Proteksyunan ang kapakanan at karapatan ng mga uniformed personnel

ni Bong Go @Bisyo Magserbisyo | Jan. 29, 2025

Totoo na ang ating mga sundalo, pulis, at iba pang uniformed personnel ay laging nahaharap sa iba’t ibang uri ng panganib sa pagtupad ng kanilang mandato. Sinusunod nila ang kanilang sinumpaang tungkulin na panatilihin ang kapayapaan at kaligtasan ng ating bansa, at ipinatutupad ang batas nang may tapang at paninindigan. Sila rin ang ating sandalan at tagapagligtas sa panahon ng mga sakuna at krisis. 

Gayunpaman, may mga pagkakataon na nahaharap sila sa mga isyung legal sa kanilang matapat na pagtupad sa tungkulin. Sa mga sitwasyong tulad nito, dapat tiyakin ng ating pamahalaan na hindi maramdaman ng mga uniformed personnel na nag-iisa sila para ipagtanggol ang kanilang mga sarili. 

Kaya nitong Lunes, January 27 ay naaprubahan na sa Senado sa ikatlo at huling pagbasa ang Senate Bill No. 2814, o ang Free Legal Assistance for Military and Uniformed Personnel (MUP) Act, na tayo ang principal author. Bilang Vice Chairperson ng Committee on National Defense, pinasalamatan natin ang ating mga kapwa mambabatas sa kanilang suporta sa panukala. Kung tuluyang maging ganap na batas, layunin ng SBN 2814 na magkaloob ng free legal assistance sa ating MUPs na mahaharap sa problemang legal sa kanilang pagtupad sa tungkulin. 

Simula’t sapul at buhat pa noong panahon ni dating Pangulong Rodrigo Duterte, ay laging naririyan ang aking buong suporta sa ating mga sundalo, pulis, at iba pang uniformed personnel. Hindi natin sila pinababayaan. Naging instrumento tayo para madoble ang kanilang suweldo sa ilalim ng Duterte administration. Ang tanging hiling lang natin sa kanila, gawin nang tama ang kanilang mandato na naaayon sa batas, laging unahin ang interes ng bansa, at proteksyunan ang mga Pilipino lalo na ang mga mahihirap.

Samantala, hindi rin tayo humihinto sa pagseserbisyo sa mga kapwa natin Pilipino. Nasa Occidental Mindoro tayo noong January 25 at personal na sinaksihan ang inagurasyon ng itinayong Super Health Center sa Mamburao. Personal din nating pinangunahan ang pamamahagi ng tulong sa 178 nawalan ng tirahan sa Rizal, Calintaan at Sablayan, na sa ating inisyatiba ay nabigyan din ng tulong pinansyal ng pamahalaan sa ilalim ng programang ating isinulong para may pambili sila ng materyales na pampaayos ng kanilang tahanan. 

Bilang adopted son ng probinsya ng Occidental Mindoro at pati ng bayan ng Sablayan, dumalo rin tayo sa groundbreaking ng itatayong Sablayan Sports Complex — na napondohan sa ating kapasidad bilang Vice Chairperson ng Senate Committee on Finance at kaakibat ng ating inisyatiba na grassroot sports development bilang tayo ang Chairperson ng Senate Committee on Sports. Binisita rin natin ang Super Health Center sa Sablayan na ating isinulong bilang Chairperson ng Senate Committee on Health. 

Noong January 26, nakisaya naman tayo sa Dinagyang Festival sa Iloilo. Pareho kong dinaluhan ang mga selebrasyon na ginanap sa Freedom Grandstand at Iloilo Provincial Capitol. Nagbigay-pugay tayo sa mainit na pagtanggap nina Governor Arthur Defensor Jr., Iloilo City Mayor Jerry Treñas, Congresswoman Jam Baronda, at iba pang mga lokal na opisyal. 

Bukod sa Dinagyang Festival, binisita rin natin ang Malasakit Center na nasa Western Visayas Medical Center at nagpameryenda ng lugaw para sa mga pasyente, kanilang mga bantay at hospital staff. Namahagi rin tayo ng tulong tulad ng food packs sa mga healthcare worker at hospital staff doon.

