Suportahan ang sports, ilayo ang kabataan sa droga

ni Bong Go @Bisyo Magserbisyo | January 19, 2023

Una sa listahan ng mga prayoridad natin ang tulungan at proteksyunan ang mahihirap—hopeless at helpless nating mga kababayan, na walang ibang matakbuhan maliban sa pamahalaan.

Tulad ng maraming mahihirap na humingi ng tulong sa kanilang pampaospital, ubos na ang panahon nila, ubos pa ang pera nila sa pamasahe.

Bakit ba natin pinahihirapan ang mga Pilipino kung pera naman nila 'yan? Ibalik ang pera sa mahihirap sa pamamagitan ng mabilis, maayos at maaasahang serbisyong nararapat.

Kaya noong naging senador ang inyong lingkod, bilang Chair ng Senate Committee on Health ay itinulak natin ang panukalang Malasakit Centers Act of 2019 o ang Republic Act No. 11463.

Target nito'y ibaba sa lowest amount possible ang hospital bill para maibsan ang pasakit ng mahihirap na nagkakasakit. Sa kasalukuyan ay mayroon na tayong 153 Malasakit Centers sa buong bansa mula nang sinimulan ang programa noong 2018 at maisabatas noong 2019. Iniulat din ng DOH na mahigit pitong milyong Pilipino na ang natulungan ng Malasakit Centers—mula Batanes hanggang Tawi-Tawi. Basta Pilipino, lalo na kung poor o indigent patient, qualified sa mga serbisyo nito.

Mahalagang patuloy na ilapit sa tao ang mga serbisyo ng gobyerno, lalo na pagdating sa kanilang kalusugan.

Sa naobserbahan natin nang pumutok ang pandemya, kailangang mas lalong palakasin ang healthcare system. Bukod sa pagpapatayo ng mga bagong ospital at pagpapaganda ng mga existing na, isinulong din natin ang pagkakaroon ng Super Health Center (SHC), partikular sa malalayong lugar.

Ang SHC ay improved version ng mga rural health clinic, mas maliit lang sa polyclinic, pero ang kagamitan at pasilidad ay maihahalintulad sa mga ospital na kayang makapagbigay ng basic health services. Kapag may nagkasakit sa malayong lugar, hindi nila kailangang pumunta o bumiyahe sa malalaking ospital na kadalasan ay nasa mga siyudad dahil kaya na silang asikasuhin dito, lalo na ang mga manganganak at iba pang emergency cases.

Kabilang sa mga serbisyong ipagkakaloob sa SHCs ang database management, outpatient, pagpapaanak, pagpapabunot ng ngipin, isolation, diagnostic (laboratory: X-Ray at ultrasound), pharmacy at ambulatory surgical unit. Maaari ring suriin kung may diperensya sa eye, ear, nose and throat (EENT); oncology centers; at physical therapy and rehabilitation centers. Makapagsasagawa rin ng telemedicine, kung saan puwedeng magpakonsulta ang pasyente sa pamamagitan ng pagtawag sa doktor.

May mga nasimulan na noong nakaraang taon dahil 307 SHCs ang napondohan noong 2022. 322 SHCs naman ang target na maipatayo ng gobyerno ngayong taon gamit ang pondong ipinaglaban nating maisama sa 2023 national budget.

Suportado rin natin ang mga inisyatiba ng mga lokal na pamahalaan para mapaganda ang serbisyo sa kanilang mga nasasakupan. Nitong January 16 ay personal nating sinaksihan ang pagbubukas ng mga bagong Multi-Purpose Building sa Bgy. Batasan Hills at sa Bgy. Commonwealth sa Quezon City. Malaking tulong ang mga bagong gusaling ito para sa komunidad doon.

Bilang Vice-Chair ng Senate Committee on Finance, naging instrumento tayo para mapondohan ang mga proyektong ito kasama ang local officials nila. Ipagpatuloy lang natin ang pakikipagtulungan para tuluy-tuloy din ang pag-unlad ng mga komunidad ninyo. Nandito lang tayo at tutulong sa abot ng ating makakaya.

Samantala, isa nang ganap na Filipino citizen ang basketball player na si Justin Brownlee matapos ang kanyang oath of allegiance sa Senado noong January 16. Bilang Chair ng Senate Committee on Sports, naniniwala tayong malaki ang maitutulong ni Justin bilang isa sa magiging manlalaro ng Gilas Pilipinas. To Mr. Brownlee, ngayon na isa ka nang ganap na mamamayan ng bansang Pilipinas, nawa’y patuloy mong isapuso ang pagiging isang Pilipino!

