Ang pangarap noon ay naisasakatuparan na ngayon

ni Bong Go - @Bisyo Magserbisyo | November 30, 2022

Bawat Pilipino ay may pangarap na mas magandang buhay para sa kanilang pamilya. Pinaghihirapan ng mga magulang na siguraduhing maging mas maginhawa ang kinabukasan ng kanilang mga anak. Ito ang rason kung bakit isinakripisyo ni dating Pangulong Rodrigo Duterte ang lahat para labanan ang masasamang elemento sa lipunan.

At tulad ng sinabi ni Pangulong Ferdinand Marcos, Jr., ang pangarap ninyo ay pangarap din namin. Ito ang dahilan kung bakit sama-sama tayong lumalaban tungo sa iisang hangarin para sa ating inang bayan. Magkaiba man tayo ng mga pinanggalingan, iisa ang daang ating tinatahak para masigurong walang maiiwan sa ating muling pagbangon.

Mula nang pagkatiwalaan ninyo ako na maging bahagi ng Senado, naging paninindigan ko na noon pa man ang gawin ang aking makakaya na magkaloob ng komportableng buhay sa lahat ng Pilipino. Ito ang panata na aking pinanindigan kasama ang pangako na magsilbi at magserbisyo sa inyo nang sapat.

Unti-unti ay nagiging reyalidad na ang pinaghirapan natin noon. Ang mga pangarap noon ay naisasakatuparan na ngayon.

Isa na ang Overseas Filipino Workers Hospital sa San Fernando City, Pampanga na pinasinayaan noong Mayo 1 na sinaksihan namin ni dating pangulong Rodrigo Duterte.

Ang OFW Hospital ay testamento kung gaano namin kamahal ni Tatay Digong ang ating mga bagong bayani at para mapangalagaan ang kanilang kalusugan maging ng kanilang pamilya. Ito rin ang kauna-unahang ospital para sa mga OFW at sa tulong nito, masusuklian natin ang kanilang sakripisyo at mapasalamatan sila sa kanilang kontribusyon sa ating bansa.

Bahagi pa rin ng ating malasakit at serbisyo sa ating mga OFW, isa sa aking mga pangarap na natupad ang paglikha sa Department of Migrant Workers.

Sa 18th Congress ay isa po ako sa may akda at co-sponsor ng Republic Act 11641, kung saan nalikha ang DMW, kaya mayroon na ngayong ahensya na nakatutok sa mga isyung kinahaharap ng OFW sa kanilang pagtatrabaho sa ibang bansa at hindi na sila kailangang mag-ikot pa sa iba’t ibang tanggapan para humingi ng tulong at serbisyo.

Sinimulan ko rin ang inisyatiba noong 2018 para matulungan ang ating mga kababayan, lalo na ang mahihirap at walang pagkukunan, sa kanilang hospital bills sa pamamagitan ng Malasakit Centers program.

Naisabatas ang Malasakit Centers Act noong 2019 na akin ring iniakda at ini-sponsor sa Senado noon. Sa pamamagitan ng Malasakit Centers, hindi na kailangang pumila o mag-ikot pa ng mga Pilipino sa mga opisina ng gobyerno para kumuha ng medical assistance. Gobyerno na mismo ang naglapit sa kanila ng mga serbisyong ito sa tulong ng Malasakit Centers, na sa kasalukuyan ay milyun-milyon na nating kababayan ang naalalayan.

Masaya rin po akong ibalita na sa ngayon ay mayroon na tayong 153 Malasakit Center sa buong bansa at nakapaglagay na rin po tayo sa OFW Hospital noong November 24, kaya dagdag-ginhawa ito sa kanila.

Bahagi naman ng aking adhikain na mapalakas ang ating healthcare system at mas maging maayos ang paghahatid ng serbisyong medikal ang pagpapatayo ng Super Health Centers sa buong bansa.

Ang SHC ay mga medium na bersyon ng polyclinics at mas malaki, kaysa sa rural health units. Magkakaloob ito ng mga serbisyo tulad ng outpatient, birthing, isolation, diagnostic (laboratory: X-ray, ultrasound), pharmacy at ambulatory surgical unit. Meron ding eye, ear, nose, and throat (EENT) service; oncology centers; physical therapy and rehabilitation center; and telemedicine. Magagamit din ito bilang satellite vaccination sites para sa mga kababayan nating nakatira malayo sa urban centers kapag may immunization na isasagawa ang Department of Health.

