‘Go For Gold!’ — Hangad natin ang tagumpay ng mga atletang Pilipino sa 2023 SEA Games

ni Bong Go @Bisyo Magserbisyo | April 26, 2023

Muling sasabak ang ating mga atletang Pilipino sa gaganaping 32nd Southeast Asian Games sa Cambodia sa Mayo 5 hanggang 17, 2023. Noong Lunes, Abril 24, dinaluhan natin ang kanilang send-off ceremony sa Philippine International Convention Center sa Pasay City.

Bilang Chair ng Senate Committee on Sports, palagi tayong nandito para suportahan ang ating mga atleta. Isa rin akong sports enthusiast, at noon pa man ay talagang mahilig na ako sa sports. Isa rin itong paraan para mahikayat ang ating mga kabataan, to get into sports and stay away from drugs. Isa ito sa pamamaraan para mailayo ang ating mga kabataan sa ilegal na droga at manatili silang malusog ang isipan at katawan.

Kaya sa ating kapasidad, nag-sponsor tayo sa Senado at ipinaglaban sa 2023 national budget deliberation na magkaroon ng dagdag na pondo ang Philippine Sports Commission, lalo na ang para sa grassroots sports development, at upang masuportahan ang ating mga atletang lalahok sa international competitions.

Mula noon hanggang ngayon, full support tayo sa ating mga atleta, hindi lang sa SEA Games kundi maging sa Asian Games at Olympics. Sa katunayan, sa budget deliberation ay humigit-kumulang sa P200 million ang inilalaan sana para sa PSC. Tayo ang nag-defend at nag-suggest ng dagdag sa pondo nila na P1 billion para sa kapakanan ng ating mga atleta.

Makakatanggap din ng suporta ang mga atletang Pilipino na lalahok sa ASEAN Para Games, Asian Indoor Martial Arts Games, World Combat Games, World Beach Games, at Asian Beach Games.

Inilaan din ang bahagi ng pondo para sa pagho-host ng ating bansa ng FIBA World Cup ngayong taon, at sa iba pang sports programs gaya ng Batang Pinoy, Philippine National Games, at ng grassroots program sa ilalim ng Sports Development Council. May nakalaan din para sa pagpapatayo ng sports infrastructure sa iba’t ibang bahagi ng ating bansa, at para sa advanced research and development sa larangan ng sports sciences and sports technology.

Tulad ni Pangulong Ferdinand “Bongbong” Marcos Jr., ang naging mensahe natin sa ating mga atletang lalahok sa SEA Games ay ‘Go, go, go for the gold.’ Sana ay mag-champion tayo at ibalik natin ang pagiging number one natin sa rehiyon sa larangan ng palakasan. Ipinaalala ko rin sa kanila na pinakaimportante ang lumaban nang buong puso dahil kilala ang mga Pilipino na may puso at lalaban talaga.

Samantala, kahapon ay nasa Antique tayo at sinaksihan natin ang groundbreaking ng itatayong Sibalom Super Health Center sa lugar. Bahagi ito ng ating layunin na mahatiran ng mga serbisyong medikal ang malalayong komunidad, at mas mapalakas pa ang ating healthcare system. Personal din nating pinangunahan ang pamamahagi ng ayuda sa 1,000 mahihirap na residente at walong pamilyang nasunugan sa Sibalom.

Nagkaroon din ng medical and dental mission para masuri naman ang kalusugan ng 300 benepisyaryo.

Sinaksihan din natin ang groundbreaking ng itatayong San Jose de Buenavista Super Health Center, at pagkaraan ay pinangunahan ang pamamahagi ng ayuda sa 1,000 senior citizens at PWDs doon. Nagsagawa rin tayo ng monitoring visit sa Malasakit Center sa Angel Salazar Memorial General Hospital para matiyak na patuloy itong nakapagseserbisyo sa mga benepisyaryo. May ibinigay tayong tulong sa 232 pasyente at 935 frontliners. May hiwalay ding tulong ang Department of Social Welfare and Development (DSWD) sa mga pasyente, security guards at utility workers. Samantala, pinangunahan ng ating tanggapan ang pagkakaloob ng tulong sa 1,000 mahihirap sa San Remigio at nakiisa sa selebrasyon nila ng Hambaru Festival.

