Taumbayan, ingat sa sakit na dulot ng tag-ulan

ni Bong Go @Bisyo Magserbisyo | July 19, 2023

Panahon na ng tag-ulan at hindi maiiwasang uso na naman ang iba’t ibang sakit. Mag-ingat po tayo at pangalagaan ang ating kalusugan.

Kaugnay nito, nagbabala na ang Department of Health (DOH) sa posibilidad na tumaas ang kaso ng leptospirosis lalo pa at halos walang tigil na ang buhos ngayon ng ulan sa buong bansa at maraming lugar ang binabaha. Ang leptospirosis ayon sa DOH ay bacterial infection na dala ng ihi ng iba’t ibang hayop, partikular ang mga daga, at nakukuha ng mga tao kapag lumulusong sa baha lalo na sa mga lugar na tambak ang basura.

Delikado ang leptospirosis at nagiging sanhi ng kamatayan. Kabilang sa mga sintomas nito ang mataas na lagnat, sore eyes, paninilaw ng mga mata at balat, pagbabago sa kulay ng ihi na posibleng sanhi ng kidney failure.

Bilang Chair ng Senate Committee on Health, nakikiusap ako sa DOH na mas paigtingin pa ang kanilang kampanya laban sa leptospirosis at iba pang sakit ngayong panahon ng tag-ulan. Dapat mas maintindihan ng taumbayan kung saan nakukuha ang naturang sakit, kung paano maiiwasan ito at kung ano ang gagawin kung sakaling may tamaan nito.

Kung kailangan ninyo ng tulong sa pagpapaospital, meron tayong 158 Malasakit Center sa buong bansa na makatutulong sa inyo para mapababa sa pinakamababang halaga ang inyong bayarin sa pagpapagamot. Batas na po ito na isinulong ko bilang principal sponsor at author noon. Pinagsama-sama na sa iisang kuwarto sa loob ng pampublikong ospital ang mga ahensya ng gobyerno na may medical assistance programs para maghatid ng mas mabilis, maayos at maaasahang tulong pangmedikal sa mga Pilipino lalo na ang mga mahihirap.

Samantala, bilang bisyo ko ang magserbisyo, tuluy-tuloy ang ating mga gawain sa loob at labas ng Senado kaugnay ng ating layuning patuloy na paghahatid ng serbisyo sa mga komunidad.

Kahapon, July 18, ay nasa Bulacan tayo para sa ribbon cutting ceremony ng itinayong Super Health Center sa San Miguel. Personal din nating pinangunahan ang pamamahagi ng ayuda para sa 1,000 mahihirap na residente sa lugar katuwang ang opisina ni Mayor Roderick Tiongson. Dumiretso tayo sa Bustos kung saan 1,000 benepisyaryo rin ang napagaan natin ang dalahin kasama sina Congresswoman Tina Pancho, former congressman Apol Pancho, Mayor Iskul Juan at Vice Mayor Martin Angeles.

Noong July 17 ay nasa Bohol tayo para bisitahin ang itinatayong Governor Celestino Gallares Multi-Specialty Medical Complex sa Cortes kasama sina Cong. Edgar Chatto, Vice Governor Victor Balite, Cortes Mayor Iven Lim at Dauis Vice Mayor Miriam Sumaylo.

Naging principal sponsor tayo ng Republic Act 11883 kung saan sa pamamagitan nito, ang Governor Celestino Gallares Memorial Hospital ay nai-convert para maging multi-specialty medical complex at mapaglaanan ng gobyerno ng pondo. Bumisita rin tayo sa Cortes Municipal Public Park at sa Cortes Municipal Grounds -- mga proyektong napondohan sa ating pamamagitan. Pinuntahan din natin ang Disaster Risk Reduction and Management building na itinayo sa Brgy. Poblacion. Ang nasabing gusali, kabilang ang isang rescue vehicle at fire truck, ay sa ating pamamagitan din napaglaanan ng pondo.

