Ang tagumpay ng mga atletang Pilipino ay tagumpay rin natin at ng buong Pilipinas

ni Bong Go - @Bisyo Magserbisyo | June 07, 2023

Masaya po ako sa sunud-sunod na tagumpay ngayon ng ating mga atletang Pilipino sa international sports competitions.

Napanalunan ni Alex Eala ang kanyang ikatlong International Tennis Federation professional crown noong June 4 sa Yecla Club de Tenis sa Spain. Mula naman sa kanyang pagwawagi ng gold medal sa SEA Games sa tennis men’s doubles, nagkampeong muli si Francis Casey Alcantara, katambal si Hiroki Moriya ng Japan, sa BNI-Medco Energi M25K International Tennis Series noong June 3 sa Jakarta, Indonesia.

Nakakuha naman ng bronze medal ang Filipina gymnast na si Jasmine Althea Ramilo sa ginanap na 19th Junior Rhythmic Gymnastics Asian Championships sa Ninoy Aquino Stadium noong June 3.

Namamayagpag din ang delegasyon ng Pilipinas sa ginaganap na 12th ASEAN Para Games sa Cambodia na kung saan, as of June 6 ng hapon, meron na tayong nasungkit na 14 na gintong medalya, 17 na pilak at 17 na tansong medalya o kabuuang 48 na medalya. Hangad natin na mas marami pang medalya ang mapapanalunan ng koponan bago matapos ang ASEAN Para Games ngayong Biyernes.

Ilan lamang ito sa mga mahuhusay na atleta natin na mag-uuwi na naman ng karangalan sa bansa. Ang tagumpay ng ating mga atletang Pilipino ay tagumpay rin ng buong sambayanan.

Sa ating parte, bilang Chair ng Senate Committee on Sports, inisponsoran natin at ipinaglaban sa Senado ang karagdagang pondo para sa Philippine Sports Commission noong deliberasyon para sa ating 2023 budget, partikular ang para sa grassroots sports development at suporta sa ating mga atletang lalahok sa mga international competitions. Sa katunayan, dapat ay humigit- kumulang sa P200 milyon lang ang budget para sa PSC, pero ipinaglaban natin na madagdagan ito ng P1 bilyon, kung saan kasama na ang pondo bilang suporta sa mga lalahok sa SEA Games, Asian Games, ASEAN Para Games, 2024 Paris Olympics, at iba pang international competitions.

May bahagi ng pondo na inilaan din para sa pagho-host ng Pilipinas ng 2023 FIBA World Cup at iba pang programa gaya ng Batang Pinoy, Philippine National Games, at ang grassroots program na nasa ilalim ng Sports Development Council. Naglaan din ng pondo para sa pagpapatayo ng sports facilities sa buong bansa, at para sa mas pinalawak na research and development sa larangan ng sports sciences and sports technology.

At bilang isang sports enthusiast mula noong bata pa ako at hanggang ngayon, naniniwala ako na isang paraan ang sports para mailayo ang ating mga kabataan sa ilegal na droga at manatiling malusog ang kanilang pangangatawan at isipan. Ang lagi kong payo sa kanila: get into sports, stay away from drugs.

Samantala, hindi naman tayo tumitigil sa paglalapit ng serbisyo sa ating mga mga kababayang nangangailangan. Kahapon, June 6, ay nasa Agusan del Norte tayo at nag-inspeksyon sa ginagawang Las Nieves Bridge at mga kaugnay nitong kalsada. Ang naturang proyekto ay nasimulang mapondohan natin sa pamamagitan noong administrasyon ni dating pangulong Rodrigo Duterte. Sinaksihan din natin ang groundbreaking ng itatayong Las Nieves Super Health Center. Pinangunahan din natin ang pagkakaloob ng tulong sa 1,500 mahihirap na residente ng Las Nieves.

Bago natapos ang araw ay dumiretso tayo sa Butuan City at nag-inspeksyon sa itinayong Super Health Center sa Bgy. Ampayon. Hindi naman natin kinaligtaang mag-abot ng tulong sa 2,000 mahihirap na Butuanons. Dumalo rin tayo sa ginanap na annual general assembly ng Philippine League of Secretaries to the Sanggunian, Inc. sa Davao City. Masaya ko ring ibinabalita na sinimulan na kahapon ang pagtatayo ng Talon-Talon Super Health Center sa Zamboanga City.

Nasa Digos City naman tayo noong June 5 at sinaksihan ang groundbreaking ng itatayong Digos Super Health Center, at pinagkalooban ng tulong ang 1,500 mahihirap na residente sa lugar.

