Pagtiyak sa kapayapaan at kaayusan ng bayan

ni Bong Go - @Bisyo Magserbisyo | September 23, 2022

Patuloy na pinupunan ng administrasyon ni Pangulong Ferdinand “Bongbong” Marcos, Jr. ang iba’t ibang posisyon sa pamahalaan at tungkulin ng Commission on Appointments—na kung saan isa ako sa mga miyembro—na suriin ang kuwalipikasyon ng mga itinatalaga.

Mahalaga ang tungkulin ng CA dahil kailangang maging sobrang mapanuri kami sa pagsala sa mga hahawak ng posisyon para matiyak na sapat ang kanilang kakayahan at karanasan para mapatakbo ang tanggapan na kanilang hahawakan, at ang magbebenepisyo ay ang mamamayang Pilipino.

Ngayong linggo ay kinumpirma natin ang appointment ni Department of Labor and Employment Secretary Bienvenido Laguesma. Dati na siya sa posisyong ito sa administrasyon ni dating pangulong Joseph Estrada, kaya umaasa tayong patuloy niyang pangangalagaan ang kapakanan at karapatan ng lahat ng manggagawang Pilipino.

Sinuportahan din natin ang kumpirmasyon ng 50 Flag and Senior Officers ng Armed Forces of the Philippines. Inisa-isa pa talaga nating banggitin ang kanilang pangalan dahil tayo ay nagpapasalamat sa kanilang serbisyo lalung-lalo na nitong pandemya.

Isa lang ang paalala natin, unahin ng militar at kapulisan ang interes at seguridad ng ating mga kababayan. Patuloy ninyong pagserbisyuhan ang ating mga kababayan at palagi pong uunahin ang interes ng gobyerno at ng ating bayan.

Nabanggit natin ito dahil na rin sa pangambang muling tumaas ang bilang ng mga krimen sa bansa. Anuman ang nasyonalidad ng mga biktima, mapabanyaga man ang mga ito o Pilipino, kailangang mabigyan ng sapat na proteksyon ang sinumang walang ibang ninanais kundi ang mamuhay nang maayos sa loob ng ating bansa. Kung walang matatag na kapayapaan at kaayusan, mahirap sustinihan ang paglago ng ating ekonomiya, lalo ngayon na unti-unti na tayong nakakabangon mula sa hagupit ng pandemya.

Samantala, sa kabila ng ating pagiging abala sa Senado ay hindi tayo nawawalan ng oras sa pagseserbisyo sa ating mga kababayan. Patuloy tayong bumibisita sa mga komunidad upang makatulong sa mga nangangailangan, lalo na ang mahihirap nating kababayan upang makapagbigay-solusyon sa kanilang mga problema, mapakinggan ang kanilang hinaing at makapag-iwan ng ngiti sa oras ng kanilang pagdadalamhati.

Ngayong linggong ito ay naabutan natin ng ayuda ang mga kababayan nating ang kabuhayan ay apektado pa rin ng pandemya at iba pang krisis, gaya ng 1,200 benepisyaryo sa Dumaguete City, Negros Oriental; 912 sa Mandaue City, Cebu; 383 sa Tangub City, Misamis Occidental; at 1,000 pa sa Capas, Tarlac.

Tuluy-tuloy din ang pagbibigay natin ng tulong pangkabuhayan sa mga kababayan nating may maliit na negosyo. Sa lalawigan ng Cagayan, nasuportahan natin ang 328 benepisyaryo sa Gattaran; 549 sa Sanchez Mira; 149 sa Baggao; 132 sa Gonzaga at Sta. Ana; 192 sa Iguig, Piat, Tuao at Sto. Niño; at 89 pa sa Alcala.

Sa tulong ng mga ahensya ng gobyerno, nabigyan ng dagdag na puhunan ang mga maliliit na negosyo sa Camiguin, gaya ng 474 sa Catarman; 220 sa Mahinog; 620 sa Mambajao; 115 sa Sagay; at 95 pa sa Guinsiliban. Sinuportahan din natin ang mga taga-Leyte, tulad ng 600 benepisaryo sa Tacloban City; 130 sa Abuyog; at 50 pa sa Isabel. Natulungan din natin ang 200 katao sa Maasin City, Southern Leyte.