Ang pagtatayo ng SHC ay bahagi at pinopondohan ng Health Facilities Enhancement Program (HFEP) ng DOH na isinulong namin sa Kongreso noong nakaraang taon. Kasama ang pagpapatayo ng 307 SHCs sa buong bansa sa ilalim ng 2022 budget. Nais din nating makapagpatayo pa ng mas maraming SHCs sa susunod na mga taon kasama ang DOH at sa tulong ng LGUs. Kumpiyansa ako na sa pamamagitan nito, mas maaalagaan natin ang kalusugan ng ating mga mamamayan lalo na sa malalayong sulok ng bansa.

Sabi nila, libreng mangarap. Pero sa bawat pangarap na ito, may kaakibat na sakripisyo, serbisyo at pakikiisa na kailangan upang maging reyalidad ang mga ito.

Tulad ng mga naging pangarap ni Gat Andres Bonifacio na sa araw na ito ay ginugunita natin ang kanyang kapanganakan. Nangarap siya, kasama ang iba pang Katipunero, para sa kalayaan ng ating bansa. Nangarap siya para mabago ang buhay, lalo na ng ordinaryong Pilipino.

Kaya sana ay patuloy lang tayong magmalasakit at magbayanihan sa isa’t isa upang maisakatuparan ang ating mga pangarap para sa susunod na henerasyon.

Ang kinabukasan ng ating bansa ay nasa ating mga kamay kung kaya’t huwag tayong mawalan ng pag-asa kahit anumang hirap o krisis ang ating pinagdaraanan. Manalig tayo sa Diyos at magkaisa para sama-sama nating marating ang minimithing mas ligtas, komportable at masaganang buhay para sa lahat!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Bagong buhay para sa biktima ng droga

ni Bong Go - @Bisyo Magserbisyo | November 25, 2022

Sa ginanap na pagdinig sa Senate Committee on Public Order ngayong linggo, muli tayong nanawagan na magkaroon ng pangkalahatang sistema o holistic approach sa pamamaraan kung paano masusugpo ang paglaganap ng ilegal na droga sa bansa.

Bukod sa tapang, dapat mayroong malasakit. Importante kung paano matutulungan ang mga nalulong sa masamang bisyo na muling makapagbagong buhay at makabalik sa kanilang pamilya at sa lipunan sa pamamagitan ng mas maayos na rehabilitation programs na ipatutupad ng pamahalaan.

Isa sa mga adbokasiya ng nakaraang administrasyon ay ang pagpapanatili ng peace and order sa bansa. Kaya nagpapasalamat tayo sa Philippine National Police, Dangerous Drugs Board, Philippine Drug Enforcement Agency, National Bureau of Investigation at sa Department of the Interior and Local Government, sa lahat ng naging bahagi ng laban kontra droga dahil hindi ito magiging matagumpay kung hindi dahil sa inyong tulong at trabaho.

Masidhi ang kampanya kaya bumaba na ang crime rate noon. Mahalagang hindi masayang ang ating nasimulan at maipagpatuloy ang pagsugpo sa mga nasa likod ng ilegal na droga para masolusyunan din ang problema sa kriminalidad at katiwalian. Kaya saludo tayo sa administrasyon ni Pangulong Ferdinand Marcos, Jr. dahil sa kanilang adhikain na ipagpatuloy ang laban at bigyang-importansya ang rehabilitasyon.

Ito ang isa sa mga dahilan kaya isinumite nating muli ang isa sa ating priority bills, ang Senate Bill No. 428 na naglalayong maitayo ang Drug Abuse Treatment and Rehabilitation Center sa bawat lalawigan sa ating bansa. Ang mga nalulong sa droga ay dito pansamantalang maninirahan habang isinasagawa ang rehabilitasyon at gamutan. At kapag tuluyan na silang na-rehabilitate, magpapatuloy ang rehabilitation center sa pagsubaybay sa kanila hanggang tuluyan silang makaangkop muli sa buhay.

Bukod sa pagtiyak sa kaligtasan at seguridad ng ating bansa laban sa kasamaang hatid ng droga, napakahalagang tutukan at bigyang-pansin ang rehabilitasyon, paggaling at tuluyang pagbabagong buhay ng mga nalulong dito. Sa pamamagitan ng pagtatayo ng Drug Abuse Treatment and Rehabilitation Centers, mas mapalalakas natin ang isinasagawang pagsisikap na makapagsalba ng buhay at makawala ang mga biktima sa kuko ng mapanganib na droga.

Bahagi ng ating pangako ang patuloy na paglalapit ng serbisyo at malasakit sa mga Pilipino lalung-lalo na ang mga higit na nangangailangan.