Ang Bicol naman ang ating binisita noong June 3 at dinaluhan ang 1st Bicol Social Media Summit 2023. Suportado natin ang ating mga manggagawa sa media at ang malayang pamamahayag. Mahalaga ang papel na ginagampanan nila sa paghahatid sa ating mga kababayan ng tamang impormasyon.

Nakisalamuha rin tayo sa 1,500 mahihirap na residente ng Naga City at nagkaloob sa mga ito ng kaunting tulong. Ininspeksyon din natin ang Almeda-Mabolo bypass road na isa sa mga proyekto kung saan naging instrumento tayo para masimulan at mapondohan noong 2020 at 2021. Malaking ginhawa sa pagbiyahe ng ating mga kababayang Bicolano ang kalsadang ito.

Sinaksihan din natin ang groundbreaking ng Naga City Super Health Center, at nag-monitoring visit sa Malasakit Center na nasa Bicol Medical Center. Nagkaloob tayo ng suporta sa mga pasyente at frontliners kabilang na ang mga security guards at utility personnel ng ospital. May hiwalay ding tulong ang Department of Social Welfare and Development (DSWD) sa mga kuwalipikadong pasyente.

Maagap ding dinaluhan ng aking opisina ang mga naging biktima ng magkakahiwalay na insidente ng sunog gaya ng 186 residente ng Bgy. Tatalon, Quezon City; 41 sa Caloocan City; at lima pa sa Baguio City. Naghandog din tayo ng dagdag na suporta sa 83 TESDA trainees sa Carcar, Cebu City. Limang estudyante rin sa Baguio City ang nabigyan ng educational assistance at dagdag tulong, habang 1,500 na mahihirap naman ang nasuportahan sa Calatrava, Romblon.

Ipinapaabot ko naman ang aking pagbati kina Dr. Teodoro Herbosa bilang bagong kalihim ng Department of Health, at Atty. Gilberto Teodoro bilang bagong kalihim ng Department of National Defense. Bilang Chair ng Senate Health Committee at Vice Chair ng Senate Defense Committee, handa akong makipagtulungan sa kanila sa paghahatid ng serbisyo sa bawat Pilipino. Unahin natin parati ang interes at kapakanan ng mga mahihirap at walang ibang matakbuhan—iyan ang mensahe ko sa kanila.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Tulong para sa mga OFW, hindi na dapat pang dumaan sa social media, radyo, o telebisyon

ni Bong Go @Bisyo Magserbisyo | June 3, 2023

Isa sa aking mga prayoridad ay ang matulungan ang ating mga overseas Filipino workers.

Napakalaki ng kanilang sakripisyo, tinitiis ang lungkot at kinakailangang mahiwalay sa kanilang pamilya at maghanapbuhay sa ibang bansa, na bukod sa iba ang lengguwahe ay kailangan din nilang umakma sa mga kultura, tradisyon at batas doon. Marami sa kanila ang nagiging biktima ng pagmamalupit ng kanilang mga employer, o kaya naman ay naiipit sa mga kaguluhang nagaganap.

Sa ginanap na confirmation hearing ng mga opisyal ng Department of Foreign Affairs noong May 31, bilang Vice Chair ng Committee on Foreign Affairs ng Commission on Appointments, ibinigay ko ang aking suporta sa nominasyon ng pitong foreign service officials, at binigyang-diin sa kanila na dapat nilang tuparin ang kanilang mga tungkulin nang buong puso at dedikasyon.

Sinabi ko sa mga bagong ambassadors na dapat mas maramdaman ng ating mga kababayan sa abroad ang kanilang presensya lalo na sa mga panahong sila ay lubos na nangangailangan. Hindi na dapat pang dumaan sa social media, radyo, telebisyon o sa iba pang panawagan ang ating mga OFWs upang humingi ng tulong. Higit sa anupaman, ang dapat nilang unahin ay ang karapatan, kapakanan at interes ng ating mga kababayan sa bansang kanilang kinaroroonan.

Sinabi ko sa mga opisyal na sila ang extension ng ating gobyerno sa kanilang host countries, kaya dapat na ang kanilang serbisyo bilang head of post ay laging handa at walang pinipiling tao o oras.

Kailangang laging bukas ang kanilang linya ng komunikasyon at kung kinakailangan ay ibigay nila ang kanilang numero para maaabot sila ng ating mga kababayan anumang oras at saan man sila naroroon. Ipinaalala ko rin sa kanila na hindi sila itinalaga sa labas ng ating bansa para mamasyal at asikasuhin lang ang mga bisita. Para ito sa kapakanan ng ating bansa at ng mga Pilipino roon na napalayo sa pamilya.