Sa Northern Samar, 302 benepisaryo mula sa Catarman ang ating naalalayan; at 200 pa sa Lope de Vega. Sa Agusan del Sur, naayudahan natin ang 67 benepiaaryo sa Rosario; at 66 pa sa San Luis. Umabot sa 250 benepisyaryo naman mula sa Bacuag at Claver, Surigao del Norte ang nabigyan ng tulong.

Pinuntahan din natin ang iba pang komunidad para maabutan ng tulong pangkabuhayan tulad ng 764 benepisaryo sa Maria, Lazi, San Juan at Enrique Villanueva, at 402 sa Siquijor, Siquijor; 591 sa Caloocan City; 223 sa Laoag City, Ilocos Norte; at 200 pa sa Marikina City.

Kahapon naman, Setyembre 22, ay personal kong binisita ang ating mga kababayan sa Malabon City at Quezon City kasama si Senator Ronald “Bato” dela Rosa at ang representative mula sa opisina ni Senator Francis “Tol” Tolentino. Nag-abot tayo ng ayuda sa halos kalahating libo nating mga kababayan doon.

Pinayuhan namin ang mga benepisaryo na palaguin ang kanilang puhunan para sa kanilang pamilya. Masarap sa pakiramdam kapag galing sa sariling pawis at pagsisikap ang kinikita. Salamat sa DSWD at iba pang ahensya sa mga programa nilang pangkabuhayan. Sa pamamagitan ng iba’t ibang inisyatibong ito, mabibigyan ang mga nangangailangan ng puhunan, tuturuang magnegosyo at tutulungang palaguin ito upang masigurong walang maiiwan sa ating muling pagbangon mula sa pandemya.

Mga kapwa natin Pilipino, kapakanan at kaligtasan ninyo ang ating prayoridad. Sa gitna ng paghahatid ng serbisyo, titiyakin ko rin na ramdam ninyo ang kapayapaan at kaayusan sa ating bayan. Asahan ninyo, anumang krisis at problema ang ating kinahaharap, palaging una ang interes at buhay ng bawat Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Sports ang isa sa mga sagot para maiwasan ng kabataan ang ilegal na droga

ni Bong Go - @Bisyo Magserbisyo | September 21, 2022

Malaki ang ating pasasalamat sa Administrasyong Marcos sa pangako nitong ipagpapatuloy ang kampanya laban sa ilegal na droga. Napakalaki kasi ng epekto ng droga sa lipunan at sa bansa. Sa isang pamilya, kapag may isa lang na miyembro na nalulong sa droga, lahat sila ay apektado na. Nawawala ang katiwasayan sa tahanan at naglalaho ang saya at pagmamahalan.

Bilang vice-chair ng Senate Committee on Public Order and Dangerous Drugs, ipagpapatuloy natin ang nasimulan ng Administrasyong Duterte na paglaban sa ilegal na droga. Dahil tulad ng ating paniniwala, kapag laganap ang droga, nariyan din ang kriminalidad at katiwalian. Kapag nasugpo ang ilegal na droga, ang kasunod nito ay katiwasayan sa ating bayan.

Si dating pangulong Rodrigo Duterte, prayoridad niyang labanan ang ilegal na droga, kriminalidad at korapsyon. Kapag bumalik ang droga, babalik din ang kriminalidad at papasok ulit ang korapsyon. Lumalaganap ang krimen, kidnapping at patayan. Madali kasi ang pera sa droga at lucrative business 'yan kahit ilegal.

Hindi natin dapat hayaang bumalik o muling lumaganap ang ilegal na droga sa bansa. Malayo na ang ating narating sa laban na ito. Marami nang nakumpiska, nahuli, napanagot at nagbagong buhay sa nakaraang anim na taon. Pero hindi ito ang panahon para magkumpiyansa dahil kinabukasan at kaligtasan ng ating mga anak ang nakasalalay dito.

