Mga Pilipinong nahaharap sa iba’t ibang krisis, bigyang sapat na proteksyon

ni Bong Go @Bisyo Magserbisyo | Oct. 30, 2024

Sa pagdinig ng Senate Blue Ribbon Sub-Committee nitong Lunes para sa war on drugs na inilunsad ni dating Pangulong Rodrigo Duterte, nabigyan ng pagkakataon ang mga miyembro ng dating administrasyon para muling ipadama sa publiko ang malaking benepisyo ng isang tahimik at mapayapang komunidad.

Mismong si dating Pangulong Duterte ang muling naglahad kung gaano kalakas ang impluwensya ng mga sindikato ng droga nang mga panahon na itinuturing na salot ng lipunan. Kamay na bakal ang kinailangan noon ng buong bansa kaya naman hindi lang nanalo sa eleksyon, natapos pa ang termino ni dating Pangulong Duterte na may napakataas na approval rating.

Muli ring nasaksihan ng publiko kung gaano katindi ang galit ng dating pangulo sa mga taong sangkot sa pagpapalaganap ng ilegal na droga. Buo ang suporta noon ng Duterte administration sa kapulisan. Pero kung mismong ang mga pulis na ang sangkot sa droga, hindi niya pinalampas ito.  

Sabi nga ng dating pangulo, ang war on drugs ay hindi para manakit o pumatay ng tao. Ito ay para proteksyunan ang taumbayan na walang kalaban-laban sa mga sindikatong naghahari-harian noon sa mga lansangan. Walang katotohanan ang mga paratang na state-sanctioned violence. 

Ang inyong Senator Kuya Bong Go mismo, saksi noon sa maraming mga buhay na naisalba mula sa droga. Kung kaya’t kasama ninyo ako sa panalangin na hindi sana masayang ang mga nasimulan ng dating administrasyon. 

Bilang chairperson ng Senate Health, Sports, at Youth Committees, at vice chairperson ng Senate Committee on Public Order and Dangerous Drugs, binigyang-diin natin na ang ilegal na droga ay hindi lang isyu ng kaayusan kundi isa ring isyung pangkalusugan. Itinuturing itong sakit ng lipunan na dapat bigyang lunas upang maiwasan at hindi kumalat lalo na sa mga kabataan. 

Kung kaya’t isinusulong natin na maisaayos dapat ang rehabilitation process ng mga sumuko at nais magbagong buhay lalo na ngayon na nagiging sagabal ang mahabang proseso ng pagkuha ng commitment order mula sa korte para lang makapagpa-rehab ang mga nais magpa-rehab. 

Layunin din nating makalikha ng mga batas na magpapalakas ng laban kontra droga sa paraang napoprotektahan ang karapatang pantao ng bawat Pilipino. Kasama na rito ang aking nai-file na mga panukala tulad ng SBN 428 na nagnanais magtayo ng Drug Abuse Treatment and Rehabilitation Centers sa bawat probinsya, at ang SBN 2115 na nais magbigay ng vocational and livelihood programs sa mga rehabilitated drug dependents. Bukod pa rito, nais din nating magkaroon ng sapat na counseling interventions sa mga komunidad, maisama sa curriculum sa eskwelahan ang drug prevention awareness, at palakasin ang sports programs para maengganyo ang mga kabataan to get into sports, stay away from illegal drugs, to keep us healthy and fit!

Tandaan natin na ang imbestigasyong ito ay in aid of legislation. Importanteng makagawa ng mga batas na poprotekta sa karapatan ng bawat tao, at malaman ang katotohanan upang makatutok na tayong lahat sa paghahatid ng serbisyo at tulong sa ating mga kababayan lalo na ngayong marami ang biktima ng nakaraang kalamidad.

Nito ngang October 26, nasa Davao Oriental tayo para magkaloob ng tulong sa 1,000 residenteng kapos ang kita sa Banaybanay, na sa pamamagitan natin ay nakatanggap ng tulong pinansyal katuwang si Mayor Ian Larcia. May 1,000 ding benepisyaryo sa Governor Generoso ang nakatanggap ng katulad na tulong katuwang sina Mayor Juanito Inojales at Lupon Councilor Don Go Montojo. 

