Respeto at sinseridad ang kailangan!

ni Bong Go @Bisyo Magserbisyo | August 9, 2023 Mariin nating kinukondena ang naging aksyon ng Chinese Coast Guard na binugahan ng water cannon ang barko ng ating Philippine Coast Guard na magdadala sana ng supplies sa ating mga sundalo sa Ayungin Shoal. Nangyari ang insidente noong Sabado, August 5, at naibalita ito maging ng international media.

Ang pakiusap natin sa China, stop bullying us! Hindi pork’t maliit tayong bansa ay gaganunin na lang tayo. Respeto ang kailangan dito. Sa loob ng anim na taon ay sobra-sobra ang respeto na ibinigay ni dating Pangulong Rodrigo Duterte sa kanila at naging mabuti ang ating gobyerno noong nakaraang administrasyon sa China.

Maganda naman sana ang ating relasyon sa China kaya hindi natin inaasahan na magkakaroon ng ganitong pambu-bully sa karagatan na sakop ng ating exclusive economic zone.

Sa katunayan, noong may personal na lakad si dating Pangulong Duterte sa China kamakailan lamang ay naimbitahan pa siya bilang isang kaibigan ni President Xi Jinping sa isang pagpupulong.

Nandoon si Tatay Digong dahil sa imbitasyon ng isang eskwelahan na ipinangalan ang isang gusali sa kanyang inang si Soledad Duterte. Ibinahagi rin ng dating pangulo sa kasalukuyang Pangulong Bongbong Marcos, Jr. ang napag-usapan nila ng presidente ng China. Pareho ang hangarin ng ating dating Pangulong Duterte at ni Pangulong Marcos — ang maipaglaban ang interes ng Pilipinas at maproteksyunan ang kapakanan ng mga Pilipino.

Sa aking naging manipestasyon noong Lunes, August 7, sinusugan ko ang privilege speech ni Senate President Juan Miguel Zubiri tungkol sa insidente at binigyang-diin ko na ang buong bansa ay dapat na maging matatag at malakas sa harap ng mga ganitong sitwasyon. Hinikayat ko ang bawat Pilipino na pangalagaan ang ating sovereign rights sa West Philippine Sea. Ang atin ay atin.

Kung ano ang para sa Pilipino ay para sa Pilipino. What is ours is ours!

Kailangang manatili tayong consistent sa ating foreign policy na “friend to all, enemy to none”.

Gayunpaman, kailangan nating manindigan sa pagprotekta sa ating karapatan bilang isang malayang bansa.

Umapela rin ako sa kasalukuyang administrasyon na tiyakin ang kaligtasan ng bawat Pilipino.

Malaki ang tiwala ko sa Pangulo na ipaglalaban niya ang ating karapatan sa WPS sa tulong na rin ng ating international partners. Maraming beses na itong nai-bring-up noon ni dating Pangulong Duterte. Panalo tayo sa arbitral ruling pagdating sa teritoryong atin naman dapat talaga. Pero ang tanong, who will enforce? And who can enforce the ruling?

Bilang vice chair ng Senate Committee on National Defense, tiwala ako sa dedikasyon ng ating Armed Forces of the Philippines at Coast Guard na pangalagaan ang ating interes sa WPS.

Suportado ko mula noon hanggang ngayon ang modernization efforts ng ating military.

Isinumite ko rin ang Senate Bill 2112, na kung makapapasa at magiging ganap na batas, ang layunin ay ang modernisasyon ng Philippine Coast Guard.

Gaya ng sabi ko noon, kahit maliit lang tayo na bansa, huwag tayong apihin dahil kilala ang mga Pilipino na matatapang, lumalaban, at ipinaglalaban ang ating karapatan.

Samantala, dahil bisyo ko ang magserbisyo, sa kabila ng ating pagiging abala sa mga gawain sa Senado ay patuloy ang aking tanggapan sa pag-alalay sa mga komunidad at kababayan nating nahaharap sa iba’t ibang krisis.

Kahapon, August 8, katuwang ang tanggapan ng lokal na pamahalaan ng Cavite City ay namahagi tayo ng tulong sa 158 mahihirap na residente. Pinagaan natin ang dalahin ng 20 nasunugan sa San Fernando City, Pampanga.

Sa Parañaque City, nagbigay tayo ng dagdag na suporta sa 58 benepisyaryo ng emergency housing assistance ng National Housing Authority. Ang programang EHAP ay isinulong ko noon at patuloy na sinusuportahan ngayon para may maibili ng housing materials ang mga nasunugan gaya ng yero, pako, semento at iba pa.