Kaya tayo, bilang lingkod bayan ay ipagpapatuloy natin ang adbokasiya ni Tatay Digong at suportado ko rin ang hangarin ng administrasyon ni Pangulong Bongbong Marcos, Jr. na paigtingin pang lalo ang laban sa pamamagitan ng pagbibigay ng mas maraming oportunidad sa mga biktima ng droga na ma-rehabilitate at magbagong buhay.

Nakalinya rin naman ating kampanya laban sa ilegal na droga sa pananaw ng ating Pangulo na dapat paigtingin ang prevention — pagpapalawak ng edukasyon at impormasyon sa masamang epekto, lalo na sa kabataan, pagtulong sa mga drug dependent na gumaling at makabalik sa kanilang pamilya at lipunan nang nakabatay sa mga umiiral na batas, at ang pagrespeto sa kanilang mga karapatang-pantao.

Palagi nga nating sinasabi, itong mga drug dependent ay mga biktima lang kaya dapat nating unawain at tulungan na makawala sa kanilang masamang bisyo. Sa layuning ito, isinumite natin sa Senado ang Senate Bill No. 428 na, kung maisasabatas, magtatayo ng drug abuse treatment and rehabilitation center sa bawat lalawigan sa buong bansa sa ilalim ng pamamahala ng Department of Health.

Pangangalagaan dito ang mga drug dependent at tutulungan silang muling lumakas ang kakayahang pisikal at sikolohikal, at kung paano humarap sa anumang problemang panlipunan. Kapag natapos ang kanilang rehabilitasyon, patuloy pa rin silang aalalayan ng rehabilitation center hanggang tuluyan silang maging malusog, makabalik sa kanilang pamilya at maging kapaki-pakinabang na bahaging muli ng ating lipunan.

Isa pang approach na ating ginagawa para makaiwas ang mga kababayan natin sa droga, lalo na ang kabataan, ay ang ibaling ang kanilang atensyon sa sports. Sa ganitong paraan, natuturuan ang kabataan ng disiplina at iba pang katangian ng isang produktibong mamamayan upang sila ay umasenso sa buhay.

Isinumite rin natin ang Senate Bill 423 o ang panukalang "Philippine National Games Act of 2022". Layunin nitong magkaroon ng ugnayan ang grassroots sports promotion sa national sports development para ang lahat ng mga Pilipinong kabataan na may potensyal sa iba’t ibang larangan ng palakasan ay mabigyan ng pantay na oportunidad na makasali sa mga international sporting events para maipamalas ang kanilang kakayahan. Sasanayin natin sila para maging miyembro ng ating mga pambansang koponan. Naniniwala tayong ito ang magiging daan para kilalaning muli ang Pilipinas bilang “Sports Powerhouse of Asia.”

Kaya walang tigil din ang ating suporta sa lahat ng atletang Pilipino na magandang ehemplo sa ating kabataan. Ang tagumpay ng ating mga atleta ay tagumpay din ng buong sambayanang Pilipino.

Nitong Setyembre 20 ay nag-co-sponsor tayo sa Senado ng Adopted Resolution No. 18—na isa rin tayo sa may-akda—bilang pagbati at pagkilala sa ating pole vaulter na isa sa pinakamahusay sa buong mundo—si EJ Obiena. Sunud-sunod ang kanyang panalo at karangalang iniuwi sa ating bansa ngayong taon kaya nararapat lang ang ganitong rekognisyon para sa kanya.

Naging bisita rin po natin sa Senado ang Siklab Pilipinas, ang ating Philippine netball team, na nagtapos sa ikalimang puwesto sa nakaraang Asian Netball Championships sa Singapore at nag-kampeon sa Plate Category. Pinasalamatan natin sila sa kanilang magandang ipinakita, at suportado natin ang kanilang paglahok sa mga susunod na kompetisyon.

