Bigyan ng oportunidad ang mga kabataan sa larangan ng sports

ni Bong Go @Bisyo Magserbisyo | Sep. 28, 2024

Ang pagdaraos ng sports competitions ay isang paraan hindi lang para maipakita ng ating mga kabataan ang kanilang husay sa palakasan, pinatatatag din nito ang karakter, disiplina, at pagsusumikap ng bawat kalahok tungo sa pagkakaisa ng komunidad.

Epektibong paraan din ito para mailayo ang ating mga kabataan sa masasamang bisyo tulad ng ilegal na droga at magabayan tungo sa tamang landas para sa mas magandang kinabukasan. Gaya ng madalas kong payo, “Get into sports, stay away from drugs to keep us healthy and fit.”

Naniniwala ang inyong Senator Kuya Bong Go na malayo ang mararating ng isang atleta kung sa grassroots level pa lang ay nabibigyan na siya ng sapat na suporta. Bilang chairperson ng Senate Committee on Sports at on Youth at katuwang ang Philippine Sports Commission ay nagkakaloob tayo ng suporta sa mga proyekto, inisyatiba, at mga kumpetisyon na kaugnay sa sports lalo na sa kanayunan.

Ito rin ang dahilan kung bakit natin isinulong bilang may-akda at principal sponsor ang panukalang Philippine National Games (PNG) Act na na-ratify na sa Senado noong Lunes, September 23 ang bicameral report nito. Kung maaprubahan ng Pangulo ay magiging ganap na itong batas.

Layon ng PNG na ma-institutionalize ang isang national sports program para sa pagtuklas ng mga bagong talento at mabigyan ng oportunidad ang mga nais maging atleta nasaan man sila sa bansa. Hindi lang basta kumpetisyon ang PNG, isa rin itong platform para mahasa ang susunod na henerasyon ng ating sports heroes.

Tayo rin ang may akda at co-sponsor ng Republic Act No. 11470 na nagtatag sa National Academy of Sports (NAS) sa New Clark City, Capas, Tarlac. Nagkakaloob ito sa student-athletes ng secondary education na may kaakibat na specialized sports training. Mapagsasabay nila ang pag-aaral at pagsasanay nang walang masasakripisyo.

Bilang sponsor para sa budget ng sports sa Senado, naging instrumento tayo para maipaayos ang mahahalagang sports facilities gaya ng Rizal Memorial Coliseum sa Maynila at ng Philsports Arena sa Pasig City, paglalagay ng sapat na budget para sa pagsuporta sa mga atletang nagrerepresenta sa bansa sa mga pandaigdigang kumpetisyon tulad ng Olympics, at pagpapalakas ng mga programang pampalakasan sa grassroots.  

Bilang sports enthusiast at atleta rin, hangarin natin na matuklasan at masuportahan ang panibagong henerasyon ng bagong bayani sa larangan ng sports na susunod sa yapak nina Manny Pacquiao, Hidilyn Diaz, Carlos Yulo, at iba pa. Minsan lang tayong dadaan sa mundong ito kaya anumang tulong na puwede nating maibigay sa kapwa, o anumang karangalan ang maaari nating madala sa bansa, ay gawin na natin ngayon!

Samantala, bumisita tayo sa Cavite noong September 25 para pangunahan ang inagurasyon ng bagong Super Health Center sa Dasmariñas City. Pinangunahan din natin ang pamamahagi sa 1,667 mahihirap ng tulong pinansyal na ating isinulong kasama si Mayor Jenny Barzaga.

Nasa Lobo, Batangas tayo kahapon, September 27, at personal na pinangunahan ang pagkakaloob ng tulong katuwang si Mayor Lota Manalo para sa 1,000 apektadong hog raisers, na sa ating inisyatiba ay nabigyan din ng tulong pinansyal ng lokal na pamahalaan. Nag-inspeksyon din tayo sa ginagawang bypass road na ating sinuportahan bilang vice chairperson ng Senate Committee on Finance. Binisita naman ng aking staff ang itinatayong multi-purpose building covered court na napondohan din sa ating inisyatiba. Bilang adopted son ng CALABARZON at kapwa Batangueño, isang karangalan din sa akin na maideklarang adopted son ng bayan ng Lobo.

Hindi naman tumitigil ang aking Malasakit Team sa pagtulong sa ating mga kababayan tulad ng 22 pamilyang nabiktima ng sunog sa Quezon City.

Sumuporta rin tayo sa 999 mahihirap sa Caloocan City; 1,000 transport workers sa Quezon City; 1,250 sa San Vicente, Camarines Norte kaagapay si Mayor Jhoana Ong; 300 sa Dapitan City, Zamboanga del Norte kasama si Mayor Bullet Jalosjos; at 800 sa Puerto Princesa City, Palawan kaagapay si Coun. Elgin Damasco.