Dumalo naman tayo noong January 27 sa ginanap na Philippine Sportswriters Association Awards Night sa Maynila sa paanyaya ni PSA President Nelson Beltran. Bilang Chairman ng Senate Committee on Sports at on Youth, tayo ang nag-present ng award kay Carlos Yulo na hinirang bilang Athlete of The Year, at ng Hall of Fame award kay Hidilyn Diaz. 

Sinaksihan naman ng aking opisina ang turnover ng itinayong Super Health Center sa San Luis, Agusan del Sur noong araw ding iyon. 

Kahapon, January 28, ang mga kababayan natin sa Pampanga ang aking binisita. Personal nating pinangunahan ang pamamahagi ng tulong para sa 1,200 mahihirap sa Bacolor, na sa ating pakikipagtuwang sa lokal na pamahalaan ay napagkalooban din ng tulong pinansyal. Pinangunahan din natin ang pagkakaloob ng tulong para sa 200 maliliit na negosyante sa lugar, na sa ating inisyatiba ay nakatanggap din ng livelihood kits mula sa DTI. 

Ipinadala ko naman ang aking Malasakit Team sa iba’t ibang komunidad para maghatid

ng tulong. Naalalayan natin ang mga naging biktima ng sunog sa apat na barangay sa Pasay City.

Tinulungan nating makabangon muli ang mga nawalan ng tirahan sa North Cotabato kabilang ang 11 sa Aleosan, pito sa Midsayap, at tatlo sa Libungan. Nabigyan din sila ng emergency housing allowance mula sa NHA na ating isinulong para may pambili sila ng materyales na pampaayos ng kanilang tirahan.

Namahagi rin tayo ng dagdag na tulong sa mga student scholar kabilang dito ang 325 sa Cagayan, 40 sa Benguet, at 55 pa sa ginanap na orientation sa Benguet State University. 

Nagbigay tayo ng tulong para sa 88 maliliit na negosyante sa Baras, Rizal katuwang si Mayor Wilfredo Robles, na sa ating inisyatiba ay nabigyan din ng tulong pangkabuhayan ng pamahalaan. 

Patuloy na magseserbisyo ang inyong Senator Kuya Bong Go sa abot ng aking makakaya. Bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pagpapahalaga sa pamilya, kultura at tradisyon ng mga Pilipino

ni Bong Go @Bisyo Magserbisyo | Jan. 25, 2025

Isa sa ipinagmamalaki natin bilang mga Pilipino ay ang matibay na pundasyon ng ating lipunan dahil sa pagpapahalaga natin sa konsepto ng pamilya. Napakatibay ng pagkakabuklod ng pamilya sa ating bansa, at ito ang pinakamahalagang impluwensya sa paghubog ng ating pagkatao at paghahanda sa atin para humarap sa mundo.

Bilang chairman ng Senate Committee on Youth, hangad ko ang lahat ng ikabubuti ng mga kabataan. Laging isinusulong ng inyong Senator Kuya Bong Go ang mga programa na gagabay sa ating mga kabataan mula sa murang edad. Bilang isang mambabatas, palagi kong binibigyan ng halaga ang paniniwala, relihiyon at kultura ng bawat Pilipino. Ito ay dapat irespeto sa bawat polisiya na isusulong. Hindi ako sang-ayon sa anumang panukala na makakasira sa halaga ng pamilya at salungat sa pananampalataya ng ating mga kababayan. 

Pagdating sa paghubog ng kabataan, bigyan dapat ng importansya ang papel ng pamilya. Huwag idikta kung ano ang ituturo sa mga bata. Tayong mga magulang ang pangunahing haligi sa pagsigurong nasa tamang landas ang ating mga anak. Ang tungkuling ito na ginagampanan ng mga magulang ay siyang dapat proteksyunan ng gobyerno kasama na rin ang pagpapahalaga sa relihiyon, mga tradisyon at kultura na humuhubog sa ating pagka-Pilipino. 