Nitong Lunes, bumisita tayo sa Pasay City at dumalo sa kanilang flag raising ceremony kasama sina Mayor Emi Calixto-Rubiano, Cong. Antonino Calixto at Vice Mayor Ding Del Rosario, at iba pang opisyal. Ipinagdiwang rin namin doon ang kaarawan ni Mayor Emi at ng kanilang Urban Development and Housing Office Head Ian Vendivel. Matapos nito, personal tayong namahagi ng tulong sa 2,000 TODA members ng lungsod.

Bilang Chair ng Senate Committee on Sports, dumalo tayo sa imbitasyon ni Pangulong Marcos sa ginanap na “Konsyerto sa Palasyo” bilang pagbibigay-pugay sa ating mga atletang Pilipino sa Malacañang noong August 6.

Nasa Cotabato City naman tayo noong August 5, at sinaksihan ang blessing and ribbon cutting ceremonies ng two-storey na Malasakit Center Building kasama sina Congresswoman Bai Dimple Mastura, Maguindanao del Norte Governor Abdulraof Macacua, Cotabato City Mayor Mohammad Ali "Bruce" dela Cruz Matabalao, Matanog Mayor Zohria Bansil-Guro, at Sultan Kudarat Vice Mayor Shameem Mastura. Nasa 647 mga pasyente at 2,535 medical frontliners ang ating natulungan doon. May hiwalay ring pinansyal na tulong ang DSWD sa mga kwalipikadong benepisyaryo.

Sinaksihan din natin ang inagurasyon ng itinayong Super Health Center sa Libungan, Cotabato.

Tayo naman ang nagbukas at nagbigay ng mensahe sa ginanap na inter-barangay championship game bilang bahagi ng pagdiriwang ng 62nd founding anniversary at 8th Katambolit Festival sa imbitasyon ni Mayor Angel Rose Cuan. Personal din nating pinangunahan ang pamamahagi ng ayuda sa 1,000 mahihirap na residente ng Libungan.

Dumiretso tayo sa Midsayap, at sinaksihan ang groundbreaking ng itatayong Super Health Center doon, at pagkatapos ay nagkaloob ng tulong sa 1,000 mahihirap na residente sa lugar katuwang ang tanggapan ni Mayor Rolando Sacdalan. Nakasama rin natin sina Congresswoman Samantha Santos, Vice Governor Efren Piñol, at iba pang opisyal. Nagpapasalamat tayo sa suporta ng lokal na pamahalaan ng North Cotabato sa pamumuno ni Gov. Lala Taliño-Mendoza.

Nakarating naman ang aking opisina para mamahagi ng food packs sa iba pang sinalanta ng Typhoon Egay. Nakapagbigay tayo ng tulong sa 4,000 benepisyaryo sa Pampanga, bukod pa ang 500 sa Minalin, at 500 sa Arayat. Nakapamahagi rin sa 500 sa Bauang, La Union, at 700 para sa mga taga-Calumpit, Bulacan.

Naghatid din tayo ng food packs para sa 2,500 biktima ng bagyo sa Santa Praxedes, Claveria, Sanchez Mira, Pamplona at Abulog, mga bayan sa Cagayan. Sa Ilocos Norte, namahagi tayo ng 1,500 food packs sa mga bayan ng Pasuquin, Laoag City at Marcos, habang nagbigay ng karagdagang tulong ang DSWD sa kanila.

Hangad ko pa rin ang mapayapang solusyon sa isyu sa West Philippine Sea. Ayaw natin ng gulo. Pero mahalagang manindigan tayo para sa pambansang interes at pagtataguyod ng mapayapang resolusyon sa mga alitan sa teritoryo, at igiit kung ano ang sa atin. Wala tayong dapat isuko ni katiting na bahagi ng ating bansa!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Dagdag insentib at suporta sa para athletes

ni Bong Go @Bisyo Magserbisyo | August 5, 2023 Bilang chair ng Senate Committee on Sports, noong August 3 ay isinumite ko sa Senado ang anim na resolusyon bilang pagkilala sa ating mga atleta sa bitbit nilang karangalan sa ating bansa, at paglalagay sa pangalan ng Pilipinas sa mapa ng international sports.

Kabilang sa ating pinapurihan ang Makati Football Club na nagwagi sa Gothia World Youth Cup na ginanap sa Gothenburg, Sweden, at sa Cup No. 1 na idinaos naman sa Frederikshavn, Denmark.