Umaasa tayong ang suportang ibinibigay natin sa mga atleta ay magiging gabay rin upang mailayo ang kabataan sa masasamang bisyo at mailapit sa tamang landas sa pamamagitan ng mga magagandang ehemplong ipinakikita ng mga atletang kanilang iniidolo anumang koponan at anumang sports ito. Tulad ng madalas nating payo, get into sports, stay away from drugs.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

National security, nalagay sa peligro dahil sa kapalpakan ng sistema sa NAIA

ni Bong Go @Bisyo Magserbisyo | January 13, 2023

Hindi dapat maulit pa ang nangyari noong January 1 sa Ninoy Aquino International Airport kung saan libu-libong biyahero ang naapektuhan hanggang ngayon dahil sa technical glitch.

Hindi katanggap-tanggap para na makitang nakahiga na lang kung saan-saan sa airport ang ating mga kababayan, napipilitang gumastos muli upang kumuha ng panibagong tickets at nag-aalalang OFWs na baka mawalan ng trabaho dahil hindi nakabalik agad sa kanilang pinagtatrabahuhang bansa. Mas lalong hindi katanggap-tanggap na nailagay sa peligro ang ating national security dahil sa ‘technical glitch’.

Huwag natin ipahiya ang bansa. Napakalaki ng epekto nito hindi lang sa mga pasahero, kundi may implikasyon rin sa negosyo, sa turismo at sa buhay ng bawat Pilipino.

Saksi tayo na pinaghirapan ng Duterte Administration na mapaganda ang ating air transport system. Bukod sa Communications, Navigation, and Surveillance Air Traffic Management o CNS-ATM na sinimulan nating gamitin noong 2019, ang pamahalaan ay nagtayo rin ng mga bagong airport at mas pinaganda ang mga existing na. Isinagawa ang mahigit 200 airport projects, kabilang ang Mactan-Cebu International Airport, Clark International Airport, Bohol-Panglao International Airport, at marami pang iba.

Samantala, pinupuri natin ang Department of Migrant Workers sa maagap na pag-aasikaso sa stranded na OFWs. Siguruhin nating maalalayan sila, lalo na ‘yung naapektuhan ang pagbalik sa trabaho o pag-uwi sa kanilang pamilya.

Ang mga pasahero at ordinaryong mamamayan ang tunay na biktima sa mga ganitong sitwasyon. Huwag natin silang pabayaan at proteksyunan natin ang kapakanan at kaligtasan nila. Bukod sa maayos na transportasyon, huwag kalimutan na ang pangunahing layunin ay ang mabigyan ng ligtas at komportableng buhay ang ating mga kababayan.

Walang tigil ang ating tanggapan sa pagkakaloob ng ayuda sa mga komunidad na ang mga residente ay apektado pa rin ang kabuhayan ng iba’t ibang krisis. Ipinadala ko ang aking relief team sa Llorente, Eastern Samar para maghatid ng tulong sa 722 benepisyaryo na biktima ng pagbaha. Natulungan din natin ang mga siyudad ng Ozamis at Oroquieta; at mga bayan ng Jimenez, Lopez Jaena, Tudela, Aloran, Clarin, Panaon, Sapang Dalaga, Calamba, Don Victoriano, at Baliangao sa Misamis Occidental para maalalayan ang kanilang residente.

Bilang bahagi ng ating layuning mas mapalakas pa ang healthcare system, nagkaroon na ng groundbreaking para sa itatayong Super Health Center sa Rizal, Nueva Ecija noong January 9. Nitong January 10 naman ay nag-groundbreaking na rin ang itatayong Super Health Center sa Sara, Iloilo.

Ang Super Health Center ay medium type na polyclinic, mas malaki lang sa rural health clinic, mas maliit sa ospital. Puwedeng manganak, dental services at laboratory services. Emergency cases para kung kailangang manganak, hindi na kailangang itakbo sa malalayong ospital. Bukod sa 307 SHCs na napondohan noong 2022, umaasa tayo na ngayong taon ay mas marami pang SHC ang sana ay maipatatayo sa iba’t ibang bahagi ng ating bansa.

Noong January 9 ay nagsagawa tayo ng site inspection sa itinatayong Bustos Multipurpose Sports Facility sa Bustos, Bulacan. Bilang Chair ng Senate Committee on Sports, nakakatuwa kapag may ganitong mga inisyatiba na may layuning mas palakasin pa ang sports sector ng bansa. Kailangan talaga ng suporta ng ating mga atleta.

Dinaragdagan pa natin ang pagsisikap na mas maraming Pilipino na naghihirap ang maabot ng ating malasakit at serbisyo sa abot ng ating makakaya. Patuloy tayo sa ating layunin na maihatid ang serbisyong nararapat, lalo na ang pangangalaga sa kalusugan ng mga higit na nangangailangan at walang malalapitan maliban sa pamahalaan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Malasakit Centers nasa 153 na, mas dumarami pa

ni Bong Go @Bisyo Magserbisyo | January 11, 2023

Malaki ang epekto sa kabuhayan ng mga karaniwang Pilipino kapag may nagkakasakit sa pamilya. Masakit sa kalooban ng may sakit at mahal niya sa buhay ang sitwasyon, hindi pa alam kung saan kukuha ng pambayad sa ospital at pambili ng mga gamot. Apektado rin ang budget na sana’y para sa pagkain.