Sinaksihan din natin ang pagbubukas ng Inter-Barangay Basketball League na ginanap sa amphitheater ng barangay katuwang ang lokal na pamahalaan kasama si Councilor Ira Lim. Bilang Chair ng Senate Committee on Sports, suportado natin ang mga ganitong grassroot sports development programs. Hindi rin natin kinaligtaang pagkalooban ng tulong ang 1,000 indigents sa lugar.

Nakarating din tayo sa Tagbilaran City at namahagi ng ayuda para sa 2,000 mahihirap na residente kasama sina Governor Aristotle Aumentado, Vice Governor Dionisio Victor Balite, Board Member Greg Jala, Tagbilaran Mayor Jane Yap, former mayor Baba Yap, at iba pa, bago tayo nag-inspeksyon sa Super Health Center na nasa Brgy. Dampas.

Bumisita rin tayo sa Malasakit Center na nasa Governor Celestino Gallares Memorial Hospital sa Tagbilaran upang masiguro ang patuloy na operasyon nito. Dinaluhan din natin bilang panauhing pandangal ang 73rd commencement exercises ng Bohol Institute of Technology International College System at nagbigay ng inspirasyon sa mga bagong nagsitapos. Matapos ang okasyon ay binisita natin ang kasalukuyang itinatayo na New Cogon Public Market sa siyudad.

Masaya ko ring ibinabahagi na noong July 17 ay nagkaroon na ng groundbreaking para sa itatayong Olutanga Super Health Center sa Zamboanga Sibugay.

Pumunta naman tayo sa Koronadal City, South Cotabato noong July 16, kung saan ginaganap ang T’nalak Festival 2023. Nagbigay kortesiya tayo kay Governor Jun Tamayo at ilang opisyal sa probinsya. Matapos ito ay pinangunahan natin ang pamamahagi ng ayuda para sa kabuuang 1,743 mahihirap na residente sa lugar kasama sina Congressman Peter Miguel at Mayor Eliordo Ogena.

Nag-inspeksyon din tayo sa mga ikinabit na solar streetlights sa Brgy. Zone 4. Ang proyektong pailaw ay napondohan sa ating pamamagitan.

Nakarating naman ang aking relief team sa iba’t ibang lugar sa ating bansa para tulungan ang mga kababayang nahaharap sa iba’t ibang krisis. Maagap nating dinamayan ang mga biktima ng magkakahiwalay na insidente ng sunog gaya ng 388 sa Brgy. Kasangyangan, Zamboanga City; 21 sa Nabunturan, at 18 sa Mawab, mga lugar sa Davao de Oro. Nakapaglagay tayo ng ngiti sa mga labi ng 1,400 mahihirap na residente sa Polillo Island, Quezon Province katuwang si Cong. Mark Enverga; 132 sa Talavera, Nueva Ecija; 56 sa Obando, Bulacan katuwang sina Mayor Leonardo Valeda at Councilor Evangeline Bautista; at 51 pa sa Samal, Bataan kaagapay naman si Mayor Alex Acuzar.

Masaya po ako na patuloy ang masigla at aktibong pakikipagtulungan sa atin ng mga opisyal ng pamahalaan sa ating ginagawang paglalapit ng serbisyo ng gobyerno sa mga tao. Makaaasa kayo ng aming walang humpay na malasakit at serbisyo sa abot ng aming makakaya. Ingatan lang po natin ang ating kalusugan para maipagpatuloy natin nang walang sagabal ang ating mga gawain habang sama-sama nating pagtulungan ang muling pagbangon ng ating ekonomiya at mapagaan ang buhay ng bawat Pilipino.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Food security, ligtas at komportableng buhay para sa lahat

ni Bong Go @Bisyo Magserbisyo | July 15, 2023

Sa mga nakalipas na taon, nasaksihan natin ang mabigat na epekto na dulot ng pandemyang COVID-19 sa ating bansa -- sa ekonomiya, sa kalusugan at sa pang-araw-araw na pamumuhay ng bawat Pilipino.

Sa harap ng mga hamong ito, ating inaasahan na pagtutuunan ng pamahalaan ang isang inclusive recovery na may puso at malasakit para sa lahat, lalo na para sa mga mahihirap at sa mga higit na nangangailangan ng kalinga mula sa gobyerno.

