Dagdag-pondo para sa serbisyong pangkalusugan

ni Bong Go - @Bisyo Magserbisyo | October 5, 2022

Sa naganap na hearing ng Senate Committee on Finance tungkol sa budget ng Department of Health noong Oktubre 3 ay binigyang-diin natin na napakahalaga para sa ahensya ang kanilang magiging pondo para sa 2023 habang unti-unti tayong bumabangon mula sa pandemya. Ngayon ang tamang panahon para mag-invest tayo sa pagpapalakas sa healthcare system.

Pinasalamatan natin ang mga healthcare workers na hanggang ngayon ay patuloy na nagsasakripisyo para isalba ang buhay ng mga kapwa nila Pilipino. Ipinaalala rin natin na dapat mabayaran ang hindi pa nila nakukuhang allowances na itinakda sa Republic Act 11712, o ang Public Health Emergency Benefits and Allowances for Health Care Workers. Nagtaya ng buhay ang ating health workers at hindi iyon mababayaran ng kahit anuman.

Mahalaga rin sa akin na patuloy nating pagandahin ang mga pampublikong ospital na karamihan ay mahihirap na kababayan natin ang pumupunta. Sa dami ng nangangailangan ng serbisyong pangmedikal, paano gagaling ang mga pasyente na nagsisiksikan sa ospital? Saksi tayo rito sa madalas na pagbisita sa mga probinsya.

Noong 18th Congress ay nakapagpasa tayo ng 69 batas para sa pagpapaganda at pagpapatayo ng mga pampublikong ospital sa buong bansa. Kaya asahan ninyo na bilang Chairman ng Committee on Health, handa tayong tumulong sa DOH.

Sabi nga ni Pangulong Bongbong Marcos sa kanyang unang SONA, kailangang mailapit natin ang healthcare system sa taumbayan ng hindi nila kailangang pumunta sa sentro ng kanilang bayan, lalawigan o rehiyon. Kaugnay nito, dapat nating tiyakin na may sapat na pondo para sa Health Facilities Enhancement Program, at para sa patuloy na pagtatayo ng Super Health Centers na isinulong natin sa budget ngayong taon.

Bukod sa sapat na pasilidad, equipment at medical personnel, importante rin na bigyan ng dagdag-pondo ang mga programang nagbibigay ng direktang tulong-pinansyal sa ating mga kababayan, tulad ng Medical Assistance to Indigent Patients. Marami sa mahihirap nating kababayan ang walang ibang matatakbuhan at umaasa lang sa tulong ng gobyerno kapag sila ay naoospital. Ang iba nga ay ayaw magpaospital dahil takot sa malaking babayaran.

Ito ang dahilan kaya ipinasa natin ang Republic Act 11463 o ang Malasakit Centers Act noong 18th Congress para maging madali sa ating mga kababayan ang pagkuha ng tulong medikal mula sa pamahalaan. Dapat nating tiyakin ang patuloy na operasyon ng mga Malasakit Center lalo na’t marami itong natutulungang mahihirap na pasyente. Siguraduhin nating hindi balakid ang kahirapan sa pagpapagamot. Pera naman ng taumbayan ito, ibinabalik lang natin sa kanila sa pamamagitan ng mabilis, maayos, at maaasahang serbisyong pangmedikal na makukuha nila mula sa Malasakit Centers.

Importante ring mabigyan ng sapat na pondo ang mga batas na ipinasa natin sa pag-upgrade o pagtatayo ng pampublikong ospital, tulad ng Joni Villanueva General Hospital sa Bocaue, Bulacan. Ayaw nating nakatiwangwang at masayang ito dahil baka mas mahal pa yung lupa kaysa sa ospital na itinayo, at nasa strategic locations.

Tinukoy din natin na ang dagdag sa subsidiya sa PhilHealth mula P80 bilyon ngayong 2022 ay naging P100 bilyon sa 2023, at dapat magamit ito ng PhilHealth sa dagdag ng benepisyo na sakop ng Universal Healthcare Law gaya ng para sa dialysis at pagpapalawak ng Konsulta program. Sa Konsulta program, sagot ng PhilHealth ang pagpapa-check-up o laboratory test sa isang PhilHealth-accredited health facility. Dapat gawing libre ang pagpapa-check-up para hindi natatakot ang ating mga kababayan na alamin ang kalagayan ng kanilang kalusugan.

Hiniling din natin na dagdagan ang pondo sa specialty hospitals tulad ng Lung Center of the Philippines, Philippine Heart Center at National Kidney and Transplant Institute. Ang malalaking ospital na ito ang pinakapinupuntahan ng ating mahihirap na kababayan, kaya dapat masuportahan ang patuloy na pag-improve ng kanilang serbisyo.