Kaya sa pagsisimula ng 2025 ay kabi-kabila ang mga kapistahan sa iba’t ibang bahagi ng ating bansa na ating pinuntahan at binigyan ng halaga bilang parte na ng ating kultura at tradisyon. Sinusuportahan natin ang mga pagdiriwang na ito dahil bilang isang probinsyano na halong Bisaya at Batangueño, naniniwala ako sa kahalagahan ng mga ganitong okasyon.

Ang mga kapistahan ay nagpapakita ng pagkakaisa at pagbabayanihan ng komunidad. Sumasalamin ito sa pagpapahalaga sa bawat pamilyang Pilipino at sa patuloy na pagpapayabong sa ating mayamang kultura at tradisyon na dapat maipagpatuloy ng mga susunod pang henerasyon. 

Nakiisa tayo noong January 23 sa ginanap na Bambanti Festival na isang malaking pagdiriwang tampok ang mga sining, kultura, kagandahan at pagkakaisa ng mga taga-Isabela. Isang Ilocano term ang Bambanti na ang ibig sabihin ay “scarecrows” na inilalagay sa mga taniman ng mais at palay para itaboy ang mga ibon at hayop na namiminsala ng mga pananim. Sumisimbolo ito sa kasipagan ng mga magsasaka ng Isabela, at ng kanilang determinasyon para sa ikagaganda ng kalagayan sa buhay ng kanilang pamilya at ikauunlad ng kanilang komunidad. 

Bukod sa pakikisaya sa Bambanti Festival sa Ilagan City, kinumusta rin natin ang ilang miyembro ng local media roon at naghatid ng serbisyo sa mga komunidad. Personal naman nating sinaksihan ang inagurasyon ng Super Health Center sa bayan ng Echague kasama si Mayor Kiko Dy, National Liga ng mga Barangay President Jessica Dy, at iba pa na nakatuwang natin sa ating pagsisikap na mailapit ang serbisyong medikal sa kanilang lugar, na bahagi ng ating inisyatiba bilang tayo ang chairperson ng Senate Committee on Health. Bumisita rin tayo sa Cauayan City at sinaksihan ang groundbreaking ng itatayong Super Health Center doon. 

Sinaksihan din natin ang groundbreaking ng itatayong Echague Freedom Park at library na isa tayo sa naging instrumento para ito mapondohan. Sumama rin tayo sa groundbreaking ng itatayong Southern Isabela Medical Center Cancer Center sa Echague pa rin na ating isinulong. Kaakibat ang provincial government, pinangunahan natin ang pamamahagi ng tulong sa 1,000 mahihirap na residente sa lugar — na nabigyan din ng tulong pinansyal.

Noong January 22 naman, dumalo tayo sa ginanap na Provincial Board Members League of the Philippines Eastern Visayas First Quarter Assembly sa Pasay City sa paanyaya ni Regional Chairperson Adel Hernandez.  

Kahapon, January 24, naging guest speaker naman tayo sa Lyceum of the Philippines

University - Batangas Awards Convocation sa Batangas City sa paanyaya ni LPU President Dr. Peter Laurel. 

Ipinadala ko naman ang aking Malasakit Team sa iba’t ibang komunidad upang maghatid ng tulong sa ating mga kababayang nangangailangan. 

Binalikan natin at muling binigyan ng tulong ang mga nawalan ng tirahan sanhi ng mga sakuna at kalamidad. Sa South Cotabato, napagkalooban ng tulong ang tatlong residente ng Sto. Niño, dalawa sa Norala, isa sa Lake Sebu, at 10 sa Surallah. Sa Cotabato, merong 16 sa Arakan, dalawa sa Makilala, at 59 sa Pigcawayan na natulungan. May 42 naman sa Jose Abad Santos, Davao Occidental at dalawa sa Koronadal City. Nakatanggap din ang mga ito ng emergency housing allowance mula sa NHA sa ilalim ng programang ating isinulong para may pambili ang mga benepisyaryo ng materyales sa pagpapaayos ng kanilang tirahan. 

Natulungan natin ang 639 market vendors sa Catarman, Northern Samar katuwang sina Mayor Francisco Rosales Jr., at Catarman Market Manager Dr. Arlan Ong — na sa ating pakikipagkapit-bisig sa DOLE ay nabigyan din ng pansamantalang trabaho. 