Bilang kinatawan n'yo sa Senado, tayo po ay may malalim na pag-asa at optimismo na magpapatuloy ang administrasyon ni Pangulong Bongbong Marcos Jr. sa paglulunsad at pagpapatupad ng mga pro-poor initiative. Sana rin ay maipagpatuloy ang mga magagandang nagawa ng nakaraang administrasyon ni dating Pangulong Rodrigo Duterte tungo sa mas ligtas at komportableng buhay para sa lahat.

Sa mga unang taon ng kanyang pamumuno, ating nasaksihan ang malasakit ni Pangulong Marcos at ng kanyang administrasyon sa ating mga kababayang mahihirap. Sa patuloy na pagsulong ng ating ekonomiya, sana ay siguruhin talaga na walang Pilipino ang maiiwan.

Sa nalalapit niyang ikalawang State of the Nation Address (SONA), naniniwala tayo na mahalaga ang usaping food security. Kailangang ituring natin ito bilang isang prayoridad palagi para maiwasan na may magutom na pamilyang Pilipino.

Isa rin sa ating inaasahan sa paparating na SONA ay ang patuloy na implementasyon ng Philippine Development Plan ng administrasyon, na may eight-point agenda na naglalayong makamit natin ang food security, mapabuti ang pamamahala ng ating supply chain, mabawasan ang gastusin natin sa energy at mapanatili ang ating energy security, at mabawasan ang economic vulnerabilities sa bansa na idinulot ng pandemya o iba pang krisis.

Inaasahan ko rin ang patuloy na prayoridad ng gobyerno sa mga isyung pangkalusugan, pagpapalakas sa ating social protection, pagtataguyod ng imprastruktura, at paghihikayat ng entrepreneurship sa bansa.

Bilang Chair ng Senate Committee on Health, makaaasa kayo sa aking patuloy na pagsusulong sa layunin nating pangkalusugan. Isa na rito ang ating naipasa na Regional Specialty Centers Act na ating ini-sponsor at isa sa mga may-akda sa Senado, at ngayon ay naghihintay na lamang ng pirma ng Pangulo upang maisabatas.

Isa po itong paraan para mailapit natin ang mga serbisyo medikal sa ating mga kababayan na mahihirap lalo na sa malalayong lugar. Halimbawa, sa ngayon, ‘yung may sakit sa puso, kailangan pa nilang magpaopera sa Metro Manila sa Philippine Heart Center. Kapag mayroon na tayong Regional Specialty Centers, magkakaroon na ng specialized medical services sa mga regional hospitals sa iba’t ibang parte ng bansa para naman hindi na nila kailangang bumiyahe pa at gumastos ang mga pasyente papuntang Maynila.

Samantala, bilang bisyo ko ang magserbisyo, patuloy ako at ang aking opisina sa pagbisita sa ating mga kababayan upang mamahagi ng tulong sa abot ng aming makakaya.

Noong July 14, nagtungo tayo sa Rizal Park sa Davao City para magbigay ng dagdag na tulong sa 1,272 mga biktima rin ng sunog noon mula sa iba’t ibang barangay. Personal nating sinaksihan ang ipinamahaging emergency housing assistance ng National Housing Authority sa mga benepisyaryo, sa pakikipagtulungan kasama ang tanggapan nina Davao City Mayor Sebastian “Baste” Duterte at NHA Regional Manager ng Davao Region na si Engr. Clemente Dayot.

Noong July 13, nasa Davao del Norte tayo kung saan dinaluhan natin ang inauguration ng Sangguniang Panlalawigan Building sa Tagum City sa imbitasyon ng lokal na pamahalaan. Sinilip din natin ang Tagum City Motorpool for Care for School Chairs Program kasama sina Vice Governor Oyo Uy at Mayor Rey Uy.

Sa kaparehas na araw, dumalo rin tayo sa groundbreaking ng Super Health Center ng siyudad na sinundan naman ng pamamahagi natin ng tulong sa 1,500 na mga mahihirap nating kababayan doon kasama ang lokal na pamahalaan.