Masaya naman akong ibalita na nagkaroon na ng groundbreaking para sa itatayong Super Health Center sa President Roxas, North Cotabato. Nag-turnover ceremony na rin ng bagong tayong public market sa Poblacion Salug sa Zamboanga del Norte, na ating tinulungang mapondohan.

Kasama si dating Pangulong Rodrigo Duterte, dinaluhan namin kahapon ang birthday dinner ni Pastor Apollo Quiboloy sa KJC Compound, Davao City.

Noong Lunes naman, nasa Pangasinan tayo para tulungan ang 1,000 market vendors at mga pasyenteng may chronic illnesses ng San Carlos. Pagkatapos ay dumiretso tayo sa Gen. Mamerto Natividad, Nueva Ecija at tinulungan ang 1,000 mahihirap na Novo Ecijanos. Bilang adopted son ng lalawigan ng Pangasinan at Nueva Ecija, ipinarating ko na laging bukas ang aking tanggapan para suportahan ang mga pangangailangan ng ating mga kababayan doon sa abot ng aking makakaya.

Naghatid din ang aking tanggapan ng tulong sa 1,512 rebeldeng nagbalik-loob sa ating lipunan. Kasalukuyan silang kinukupkop ng ating pamahalaan sa kampo ng 14th Infantry Battalion ng Philippine Army sa Mahaplag, Leyte.

Naalalayan din ang mga biktima ng magkakahiwalay na sunog gaya ng 30 residente sa Bgy. Mother Bagua, Cotabato City; 27 sa Bgy. Matina Aplaya, Punta Dumalag, Davao City; 16 sa Bgy. Calumpang, General Santos City; 12 sa Malapatan, Sarangani; pito sa San Jose, Nueva Ecija, at dalawa pa sa Bgy. Tacunan, Davao City. Hindi rin natin kinalimutan na masuportahan ang 33 mahihirap na residente ng Paombong, Bulacan.

Bilang inyong Senador Kuya Bong Go at Chair ng Senate Committee on Health, tandaan natin na health is wealth, at mas mabuti na ang nag-iingat kaysa magkasakit. Hinihiling ko rin sa inyo na sa pagsabak ng ating mga atleta sa SEA Games, ipanalangin natin ang kanilang kaligtasan, tagumpay at maiuwi sana nila sa ating bansa ang kampeonato.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Unahin lagi ang kapakanan ng mahihirap at higit na nangangailangang mga Pilipino

ni Bong Go @Bisyo Magserbisyo | April 22, 2023

Gaya ng madalas kong sabihin, hangga’t kaya ng aking oras at katawan ay nililibot natin ang buong Pilipinas para ilapit ang serbisyo ng pamahalaan sa ating mga kababayan.

Bukod sa aking mga gawain sa Senado, gusto kong personal na nakakausap ang aking mga kapwa Pilipino, naririnig ang kanilang mga hinaing, at sa abot ng aking makakaya at kapasidad ay makapagbigay ng tulong at ngiti sa oras ng kanilang pagdadalamhati.

Ngayong Abril 22, nasa probinsya tayo ng Quirino upang makiisa sa 6th Quirino Motorismo event. Dinadaluhan ito ng libu-libong motorcycle enthusiasts, at isa sa tourist attraction sa nasabing lugar. Suportado natin ang mga ganitong aktibidad dahil isa ang turismo sa mga behikulo para umunlad ang ekonomiya sa mga probinsya.

Matapos ito ay nagtungo ako sa Quirino Province Medical Center sa Cabarroguis upang magsagawa ng Malasakit Center monitoring at mag-abot ng tulong sa mga pasyente at frontliners doon.

Patuloy nating sinusubaybayan ang mga naitatag na Malasakit Center para matiyak na maayos na nagagampanan nito ang pagkakaloob ng tulong medikal sa ating mga kababayan, lalo na ang mahihirap at walang malalapitan maliban sa pamahalaan, nang hindi na sila magpapalipat-lipat sa mga tanggapan ng pamahalaan dahil nasa iisang bubong na ang mga ahensyang makakatulong sa kanila.