Sinaksihan naman ng aking opisina noong October 28 ang inagurasyon ng Super Health Center sa Gumaca, Quezon katuwang si Mayor Webster Letargo. Sinabayan na rin ito ng pamamahagi ng tulong para sa 200 residenteng naapektuhan ng Bagyong Kristine.

Naging panauhing tagapagsalita rin tayo noong October 29 sa ginanap na Cooperative Development Authority (CDA) Gawad Parangal Awards na idinaos sa Quezon City. Buo ang ating suporta sa mga kooperatiba na kaakibat natin sa pagbibigay ng oportunidad sa mga kababayan natin na magkaroon ng maayos na kabuhayan. 

Sa araw ding ito ay sinaksihan ng aking opisina ang turnover ceremony ng itinayong Super Health Center sa Santiago, Agusan del Norte. 

Hindi naman tumitigil ang aking Malasakit Team sa paghahatid ng tulong. Namahagi tayo ng food packs at pagkain sa 300 naapektuhan ng bagyo sa Binangonan, Rizal. Nakiramay din tayo sa mga pamilya ng 20 nasawi sa Talisay at 11 sa Laurel, Batangas dahil sa Bagyong Kristine. 

May 150 ring residente mula sa Magpet, North Cotabato na naapektuhan ng pagbaha ang ating tinulungan. Tinulungan naman natin ang mga naging biktima ng sunog kabilang ang 13 sa Davao City; siyam sa IGACOS, Davao del Norte; at pito sa Lupon, Davao Oriental. 

Natulungan natin ang 751 mahihirap sa Dauin, Negros Oriental na nabigyan din ng tulong pinansyal sa pakikipagtuwang natin kay Mayor Galicano “Galic” Truita.

Nasuportahan din ang 400 mahihirap sa Bongabong, Oriental Mindoro katuwang si Mayor Elgin Malaluan; at 810 naman sa Loboc, Bohol katuwang si Mayor Raymond Jala.

Sumuporta rin tayo sa mga nawalan ng hanapbuhay, na sa ating pakikipagkapit-bisig sa DOLE ay nabigyan ng pansamantalang trabaho. Naging benepisyaryo ang 213 sa Sogod, Southern Leyte katuwang si Mayor Sheffered Tan; 98 sa Laoag City, Ilocos Norte kasama natin si PCL President Handy Lao; at 1,000 sa Polomolok, South Cotabato katuwang si Mayor Bernie Palencia.

Natulungan din ang 200 senior citizens sa ginanap na Elderly Month Celebration ng Caniogan Senior Citizens Association sa Pasig City. 

Muli, taos-puso tayong nakikidalamhati sa mga naiwang pamilya ng mga nasawi sanhi ng Bagyong Kristine. Patuloy akong tutulong sa mga kababayan nating nahaharap sa matinding krisis, katulad ng panibagong Bagyong Leon, sa abot ng aking makakaya.

Bilang inyong Mr. Malasakit, patuloy akong magseserbisyo sa inyo dahil bisyo ko ang magserbisyo, at ako ay naniniwala na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Malasakit at serbisyo sa panahon ng sakuna

ni Bong Go @Bisyo Magserbisyo | Oct. 26, 2024

Nakikiramay tayo sa mga pamilya ng mga nasawi dahil sa pananalasa ng Bagyong Kristine. Sa mga nasaktan, nasugatan, at sa libu-libong nawalan ng mga bahay at mga gamit, mahirap man ang sitwasyon, kasama ninyo ako sa pasasalamat sa Diyos na pinangalagaan ang ating buhay sa harap ng ganitong pagsubok. Patuloy tayong magtulungan tungo sa pagbangon.