Ang patuloy na tagumpay ng ating mga atletang Pilipino ay nagsisilbing inspirasyon sa kabataan na sundan ang kanilang mga yapak. Kaya umaasa tayong sa pamamagitan ng grassroot sports development at sa ating patuloy na suporta, mas marami pa tayong matutuklasang talento para sa iba’t ibang disiplina — hindi lang sa mga sikat na laro tulad ng basketball kundi sa ibang larangan na puwedeng pasukin ng kabataan.

Ang masiglang sports program ay nagbibigay ng oportunidad sa mamamayan na maipakita ang kanilang husay at galing. Mayroon din silang napaglilibangan para makaiwas sa kaway ng droga at iba pang masasamang bisyo. Kapag nagsasagawa tayo ng relief efforts sa mga komunidad, palagi nating sinasabi na “get into sports and stay away from drugs”. Namimigay tayo ng mga bola tuwing nag-iikot ako. 'Yan ang paraan natin para mailayo ang kabataan sa ilegal na droga.

Umaasa tayong sa ilalim ng kasalukuyang administrasyon ay patuloy na sisigla ang ating mga programang pampalakasan para maging malakas din ang ating kampanya laban sa droga at tuluyan nating makamit ang ligtas at komportableng buhay.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Magpabakuna na ang mga kuwalipikado, plis!

ni Bong Go - @Bisyo Magserbisyo | September 16, 2022

Palagi nating ipinapaalala sa lahat na hanggang nand'yan pa ang COVID-19, delikado pa rin. Sa kabila ng pagluluwag ng restriksyon sa pagsusuot ng face masks outdoors, patuloy pa rin tayong mag-ingat at magbayanihan. Wala namang masama kung magsuot pa rin ng face mask kahit optional na lang ito para makatiyak na ligtas tayo sa COVID-19 at iba pang sakit.

Bilang Chair ng Senate Committee on Health, masaya ako na marami pa ring Pilipino ang sumusunod sa health protocols. Sana ay magbunga ang palaging pakiusap ng inyong Senator Kuya Bong Go, na huwag magkumpiyansa at patuloy na mag-ingat at sundin ang mga patakaran. Bahagi na dapat ito ng ating disiplina para mapangalagaan ang ating kalusugan—na prayoridad ko namang tungkulin sa inyong lahat.

Kaya naman, hindi ako tumitigil sa aking pagsisikap na mas maprotektahan ang inyong kalusugan. Patuloy rin ako sa panawagan sa ating pamahalaan, mga kinauukulang ahensya at maging sa mga LGUs na mas palakasin pa ang vaccine rollout, lalo na sa mga rural areas, partikular sa malalayong komunidad na mahirap para sa mga residente ang magpunta sa vaccination sites. Hangga’t maaari, dalhin natin sa mga tao ang bakuna.

Ang pakiusap ko naman sa ating mga kababayan, magpabakuna na ang mga kuwalipikado — maging sa booster shots. Nakita natin na ang bakuna ang tanging susi para tuluyan na nating malampasan ang pandemyang ito. Pag lahat po tayo ay bakunado na, mas luluwag pa ang mga polisiya, mas magbubukas ang ating ekonomiya at mas mabilis tayong makababalik sa normal na buhay.

Hindi rin ako humihinto para mas mapalakas pa at maging laging handa ang ating healthcare system dahil hindi natin alam kung kailan muling may susulpot na bagong sakit at ayaw na nating mabulaga gaya ng nangyari sa COVID-19.

Sinisikap natin na mas maraming maitayong Super Health Centers sa iba’t ibang bahagi ng ating bansa lalo na sa malalayo at mahihirap na komunidad. Ito pong SHC ay improved version ng rural health unit at may mga kagamitan, pasilidad at kakayahan na gamutin ang mga pasyente na tulad sa isang ospital.