Binigyang-diin ko rin sa mga ambassadors na napakaimportante ng public relations sa serbisyo publiko. Kaya dapat ay laging bukas ang kanilang mga opisina para sa ordinaryong mamamayang Pilipino at mga OFWs natin na walang matakbuhan kundi tayong nasa gobyerno. Pakinggan natin ang kanilang mga hinaing at sumaklolo kaagad sa kanila kapag meron silang mga problema.

Noon pa man ay lagi nating inuuna ang ating OFWs na itinuturing nating mga bagong bayani. Isa tayo sa may-akda at co-sponsor ng Republic Act No. 11641 na lumikha sa Department of Migrant Workers para may departamentong tututok sa kanila at sa kanilang pamilya nang hindi na sila kailangang magpalipat-lipat pa ng ahensyang lalapitan sa paghingi ng tulong.

Sa ngayon, nakikita natin kung paano tinutupad ng DMW ang iniatang sa kanilang tungkulin sa pamamahala ni Secretary Susan Ople. Pero bukod sa DMW, ang pinakamalapit sa ating mga kababayan sa abroad ay ang mga embahada at consulates natin doon na pinamumunuan ng mga ambassadors at consuls. Kaya ang tanging pakiusap ko sa kanila ngayong nakumpirma na ng CA ang kanilang appointments ay maging totoo at tapat sa kanilang tungkulin, ipaglaban ang interes ng bansa, at proteksyunan ang buhay at kapakanan ng mga kababayan nating kasama nila sa bansang kanilang tinututukan.

Samantala, patuloy din ang ating paglalapit ng serbisyo sa iba’t ibang sektor ng lipunan sa loob ng ating bansa na nahaharap sa iba’t ibang krisis. Nasa Batangas tayo kahapon, June 2, at nag-inspeksyon sa Ibaan Super Health Center na itinayo kamakailan lamang.

Pinangunahan din natin ang pamamahagi ng ayuda para sa 1,000 mahihirap na residente sa lugar. Sinilip din natin ang multi-purpose building na matatagpuan sa Brgy. Sto. Niño na magiging municipal hall ng bayan ng Ibaan. Napondohan at naipatayo sa ating pamamagitan. Dumaan din tayo sa Sta. Teresita kung saan personal nating pinangunahan ang pagkakaloob ng tulong sa 1,086 mahihirap na residente.

Bilang kapwa Batangueño, ipaglalaban ko ang kapakanan ninyo.

Ang mga taga-Bataan naman ang ating pinuntahan noong June 1, at una sa ating naging aktibidad ang pagsaksi sa groundbreaking ng itatayong Samal Super Health Center, at pagkaraan ay personal nating pinangunahan ang relief effort para sa 500 mahihirap na residente roon. Nakarating din tayo sa Balanga City at nakisalamuha sa 1,008 mahihirap na residente at namigay ng tulong sa mga ito.

Dinaluhan din natin ang ribbon cutting ceremony ng Poland visa application center sa Makati City noong araw na iyon.

Hindi rin natin pinabayaan ang iba pa nating kababayan at pinagaan ang kanilang mga dalahin sa abot ng ating makakaya. Inalalayan natin nitong nakaraang mga araw ang mga naging biktima ng magkakahiwalay na insidente ng sunog gaya ng 170 residente ng Brgy. Don Bosco, Parañaque City; at tatlo pa sa Brgy. Canlapwas, Catbalogan City, Samar.

Patuloy rin ang ating serye ng pamamahagi ng tulong sa mga naging biktima ng bagyong Agaton sa Banate, Iloilo kung saan 1,535 residente ang ating naabutan ng tulong sa ikatlong araw ng relief effort, at karagdagang 1,090 benepisyaryo sa ikaapat na araw.

Napasaya rin natin ang 520 mahihirap na pamilya sa Vigan City; at ang 408 barangay health workers sa Sariaya, Quezon. Hindi rin kinaligtaan ang mga miyembro ng iba’t ibang sektor sa Kalibo, Aklan kung saan 518 benepisyaryo ang ating natulungan. Sa isinagawang medical and dental mission sa Sibalom, Antique ay 180 pasyente ang atin ding binigyan ng dagdag na suporta.

Hindi ako pulitiko na mangangako sa inyo, at sa halip ay ginagawa ko lang ang aking trabaho.