Nakalulungkot dahil kadalasa’y napipilitang mangutang malaki man ang interest makabayad lang sa pagpapaospital. Meron ding hindi na nagpapakonsulta sa takot na lalong mabaon sa utang kapag nagpagamot.

Dahil dito, naging inisyatiba natin ang pagkakaroon ng Malasakit Center program noong 2018, sa layuning ang mga kapwa nating Pilipino na mahihirap at walang mapagkukunan ng pampagamot ay mas madaling magkaroon ng access sa medical assistance program ng pamahalaan.

Ang Malasakit Center ay one-stop shop, kung saan ang mahihirap na pasyente ay mas madaling makakapag-apply para sa medical assistance mula sa Department of Health, Department of Social Welfare and Development, Philippine Health Insurance Corporation at Philippine Charity Sweepstakes Office.

Na-institutionalize ang programa sa ilalim ng Malasakit Centers Act of 2019, na ang inyong lingkod ang prinsipal na may-akda at nag-sponsor, para maibaba sa pinakamaliit na posibleng halaga ang babayaran sa ospital ng mga benepisyaryo, gamit ang pondo ng pamahalaan.

Ngayon, makalipas ang halos limang taon nang masimulan ang programa, mayroon na tayong 153 Malasakit Centers nationwide. Araw-araw, napakaraming Pilipino sa iba’t ibang lugar sa ating bansa ang patuloy na nakatatanggap ng tulong mula sa mga Malasakit Center. Inaasahan natin na mas marami pa itong matutulungan sa buong Pilipinas.

Ayon sa DOH, mula nang itatag noong 2018 ang Malasakit Center, naging madali na para sa mahihirap na Pilipino ang lumapit sa pamahalaan para humingi ng tulong-medikal. Tinukoy sa ulat na ang Medical Assistance for Indigent Patients Program ng DOH, na maaari ring ma-avail sa kahit saan na Malasakit Center ay nakapagbigay ng tulong sa 7,481,333 pasyenteng may kabuuang budget na PhP50.8 bilyon. Nitong nakaraang 2022 lang, mahigit 1.4 milyong pasyenteng benepisyaryo ang nakatanggap ng PhP14.6 bilyon na tulong mula sa pamahalaan sa pamamagitan ng Malasakit Centers program.

Ayon pa sa DOH, sisikapin nilang mas mapalawak ang tulong na ipinagkaloob ng Malasakit Centers. Bukod dito, nag-file tayo ng mga panukalang batas para magkaroon ng Free Medical Check Up program ang PhilHealth at mai-expand ang Free Dialysis benefit package. Kasunod nito, siniguro natin na ang dagdag-subsidiya sa budget ng PhilHealth ay magagamit para sa free medical check-up at free dialysis sa 2023. Malaking bagay ito sa mga pasyente para hindi na mababawasan ang kanilang budget para sa pagkain at iba pang pangunahing pangangailangan.

***

Kasabay ng ating pakikiisa noong January 9 sa Minasa Festival sa Bustos, Bulacan ay sinaksihan natin ang groundbreaking ng itatayong New Bustos Hospital sa kanilang lugar. Bilang Chair of the Senate Committee on Health at Vice Chair of the Senate Committee on Finance, ipinaglaban natin ang naturang ospital at iba pa upang mailapit sa tao ang serbisyong-medikal na kailangan nila.

Ininspeksyon din natin ang itatayong Multi-Purpose Facility (Sports Complex). Bilang Chair of the Senate Committee on Sports, ipinaglaban natin na magkaroon ng sapat na pondo para sa naturang pasilidad dahil nais nating mapalakas pa ang grassroots sports programs sa ating bansa at mahikayat ang ating mga kababayan, lalo na ang kabataan.

Masaya rin nating ibinabalita na noong January 9 ay nagkaroon na ng groundbreaking ceremony ng itatayong Super Health Center sa Rizal, Nueva Ecija. Nito pong January 10 ay nag-groundbreaking na rin ang Sara Super Health Center na itatayo naman sa Iloilo.

Samantala, noong January 7 naman ay nagpadala tayo ng tulong sa siyudad ng Ozamis at Oroquieta; at mga bayan ng Jimenez, Lopez Jaena, Tudela, Aloran, Clarin, Panaon, Sapang Dalaga, Calamba, Don Victoriano, at Baliangao sa Misamis Occidental.

Naniniwala tayo na ang serbisyo sa tao ay serbisyo rin sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.