Dapat may sapat na pondo para sa mga programa laban sa cancer, tuberculosis at mental health disorders, lalo na’t maraming apektado ang mental health ngayong panahong ito ng krisis sa bansa. At habang patuloy ang pagbabakuna laban sa COVID-19, hindi natin dapat kalimutan na labanan din ang iba pang vaccine-preventable diseases, tulad ng polio at measles.

Palagi nating tandaan na hindi pa tapos ang pandemya at delikado pa rin ang panahon habang nariyan pa ang COVID-19. Huwag tayo magkumpiyansa. Siguraduhin nating makarating ang bakuna sa mga nangangailangan nito dahil ang bakuna lamang ang tanging susi at solusyon ngayon para makabalik tayo sa normal na pamumuhay.

Napakahalaga ng buhay at kalusugan ng mga Pilipino, kaya sinuportahan at iniendorso natin ang dagdag-pondo para sa kalusugan. At tulad ng palagi nating paalala sa lahat ng ahensya ng gobyerno, siguraduhin nating magagastos ang pondo sa tama at naaayon sa batas—at ang mahihirap nating kababayan ang higit na dapat makinabang.

Huwag nating sayangin ang mga sakripisyo natin nitong nakaraang mga taon. Matuto tayo sa nangyari nitong pandemya at sikaping maging mas handa sa anumang krisis pangkalusugan na maaaring dumating pa. Higit sa lahat, siguraduhin nating walang maiiwan sa ating muling pagbangon bilang nagkakaisa at mas matatag na sambayanang Pilipino!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Serbisyo at tulong sa higit na nangangailangang Pilipino

ni Bong Go - @Bisyo Magserbisyo | September 30, 2022

Madalas akong may mga bisita sa aking tanggapan sa Senado na mga lokal na opisyal ng iba’t ibang munisipalidad, lungsod at lalawigan sa ating bansa. Minsan, napakalayo pa ng kanilang pinanggagalingan at talagang nagsasakripisyo para lang maipaabot ang mga hinaing ng kanilang nasasakupan. Bahagi ng tungkulin natin bilang mambabatas ang makinig sa kanila, alamin ang kanilang karaingan na ating masosolusyunan sa pamamagitan ng paglikha ng batas, mailapit sa mga ahensya ng pamahalaan o kung kakayanin sa aking pansariling kapasidad.

Kung ako lang ang papipiliin, mas gusto ko na ako na lang mismo ang bababa sa kanilang mga lugar. Tulad ng sinabi ko, saang sulok man ng bansa, basta kaya ng panahon, oras at katawan ko ay sisikapin kong puntahan kayo. Hindi ko kayang manatili lang sa loob ng opisina habang may mga kababayan tayong humihiling ng kaunting tulong at malasakit sa gobyerno.

Para sa akin ay napakahalaga ng ganitong pagkakataon. Nalalaman ko ang sitwasyon sa kanilang lugar at nadedetermina ko ang mga nararapat na solusyon upang makapag-iwan ng kaunting ngiti sa oras ng kanilang pagdadalamhati. Isa rin po itong mahalagang proseso ng pagtutulungan para mailapit namin mismo ang serbisyo sa mga tao.

Bilang Chair ng Senate Committee on Health at ng Sports, partikular ako sa kalusugan at kaligtasan ng ating mga kababayan lalo na ang mga nasa malalayong lugar. Kung mayroon na silang Malasakit Center, inaalam ko kung ano pa ang mga kailangan para mas matulungan ang mga pasyente.

Sinusubaybayan ko rin ang kanilang mga sports program, ang kabataang may potensyal sa iba’t ibang sports dahil epektibo rin itong solusyon para mailayo sila sa ilegal na droga at iba pang bisyo. Inaalam ko rin ang peace and order situation, at, higit sa lahat, kung paano makakatulong sa mga nasalanta ng mga kalamidad.

Nitong Huwebes, Setyembre 29 ay bumisita ako sa San Miguel, Bulacan kasama sina Senator Robinhood Padilla at Senator Bato dela Rosa para alamin ang kalagayan ng ating mga kababayan doon na noong Setyembre 25 lang ay hinagupit ng bagyong Karding. Nagkaloob po tayo ng tulong sa 500 residente roon at tiniyak natin ang tuluy-tuloy na pag-ayuda sa kanila sa abot ng ating makakaya.

Ngayong araw na ito, Setyembre 30, ay sa Del Carmen, San Benito, at Surigao City sa Surigao del Norte naman po tayo personal na bumisita. Marami po sa kanila ang hindi pa nakababangon mula sa pananalasa ng bagyong Odette noong Disyembre. Maraming tahanan at negosyo ang naapektuhan, bukod pa ang mga bahagi ng kapaligiran nito na nasira gaya ng mga tourism sites kaya marami rin ang pansamantalang nawalan ng hanapbuhay.