Handa akong tumulong sa abot ng aking makakaya. Huwag din kayong magpasalamat sa akin, at sa halip ay ako ang dapat magpasalamat sa inyo dahil binigyan ninyo ako ng pagkakataon na makapaglingkod sa inyo. Kaya kasama ang aking mga kapwa lingkod bayan, sisikapin naming ilapit sa inyo ang serbisyong nararapat at may malasakit sa inyong mga pangangailangan nasaan man kayo sa mundo.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pagtatayo ng regional specialty centers, tuloy

ni Bong Go @Bisyo Magserbisyo | May 31, 2023

Noong Lunes, May 29, naipasa sa third and final reading sa Senado ang Senate Bill No. 2212 na layuning magtatag ng mga special centers sa bawat rehiyon sa buong bansa.

Inisponsoran natin ang naturang panukala, at isa tayo sa may-akda.

Sa aking pag-iikot sa buong bansa, hindi kaila sa akin kung gaano kahirap para sa mga mahihirap nating kababayan sa mga probinsya, lalo na ‘yung mga may sakit sa puso, baga, kidney at iba pa, ang makakuha ng specialized medical services.

Ito ay dahil karamihan sa mga specialty centers natin ay nasa Maynila. Kailangan pang gumastos ng malaki ng mga kababayan nating nasa probinsya para lang magpagamot sa mga specialty centers na ito. Kasama na riyan ang mahabang biyahe, gastos sa kanilang titirhan at mahal na pamasahe, pagkain at iba pang bilihin habang nasa Maynila. Kung kaya marami sa kanila ay ayaw na lang magpagamot at ang iba ay namamatay na lang nang hindi nabibigyan ng kaukulang lunas.

Itong panukalang magtayo ng regional specialty centers ay isang paraan para mailapit natin ang serbisyo medikal sa ating mga kababayan, lalung-lalo na ang mga mahihirap.

Ang kanilang mga karanasan at istorya ang nagtulak sa amin para lumikha ng mga polisiya at programa tungo sa healthcare system na mapagmalasakit, abot-kamay at nakadisenyo para matugunan ang pangangailangan ng mga Pilipino.

Kabilang sa mga author ng panukalang batas sina Senate President Migz Zubiri, Senate Majority Floor Leader Joel Villanueva, Senators Sonny Angara, JV Ejercito, Pia Cayetano, Jinggoy Estrada, Imee Marcos, Robin Padilla, Win Gatchalian, Francis Escudero, Ronald dela Rosa, Ramon Revilla Jr., Cynthia Villar, at Loren Legarda. Co-author din sina Senators Francis Tolentino, Raffy Tulfo, Risa Hontiveros, Lito Lapid, Grace Poe, Mark Villar, Alan Cayetano, Nancy Binay, at Koko Pimentel.

Kabilang din ito sa mga priority measures ni Pangulong Ferdinand Marcos Jr., at nakapaloob sa Philippine Development Plan 2023-2028.

Kung magiging ganap na batas, sisikapin ng pamahalaan na magtatag ng specialty centers sa mga regional hospitals ng Department of Health sa loob ng limang taon. Ang mga specialty centers na ito ay magkakaroon ng mga serbisyo na maihahalintulad sa mayroon ang Philippine Heart Center, Philippine Kidney Center, National Kidney Transplant Institute, at iba pang specialty hospitals.

Kapag operational na ang mga itatayong specialty centers sa mga rehiyon, ang pasyente ay hindi na kailangang bumiyahe sa Metro Manila para lang makapagpagamot sa nabanggit na mga specialty hospitals, at hindi na nila poproblemahin pa ang dagdag na gastos gaya ng pamasahe at kung saan tutuloy pansamantala.

Itatakda rin ang mga pamantayan sa pagtatatag ng specialty centers katulad ng assessment sa pangangailangang pangkalusugan, demand batay sa laki ng populasyon, geographical access sa mga pagamutan, ang papel ng ospital bilang referral center, availability ng mga specialized healthcare professionals, at operational and financial performance ng ospital. Para naman matiyak ang kalidad ng serbisyong ipagkakaloob ng mga specialty centers, makikipag-ugnayan ang DOH sa National Specialty Centers para makapagbigay ng kaukulang pagsasanay, mga ekspertong tauhan at specialist equipment.

Sa aking naging manipestasyon sa plenaryo ay nagpasalamat ako sa aking mga kapwa authors at co-sponsors, at sa lahat ng aking kapwa mambabatas na sumuporta sa SBN 2212. Patunay ito ng aming walang humpay na dedikasyon, at sama-samang pananaw na dapat mas mapapalakas pa ang ating healthcare system para sa mas mabilis, episyente at de-kalidad na serbisyong pangkalusugan sa lahat ng Pilipino.