Nananawagan tayo sa ating national government para sa mas mabilis na paghahatid ng tulong sa mga nasalanta. Sa mga kababayan naman natin na nasa mga ligtas na lugar, subukan nating makatulong kahit sa maliit na paraan, subalit tiyakin din natin ang ating kaligtasan.

Bilang inyong Mr. Malasakit na ang tanging bisyo ay magserbisyo sa inyo sa abot ng aking makakaya, nakatutok tayo sa anumang tulong na maaari nating maibigay sa mga biktima at mga komunidad.

Bukod sa agarang tulong at bilang mambabatas, patuloy nating isinusulong na palakasin pa ang ating disaster resilience measures sa ating bansa na kamakailan ay tinukoy ng Asian Development Bank bilang most disaster-prone sa Southeast Asia. Mula 2014 hanggang 2023, umabot na sa halos 43 milyong Pilipino ang naapektuhan ng mga kalamidad.

Isa ito sa mga dahilan kaya patuloy kong isinusulong ang pagtatatag ng Department of Disaster Resilience sa pamamagitan ng Senate Bill No. 188. Layunin ng panukalang ito na magkaroon ng isang departamento na pamumunuan ng isang cabinet-level secretary na magsisigurong mabilis at organisado ang pagtugon sa mga kalamidad. Hindi na sapat kung palaging task force o coordinating council lamang. Dapat mayroon talagang nakatutok na timon sa pamamagitan ng isang departamento na may sapat na mandato at kakayahan upang maghanda, rumesponde, at madaliang maibalik ang mga nasalanta sa normal na buhay.

Panahon na rin na magkaroon sa bawat lokalidad ng ligtas at kumpleto sa supply na evacuation centers. Umaasa tayo na maisasabatas na ang Senate Bill No. 2451 o ang Ligtas Pinoy o Mandatory Evacuation Centers Act, na tayo ang principal author at co-sponsor. Bukod sa kanilang kaligtasan at kalusugan, kailangan ding mapangalagaan ang dignidad ng ating evacuees.

Anuman ang lagay ng panahon, hindi tayo tumitigil sa paghahatid ng serbisyo. Dumalo tayo noong October 23 sa ginanap na National Congress ng Liga ng mga Barangay Cluster 6 sa Pasay City. Panauhing tagapagsalita naman tayo noong October 24, sa ginanap na Barangay Councilors League of the Philippines General Assembly na ginanap sa Maynila.

Nagpapasalamat tayo sa mga opisyal ng mga barangay sa kanilang serbisyo at patuloy nating isinusulong ang mga panukala na mangangalaga sa kanilang kapakanan at magpapalakas pa ng kanilang kakayahang maglingkod. Ilan dito sa mga inihain natin sa Senado ay ang Senate Bill No. 197, o ang Magna Carta for Barangays; Senate Bill No. 2802, na naglalayong magbigay ng six-year term sa barangay at SK officials kung maisabatas; at ang Senate Bill No. 427, na naglalayong mabigyan ng karampatang suporta at benepisyo ang barangay health workers kung maipasa.

Kahapon naman, October 25, nagbigay inspirasyon tayo sa pamamagitan ng video call sa Vice Mayors League of the Philippines (VMLP) Region III-3rd Regional Assembly na idinaos sa Tarlac City sa paanyaya ni Mayor Mike Galang.

Tuluy-tuloy din ang aking Malasakit Team sa paghahatid ng tulong sa ating mga kababayang nangangailangan tulad ng mga biktima ng sunog sa Surigao del Sur kabilang ang 82 sa Tandag City, at 36 sa Bislig City. Nakapagpaabot din tayo ng agarang tulong sa 250 nating kababayang nabiktima ng bagyo sa Tungawan, Zamboanga Sibugay.

Sa Lupon, Davao Oriental ay natulungan natin ang 1,000 kapos ang kita na nabigyan din ng gobyerno ng tulong pinansyal. Bukod sa kanila, nasuportahan natin ang 1,500 mahihirap na residente sa lugar na sa pamamagitan natin ay napagkalooban ng tulong pinansyal katuwang si Mayor Erlinda Lim.