Nagkaloob din tayo ng ayuda sa mahigit dalawang libong benepisaryo, kasabay ng pagsaksi sa groundbreaking ng Super Health Center sa Del Carmen at San Benito. Ipinaalala ko rin sa kanila na kung kailangan nila ng tulong medikal ay lumapit lang sa Malasakit Center sa kanilang lugar.

Samantala, ngayong linggo ay nag-abot din ang aking tanggapan ng ayuda sa iba’t ibang komunidad na ang mga residente ay apektado pa rin ng pandemya at iba pang krisis ang kabuhayan.

Maagap nating dinaluhan ang 35 kataong nasunugan sa Bgy. 439, Maynila; at 69 sa Mandaue City, Cebu.

Sa Sta. Teresita, Batangas, umabot sa 1,110 benepisaryo na nawalan ng trabaho ang nabigyan natin ng ayuda. Pinagaan naman natin ang dalahin ng 800 mahihirap na residente ng Malolos City, Bulacan; 500 sa Tangalan, Aklan; at 152 pa sa Zamboanga City. Pinagkalooban din natin ng tulong ang 775 estudyante ng Bulacan State University-Bustos Campus.

Tuluy-tuloy rin ang pagkakaloob natin ng dagdag-puhunan sa ating maliliit na negosyante para mapalago nila ang kanilang negosyo at makatulong sa pagpapasigla ng kanilang lokal na ekonomiya. Narating natin ang Romblon para pangitiin ang kanilang MSMEs gaya ng 150 benepisaryo sa Romblon; 150 sa Looc; 50 sa Alcantara; at 50 pa sa Sta. Maria.

Habang sa Agusan del Norte, naabutan natin ng tulong ang 176 na indibidwal sa Cabadbaran City; 147 sa Jabonga; 77 sa Buenavista; at 53 sa Tubay. Sa Surigao del Norte naman ay tinulungan natin ang 50 sa Alegria; at 50 din sa Placer.

Sa isla naman ng Siargao ay nakapaghatid din tayo ng tulong sa 40 katao sa General Luna; 30 sa Dapa; 21 sa Burgos; 19 sa San Benito; 15 sa Del Carmen; at 15 sa Sta. Monica. Tayo rin ay nag abot sa mga taga-Dinagat Islands kung saan 72 ang natulungan sa San Jose at Basilisa; 50 sa Cagdianao at Dinagat; at 25 sa Libio.

Sa Quirino, 1,635 MSMEs din ang ating natulungan na mula sa Aglipay, Cabarroguis, Diffun, Maddela, Nagtipunan at Saguday.

Pinuntahan din natin ang Ilocos Norte para sa dagdag na puhunan ng 282 benepisaryo sa Pagudpud; 247 sa Currimao; at 240 pa sa Batac. Hindi rin natin kinalimutan ang 200 pa sa Navotas City.

Marami pa sa ating mga kababayan ang dapat mahatiran ng serbisyo at malasakit ng pamahalaan. Kaya anumang oras ay susubukan kong puntahan ang inyong lugar para pagaanin ang inyong mga dalahin at mabigyan kayo ng bagong pag-asa. Sa abot ng aking makakaya, ipagpapatuloy ko ang ating iisang hangarin na magbigay ng mas ligtas at komportableng buhay sa bawat Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Kahandaan katatagan at pagmamalasakit sa panahon ng sakuna

ni Bong Go - @Bisyo Magserbisyo | September 28, 2022

Kasalukuyang nakikipag-ugnayan ang tanggapan ng inyong Senador Kuya Bong Go sa iba’t ibang komunidad na labis na naapektuhan ng Bagyong Karding. Inaalam natin ang lawak ng pinsala sa kanilang lugar at kung anong tulong ang kanilang kinakailangan.

Asahan ninyong sa abot ng aking makakaya — hanggang kaya ng oras at katawan ko — ay pupunta ako mismo o ang aking opisina sa mga naapektuhang lugar para maghatid ng tulong, pakinggan ang kanilang hinaing at mag-iwan ng ngiti sa oras ng kanilang pagdadalamhati.

Ang panahon ng sakuna ay panahon din para sa pagkakaisa, pagtutulungan at bayanihan. Gagawin ko ang nasa aking kapasidad para mapagaan ang dalahin ng mga kababayan nating hindi pa nga nakababangon sa hagupit ng pandemya at iba’t ibang krisis ay muli na namang humarap sa panibagong pagsubok. Tulad ng dati, hindi ko kayo iiwan at sama-sama tayong babangon mula sa kalamidad na ito.

