdiriwang natin ng National Heroes Day. Nagpapasalamat tayo sa mga players at sa lahat ng bumubuo sa Gilas Pilipinas na ibinuhos ang lahat ng kanilang makakaya at hindi binigo ang ating mga kababayan sa kanilang panalo.

Bilang Chair ng Senate Committee on Sports, patuloy nating rerepasuhin ang ating mga polisiya at batas kung paano mas lalo pang masusuportahan ng pamahalaan ang mga atleta na nagbibigay ng karangalan sa ating bansa.

Samantala, kasabay ng ating pagdiriwang ng National Heroes Day sa simula ng linggong ito, ipinaabot din natin ang paggalang at pagkilala sa mga bayaning Pilipino ng makabagong panahon.

Sila ang mga Pilipino na malaki ang naging kontribusyon sa patuloy na pakikipaglaban ng ating bansa sa pandemya at iba pang krisis na atimg kinahaharap, araw-araw.

Kabilang ang medical frontliners and health workers na hindi bumitaw sa pangangalaga sa ating mga kababayan. Hindi nila inalala ang sariling kaligtasan para lang maipagpatuloy ang kanilang sinumpaang tungkulin.

Nariyan din ang mga pulis at sundalo na malaki ang naging papel sa pagpapanatili ng kaayusan sa mga komunidad. Kabilang din ang mga barangay officials na siyang unang nilalapitan ng kanilang mga nasasakupan.

Ang mga guro na buong giting na itinawid ang edukasyon ng kabataan sa pamamagitan ng online at distance learning. Sobrang bilib ako sa inyo!

Ang mga OFWs na tuloy ang pagsasakripisyo sa ibang bansa para lang may maiuwi sa kanilang pamilya at mabigyan ang kanilang mga anak ng mas magandang kinabukasan.

Ang mga taga-media na walang takot sa patuloy na paghahatid ng makabuluhang balita at tamang impormasyon, partikular sa ginagawang pagtugon ng pamahalaan sa pandemya at iba pang paksa na makakatulong sa taumbayan.

At ang mga manggagawang Pilipino sa pampubliko at pribadong sektor na patuloy na kumakayod sa araw-araw matiyak lang ang produksyon ng ating mga pangunahing pangangailangan, lalo na ang pagkain at paghahatid ng mga serbisyo.

Marami pang iba, tulad ng mga karaniwang tao na nakipagbayanihan makalampas lang tayo sa bawat krisis na ating kinaharap, lalo na kapag may mga sakuna at kalamidad.

At bilang pagkilala sa ating mga makabagong bayani, sa 19th Congress ay isinumite natin ang mga prayoridad na panukalang batas para patuloy na mapangalagaan ang kanilang mga kapakanan at maipaglaban ang kanilang karapatan.

Nariyan ang Advanced Nursing Education Bill para sa patuloy na suporta sa propesyon ng ating mga nurses.

Isinumite rin ang panukalang batas na magkakaloob ng libreng suportang legal sa ating mga pulis at sundalo na nakasuhan habang tinutupad ang kanilang tungkulin.

Para sa mga opisyal ng barangay, nariyan ang Magna Carta for Barangays para mabigyan sila ng karampatang kompensasyon at benepisyo tulad ng mga regular na empleyado ng pamahalaan. Kabilang ang barangay health workers.

Kasama rin ang pagpapalawak ng paggamit ng Special Education Fund para sa dagdag na pondo sa mga eskwelahan at masuportahan ang kanilang operasyon at mga programa, at hindi na gagastos ang mga guro ng sarili nilang pera.

Para sa ating mga marino, ang Magna Carta of Seafarers na titiyak sa kanilang kapakanan at mga karapatan habang nagtatrabaho sa malalayong lugar, at maging kapag tapos na ang kanilang employment.

Sa Senado ay binuo naman ang Committee on Migrant Workers para sa tuluy-tuloy na pangangalaga sa ating OFWs.

Isinusulong din natin ang Media and Entertainment Workers Welfare bill na kung maisasabatas, kailangang malinaw sa kontrata ng taga-media at entertainment industry ang kanilang kompensasyon, benepisyo at proteksyon bago sila magsimula ng trabaho.

Para mapangalagaan ang mga delivery riders, isinumite natin ang Delivery Riders’ Protection bill para protektado sila laban sa mapang-abusong consumers at scammers.

Para sa ating mga manggagawa, nagpanukala tayo na magkaroon ng mga karagdagang dibisyon sa National Labor Relations Commissions para maging mabilis ang pagresolba sa mga labor disputes.

Ang mga pagsisikap na ito ay bilang pagkilala sa kanilang pagiging bayani at kontribusyon nila sa ating pagsulong at pag-unlad. Mabuhay ang mga Pilipino, at patuloy tayong lumingon sa mga naging hangarin ng ating mga bayani at gawin nating gabay sa ating pang-araw-araw na buhay.

Asahan ninyo na hindi mauuwi sa wala ang inyong mga sakripisyo. Kayo ang aming inspirasyon para lalo pang magserbisyo at maipaglaban ang inyong mga naipaglaban mula noon hanggang ngayon upang mabigyan ng mas komportableng buhay ating mga kapwa Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Paghahanda sa mga kalamidad at pagmamalasakit sa mga apektado nating kababayan

ni Bong Go - @Bisyo Magserbisyo | August 26, 2022

Nadudurog ang puso ko habang pinapanood ang balita kung paano nanalasa ang Bagyong Florita sa mga kababayan natin sa Isabela, Cagayan at mga karatig na lugar. Hindi pa ito kasinlakas ng mga nagdaang bagyo sa ating bansa, pero dahil maraming dalang ulan ay nagdulot ng mga pagbaha at dagdag-hirap.