Dahil napakahalaga ng edukasyon ng kabataang Pilipino, noong Nobyembre 23 ay sinaksihan natin ang ceremonial awarding ng scholarship certificates para sa 593 estudyanteng benepisaryo sa Minalin, Pampanga. Sinaksihan din natin ang paglulunsad ng ika-153 na Malasakit Center na nasa OFW Hospital sa San Fernando City. Matapos ito ay nag-inspeksyon tayo sa itinatayong SHC sa nabanggit ding lugar at personal na namahagi ng ayuda sa mahihirap na residente.

Ngayong linggo ay maagap nating inalalayan ang mga biktima ng sunog, tulad ng 72 residente sa Cagayan de Oro City; 19 pamilya sa Nangka at Malanday sa Marikina City, at dalawang katao sa Tacurong City, Sultan Kudarat; at ang 466 na binaha sa Cagayan de Oro City.

Nakarating din tayo sa Maguindanao del Norte at naghatid ng tulong sa 3, 333 mahihirap na residente mula sa iba’t ibang bayan. Sa Surigao del Norte ay 1,200 residente ng Sta. Monica ang naalalayan, bukod pa ang 1,184 mula sa Dapa. Sa Misamis Oriental, hindi natin kinaligtaan ang 1,595 na benepisaryo sa Medina, at 926 pa sa Tagoloan. Dumayo rin tayo sa Noveleta, Cavite at naayudahan ang 1,333 benepisyaryo; 1,666 sa Labason, Zamboanga del Norte; at 1,116 sa Lucena City, Quezon.

Ramdam natin ang paparating na Kapaskuhan. Tanaw na rin natin ang “light at the end of the tunnel” sa laban kontra COVID-19. Tulad noon, ang apela natin ay patuloy tayong magtulungan, magbayanihan at sumunod sa health protocols habang naririyan pa rin ang panganib ng pandemya. Ang mahalaga ay unti-unti na tayong nakababalik sa normal, bumabangon ang ating ekonomiya at walang maiiwan sa pag-unlad.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Gobyerno mismo ang lalapit sa mamamayan para sa serbisyong medikal

ni Bong Go - @Bisyo Magserbisyo | November 23, 2022

Bilang matagal nang nakakasama ni dating pangulong Rodrigo Duterte sa loob ng mahigit dalawang dekada, saksi tayo sa paghihirap ng ating mga kababayan sa pag-avail ng serbisyong medikal ng gobyerno. Ang marami sa kanila, pumipila pa sa iba’t ibang opisina ng gobyerno para lamang humingi ng tulong. Ang iba, bumibiyahe pa ng Maynila mula probinsya para lamang magmakaawa sa iba’t ibang ahensya ng gobyerno.

Kaya naman bago pa man maihalal bilang senador at italagang Chair ng Senate Committee on Health, naging adhikain natin ang mailapit ang serbisyong medikal ng gobyerno sa mga Pilipino.

Mula 2018, isa sa mga ipinaglaban nating inisyatiba ang Malasakit Center program. Sabi ni Tatay Digong sa akin noon, dapat matulungan ang mga nangangailangan ng pampagamot kahit saan mang sulok ng bansa. Kaya sa unang anim na buwan bilang senador ay inakda at sinikap nating maipasa ang Malasakit Centers Act of 2019 na naisabatas bilang Republic Act No. 11463 sa 18th Congress.

Sa kasalukuyan ay mayroon na tayong 152 Malasakit Centers sa iba’t ibang bahagi ng ating bansa at nakatulong na sa milyun-milyong benepisaryo. Sa tulong nito, hindi na kailangang pumila o mag-ikot pa ng mga Pilipino sa iba’t ibang opisina ng gobyerno para kumuha ng medical assistance. Gobyerno na mismo ang naglapit sa kanila ng mga serbisyong ito sa tulong ng Malasakit Centers.

Nang pumutok ang pandemya noong 2020 ay nasaksihan naman natin ang kakapusan ng mga ospital at iba pang health facilities sa ating bansa. Sa totoo lang, durug na durog ang puso natin noong kasagsagan ng COVID-19 kapag nakikita nating siksikan sa ospital ang mga kababayan nating tinamaan ng sakit. Ang ibang pasyente na hindi COVID-19 ang sakit ay hindi na halos makakuha ng agarang lunas dahil sa takot na mahawahan sa ospital. Kapos din sa health personnel noon dahil prayoridad munang tugunan ang mga nagka-COVID-19.

Naisip natin, hindi na dapat maulit ang mga ganitong eksena, lalo na sa mga kababayan nating nasa liblib na lugar na kailangan pang bumiyahe para makapunta sa mga ospital. Kailangang matiyak na may mabilis na access sila sa de-kalidad na healthcare services kahit na malayo sila sa mga siyudad — may pandemya man o wala.