Sa ating pakikipagkapit-bisig sa DOLE, natulungan natin ang mga nawalan ng hanapbuhay na nabigyan ng pansamantalang trabaho. Sa Southern Leyte ay naging benepisyaryo ang 213 sa San Juan katuwang si Mayor Tado Saludo, at 149 naman sa Liloan, San Francisco, Pintuyan at San Ricardo kaagapay si VG Melay Mercado. Dagdag dito ang 139 sa Gingoog City, Misamis Oriental katuwang sina Mayor Erick Cañosa at BM Robert de Lara.

Minsan lang tayong daraan sa mundong ito kaya kung anumang kabutihan at tulong ang puwede nating ibigay sa kapwa, gawin na natin ngayon. Bilang inyong lingkod, patuloy akong magseserbisyo sa abot ng ating makakaya at kapasidad. Patuloy tayong magtulungan at magmalasakit sa isa’t isa dahil ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Serbisyo at malasakit para sa lahat ng sektor ng lipunan

ni Bong Go @Bisyo Magserbisyo | Oct. 23, 2024

Nitong nakaraang Linggo, nagkaroon ng pagkakataon ang inyong Senator Kuya Bong Go na makasalamuha at magpamahagi rin ng tulong tulad ng food packs sa ating mga kapatid na katutubo sa ginanap na Pistang Katutubong Dumagat Indigenous Peoples

Meet sa San Rafael, Bulacan. Bahagi ito ng pagdiriwang ng National Indigenous Peoples Month ngayong Oktubre bilang pagpapahalaga sa preserbasyon ng pamanang kultura at pangangalaga sa karapatan ng indigenous communities sa ating bansa. 

Bilang miyembro ng Senate Committee on Cultural Communities, ipinabatid ko sa ating mga kapatid na katutubo na patuloy akong magsusulong ng mga hakbangin upang suportahan sila sa abot ng aking makakaya. Isang oportunidad na rin ito para marinig natin ang kanilang mga hinaing at malaman ang pangunahin ninyong pangangailangan. 

Ang ating mga katutubo ay mahalagang bahagi ng ating lipunan. Sinasalamin nila ang ating pinagmulan at gabay natin sila sa ating patutunguhan. Sa nakaraang administrasyon ni dating Pangulong Rodrigo Duterte, inilabas niya ang Executive Order No. 139 noong 2021 na nagkakaloob ng death and burial benefits sa Barangay Indigenous Peoples Mandatory Representatives (IPMRs).

Patuloy din akong nagtatrabaho upang mabigyan ang ating IPs ng maayos na serbisyo — mula sa edukasyon, kalusugan, hanggang sa kanilang kabuhayan. Bilang vice chairperson ng Senate Committee on Finance, sinuportahan natin ang pagbibigay ng karagdagang budget para sa programang Strengthening Indigenous People in Mindanao o STIP-Mindanao na nakapaloob sa budget ng Mindanao Development Authority.

Importante na maparating ang serbisyo at mapadama ang malasakit ng gobyerno sa lahat ng sektor ng lipunan. Kaya sinisikap kong hindi maantala ang serbisyo ko sa mga kapwa ko Pilipino anumang oras sa abot ng aking makakaya. 

Bumisita tayo sa Negros Occidental noong October 19 at nag-inspeksyon sa mga Super Health Center sa La Castellana at sa Moises Padilla. Matapos ito, pinangunahan natin ang pamamahagi ng tulong para sa 2,000 benepisyaryo mula sa Moises Padilla katuwang si Mayor Ella Yulo, at 930 naman sa La Castellana katuwang si Mayor Mhai Nicor-Mangilimutan. Kasama ang kanilang lokal na pamahalaan, nabigyan din ang mga ito ng tulong pinansyal. Dumalo rin tayo sa ribbon cutting ceremony ng isang road project sa Pontevedra na naisulong sa pamamagitan natin. Katuwang si Mayor Jose Maria Alonso, naayudahan din natin ang 346 mahihirap sa Pontevedra. Tayo rin ay nagpapasalamat sa lokal na pamahalaan ng Pontevedra sa pagkilala sa akin bilang adopted son. 