Masakit sa kalooban na makitang sinira ng Bagyong Florita ang kabuhayan ng ating mga kababayan. Natangay ng rumaragasang baha ang mga alagang hayop na pambenta na sana at mga pananim na aanihin na rin sana sa susunod na mga buwan at linggo. Apektado ang mga negosyo at pinagkukunan ng ikabubuhay. Ang mga tahanan ay nawasak. Napakahirap para sa kanila ang magsimulang muli.

Naghahanda na po ang aking tanggapan at nakikipag-ugnayan sa LGUs at iba pang ahensya ng pamahalaan para agad na makapaghatid ng ayuda sa mga kababayan nating naapektuhan ng Bagyong Florita.

Panahon na ng pagdating ng mga bagyo, kaya mag-iingat kayo at maging palaging handa. Kapag may anunsyo ng paparating na bagyo ay huwag balewalain.

Kapag may opisyal na anunsyo na ang ating pamahalaan na may paparating na bagyo ay palaging abangan ang updates sa radyo, TV at sa social media. Sundin ang payo ng mga awtoridad kung kinakailangang lumikas, lalo na sa mga idineklarang danger zones.

Tiyakin din na may sapat na suplay ng pagkain at tubig na tatagal para sa buong pamilya sa loob ng tatlong araw. Mahalagang may emergency bag na bukod sa first aid kit ay may mga gamot para sa lagnat, ubo at sipon, flashlight at silbato. At kung hindi matibay ang bahay, siguraduhing malalagyan ng suporta ang mga bubong at poste. Ang mahahalagang dokumento ay ilagay sa plastic bag para hindi mabasa. Siguraduhin ding fully charged ang mga cellphones.

Maraming dalang sakit ang bagyo at baha tulad ng dengue at leptospirosis, kaya kailangan ang todong pag-iingat. Ugaliin ang maligo o maglinis ng katawan kung hindi maiiwasang lumusong sa baha.

Dumamay at magmalasakit din tayo sa ating mga kapitbahay, lalo na ang mga masyadong nasalanta. Kung may maibibigay tayo para sa kanilang pangunahing pangangailangan tulad ng damit, pagkain at pansamantalang matutuluyan, ipagkaloob natin. Masarap sa damdamin ang nakatutulong sa ating kapwa.

Dahil sa Bagyong Florita ay lalo tayong naging pursigido na maisulong ang mga panukala na isinumite sa 19th Congress na kung maisasabatas ay magiging bahagi ng solusyon sa mga problemang hatid ng mga kalamidad. Una na ang paglikha sa Department of Disaster Resilience. Layunin nitong mapabilis ang mga mekanismo sa paghahanda kapag may kalamidad at iba pang emergency. Kapag naitatag ang DDR, may sarili itong kalihim na magbibigay ng mas malinaw na direktiba sa iba pang sangay ng pamahalaan kung paano tutugunan ang sitwasyon bago dumating at pagkatapos ng kalamidad.

Nariyan din ang panukalang Mandatory Evacuation Center Act of 2022. Layunin nito na magtayo ng matitibay na evacuation center sa bawat probinsiya, lungsod at munisipalidad. Dito pansamantalang tutuloy ang mga apektadong residente. Bukod sa maayos na tulugan at palikuran, kumpleto ito sa mga pangunahing pangangailangan gaya ng pagkain, tubig, gamot, kumot at mga damit.

Isa pa ang Rental Housing Subsidy Bill na ang layunin naman ay pagkalooban ng rental housing subsidy ang mga Pilipinong nawalan ng tirahan para mayroon silang disenteng matitirahan at gastusin habang hindi pa naitatayong muli ang kanilang bahay o inihahanap pa sila ng relokasyon.

Ilalaban natin ang mga ito sa Senado, maging ang mga nauna nating prayoridad na panukalang batas dahil napapanahon at ito ang talagang solusyon sa mga suliraning palaging kinahaharap ng ating mga kababayan kapag may kalamidad.

Samantala, sa kabila ng aking pagiging abala sa Senado ay tuluy-tuloy pa rin ang malasakit at serbisyong Kuya Bong Go para sa mga kababayan nating nahaharap sa iba’t ibang krisis.

Maagap nating pinagkalooban ng tulong ang mga pamilyang naging biktima ng magkakahiwalay na insidente ng sunog gaya ng 20 sa Cebu City; 17 sa Paco, Maynila; anim sa San Jose del Monte City, Bulacan; lima sa Tanjay City, Negros Oriental; gayundin ang 205 na pamilya mula sa Ipil, Zamboanga Sibugay.

Hindi rin natin kinalimutan ang 1,000 biktima ng bagyong Odette sa Bais City, Negros Oriental.

Naghatid din tayo ng ayuda sa mahihirap na residente ng iba’t ibang komunidad para gumaan ang kanilang dalahin. Napangiti natin ang 1,666 benepisaryo sa lungsod ng San Jose del Monte, Bulacan; 1,000 sa Arayat, Pampanga; 1,000 sa Nasugbu, at 666 sa San Jose, Batangas; 734 sa Pila, Laguna at 333 sa Lopez, Quezon.

Para maipagpatuloy ang kanilang maliit na negosyo, inayudahan din natin ang 228 micro entrepreneurs sa Jamindan, Capiz.

Mga kababayan ko, hindi tayo nauubusan ng mga pagsubok na kinakaharap araw-araw. Maaasahan ninyo na habang tinutupad ko ang aking tungkulin bilang inyong senador at lingkod bayan, laging una sa akin ang kabutihan at kapakanan ng lahat. Isang prebilehiyo at karangalan para sa atin na mapaglingkuran kayo at ang aking mga adhikain ay maging bahagi ng sama-samang pagkakamit ng komportableng buhay ng bawat Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.