Pumunta rin ako sa bayan ng Saguday upang tingnan ang kasalukuyang kalagayan ng itinatayong Super Health Center sa nasabing bayan. Ang Super Health Center ay bahagi ng ating adhikain bilang Chair ng Senate Committee on Health, at sa suporta na rin ng aking mga kapwa mambabatas at Department of Health (DOH), na mas mapalakas pa ang ating healthcare system at mailapit sa ating mga kababayan sa malalayong komunidad ang kinakailangan na serbisyong medikal.

Kabilang sa mga serbisyong hatid ng SHCs ang database management ng mga pasyente, outpatient, birthing, isolation, diagnostic (laboratory: X-Ray at ultrasound), pharmacy, and ambulatory surgical unit. Ang iba pang kayang maipagkaloob nito ay eye, ear, nose and throat (EENT); oncology centers; physical therapy and rehabilitation center; at maging telemedicine kung saan maaaring magpakonsulta ang pasyente sa pamamagitan ng pagtawag sa SHC. Nagbigay din ako ng tulong sa 500 benepisyaryo sa lugar.

Tumutulong din tayo sa pagpapatayo ng mga imprastruktura na makakatulong sa iba’t ibang sulok ng bansa. Kahapon ay sinaksihan natin ang groundbreaking ng itatayong Girl Scouts of the Philippines Training Center Multi Purpose Hall sa Toril, Davao City. Matapos nito ay bumisita tayo sa Calbayog City, Samar para alamin ang sitwasyon ng 216 residente na biktima ng sunog. Pinagkalooban natin sila ng tulong, gayundin ang 1,000 mahihirap na residente roon. Nag-inspeksyon din tayo sa itinatayong Super Health Center sa bayan ng Sta. Margarita sa Samar, at pinangunahan din ang pamamahagi ng tulong sa 1,000 mahihirap na residente sa lugar.

Masugid din nating sinusuportahan ang local government units na lagi nating katuwang sa paghahatid ng serbisyo sa ating mga kababayan, lalo na kapag naghahatid tayo ng tulong sa kanilang mga nasasakupan.

Dinaluhan natin noong Abril 20 ang Philippine Councilors League Quezon Chapter seminar na ginanap sa Davao City. Kinagabihan ay sinamahan ko ang mga konsehal sa pagbisita kay dating Pangulong Rodrigo Duterte. Nagpasalamat sila sa anim na taong serbisyo ni Tatay Digong bilang pangulo ng bansa.

Ipinagbilin namin sa kanila na importanteng tandaan ng lahat na halal na opisyal—national man o local—na iisa ang aming layunin: ang maglingkod sa taumbayan. Sabi ko nga sa kanila, sa totoo lang, pareho lang ang trabaho namin. Ang ipinagkaiba lang, sila ay sa municipal o city level, habang kaming mga senador ay sa national level.

Nanawagan din tayo sa mga konsehal na sa kanilang pagganap sa tungkulin, laging isaisip ang mga prinsipyong nagsisilbing gabay sa kanila bilang mga lingkod-bayan.

Ipakita natin at maging halimbawa tayo ng katapatan, maging masugid sa ating tungkulin at magkaroon ng pananagutan sa ating mga responsibilidad. Lagi nating unahin ang kapakanan ng mahihirap at higit na nangangailangan, lalo na ang mga hopeless at helpless nating kababayan na walang ibang malalapitan kundi ang pamahalaan.

Masaya naman akong ibalita na kasabay ng kanilang 25th Charter Anniversary, ginanap ang groundbreaking ceremony noong Abril 20 ng Tarlac City General Hospital sa Bgy. Binauganan, Tarlac. Naging instrumento tayo para mapondohan ang pagpapatayo ng nasabing ospital na magiging malaking tulong sa paghahatid ng de-kalidad na serbisyong medikal sa mga Tarlaqueños at karatig na lugar. Bahagi rin ito ng ating adhikain na mas mapalakas pa ang healthcare system sa buong bansa. Kung mas maraming ospital na maipatatayo, mas mapapangalagaan ang kalusugan ng mga Pilipino.

Hindi naman natin kinakaligtaang marating at mapagkalooban ng tulong ang iba pa nating kababayan sa iba’t ibang lugar na nahaharap sa iba’t ibang krisis. Naalalayan ng aking opisina ang mga biktima ng magkakahiwalay na insidente ng sunog gaya ng 118 residente ng Bgy. Lapasan, Cagayan de Oro City; at 27 pa sa Tagoloan, Misamis Oriental.