May pondo para sa pagtatayo ng 305 SHCs sa 2022 budget sa ilalim ng Health Facilities Enhancement Program. Maraming SHC na ang sinisimulang itayo at magpapatuloy ito hanggang maabot ang ating layunin na ilapit sa mga komunidad ang kinakailangang pasilidad at serbisyong medikal na mangangalaga sa kanilang kalusugan.

Bilang mambabatas, patuloy kong susubaybayan ang implementasyon ng Malasakit Center Act. Napakalaking tulong po ng mga itinayong Malasakit Centers sa ating mga kababayan sa pagbabayad ng kanilang hospital bills. Hangad ng mga Malasakit Centers na ibaba sa lowest amount possible, kung hindi man zero, ang hospital bill ng isang pasyenteng Pilipino.

Tuluy-tuloy ang ating pagpapatayo nito at noong Setyembre 15 ay personal na sinaksihan ko ang pagbubukas ng ika-152 Malasakit Center na nasa Maria L. Eleazar General Hospital sa Tagkawayan, Quezon. Bahagi pa rin ito ng aking layuning ilapit ang malasakit at serbisyo ng gobyerno kahit sa pinakamalalayong komunidad.

Personal din tayong namahagi ng ayuda sa ating mga kababayan sa Tagkayawan at Atimonan, Quezon, at napagkalooban natin ng tulong ang nasa halos 800 na mga benepisyaryo. Medyo may kalayuan po ang mga lugar na ito, pero sadyang naglaan ako ng oras kasama si Senador Robin Padilla para makasama at marinig ang mga hinaing ng mga tagarito, at malaman kung ano pa ang maaari naming maitulong.

Bukod naman sa mga taga-Quezon, gaya ng dati, maagap ang ginawa nating pagsaklolo sa mga kababayan nating naging biktima ng sunog. Agad nating dinaluhan ang 214 pamilya sa Brgy. Baesa, Quezon City; 179 sa Brgy. Mabolo at Guadalupe sa Cebu; at 58 pa sa Brgy. Villamonte, Brgy. 6, at Brgy. Punta Taytay sa Bacolod City.

Naglibot tayo sa malalayong komunidad para maghatid ng ayuda sa mga apektado pa rin ng pandemya at iba’t ibang krisis ang kabuhayan. Napagaan natin ang dalahin ng 1,000 residente ng Ternate, Cavite; 1,000 sa Baliuag, Bulacan; 978 sa Sugbongcogon, Misamis Oriental; 301 sa Legazpi City, Albay; 143 sa Catarman, Camiguin; 116 sa San Rafael, Bulacan; at 80 pa sa Paracale, Camarines Norte. Sinuportahan rin natin ang 441 senior citizens sa Caloocan City.

Nagkaloob naman tayo ng dagdag na tulong pangkabuhayan sa mga kababayan nating may munting negosyo, gaya ng 1,992 benepisaryo sa Cauayan, Naguilian, San Guillermo, Echague, Ilagan, Tumauini, Cabagan at Sto. Tomas sa Isabela; 800 sa Murcia, Silay City, Victorias City, EB Magalona at Manapla sa Negros Occidental; 702 sa Saluysoy, Meycauayan City, Bulacan; 682 sa Bacolod City, Negros Occidental; 600 sa Sarangani, Davao Occidental; 600 sa Bataan; 400 sa Esperanza, Sultan Kudarat; 243 sa Bambang, Nueva Vizcaya; at 108 pa sa Bongabon at Gabaldon sa Nueva Ecija.

Mga kababayan, sa kabila ng mga gawaing iniatang ninyo sa akin bilang senador ay hindi ko kaliligtaan ang paglapit sa inyo para dalhin ang malasakit at serbisyo saan man kayo naroroon. Hindi po ako titigil sa aking adhikain na maiangat ang kalagayan ng bawat Pilipino, at magkaroon ng komportableng buhay. Asahan po ninyo na laging handa ang inyong Senador Kuya Bong Go, na tumulong sa lahat sa abot ng aking makakaya para masigurong walang maiiwan sa ating muling pagbangon!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.