Tiyakin ang kapakanan ng mga estudyante ngayong F2F

ni Bong Go - @Bisyo Magserbisyo | October 26, 2022

Ngayong Nobyembre 2 ay sisimulan na ng mga pampublikong paaralan ang pagdaraos ng limang araw na face-to-face classes kada linggo. Ang mga pampribadong paaralan ay maaari namang magsagawa ng blended learning. Batay ito sa Department Order 44 na nilagdaan ni Vice-President at Department of Education Secretary Sara Duterte.

Suportado natin ang desisyon ng ehekutibo at tiwala tayo sa kakayahan nilang ipatupad ito nang maayos. Gayunman, muli tayong nananawagan sa pamahalaan at sa mga school authorities na tiyakin ang kalusugan at kapakanan ng mga estudyante sa kanilang pagbabalik sa mga silid-aralan.

Bilang Chair ng Senate Committee on Health at miyembro ng Senate Committee on Basic Education, bagaman at nararanasan na natin ngayon ang bahagyang pagbaba ng bilang ng mga tinatamaan ng COVID-19 at marami na sa sektor ng ekonomiya ang nagbabalik sa kanilang normal na operasyon, napakahalaga na mapangalagaan ang buhay ng lahat ng Pilipino at makontina ang panganib na dala ng pandemya, lalo na sa kabataan.

Hinihimok natinang lahat na siguruhin ang kapakanan at kalusugan ng mga estudyante sa gitna ng pagpapatupad ng full face-to-face classes sa bansa. Naiintindihan natin na importante ang edukasyon dahil ito ang tanging puhunan sa mundong ito. Kaya kapag nagkakaloob po ang aking tanggapan ng ayuda sa mga komunidad, pinapayuhan at hinihikayat ko ang mga bata na patuloy na mag-aral kahit na may krisis tayong hinaharap.

Gayunman, gawin natin ito sa ligtas na paraan. Ipinapaalala natin sa pamunuan ng mga paaralan at maging sa mga guro na mahigpit na ipatupad ang Required Health Standards for COVID-19 Mitigation na magkatuwang na inilabas ng DepEd at ng Department of Health ngayong magkakasama na muli sa loob ng silid-aralan ang mga guro at estudyante.

Dapat maimplementa ito nang maayos para hindi malagay sa alanganin ang kaligtasan at kalusugan ng mga kabataan. Kahit ayaw nating maantala ang klase nila, importanteng ligtas ang mga estudyante. Health and safety pa rin ang importante. Sa kagustuhan nating makapag-aral ang mga bata, huwag nating kalimutan na unahin palagi ang interes, kapakanan at buhay nila at ng bawat Pilipino.

Palakasin din natin ang pagbabakuna sa mga komunidad. Ngayong puwede nang magpabakuna ang mga edad mula lima hanggang 18, sana ay mas lalong paigtingin natin ang vaccination drive para mas maraming kabataang Pilipino ang mabakunahan, lalo na ngayong patuloy na lumalabas ang mga bagong variants at subvariants ng COVID-19.

Bilang magulang din, prayoridad nating proteksyunan ang mga bata. Unang-una, hindi maikakailang mayroon pa ring mga hindi pa bakunado. Pangalawa, hindi natin kontrolado 'yung galaw nila at pangatlo, baka mag-back to zero na naman tayo kung sakaling magkahawahan na naman.

Kaya ngayon na puwede nang magpabakuna ang mga bata, huwag nating sayangin ang oportunidad na ito na proteksyunan sila. Palagi nating alalahanin na hindi kaya ng gobyernong mag-isa ang laban kontra pandemya. Mahihirapan din ang mga frontliners kung darami na naman ang maoospital. Ang pagkontina sa paglaganap ng virus ay nagsisimula sa ating pagiging mga responsableng mamamayan sa pamamagitan ng pagpapabakuna at pagsunod sa health and safety protocols.

Napakahalaga na palaging naipatutupad ang mga patakaran para matulungan ang mga lokal na awtoridad at ang mga eskwelahan sa ligtas na pagbabalik ng face-to-face classes. Kung kakailanganin, maglagay tayo ng dagdag-safety officers sa mga paaralan at iba pang pampublikong lugar para masigurong nasusunod ang minimum health standards. Huwag din nating kalimutan ang mga natutunan natin sa nakaraang mga taon tulad ng contact tracing at iba pang disease control mechanisms.