Ang Bagyong Karding at ang iba pang kalamidad, tulad ng lindol at pagbaha, ang mga dahilan kaya pursigido akong maisulong ang aking mga prayoridad na panukalang batas sa 19th Congress. Kung maisasabatas po ang mga ito, mas mapoproteksyunan natin ang buhay ng bawat Pilipino.

Isinusulong ko ang paglikha sa Department of Disaster Resilience. Layunin nitong mapabilis ang mga mekanismo sa paghahanda kapag may kalamidad at iba pang emergency. Kapag naitatag ang DDR, may sarili itong kalihim na magbibigay ng mas tutok na direktiba sa iba pang sangay ng pamahalaan kung paano tutugunan ang sitwasyon bago pa dumating ang kalamidad hanggang sa rescue, recovery at rehabilitation efforts lalo na ang restoration of normalcy ng buhay ng mga apektado nating kababayan.

Ipinanukala ko rin ang Mandatory Evacuation Center Act of 2022. Layunin nito na magtayo ng matitibay na evacuation center sa bawat probinsya, lungsod at munisipalidad. Dito pansamantalang tutuloy ang mga apektadong residente. Bukod sa maayos na tulugan at palikuran, kumpleto ito sa mga pangunahing pangangailangan gaya ng pagkain, tubig, gamot at mga damit.

Isa pa ang Rental Housing Subsidy Bill na ang layunin naman ay pagkalooban ng subsidiya sa pangungupahan ang mga kababayan nating nawalan ng tirahan para mayroon silang disenteng matitirahan at gastusin habang hindi pa naitatayong muli ang kanilang bahay o habang inihahanap pa sila ng relokasyon.

Nakikita naman natin na kapag may kalamidad, siksikan ang mga evacuees sa mga pansamantalang ginagawang evacuation center tulad ng mga basketball court o eskwelahan. Malaki rin ang tsansa na magkahawahan sila ng sakit. Ito ang iniiwasan natin para hindi na matagalan na makabangon ang mga komunidad. Kung minsan, nariyan na uli ang panibagong bagyo, hindi pa sila nakaka-recover sa nagdaang hagupit.

Ang mga panukalang batas ay ilan sa magiging solusyon para mapagaan ang paghihirap ng ating mga kababayan. Hindi man natin kontrolado ang pagdating ng kalamidad, kaya naman natin maging mas handa sa ganitong mga pangyayari.

Bukod dito, ang Bagyong Karding ay nag-iwan din ng sakit sa ating kalooban dahil sa pagkasawi ng limang rescuers na sina George Agustin, Narciso Calayag, Jr., Troy Justin Agustin, Jerson Resurreccion, at Marby Bartolome.

Unang-una, ako ay nakikiramay sa mga naiwang pamilya at mahal sa buhay ng mga nasawing rescuers sa nangyaring pagbaha sa San Miguel, Bulacan. Nakakalungkot na buhay ang naging kabayaran ng kanilang pagtupad sa tungkulin at pagnanais na makasagip ng buhay ng kanilang kapwa tao. Ang lima po nating magigiting na rescuers ay tunay na mga bayani.

Bagama't hindi matutumbasan ng anumang halaga ang mga buhay na nawala, kasalukuyan kong pinag-aaralan ang posibleng pagpa-file ng panukalang magbibigay ng mga kaukulang benepisyo para sa mga casual at contractual na empleyado ng gobyerno. Kasama na ang pagbibigay ng security of tenure para sa mga matagal na sa serbisyo.

Para sa akin, anuman ang status ng employment, lahat ng tauhan ng pamahalaan ay dapat na pagkalooban ng hazard pay, lalo na ang mga sumasabak sa mapanganib na sitwasyon. Ipinatupad na ito noon ni dating pangulong Rodrigo Duterte, kung saan ipinag-utos niya na bayaran ang COVID-19 hazard pay ng lahat ng regular, contractual, casual, Contract of Service at Job Order na frontliners. Wala akong nakikitang dahilan para hindi natin maipatupad din ang ganito sa mga nagbubuwis ng buhay sa pagganap ng kanilang tungkulin na isalba ang kapwa nila.

Ang pinsalang hatid ng Bagyong Karding at ang malungkot na pangyayari sa ating limang rescuers ay paalala na dapat palagi tayong one-step ahead. Hindi natin maiiwasan ang pagdating ng mga ito, pero mas mabuti na ang lagi tayong handa para maiwasan natin ang mas malaking pinsala, at pagkasawi ng buhay ng ating mga kababayan. Para sa akin, importante ang buhay ng bawat Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.