Nagsulong naman tayo ng tulong pangkabuhayan para sa 26 na naapektuhan ng kalamidad sa Veruela, Agusan del Sur. Naging benepisyaryo rin ng programang pangkabuhayan ang 30 na maliliit na negosyante sa Caloocan City na ating tinulungan katuwang si Coun. King Echiverri.

Bukod sa tulong mula sa aking tanggapan, isinulong din natin ang emergency housing assistance mula NHA para sa pagpapaayos ng mga tahanan ng mga biktima ng sakuna. Sa Cotabato, naging benepisyaryo ang lima sa Arakan; 20 sa Midsayap; isa sa Magpet; at dalawa sa Libungan. May siyam naman sa Alabel, Sarangani; 52 sa Valenzuela City; anim sa Lutayan, Sultan Kudarat; at 34 sa General Santos City.

Tuloy rin tayo sa pagtulong sa mga nawalan ng hanapbuhay at sa ating pakikipagkapit-bisig sa DOLE ay nabigyan ng pansamantalang trabaho ang 500 sa Dauin, Negros Oriental kasama si Mayor Galicano Truita; 110 sa Tampakan, South Cotabato katuwang si BM Ryan Escobillo; 497 sa Medina, Misamis Oriental kaagapay si Mayor Donato Chan; 88 sa Santa Ignacia, Tarlac kasama si LNB President Alexander Manzano; at 53 sa Marilao, Bulacan katuwang si VM Jun Bob dela Cruz.

Sinuportahan din natin ang mga sports fest sa Sultan Kudarat State University sa Tacurong City mula Sept. 27-29; at sa Mindanao State University sa Maguindanao del Norte na ginanap noong Sept. 23-25. Nagkaloob din tayo ng wheelchair kaagapay ang PSC at si Coun. Girlie Balaba para sa 10 benepisyaryo sa Cagayan de Oro City. Panghuli, nakiisa ang aking opisina sa Elderly Senior Citizen’s Day sa Naval, Biliran, kasama si Mayor Gretchen Espina.

Sa abot ng aking makakaya ay tutulong ako lalo na sa mga kababayan nating mahihirap para mailapit sa kanila ang serbisyo ng gobyerno. Alay ko sa Pilipino ang aking kasipagan sa pagtatrabaho. Bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Magna Carta of Filipino Seafarers, ganap nang batas!

ni Bong Go @Bisyo Magserbisyo | Sep. 25, 2024

Masaya kong ibinabalita na batas na ang “Magna Carta of Filipino Seafarers” o ang Republic Act No. 12021. 

Isa tayo sa may akda at co-sponsor ng bagong batas na ito na naglalayong maprotektahan ang mga karapatan at kapakanan ng mga marinong Pilipino, at tiyakin na nabibigyan sila ng patas na pagtrato nasa dagat man o nakadaong. Matagal na nating isinusulong at ipinaglalaban ito, hindi lang para matiyak ang kanilang kaligtasan, kundi para maiangat rin ang antas ng pagmamarino sa bansa.

Ang ating seafarers ang bumubuo sa pinakamalaking bilang ng marino sa buong mundo. Katunayan, 25 percent o isa sa bawat apat na marino sa buong daigdig ay Pilipino! Kaya naman ang Pilipinas ang itinuturing na single biggest nationality bloc sa maritime industry. Malaki ang kontribusyon ng Filipino seafarers hindi lang sa ating ekonomiya kundi pati na rin sa pandaigdigang komersyo.

Kabilang sa mga itinatakda ng Magna Carta ang ilang mahahalagang karapatan ng ating mga marino katulad ng makatarungang terms and conditions sa kanilang trabaho, karapatan na magkaroon ng self-organization, collective bargaining, access sa abot-kayang edukasyon at pagsasanay, at proteksyon laban sa diskriminasyon.

Layunin ng mga probisyong ito na matiyak na ang mga marinong Pilipino ay hindi lang nakatatanggap ng karampatang sahod kundi nabibigyan din ng mga oportunidad para sa kanilang professional growth at napangangalagaan laban sa mga banta sa trabaho.

Itinatakda rin ng batas ang karapatan ng mga marinong Pilipino sa ligtas na paglalakbay, pangangalaga sa kanilang kalusugan, access sa komunikasyon at legal na tulong lalo na kapag may aksidente sa karagatan. Alinsunod din sa batas, makatatanggap sila ng nararapat na sertipikasyon ng kanilang employment records, na isang mahalagang dokumento para sa kanilang pag-angat sa puwesto. Bukod naman sa pangangalaga sa kanilang mga karapatan, binibigyang-diin din sa batas ang mga responsibilidad ng mga marino gaya ng pagsunod nila sa nakasaad sa kanilang employment contracts, at tuparin nang maayos ang kanilang tungkulin.