Proteksyunan natin ang kabataang Pilipino. Sila ang pag-asa ng ating bayan at ng mga susunod pa nating henerasyon. Bukod sa tamang edukasyon na magiging puhunan nila sa buhay, magtulungan din tayo para mabigyan sila ng mas ligtas at komportableng buhay sa hinaharap.

Ilayo natin sila sa masasamang bisyo, tulad ng ilegal na droga, engganyuhin natin silang pumasok sa mga mas produktibong gawain tulad ng sports — “Get into sports, stay away from drugs!”, ‘ika nga — at gabayan natin ang kanilang landas para maging mabuting mamamayan para sa kanilang mga magulang, pamilya at bayan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Tulong at proteksyon sa mga taga-media

ni Bong Go - @Bisyo Magserbisyo | October 22, 2022

Hindi tayo tumitigil sa pangakong pagseserbisyo sa abot ng aking makakaya para sa bawat Pilipino, lalo na ang mahihirap at walang ibang matakbuhan. Patuloy tayong pupunta sa iba’t ibang komunidad upang maghatid ng tulong, mapakinggan ang hinaing ng ating mga kababayan, masolusyunan ang mga problemang inyong hinaharap at makapag-iwan ng ngiti sa oras ng inyong pagdadalamhati.

Noong Oktubre 20 ay bumiyahe tayo patungong Mandaue City, Cebu at personal ko nating inalam ang kalagayan ng mga kababayan natin na apektado ng pagbaha. Pinangunahan natin ang pamamahagi ng ayuda sa halos isang libong benepisaryo mula sa iba’t ibang barangay, at mayroon pang mahigit 3,000 na makatatanggap din ng ayuda ngayon.

Kahapon, Oktubre 21 ay agad nating pinuntahan ang mga kababayan nating naging biktima ng sunog sa Malabon City. Personal din tayong nag-abot ng tulong sa mahigit isang daang pamilyang nasunugan.

Tulad ng madalas nating sabihin, mahirap ang sitwasyon ng mga nasunugan, binaha o tinamaan ng sakuna dahil nauwi lang sa wala ang kanilang mga pinaghirapan, bukod pa sa wala agad pagkukunan ng pangunahing pangangailangan at gastusin.

Ang ating relief team ay nakarating naman ngayong linggo sa iba’t ibang komunidad sa ating bansa para sa patuloy na adhikaing mapagaan ang mga dalahin ng ating mga kababayan habang patuloy na nakikipaglaban sa epekto ng pandemya at iba pang krisis.

Ang mga kababayan nating apektado ng bagyo tulad ng 500 sa Gapan, Nueva Ecija, at 39 sa New Washington sa Aklan ay nakatanggap ng tulong. Merong 21 na mga kababayan nating apektado ng sunog mula sa Balingasag at El Salvador City, Misamis Oriental ang nakatanggap din ng suporta.

Nagsagawa tayo ng serye ng pamamahagi ng ayuda sa iba’t ibang lugar sa Bohol at nasuportahan natin ang 1,052 benepisaryo sa Pilar; 325 sa Anda; 258 sa Dimiao; 199 sa Sevilla; at 189 pa sa Lila. Hindi rin natin kinaligtaan ang 1,900 na nangangailangan sa Zamboanga City; 600 sa San Pablo City, Laguna; at 1,000 sa Tanza, Cavite.

Sa Rizal, 500 benepisaryo sa Rodriguez ang ating natulungan, at 450 pa sa Taytay. Dagdag pa rito ang 689 benepisaryo sa Magsaysay, Lanao del Sur; 500 sa Dingalan, Aurora; 333 sa Orani, Bataan; at 190 pa sa San Fernando City, La Union.

Tuluy-tuloy rin ang pagkakaloob natin ng tulong-pangkabuhayan sa maliliit nating negosyante para sumigla ang kanilang lokal na ekonomiya. Sa Ilocos Norte, napagkalooban ng gobyerno ng pandagdag sa kanilang puhunan ang 105 MSMEs sa San Nicolas, 83 sa Paoay, at 76 pa sa Banna. Nakarating din tayo sa La Union para naman palakasin ang 109 MSMEs sa Luna, 75 sa Bangar, 199 sa Bauang at Naguilian, at 20 pa sa Sudipen.