Pinagaan din natin ang dalahin ng mahihirap na residente sa malalayong komunidad gaya ng 1,427 benepisyaryo mula sa iba’t ibang bayan ng Zambales; at 350 sa Bgy. 17, Cagayan de Oro City.

Nagsagawa rin tayo ng serye ng pamamahagi ng ayuda sa mga lugar sa Agusan del Sur at naabutan ang 200 sa Talacogon; 100 sa Sibagat; 100 sa Bayugan; 100 sa Esperanza; 100 sa Prosperidad; at 100 pa sa La Paz.

Umaasa ako na sa ating paghahatid ng serbisyo at malasakit sa ating mga kababayan ay maging inspirasyon din ito sa ating kapwa na gawin ang abot ng makakaya upang makatulong sa iba pang nangangailangan. Magkaisa at magbayanihan tayo para alalayan ang ating mga kapwa Pilipino tungo sa mas magandang kinabukasan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Walang pinipiling panahon ang pagmamalasakit at pagseserbisyo

ni Bong Go @Bisyo Magserbisyo | April 19, 2023

Anuman ang panahon—tag-ulan o tag-araw—patuloy tayo sa ating layunin na makapagbigay ng sapat at tamang serbisyo sa ating mga kapwa Pilipino, lalo na pagdating sa kalusugan. Dahil wala ring pinipiling panahon ang pagkakasakit, kailangang laging handa ang ating serbisyong pangkalusugan para sa ating mga kababayan, lalo na sa malalayong komunidad.

Bilang Chair ng Senate Committee on Health, naging adhikain ko na ang ilapit ang serbisyong medikal, partikular sa mga higit na nangangailangan, mga hopeless at helpless at walang malalapitan maliban sa pamahalaan.

Ito ang dahilan kung bakit nais nating ipagpatuloy ang Malasakit Centers program na ating naisabatas noon upang mas marami pang mga pasyente ang mabigyan ng karampatang medical assistance mula sa gobyerno. Higit pitong milyong Pilipino na ang natulungan nito, ayon sa Department of Health (DOH), at sana ay mas dumami pa dahil para sa Pilipino naman ito. Kung tutuusin, pera naman ‘yan ng taumbayan, ibinabalik lang sa kanila sa pamamagitan ng maayos at mabilis na serbisyong pangkalusugan.

Ipinaglalaban din natin na mas marami pang Super Health Centers ang maitayo sa iba’t ibang sulok ng bansa upang mailapit sa tao ang serbisyong medikal mula sa gobyerno.

Hindi na dapat nila kailangang maglakbay pa para magpagamot kung nasa komunidad na nila mismo ang pasilidad na puwedeng tumugon sa kanilang pangangailangang pangkalusugan.

Suportado rin natin ang panawagan ni Pangulong Ferdinand “Bongbong” Marcos, Jr. na magtayo ng specialty centers sa iba pang mga rehiyon. Ang pagtatayo ng specialty centers ay kabilang sa health-related legislative agenda na nakapaloob sa Philippine Development Plan 2023-2028 na nilagdaan ng ating Pangulo.

Bagama’t nakatutok ako sa ating mga gawain bilang mambabatas, doble ang aking kayod kapag tinutupad ang bahagi ng aking tungkulin na pakinggan ang mga hinaing at matulungan ang mga kababayan nating mahihirap sa iba’t ibang sulok ng bansa.

Kahapon ay biyaheng Pangasinan tayo at sinaksihan ang groundbreaking ng itatayong Super Health Center sa bayan ng Umingan. Nagkaroon din ako ng pagkakataon na makaharap ang 700 persons with disability sa nasabing lugar, at personal nating pinangunahan ang pagkakaloob sa kanila ng tulong.

Matapos ito, lumipat naman tayo sa Nueva Ecija sa parehong araw at sinaksihan din ang groundbreaking ng itatayong Super Health Center sa Cabanatuan City. Namahagi rin tayo ng tulong sa 1,000 mahihirap na residente ru’n. Nagsagawa rin tayo ng monitoring visit sa Malasakit Center na nasa Paulino L. Garcia Memorial Research and Medical Center, at namahagi ng tulong sa mga pasyente at frontliners. Ito ang ika-76 na Malasakit Center at inilunsad noong Hulyo 29, 2020. Bukod sa tulong ng aking tanggapan, may hiwalay ding ayuda ang Department of Social Welfare and Development (DSWD) sa mga pasyente.