Kaya naisipan natin, sa tulong ng mga kasamahan sa Kongreso at maging sa Ehekutibo, na magpatayo ng mga Super Health Centers na isa sa magiging solusyon para umayos ang healthcare services sa bansa. Pero ano nga ba ang Super Health Center?

Ang Super Health Center ay medium na bersyon ng polyclinics at mas malaki kaysa sa rural health units na karaniwang natatagpuan sa mga barangay. Layunin ng SHC na magkakaloob ng mga serbisyo, tulad ng out-patient, birthing, isolation, diagnostic (laboratory: X-ray, ultrasound), pharmacy at ambulatory surgical unit. Meron ding eye, ear, nose, and throat (EENT) service; oncology centers; physical therapy and rehabilitation center; and telemedicine. Maaari rin itong magsilbing satellite vaccination sites para sa mga Pilipinong nakatira malayo sa urban centers kapag may immunization na isasagawa ang Department of Health.

Itinatayo ang SHCs sa mga maa-identify ng DOH na mga strategic locations para matiyak na madali silang mapupuntahan ng mga Pilipinong pinakanangangailangan ng kanilang serbisyong pang-medikal. Ang pagtatayo ay bahagi at pinopondohan ng Health Facilities Enhancement Program (HFEP) ng DOH na isunulong namin sa Kongreso noong nakaraang taon. Target ng DOH na makapagpatayo ng 307 SHCs sa buong bansa sa ilalim ng 2022 budget ng HFEP nito.

Kamakailan ay nagsagawa ako ng monitoring at inspection ng itinatayong SHC sa Anilao, Iloilo. Binisita rin natin ang SHC sa Iba, Zambales at sinaksihan ang groundreaking ng itinatayo sa Calatagan, Batangas; at sa Balagtas, Bulacan. Personal ko ring binisita ang itinatayo sa Barangay Inagawan, Puerto Princesa City, Palawan—at sa ilalim ng budget ngayong taon ay magkakaroon din sa iba pang mga bayan. Nitong Nobyembre, mayroon ding mga nagsagawa na ng mga ceremonial groundbreaking, tulad ng dalawang SHC sa Surigao City; at isa sa Santiago, Agusan del Norte.

Hangad nating tuluyang maipatayo ng gobyerno ang 307 SHCs na tinulungan nating mapondohan sa ilalim ng budget ng kasalukuyang taon. At sana ay madagdagan pa ang mga ito sa susunod na mga taon. May pandemya man o wala, dahil hindi nawawala ang pangangailangan ng mga Pilipino pagdating sa kanilang kalusugan.

Sa mga ginanap na pagdinig sa Senado sa 2023 budget ng DOH, bilang Chair ng Senate Committee on Health at Vice Chair ng Finance Committee, nagpapasalamat tayo sa mga kasamahan at natiyak nating may sapat na pondo para sa patuloy na pagtatayo ng mga SHCs at sa pagpapatupad ng iba pang programa para epektibong mailapit ang public healthcare services sa lahat. Napakahalaga na protektado ang ating mga kababayan, lalo na ang kanilang kalusugan. Ang pagpapalakas sa ating healthcare system at ang abot-kayang serbisyong medikal ay puhunan para sa kinabukasan ng ating bansa at bahagi ng ating layunin na patuloy na pagkakaloob ng komportableng buhay para sa mga Pilipino.

Bukod sa ating healthcare, tuloy pa rin ang ating suporta sa pagpapalakas ng sports sector ng bansa. Nito lamang Lunes, Nobyembre 21 ay personal nating nakapanayam si Justin Brownlee na nagpahayag ng kanyang pagnanais na maging ganap na Filipino citizen. Humarap siya sa Senate Public Hearing ng Committee on Justice and Human Rights para sa proseso ng kanyang naturalization.

Si Brownlee ay may pusong Pinoy at "never say die" attitude, kaya napamahal na siya sa mga Pilipino at alam din nating napamahal na ang mga Pilipino sa kanya.

Kaya naman taus-puso nating ipinaaabot ang buong suporta kay Brownlee. Higit sa talento niya sa basketball, ipinapakita niya ang puso niya na lumaban para sa Pilipino at ang pagmamahal niya sa ating bayan. Wala akong duda na ang puso niya para sa Pilipinas, kasama ang kanyang kakayanan at kakayahan sa basketball, ay may potensyal na magdadala sa ating Gilas Pilipinas sa rurok ng tagumpay sa mga kompetisyon na kanilang lalahukan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.