Bukod dito, patuloy din ang ating trabaho sa Senado bilang mambabatas at lingkod-bayan.

Dagdag pa rito, suportahan din natin ang mga sektor na nagiging gabay at haligi natin sa ating paglilingkod sa bayan. Kasama na ang mga nasa media at entertainment industry.

Mahal natin ang mga taga-media. Pantay-pantay ang aking pagtingin sa kanila sa radyo man sila, online, telebisyon o dyaryo—pribado o gobyerno. Napakahalaga ng papel ng media sa paghahatid ng balita at impormasyon. Ang media rin ang nagsisilbing mata, tainga at dila ng mga tao para iparating ang kanila ang mga karaingan na nangangailangan ng agarang pansin at solusyon.

Proteksyunan natin ang buhay ng bawat mamamahayag. Kaya noong panahon ni dating Pangulong Rodrigo Duterte, binuo niya ang Presidential Task Force on Media Security (PTFoMS) dahil prayoridad niya na proteksyunan ang media. Basta siguraduhin lang na tama ang trabaho at tama ang pagbabalita.

Alam ko rin ang hirap na dinaranas ng mga taga-media. Bukod sa panganib na kanilang sinusuong makapaghatid lang ng tama at makabuluhang balita, may sarili rin silang pamilya na binubuhay. Ito ang dahilan kaya bilang pag-alalay sa kanila at sa mga taga-entertainment industry, isinulong ko ang Senate Bill No. 1183 o ang Media and Entertainment Workers Welfare Act.

Kapag naisabatas ito, magiging mandatory na ang pagkakaroon nila ng detalyadong kontrata bago sila magsimula ng trabaho. Kasama rin dito ang mga dapat nilang matanggap na benepisyo. Ipaglalaban ko ito upang tuluyang maging batas bilang pagkilala sa dedikasyon nila sa kanilang propesyon at tungkulin nila sa buong sambayanang Pilipino.

Walang Pilipino na dapat maiwan sa ating muling pagbangon. Ipagpapatuloy natin ang pagtulong. Nagsisilbing lakas ko ang aking paninindigan na, “Ang serbisyo sa tao ay serbisyo rin sa Diyos.”

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Hakbang laban sa kalamidad, susi sa matatag na bansa

ni Bong Go - @Bisyo Magserbisyo | October 19, 2022

Noong Oktubre 13 ay naging isa sa panauhing pandangal at tagapagsalita ang inyong Senador Kuya Bong Go sa ginanap na 7th MCLE-Accredited National Convention of Public Attorneys na inorganisa ng Public Attorneys Office sa pamumuno ni PAO chief Atty. Persida Acosta. Tumanggap din ang inyong lingkod ng parangal mula sa PAO bilang “Outstanding Senator.”

Bagama't nakatataba ng puso ang mga ganitong parangal lalo pa at galing sa PAO na ang tungkulin ay magkaloob ng libreng tulong na legal sa mahihirap na Pilipino, sabi ko nga sa kanila, tulad nila ay ginagawa ko lang naman ang aking tungkulin nang walang hinihinging kapalit. With or without an award, magseserbisyo ako sa abot ng aking makakaya dahil bisyo ko ang magserbisyo. Saludo naman tayo sa PAO at sa kanilang mga abogado na nagtatanggol sa hukuman para matiyak na may hustisya sa lahat, lalo na sa mga karaniwang Pilipino.

Samantala, habang papalapit ang Kapaskuhan ay patuloy pa ring dinadalaw ng mga bagyo ang ating bansa. Kaaalis lang ng Bagyong Neneng at nag-iwan ng pinsala sa kabuhayan ng mga kababayan natin sa Cagayan at Ilocos. Labis akong nalulungkot sa ganitong pangyayari dahil unti-unti na tayong nakababangon mula sa hagupit ng pandemya, pero patuloy tayong pinipilay ng mga kalamidad at iba pang krisis.

Napakahalaga ng disaster resiliency dito dahil halos 20 bagyo ang pumapasok sa ating bansa taun-taon, bukod pa ang mga kalamidad tulad ng lindol, landslide, storm surge at iba pa. Ito ang isa sa mga dahilan kaya naging adhikain ko na simula nang ako’y maging senador na gawing mas matatag o resilient at palaging handa sa mga kalamidad ang mga komunidad, lalo na sa mahihirap at liblib na lugar.