Nagbigay tulong naman tayo sa mga mahihirap na residente sa Cebu kabilang ang 500 sa Oslob, at 500 din sa Argao katuwang si BM Stanley Caminero. 

Nagbigay din tayo ng dagdag na suporta sa 45 CHED scholars sa Cebu Technological University - San Francisco Campus sa Cebu; at 52 sa UP Mindanao sa Davao City. 

Bukod naman sa ating patuloy na palugaw para sa mga pasyente, kanilang bantay at hospital staff sa mga ospital na may Malasakit Center, nagkaroon din tayo ng katulad na feeding initiative para sa mga naging biktima ng insidente ng sunog sa Brgy. 459, Sampaloc, Maynila na ating huling binisita noong Lunes. 

Palagi kong sinasabi, minsan lang tayong dadaan sa mundong ito. Kung anong kabutihan o tulong na puwede nating gawin sa ating kapwa ay gawin na natin ngayon dahil hindi na tayo babalik sa mundong ito. Bilang inyong Mr. Malasakit, bisyo ko ang magserbisyo dahil naniniwala ako na ang serbisyo sa tao ay serbisyo sa Diyos!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pasasalamat para sa pagkakataong magserbisyo sa kapwa

ni Bong Go @Bisyo Magserbisyo | Jan. 22, 2025

Ang buhay at kalusugan ay mga biyaya na dapat nating ipagpasalamat palagi sa Panginoon. 

Isang masaya at makulay na okasyon para ipahayag natin ang papuri sa Diyos ay ang mga kapistahan na idinadaos sa iba’t ibang panig ng bansa na ako ay nabigyan ng oportunidad na makisama at makisaya nitong mga nakaraang araw. 

Tulad na lamang ng Sinulog Festival sa Cebu, bilang isa ring Bisaya, nakiisa tayo nitong January 19 sa mga kababayan nating Cebuano sa ipinagmamalaki nilang pagdiriwang na talaga namang dinarayo ng mga turista mula sa loob at labas ng bansa. Ang pagdiriwang na ito ay nagbibigay-pugay sa Sto. Niño bilang pagpapahalaga sa ating Diyos. 

Bukod sa kasiyahan ng Sinulog, personal din nating dinaluhan ang inagurasyon ng itinayong Super Health Center sa Moalboal, Cebu gayundin ang Malasakit Center na nasa Vicente Sotto Memorial Medical Center sa Cebu City. Nagpalugaw tayo roon at namahagi ng tulong sa mga healthcare worker. Lubos kong ipinagpapasalamat sa Panginoon ang pagkakataong makapagsilbi sa kapwa ko Pilipino. Viva Pit Señor Sto. Niño! 

Bago ito ay dumalo tayo sa selebrasyon ng Ati-Atihan Festival sa Kalibo, Aklan sa paanyaya nina Mayor Juris Sucro at Gov. Joen Miraflores. Nakiisa tayo sa ating mga kababayan sa street dancing bilang pasasalamat sa Poong Sto. Niño sa mga biyayang ibinibigay Niya. 

Bukod sa pakikisaya, inuna rin natin ang serbisyo. Binisita natin ang Malasakit Center na nasa Dr. Rafael Tumbokon Memorial Hospital kung saan namahagi tayo ng tulong sa mga pasyente at healthcare workers, at nagsagawa ng feeding initiative. Nag-inspeksyon din tayo ng itinayong Super Health Center sa Kalibo.

Nais kong iparating ang pagsaludo sa ating mga uniformed personnel para sa mapayapang mga pagdiriwang nitong mga nakaraang araw. Hindi biro ang magbantay sa isang okasyon na dinadaluhan ng milyun-milyong tao. Napakahalaga ng papel ng ating mga pulis at sundalo sa pagpapanatili ng kapayapaan at katahimikan sa ating bansa. Kaya naman noong Lunes, January 20, bilang Vice Chairperson ng Senate Committee on Public Order, sinuportahan natin ang isang resolusyon na nagbibigay-pugay sa ating uniformed personnel. 