Noong July 12, tayo ay nasa Cebu para daluhan ang groundbreaking ng Super Health Center sa Carcar City at mamahagi ng tulong sa 2,000 na indigents sa lugar kasama sina Governor Gwendolyn Garcia, Congresswoman Rhea Gullas, Mayor Mario Patricio Barcenas at Vice Mayor Efren Quijano. Ininspeksyon din natin ang Carcar City New Public Market na napondohan ang pagsasaayos sa ating pamamagitan.

Sinundan ito ng ating monitoring visit sa Malasakit Center sa Cebu Provincial Hospital kung saan namigay tayo ng tulong sa 170 pasyente at 243 frontliners. May hiwalay na tulong ang DSWD sa mga kwalipikadong pasyente. Namahagi rin tayo ng tulong sa 2,000 na mahihirap na residente sa Naga City sa tulong ng opisina ni Mayor Valdemar Chiong.

Binisita natin ang seawall project at turn over ng mga sasakyan para sa lungsod na atin ding sinuportahang mapondohan noon.

Pagkatapos ay dinaluhan natin ang Liga ng mga Barangay NCR Regional Summit 2023 na ginanap sa Davao City kung saan binigyang-diin ko ang aking suporta sa kapakanan at karapatan ng ating barangay at Sangguniang Kabataan officials.

Nitong nakaraang linggo, nagkaroon din ng iba’t ibang relief activity ang aking opisina sa buong bansa. Sa Camarines Sur, namahagi tayo ng assistance sa 94 na kababayan natin sa mga conflict-affected at geographically isolated barangays; at 450 na mahihirap naman sa Canaman at Calabanga.

Namahagi rin tayo ng tulong sa 57 na mahihirap na residente sa Muntinlupa City; 57 sa Licab at 237 sa Gapan, Nueva Ecija; 75 na persons with disabilities sa Davao City; 300 na mahihirap sa Pasig City; at 1,000 sa Meycauayan City, Bulacan. May 109 pamilyang biktima ng sunog rin ang naabutan ng tulong sa Brgy. 23-C, Davao City.

Nagpaabot din tayo ng suporta sa groundbreaking ng Super Health Center sa Estancia, Iloilo, at namahagi rin ng tulong ang aking team sa 1,000 na mahihirap doon.

Tandaan natin na sa bawat pagsubok, may kasamang pagkakataon para sa atin na matuto at magpatuloy. Sa nalalapit na SONA ni Pangulong Marcos Jr., aking inaasahan na patuloy na ipapakita ng ating gobyerno ang dedikasyon at malasakit sa sambayanang Pilipino. Sa ating pagtutulungan at pagkakaisa, tiyak na malalampasan natin ang hamong ating kinakaharap at maaabot natin ang isang mas magandang kinabukasan para sa lahat.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

E-Governance Act, para sa mas maayos na serbisyo publiko

ni Bong Go @Bisyo Magserbisyo | July 12, 2023

Hindi na katulad ng dati ang panahon ngayon. Kasabay ng pagsulpot ng mga makabagong teknolohiya, iba’t ibang uri rin ng problema at mga hamon ang ating kinakaharap. Kabilang na rito, ang pagtaas ng bilang ng mga krimeng nagaganap sa cyberspace.

Ayon sa ulat ng Philippine National Police, ang bilang ng mga cybercrime sa Metro Manila sa first half ng 2023 ay tumaas ng 152% kumpara sa parehong panahon noong nakaraang taon.

Hindi natin maaaring palampasin ang ganitong uri ng krimen. Kahit saan man ito mangyari, online man o hindi, kailangang panagutin ang mga taong nasa likod nito.

Kasama sa ating mga hakbangin upang maresolba ang isyu ng cybercrime, ang pagsiguro na ang gobyerno ay makakasabay sa pangangailangan ng panahon ngayon gamit ang teknolohiya. Kaya ko ipinaglalaban ang pagtataguyod ng E-Governance Act.

Kung maipasa, layunin ng panukalang batas na ito na magtatag ng isang integrated at interconnected na information at resource-sharing network na sasaklaw sa national at mga local government units sa bansa. Sa ilalim ng panukalang ito, dapat tayong magkaroon ng internal records management information system, information database, at digital portals para sa mas maayos na paghahatid ng mga serbisyo ng pamahalaan.