Noong Lunes ay bumisita naman tayo sa Roxas City para magsagawa ng monitoring visit sa Malasakit Center na nasa Roxas Memorial Provincial Hospital. May tulong kaming naipamahagi sa ilang pasyente at medical frontliners. May hiwalay ding tulong ang DSWD sa ilang pasyente sa ospital at mga kuwalipikadong personnel du’n.

Pagkaraan ay sinaksihan natin ang groundbreaking ng itatayong dalawang Super Health Center sa Panay at Panitan, sa Capiz. Nagkaloob din tayo ng tulong sa 1,000 mahihirap na residente ng Roxas City; 1,100 mula sa Panay at 1,100 mula sa Panitan.

Pagkatapos sa Capiz, bumiyahe rin tayo patungong Bacolod City para daluhan ang pagbubukas ng Panaad Festival kung saan naimbitahan tayo bilang isa sa mga guest speaker. Suportado natin ang ganitong adhikain para sa preserbasyon at pagpapatuloy ng mga tradisyon at kultura sa bawat rehiyon ng ating bansa, na nagiging daan para sa ating pagkakaisa, pagtutulungan at bayanihan.

Pagkatapos ay nagkaroon tayo ng relief activity para sa 1,000 mahihirap na residente sa Bacolod City. Personal din tayong bumisita sa Malasakit Center na nasa Corazon Locsin Montelibano Memorial Regional Hospital, at namahagi ng tulong sa 375 pasyente at 1,877 frontliners. May hiwalay ding tulong ang DSWD sa mga pasyente, security at utility staff ng ospital.

Noong Sabado, tumulong tayo sa mga nasunugan sa Cebu City at pagkatapos ay nagtungo tayo sa Zamboanga Del Norte at namahagi ng tulong sa mahihirap na residente sa Dipolog City. Nag-inspeksyon din tayo sa itinatayong Oval Track sa Dipolog Sports Complex, na ating sinuportahang mapondohan noon.

Bilang Chair ng Senate Committee on Sports, suportado natin ang grassroot sports development sa layuning makatuklas ng mahuhusay na manlalalaro sa mga lalawigan.

Naniniwala rin ako na isa ang sports sa mabisang instumento para mailayo ang ating mga kabataan sa kaway ng droga at iba pang krimen. Ang lagi kong payo sa ating mga kabataan, tapusin ang pag-aaral, get into sports and stay away from drugs.

Kaya noong Linggo naman ay nagbigay tayo ng suporta sa Capiztahan Swimfest sa Roxas City, Capiz bilang paghanga rin sa mga kabataang nakilahok sa laro. Inengganyo natin sila na lalong pagbutihin ang kanilang pag-eensayo at inihayag natin ang mga inisyatiba na makakatulong sa mga atletang kabataan tulad ng National Academy of Sports na ating naisabatas na, pati rin ang Philippine National Games na ating kasalukuyang isinusulong bilang mambabatas.

Samantala, hindi rin tumitigil ang aking tanggapan sa paghahatid ng tulong sa ating mga kababayan sa iba’t ibang lugar na nahaharap sa iba’t ibang krisis. Naalalayan ang 54 na naging biktima ng magkakahiwalay na insidente ng sunog sa Maramag, Valencia City, Malaybalay City at Manolo Fortich sa Bukidnon. Tumulong tayo sa mahihirap nating kababayan tulad ng 750 residente ng Botolan, Zambales; 432 sa Dipaculao, Aurora; 550 sa Sta. Josefa at Trento sa Agusan del Sur; 500 sa Binuangan, Misamis Oriental; at 33 pa sa Sta. Rita, Pampanga nitong nakaraang mga araw.

Walang pinipiling oras o panahon ang ating pagseserbisyo. Basta kaya ng aking katawan, patuloy kong lilibutin ang iba’t ibang sulok ng Pilipinas para makapaghatid ng tulong sa abot ng aking makakaya, masolusyunan ang inyong mga hinaing, at makapag-iwan ng ngiti sa oras ng inyong pagdadalamhati.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.