Nagbigay-pugay din tayo kina Johann Chua at James Aranas sa kanilang naging tagumpay sa 2023 World Cup of Pool na ginanap sa Spain. Dahil dito, muli tayong nagkampeon sa nasabing torneo, na ang pinakahuli ay noon pang 2013.

Historic naman ang panalo ng Filipinas Football Team laban sa New Zealand sa score na 1-0 sa 2023 FIFA Women’s World Cup na idinaos sa Wellington, New Zealand. Ito ang unang pagkakataon na naka-goal ang ating team sa World Cup. Isa itong milestone sa kasaysayan ng Philippine sports, at nagpapakita ng pag-unlad ng ating koponan sa larangan ng football.

Tagumpay din ang ating delegasyon ng mahuhusay na Keglers o bowlers sa ginanap na 21st Asian Youth Tenpin Bowling Championships sa Bangkok, Thailand. Sila ang itinanghal na overall champion sa kauna-unahang pagkakataon, at nakapag-uwi ng dalawang gold medals.

Ipinakita naman ng Gilas Women’s National Basketball Team ang kanilang husay sa ginanap na FIBA U16 Women’s Asian Championship, kung saan nakapagtala sila ng limang panalo at walang talo sa Division B, kaya nakakuha sila ng spot para sa Division A Asia.

Kinilala rin natin ang mga miyembro ng Philippine Para Teams sa kanilang ipinakitang galing matapos itala ang 5th Overall Championship sa ginanap na 2023 Southeast Asian Para Games sa Cambodia. Nakasungkit ang ating para-athletes ng kabuuang 117 medalya — 34 gold medals; 33 silver medals; at 50 bronze medals.

Kaugnay nito, naghain din ako ng panukalang naglalayong madagdagan ang mga insentibo para sa mga para-athletes sa pamamagitan ng Senate Bill No. 2116. Kung maisabatas, dapat ay pareho na rin ang suporta at insentibo sa mga lalahok sa Para-games tulad ng ibang international competitions na sinasalihan ng Pilipinas.

Gayundin, bilang chair ng Senate Committee on Sports, isinumite natin ang Senate Bill No. 423, o ang panukalang Philippine National Games (PNG) Act of 2022. Kung maisabatas, layunin nito na mapalawak ang grassroots sports program para makatuklas ng mga atletang Pilipino sa buong bansa na may potensyal sa iba’t ibang sports. Isang paraan din ito para mahikayat ang ating mga kabataan to get into sports and stay away from illegal drugs.

Samantala, ipinaglaban natin sa deliberasyon ng ating 2023 budget ang karagdagang pondo para sa Philippine Sports Commission. Sa katunayan, ang budget lang sana ng PSC ay nasa humigit-kumulang P200 million. Tayo ang nag-defend at nagsulong ng dagdag sa pondo nila kaya nabigyan pa ito ng P1 billion, kasama na ang budget para sa iba pang grassroots sports programs gaya ng Batang Pinoy, dagdag pondo sa pagdaraos ng FIBA 2023, at suporta sa mga lalahok sa international competitions tulad ng Asian Games, Southeast Asian Games, Summer Olympics, ASEAN Para Games, at iba pa.

Naging author at co-sponsor din tayo ng panukalang batas na naging Republic Act No. 11470 noong 2020 para maitatag ang National Academy of Sports sa New Clark City sa Tarlac. Bahagi ito ng aking pangarap na magkaroon ng dedicated learning facility kung saan ang mga kabataang Pilipino ay mas mahasa ang kakayahan sa sports habang nag-aaral.

At dahil bisyo ko ang magserbisyo, tuluy-tuloy ang aking paghahatid ng tulong sa mga komunidad na nangangailangan.

Bahagi ng aking inisyatiba naman bilang chair ng Senate Committee on Health na mapalakas ang ating healthcare system, kahapon, August 4 ay sinaksihan natin ang groundbreaking ng itatayong Super Health Center sa Monkayo, Davao de Oro. Matapos nito, binisita natin ang pagtatayo at pagsasaayos ng public market na napondohan sa ating pamamagitan. Pinangunahan din natin ang pamamahagi ng tulong sa 1,000 indigents sa lugar.

Nasa Batangas naman tayo noong August 3 at sinaksihan ang groundbreaking ng itatayong Batangas Provincial Medical Center (New Provincial Hospital) sa bayan ng Tuy.

Pinangunahan din natin ang pamamahagi ng tulong sa 1,700 residente, sa suporta ni Governor Dodo Mandanas.