Naniniwala akong malaki ang maitutulong ng E-Governance Act hindi lamang sa paglaban sa cybercrime kundi mailapit ang serbisyo publiko sa mga nangangailangan nito. Ang pagkakaroon ng mga digital portal para sa paghahatid ng public services ay magbibigay-daan sa mas mahusay na pagsusuri at pag-monitor ng mga transaksyon upang maproteksyunan ang kapakanan ng ating mga kababayan.

Sa pamamagitan ng institutionalization ng E-governance roadmap, mas mabilis ang pagkuha ng impormasyon at serbisyo mula sa pamahalaan. Sa halip na pumila ng ilang oras, o kaya’y bumiyahe ng malayo, mapapadali na natin ang proseso sa pamamagitan ng isang click lamang.

Kaya natutuwa ako na isa rin ito sa prayoridad ng kasalukuyang administrasyon.

Maliban dito, ang panukalang ito ay nagtataguyod din ng digitalization ng mga paper-based na proseso upang maabot ng gobyerno ang mas mataas na efficiency at transparency sa mga serbisyong pampubliko. Kaya mas lalong mailalapit natin ang mga serbisyo ng gobyerno sa mga Pilipino nasaan man sila sa mundo.

Isa rin ako sa mga co-author at co-sponsor ng Internet Transactions Bill na kung maipasa ay magbibigay ng proteksyon sa mga consumers at sellers na nakikipagtransaksyon sa pamamagitan ng internet.

Sa ilalim ng panukala, magkakaroon ng E-Commerce Bureau na mangangasiwa sa regulasyon ng internet transactions para maiwasan ang anumang uri ng panloloko gamit ang internet.

Aminado tayo na ang digital transformation sa pamahalaan ay isang malaking hakbang, ngunit kinakailangan natin ito. Tulad ng mga pribadong sektor na naka-adapt na sa e-commerce platforms para mapabuti ang kanilang mga serbisyo, dapat ring maka-adapt ang pamahalaan at magkaroon ng kakayahang harapin ang mga hamon ng makabagong panahon.

Samantala, sa kabila ng ating pagtugon sa problema ng makabagong panahon, patuloy rin tayo sa paglilingkod sa ating mga ordinaryong kababayan. Hindi ako titigil sa pagtulong sa abot ng aking makakaya dahil bisyo ko na ang magserbisyo.

Noong July 11, tayo ay nagpunta sa Trece Martires City, Cavite upang mag-abot ng tulong sa 1,330 na mga mahihirap na residente roon. Ang relief effort na ito ay isinagawa sa pakikipagtulungan ng opisina ni Mayor Gemma Lubigan. Bilang adopted son ng CALABARZON region, ang bawat ngiti at pasasalamat na ating natanggap mula sa kanila ay sapat na upang mapawi ang ating pagod.

Noong July 10, nagtungo naman tayo sa Quezon City para mamahagi ng tulong sa 210 na mga biktima ng sunog at 1,000 indigents sa lugar, katuwang ang tanggapan nina Congressman PM Vargas at Councilor Alfred Vargas.

Samantala, sa loob ng mga nakaraang araw, namahagi rin tayo ng tulong sa mga kababayan natin sa iba’t ibang parte ng bansa, gaya ng mga 550 pamilyang apektado ng pag-aalburoto ng Bulkang Mayon sa Sto. Domingo, Albay, at mga mahihirap nating kababayan na may hinaharap na iba’t ibang krisis at sakuna, tulad ng 750 sa Tangalan, Aklan; 100 sa Balayan, Batangas at 55 pamilyang apektado ng sunog sa Quezon City.

Mananatili tayong matatag, nagkakaisa, at nagtutulungan. Unahin natin ang kapakanan ng mga mahihirap at magmalasakit tayo para matugunan ang kanilang mga pangangailangan. Sama-sama nating harapin ang mga hamon ng makabagong panahon tungo sa isang mas ligtas at progresibong Pilipinas.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.