Bilang chairperson ng Senate Committee on Health, hangad ko ang sapat at agarang tulong medikal para sa ating mga marino at iba pang OFWs. Itinataya ng Filipino seafarers ang kanilang buhay at isinasakripisyo ang oras kasama ang pamilya. Umaasa tayo na sa pagsasabatas ng Magna Carta, hindi lang tataas ang pamantayan para sa kapakanan ng ating mga marino, magiging modelo rin ang Pilipinas pagdating sa maritime labor rights.

Binibigyan natin ng importansya ang ating OFWs na itinuturing na mga bagong bayani ng bansa. Noong 2021 ay naisabatas din ang RA 11641, o ang Department of Migrant Workers Act, na isa tayo sa mga may akda at co-sponsor. Layunin natin na mapalakas, mapabilis at maging sentralisado ang pagbibigay ng proteksyon at serbisyo sa ating OFWs.

Sa ating kapasidad bilang vice chair ng Senate Committee on Migrant Workers ay nagkakaloob din tayo sa kanila ng maitutulong sa abot ng ating makakaya. Patuloy nating sinisikap na maipaabot ang serbisyo at malasakit ng gobyerno sa mga Pilipino nasaan man sila sa mundo.

Samantala, naging panauhing tagapagsalita tayo noong September 21 sa ginanap na Dr. Carl Balita Review Center Licensure Examination for Teachers (LET) Final Coaching para sa 5,000 aspiring teachers. Bilang chair ng Senate Youth Committee, ipinarating natin ang ating suporta sa kabataan na future leaders at pag-asa ng ating bayan.

Dumalo rin tayo bilang guest speaker sa 26th anniversary at national congress ng COOP-NATCCO, sa imbitasyon nina Cong. Felimon Espares at President Alex Raquepo. Opisyal tayong nakipag-partner sa kanilang grupo upang maipaglaban at isulong ang ating mga adbokasiya para sa kapakanan ng mga kooperatiba.

Noong September 23 ay sinaksihan naman ng aking opisina ang turnover ceremony ng isang ambulansya na ating isinulong para sa Koronadal City, South Cotabato kasama si VM Erlinda Pabi Araquil.

Kahapon, September 24, personal nating pinangunahan ang pamamahagi ng personal na tulong para sa higit 2,000 residente ng Brgy. 105, Tondo, Manila na naging biktima ng malawakang sunog. Dumalo rin tayo sa ginanap na Liga ng mga Barangay National Congress Cluster 4 na nagtipon sa Pasay City.

Tuluy-tuloy naman ang aking Malasakit Team sa pagtulong sa mga nangangailangan. Muli tayong sumuporta sa mga nawalan ng tirahan kabilang ang anim na biktima sa Matalam at apat sa Makilala, North Cotabato; at tatlo sa Lebak, Sultan Kudarat. Sa South Cotabato ay nabigyan din ang dalawa sa Sto. Niño; apat sa Surallah; at tatlo sa Koronadal City. Sa ating inisyatiba ay nabigyan din sila ng emergency housing allowance ng NHA para may pambili sila ng materyales na pampaayos ng tahanan.

Namahagi rin tayo ng tulong sa mga nawalan ng hanapbuhay, na nabigyan din ng DOLE ng pansamantalang trabaho gaya ng 183 sa Cebu City katuwang si Cong. Marissa Magsino; at 44 sa Polomolok, South Cotabato kasama si Kap. Rogen Ermitaño. Sa Batangas, may 134 na natulungan sa Lemery kaagapay sina Kap. Edward Catibog at VM Geraldine Ornales; 134 sa Taal kasama sina Mayor Pong Mercado at VM Michael Villano; at 50 sa Cuenca katuwang si VM Aurea Pantas.

Inayudahan din ng aking tanggapan ang mga kapos ang kinikita gaya ng 100 sa San Jorge, Samar katuwang si Councilor Rita Rama; at 900 sa Bongabon, Nueva Ecija kaagapay si Cong. GP Padiernos. May tulong din tayong ipinamahagi para sa 1,250 mahihirap sa San Vicente, Camarines Norte kasama si Mayor Jhoana Ong. Nakatanggap din ang mga ito ng tulong pinansyal mula sa gobyerno.