Nakasama rin namin doon sina Vice Gov. Mark Leviste, Congressmen Eric Buhain at Ray Reyes, Tuy Mayor Jose Jecerell Cerrado, San Luis Mayor Oscar Lito Hernandez at Vice Mayor Maan de Gracia, Lian Vice Mayor Ronin Leviste, at iba pang lokal na opisyal.

Pagkatapos, pumunta tayo sa Davao City para daluhan ang 1st General Assembly ng Philippine Councilors League-Occidental Mindoro.

Bumisita naman tayo sa Caloocan City noong August 2 at sinaksihan ang groundbreaking ng Super Health Center kasama sina DOH Secretary Ted Herbosa, Congresswoman Mitch Cajayon-Uy, Congressman Oca Malapitan, Mayor Along Malapitan at Vice Mayor Karina Teh. Namahagi rin tayo ng tulong sa 980 mahihirap na residente katuwang ang tanggapan naman nina Cong. Cajayon-Uy, Councilor Ed Aruelo at Councilor Wewel De Leon.

Naglibot din ang aking opisina para maghatid ng tulong sa iba’t ibang sektor na nahaharap sa mga krisis. Para sa mga naapektuhan ng Typhoon Egay, namahagi tayo ng food packs at napagkalooban ang 1,700 residente mula sa Hagonoy, Guiguinto at San Miguel sa Bulacan; 900 sa Dagupan City, San Fabian at Calasiao sa Pangasinan; 200 sa Binangonan, Rizal; at 200 sa San Antonio, Zambales. Naalalayan din ang 89 naging biktima ng sunog sa iba’t ibang barangay sa Bacolod City, Negros Occidental.

Nagbigay din tayo ng suporta sa 1,200 mahihirap na residente ng Cabanatuan City, Nueva Ecija; 1,049 sa San Pedro City, Laguna; 800 sa Tabaco City, Albay; at 67 pa sa Pulupandan, Negros Occidental. Tumulong din kami sa mga taga-Bulacan kabilang ang 66 sa Santa Maria, 66 sa Paombong, 66 sa Baliwag, 66 sa Bustos, 66 sa Obando, at 66 din sa Norzagaray. Sa Batangas naman, natulungan din natin ang 500 benepisyaryo mula sa Calaca, 400 sa Tanauan at 57 pa sa Batangas City.

Walang tigil ang aking serbisyo sa abot ng aking makakaya. Mula sa pagkakaloob ng tulong sa mga mahihirap at iba’t ibang sektor, pagpapaunlad at pagpapalawak ng ating sports program, pagpapalakas ng ating healthcare system, pagsusulong ng mga proyektong magpapaunlad sa inyong lugar, at paglikha ng mga batas para sa kapakanan ng ating mga kababayan. Magtulungan tayo tungo sa pag-unlad ng ating bansa.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Malasakit Center para sa mga takot magpagamot

ni Bong Go @Bisyo Magserbisyo | August 2, 2023 Sa ating pag-iikot sa buong bansa sa tuwing naghahatid tayo ng serbisyo sa mga komunidad, lagi nating ipinapaalala sa ating mga kababayan — lalo na ang mga mahihirap — na unahin ang kanilang kalusugan.

Dapat, huwag silang matakot magpagamot dahil kung kailangan nila ng tulong pangmedikal ay nandiyan ang Malasakit Center sa kanilang lugar na handang tumulong sa kanila. Para sa taumbayan iyan at kahit sino ay maaaring lumapit dito. Basta Pilipino ka, qualified ka sa Malasakit Center.

Nasa iisang bubong na sa loob ng mga piling pampublikong ospital ang Department of Social Welfare and Development, Department of Health, Philippine Health Insurance Corporation, at Philippine Charity Sweepstakes Office, kaya hindi na mahihirapan sa pagpapalipat-lipat at pagpila ang mga kamag-anak ng pasyente sa mga ahensya ng pamahalaan para humingi ng tulong. Layunin ng Malasakit Center na ilapit sa tao ang medical assistance programs ng gobyerno para ma-cover ang mga bayaring pampagamot ng mga mahihirap na pasyente.

Tayo ang principal author at sponsor ng Republic Act No. 11463, o ang Malasakit Centers Act of 2019, na pinirmahan noon ni dating Pangulong Rodrigo Duterte bilang pagtupad sa ating pangarap na makalikha ng healthcare support system para sa mga Pilipino, lalo na ang mga hopeless, helpless at walang ibang malalapitan maliban sa pamahalaan.