Nagpasalamat din tayo sa DOH sa kanilang suporta at pakikiisa upang maipasa ang panukalang ito. Umaasa akong patuloy ang magiging pagtutulungan ng mga kapwa ko mambabatas at ng ehekutibo upang sapat na mapondohan ang specialty centers para mas marami ang maitayo sa lahat ng rehiyon, at masiguro natin na magiging maayos ang implementasyon nito.

Kaugnay ng paglalapit sa tao ng serbisyo mula sa gobyerno, tuluy-tuloy rin ang ating paghahatid ng tulong sa ating mga kababayan sa iba’t ibang bahagi ng ating bansa.

Bilang adopted son ng CALABARZON region, masaya tayong nakabisita sa Quezon noong May 28 para magsagawa ng inspeksyon sa itatayong Sariaya Super Health Center. Nag-inspeksyon din tayo sa ginawang konkretong daan sa loob ng compound ng bagong Local Government Complex na ating sinuportahang mapondohan noon.

Personal din nating pinangunahan ang pagkakaloob ng tulong para sa 1,000 mahihirap na taga-Sariaya.

Dumaan din tayo sa Lucena City at nagsagawa ng relief activity para maalalayan ang 1,500 mahihirap na pamilya roon. Nakisaya tayo sa idinaos na Pasayahan Festival at pagkatapos ay nag-inspeksyon sa itinatayong Lucena City Promenade by the Bay and seawall project sa Brgy. Talao-Talao. Ilan lamang ang mga ito sa mga proyekto sa Lucena City na naging instrumento tayo para maisakatuparan.

Nasa Negros Occidental naman tayo noong May 27 para saksihan ang groundbreaking ceremony ng itatayong Escalante Super Health Center. Matapos ito ay pinangunahan naman natin ang pamamahagi ng tulong para sa 2,000 mahihirap na residente sa lugar na kinabibilangan ng mga mangingisda, trisikad at tricycle drivers, solo parents, person with disabilities (PWDs) at mga senior citizens. Sinaksihan din natin ang 25th Manlambus Festival kung saan tampok ang carabao race, at nag-abot ng tulong sa 200 na nag-aalaga ng kalabaw.

Muli namang naglibot ang aking opisina para alalayan ang ating mga kababayang nahaharap sa iba’t ibang krisis. Napagaan natin ang dalahin ng limang nasunugan sa Malagapas, Cotabato City; at tatlong pamilya sa Catbalogan City, Samar. Nagsasagawa rin tayo ngayon ng serye ng pamamahagi ng tulong para sa mga residente ng Banate, Iloilo na ang kabuhayan ay naapektuhan noon ng bagyong Agaton, kung saan sa unang dalawang araw nito ay nakapaghatid na tayo ng tulong sa 2,477 pamilya.

Hindi rin naman natin kinaligtaang maayudahan ang 420 mahihirap na residente ng Cabanatuan City, Nueva Ecija; 1,000 sa Marawi City, Lanao del Sur; 40 Datu Chieftains sa Island Garden City of Samal, Davao del Norte; at 233 pa sa San Luis, Aurora province.

Pinuntahan din ng aking staff ang groundbreaking ng Super Health Center sa bayan ng Socorro, Surigao del Norte, at namahagi ng ayuda sa 500 indigents na mga residente.

Samantala, nitong May 30 ay personal nating dinaluhan ang pagtitipon ng Philippine Councilors League - Western Samar Chapter sa isang hotel sa Maynila.

Magkaiba man kami ng posisyon ngunit pare-pareho naman kami ng trabaho bilang legislator.

Kaya naman ang palaging pakiusap ng inyong lingkod sa mga kapwa ko public servants na wag limitahan ang kanilang trabaho sa paggawa ng batas, bagkus ay maging bukas sila sa pagtulong sa mga kababayan nating mga nangangailangan lalo na ang mga helpless at mga hopeless.

Ipagpatuloy natin ang pagkakaisa para patuloy na marinig ang boses ng bawat Pilipino lalo na ang mga mahihirap at walang ibang matakbuhan. Sama-sama tayong magtrabaho para sa ikagaganda at ikauunlad ng ating mga komunidad. Bilang mga lingkod bayan, sikapin nating ilapit sa tao ang serbisyong dapat, tapat, at may pagmamalasakit sa kanilang mga pangangailangan.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.