Para makamit ito, sa 19th Congress ay muli kong isinulong ang paglikha sa Department of Disaster Resilience. Layunin nitong mapabilis ang mga mekanismo sa paghahanda kapag may kalamidad at iba pang emergency. Kapag naitatag ang DDR, may sarili tayong kalihim na magbibigay ng malinaw na direktiba sa iba pang sangay ng pamahalaan kung paano tutugunan ang sitwasyon bago dumating at pagkatapos tayong tamaan ng kalamidad.

Nariyan din ang panukalang Mandatory Evacuation Center Act of 2022 na akin ding inihain sa Senado. Layunin nitong magtayo ng matitibay na evacuation center sa bawat probinsya, lungsod at munisipalidad. Bukod sa maayos na tulugan at palikuran, kumpleto ito dapat sa mga pangunahing pangangailangan tulad ng pagkain, tubig, gamot at damit upang mas madaling makabangon ang ating apektadong mga kababayan.

Isa pa ang Rental Housing Subsidy Bill na akin ding iniakda na ang layunin ay pagkalooban ng rental housing subsidy ang mga Pilipinong nawalan ng bahay para mayroon silang disenteng matitirahan. Kapag naisabatas ito, mas matutulungan nating makakuha ng marerentahang tirahan ang mga tinamaan ng sakuna.

Isinumite ko rin ang SBN 1181 o ang Philippine Building Act para masigurong mas maayos at ligtas ang disenyo at pagkagawa ng mga pribado at pampublikong gusali. Taong 1977 pa nabuo ang ating National Building Code at kailangan na itong mapag-aralang mabuti para maging akma sa patuloy na nagbabagong panahon ngayon.

Kasama rin sa disaster resiliency ang pagsigurong handa ang ating serbisyong pangkalusugan, may krisis man o wala. Kaya bilang Chair ng Senate Committee on Health, napakahalaga rin para sa akin ang mabigyan ng proteksyon laban sa anumang sakit ang mga Pilipino at mapalakas ang ating healthcare system.

Isinusulong ko sa Senado ang SBN 2155, o ang panukala para sa pagtatayo ng Virology Science and Technology Institute of the Philippines (VIP) para mapaigting ang ating kakayahan sa siyensya at magkaroon ng sapat na sariling gawang medisina at bakuna laban sa mga bagong lumalabas na sakit.

Dapat na one-step ahead tayo sa mga darating pang public health emergencies kaya isinulong ko rin ang SBN 2158 o ang pagkakaroon ng Center for Disease Control and Prevention (CDC) para mas maayos at mabilis nating matutugunan ang anumang krisis pangkalusugan.

Nariyan din ang SBN 1180 o ang Medical Reserve Corps. Sa ilalim nito, papayagan ang mga nakapagtapos sa mga kursong may kaugnayan sa medisina pero hindi pa lisensyado na tumulong at makapagserbisyo sa pamahalaan kapag may national emergencies.

Tugma ang tatlong ito sa mga prayoridad na panukalang batas ni Pangulong Ferdinand Marcos, Jr. na binanggit niya sa kanyang unang State of the Nation Address. Natutuwa rin ako na kamakailan ay sinabi ni Senate President Juan Miguel Zubiri na ang pagtatayo ng VIP at CDC ay kabilang sa mga panukalang batas na prayoridad ng Mataas at Mababang Kapulungan.

Ipinapangako ko na gagawin ko ang lahat ng aking makakaya upang tuluyang maging batas ang mga ito at mapakinabangan ng ating mga kababayan, lalung-lalo na ang mahihirap at walang malalapitan maliban sa pamahalaan.

Ginagawa ko ang mga pagsisikap na ito dahil patuloy pa rin ako sa aking hangarin na magkaroon tayo ng mas matatag na bansa na ligtas sa mga kalamidad at banta ng mga sakit. Kapag natugunan natin ang mga pangunahing problemang ito, nasa tamang landas tayo sa sama-samang pagbangon at walang Pilipinong maiiwan sa ating pagkakamit ng kaunlaran.

At lalo na ngayon na papalapit na ang Kapaskuhan, patuloy ako sa pagkakaloob ng serbisyo sa inyong lahat, dahil tulad ng madalas kong sabihin, “Ang serbisyo sa tao ay serbisyo rin sa Diyos.”

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.