Co-sponsor tayo ng Senate Resolution No. 1270, na kinikilala ang kabayanihan nina Police Senior Master Sergeant Ryan Mariano at Correction Officer 1 Melvin Cabanal Magnaye ng Bureau of Corrections, kasama si PCol. Kimberly Molitas, dahil sa kanilang pambihirang katapangan at dedikasyon sa pagprotekta sa ating mga kababayan. Ang ating kasamahang si Senator Ronald dela Rosa ang principal sponsor ng naturang resolusyon. 

Si Mariano ay nasugatan noong December 31, 2024 habang naka-duty sa isang simbahan sa Zamboanga City matapos makipaglaban sa mga armadong kalalakihan. Nasaksihan iyon ni Magnaye, na agad namang ipinosisyon ang kanyang sasakyan para maprotektahan ang mga tao sa paligid. Nagpapasalamat tayo sa kanilang serbisyo at sakripisyo sa ating mga kababayan. 

Sa ilalim ng administrasyon ni dating Pangulong Rodrigo Duterte, minabuti nating unahin ang kapakanan ng ating mga uniformed personnel at law enforcement officers at itinaas ang kanilang sahod sa tulong ng mga ahensya at mga nasa Kongreso noon.

Ang serbisyong ibinibigay nila sa bansa ay hindi matutumbasan. Kaya dapat lamang na suportahan sila sa lahat ng aspeto — mula sa kanilang sahod, pasilidad, at maging sa mga programa at batas na tumutulong sa kanilang propesyon. 

Ang inyong lingkod ang principal author at co-sponsor ng RA11589, o ang Bureau of Fire Protection Modernization Act of 2021. Co-author naman tayo ng Republic Act No. 11549, na nagbawas sa height requirements ng mga gustong maging pulis. Isinumite rin natin ang Senate Bill No. 422, na kung maisabatas ay naglalayon na magkaloob ng free legal assistance sa mga sundalo at pulis na may makakaharap na isyung legal sa kanilang opisyal na pagtupad sa tungkulin.

Sa lahat ng ito, iisa lang naman lagi ang hiling natin sa ating mga pulis at sundalo — gawin lagi ang tama, at unahin ang kapakanan ng mga Pilipino at interes ng bansang ating pinaglilingkuran. Simula’t sapul ay prayoridad ko na ang kapayapaan at kaayusan ng ating bansa — na pundasyon para sa ating pagsulong at pag-unlad. 

Patuloy naman ang inyong Senator Kuya Bong Go sa paghahatid ng serbisyo sa mga nangangailangang Pilipino. Inalam natin ang kalayagan at nagbigay tayo ng tulong noong January 18 sa 327 residenteng naging biktima ng insidente ng sunog sa Brgy. 458, habang 67 naman ang binigyan natin ng tulong sa Brgy. 459, Sampaloc, Manila. 

Ang 216 residente ng Bacoor City, Cavite na naging biktima ng sunog naman ang ating personal na binisita at pinagkalooban ng tulong noong January 20. 

Sinaksihan naman ng aking opisina ang groundbreaking ceremony ng Super Health Center sa Oroquieta City, Misamis Occidental. 

Ipinadala ko rin ang aking Malasakit Team para maghatid ng tulong sa ating mga kababayan. Naalalayan natin ang isang residente ng Lupon, Davao Oriental na nasunugan. Nabigyan ng dagdag na tulong ang 371 scholars ng Cebu Technological University - Danao City Campus, Cebu. 

Natulungan din ang 854 nawalan ng hanapbuhay sa Candijay, Guindulman, Mabini, Valencia, Garcia Hernandez, at Duero, mga bayan sa Bohol na nabigyan din ng pansamantalang trabaho. 

Tuluy-tuloy din ang ating palugaw sa mga ospital na may Malasakit Center para sa mga pasyente, kanilang bantay at hospital staff. 

Tandaan natin na minsan lang tayong dadaan sa mundong ito, kaya kung ano mang kabutihan ang puwede nating gawin sa ating kapwa, gawin na natin ngayon dahil hinding-hindi na tayo babalik sa mundong ito. 

Bilang inyong Mr. Malasakit, patuloy akong magseserbisyo sa inyo dahil bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.