Bilang chair ng Senate Committee on Health, isinusulong natin ang patuloy na operasyon ng Malasakit Center dahil nakakatulong talaga ito sa mga mahihirap na mapangalagaan ang kanilang kalusugan.

Sa kasalukuyan ay mayroon na tayong 158 Malasakit Center sa buong bansa. Ayon sa datos ng DOH, mahigit 7 milyong Pilipino na ang natulungan ng programang ito, at patuloy pang nadaragdagan ang bilang na iyan araw-araw.

Bilang halimbawa, ang Malasakit Center na nasa Southern Philippines Medical Center (SPMC) sa Davao City ay nakatulong na sa mahigit 212,000 pasyente mula 2019 hanggang sa kalagitnaan ng 2023. Buong Mindanao rin ang puwedeng lumapit sa Malasakit Center sa SPMC.

Batay sa datos ng Health Facility and Patient Support Team ng DOH, lumaki rin ang naseserbisyuhan ng SPMC sa mga nakalipas na taon.

Sa Davao Region, mayroon tayong raw data na nagpapakitang mahigit 500,000 pasyente na po ang natulungan ng mga Malasakit Center sa buong rehiyon. Maging ako man ay humanga sa napakalaking dagdag na bilang ng mga pasyenteng natulungan ng Malasakit Centers sa mga nakalipas na taon.

Patunay ito na importanteng pagandahin ang paghahatid ng serbisyo medikal ng pamahalaan bilang tugon sa nagbabagong pangkalusugang pangangailangan ng ating mga kababayan.

Patuloy naman ang paghahatid ng serbisyo sa ating mga kababayan, partikular ang mga tinamaan ng kalamidad. At dahil bisyo ko na ang magserbisyo, bumiyahe tayo nitong July 31 sa Cagayan at nagbigay-tulong sa 1,000 biktima ng Bagyong Egay sa bayan ng Santa Ana.

Kasama natin sa ating pagbisita si Governor Manual Mamba, Santa Ana Vice Mayor Catherin Ladrido, Sta. Teresita Mayor Rodrigo de Gracia, Gonzaga Mayor Marylin Pentecostes, Allacapan Mayor Harry Florida, at iba pa.

Pinuntahan din natin ang mga binagyo sa Sanchez Mira, Cagayan upang maalalayan ang 1,500 residenteng naapektuhan, kasama si Mayor Abe Bagasin at ang lokal na pamahalaan.

Nasa Davao City naman tayo noong July 29 para saksihan ang ribbon cutting at turnover ceremony ng multi-purpose building-gym-type sa Barangay Lasang. Pinangunahan natin ang pamamahagi ng ayuda para sa 1,531 residente na naging biktima ng pagbaha.

Sinaksihan din natin ang turn-over ng isang ambulansya at dalawang multi-purpose vehicles. Sinilip natin ang ginagawang kalsada mula Lasang Proper hanggang Purok Fatima.

Pagkatapos, pinaunlakan natin ang ribbon cutting ng ginagawang kalsada na may drainage canal sa Bgy. Bunawan, gayundin ang itinatayong multi-purpose building doon.

Pinangunahan natin ang pagkakaloob ng tulong sa 2,868 residente ng nasabing barangay na binaha. Sinaksihan natin ang turn-over ng apat na multi-purpose vehicles, at binisita ang ginagawang drainage system sa Daniel M. Perez Central Elementary School.

Tuluy-tuloy naman ang aking opisina sa pag-alalay sa ating mga kababayang umaahon mula sa iba’t ibang krisis. Sa Davao Oriental, nagbigay tayo ng dagdag na suporta sa 69 residente ng Cateel at isa sa Boston na naging biktima ng nakaraang sunog, gayundin ang mga naapektuhan ng iba’t ibang kalamidad noon tulad ng 27 residente ng Mati City, at tatlo sa Tarragona. Isinulong naman natin na mabigyan sila ng National Housing Authority ng ayuda na pambili ng housing materials tulad ng pako, yero at iba pa upang maisaayos muli ang kanilang mga tirahan.

Mayroon ding 66 indigent na residente mula sa Balagtas, Bulacan ang natulungan natin kasama ang opisina ni Vice Mayor Ariel Valderrama.

Patuloy kong isusulong at susuportahan ang mga programa na para sa mga mahihirap tulad ng mga nabanggit ni Pangulong Bongbong Marcos sa kanyang SONA na prayoridad ng administrasyon ngayon. Tulungan natin ang ating gobyerno na maiahon ang ating mga kababayan mula sa hirap para walang Pilipinong magutom.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.