Nakiisa naman tayo noong October 20 sa idinaos na Couples for Christ (CFC) Answering the Cry of the Poor (ANCOP) Global Walk sa San Rafael, Bulacan sa paanyaya nina Bulacan Head John dela Merced at BM Aye Mariano. 

Nagbalik tayo sa Bulacan noong October 21 at pinangunahan ang pagkakaloob ng tulong para sa 1,500 mahihirap sa Calumpit katuwang si Mayor Glorime Faustino, at sa 1,500 typhoon victims din sa Paombong katuwang si Mayor Maryanne Marcos, na sa ating inisyatiba ay nabigyan ng tulong pinansyal. Sinaksihan din natin ang ribbon cutting ceremony ng Super Health Center sa Paombong. Isang karangalan din sa akin na maideklarang adopted son ng bayan ng Paombong. Pagkatapos ay dumalo tayo bilang guest speaker sa ginanap na Integrated Midwives Association of the Philippines (IMAP) 50th Annual Convention sa Pasay City. 

Kahapon, October 22, dumalo tayo sa ginanap na LMP Visayas Island Cluster Conference 2024 sa paanyaya nina LMP President Mayor JB Bernos at Sec. Gen. Mayor Cynthia Fortes. Bilang kapwa Bisaya, pinapalakas natin ang ating pakikipagkapit-bisig sa mga lokal na opisyal upang mas mailapit ang serbisyo ng gobyerno sa komunidad. 

Sinuportahan din natin ang 34 na naging biktima ng sunog sa Placer, Surigao del Norte na nabigyan naman ng NHA ng emergency allowance na ating isinulong para may pambili ang mga ito ng mga materyales na pampaayos ng kanilang nasirang tahanan. 

Natulungan din natin ang mga nawalan ng hanapbuhay sa Southern Leyte, na sa ating pakikipagkapit-bisig sa DOLE, ay nabigyan ng pansamantalang trabaho kabilang ang 42 sa Macrohon katuwang si BM Ina Marie Loy, at 64 pa kasama naman si BM Fe Edillo; 213 sa Libagon kaagapay si Mayor Sabina Ranque, at 64 pa katuwang naman si VM Elizabeth Saldivar.

Sa Cebu City, nabigyan natin ng tulong katuwang si VM Dondon Hontiveros ang 716 mahihirap na residente sa Brgy. Cogon Pardo, at 231 sa Brgy. Zapatera. May natanggap ding tulong pinansyal ang mga ito mula sa gobyerno. 

Bukod sa ating ipinamahaging tulong, nakipagtuwang naman tayo sa mga lokal na pamahalaan para mapagkalooban ng tulong pinansyal ang iba’t ibang sektor tulad ng 319 sa Tuguegarao City, Cagayan katuwang si Mayor Maila Ting; 514 sa Lupon, Davao Oriental kaagapay si Mayor Erlinda Lim; at dagdag na 1,500 sa Calumpit, Bulacan.

Namahagi rin ang aking opisina ng food packs para sa 300 katao sa ginanap na barangay assembly sa Brgy. 09, Lipa City, Batangas katuwang si Kap. Beth Magsino. 

Bilang chairperson ng Senate Youth Committee, sinuportahan natin ang 82 scholars ng University of Perpetual Help System Delta-Las Piñas City. 

Bilang pinuno naman ng Senate Sports Committee at kaakibat ang Philippine Sports Commission, sumuporta tayo sa sportsfests na ginanap sa Mindanao State University-General Santos, at sa Polytechnic University of the Philippines.

Bilang inyong Mr. Malasakit, patuloy akong magseserbisyo sa inyong lahat sa abot ng aking makakaya. Bisyo ko ang magserbisyo, at ako ay naniniwala na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.