Natulungan naman natin ang 1,000 mahihirap na residente sa Bago City, Negros Occidental kaagapay si Mayor Niko Yulo. Sa ating pakikipagtulungan sa lokal na pamahalaan ay nabigyan din sila ng tulong pinansyal. Nagbigay din tayo ng dagdag na suporta sa 249 scholars ng Batangas State University.

Bilang inyong Mr. Malasakit, patuloy akong magseserbisyo sa inyong lahat sa abot ng aking makakaya dahil bisyo ko ang magserbisyo, at naniniwala ako na ang serbisyo sa tao ay serbisyo sa Diyos. Pangalagaan natin ang buhay ng bawat Pilipino nasaan man sila sa mundo.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Pangalagaan ang kaligtasan, kalusugan, at dignidad ng mga biktima ng kalamidad

ni Bong Go @Bisyo Magserbisyo | Sep. 21, 2024

Sa tuwing may mga kalamidad, gaya ng bagyo, baha, lindol, pagputok ng bulkan, o kaya’y sakuna, gaya ng sunog, doble ang hirap na pinagdaraanan ng ating mga kababayan. Bukod sa hamon ng muling pagtatayo ng nasira nilang mga bahay, maraming mahihirap na evacuees ang walang choice kundi ang sumilong muna sa evacuation centers.

Sa aking pag-iikot sa bansa upang ilapit ang serbisyo sa mga nangangailangan, saksi ako sa malungkot na sitwasyon sa ibaba sanhi ng kakulangan ng angkop na imprastraktura sa ngayon. Kalimitang nagsisilbing evacuation centers ang eskwelahan, basketball court, o kaya’y multi-purpose hall ng komunidad. Karaniwan ay walang maayos na comfort room, walang gamot, walang supply ng malinis na tubig at pagkain, walang privacy, siksikan, kaya marami ang nagkakasakit. Mahirap na ngang maging biktima ng sakuna, mas napapahirapan pa sila.

Kapag nataon naman na may klase, naaantala ang pag-aaral ng mga estudyante dahil ginagamit ang mga silid-aralan. Apektado rin ang ibang mga gusali na pansamantalang nagiging tirahan ng evacuees.

Oras na para solusyunan ito! Titiyakin natin, hindi lang ang kaligtasan at kalusugan ng evacuees, kundi pati na ang kanilang dignidad upang mas mabilis silang makabangon.

Kaya naman isinulong natin sa Senado ang Senate Bill No. 2451, o ang Ligtas Pinoy Centers Bill. Base ito sa Mandatory Evacuation Centers Bill na ating nai-file noon. Layunin ng panukalang ito na sa bawat munisipalidad at siyudad ay magkakaroon ng dedicated at maayos na evacuation center. Ang inyong Senator Kuya Bong Go ang principal author at co-sponsor nito, na naipasa na sa pangalawang pagbasa noong Miyerkules.

Dahil ang Pilipinas ay laging dinadaanan ng natural disasters, kailangang maging mas handa tayo. Isinusulong din natin ang SBN 188, na naglalayong itatag ang Department of Disaster Resilience (DDR) upang may nakatutok bago pa man dumating ang kalamidad, habang nananalasa ito, sa rescue and recovery period, hanggang sa restoration of normalcy para matiyak na mas maayos ang koordinasyon ng mga sangay ng gobyerno.

Hindi natin mapipigilan ang mga kalamidad pero nasa kamay natin kung paano tutugon sa mga ito at kung paano matitiyak na ligtas ang bawat Pilipino. May kalamidad man o wala, hindi tayo tumitigil sa paglalapit ng serbisyo sa ating mga kababayan.

Noong September 19, bumisita tayo sa Camarines Sur at personal na pinangunahan ang pamamahagi ng tulong para sa 1,000 nawalan ng hanapbuhay sa Naga City, na sa ating inisyatiba ay nabigyan din ng pansamantalang trabaho. Sinaksihan natin ang pagdaraos ng Peñafrancia Voyadores Festival and Street Dance Competition sa paanyaya ni Mayor Nelson Legacion, at nagtungo tayo sa Naga Cathedral.

Nasa Lapu-Lapu City tayo kahapon, September 20, at nagkaloob ng tulong sa mga miyembro ng 23 kooperatiba sa ilalim ng isinulong nating programang Malasakit sa Kooperatiba katuwang ang Cooperative Development Authority. Dumiretso tayo sa bayan ng San Fernando, Cebu at nagbigay ng tulong para sa 656 na BHWs, nutrition scholars at fire victims katuwang si Mayor Mytha Canoy. Sa ating pagsisikap ay nakatanggap din ang mga benepisyaryo ng tulong pinansyal mula sa lokal na pamahalaan. Sinaksihan din natin ang groundbreaking ng itatayong Super Health Center sa lugar na ating isinulong.

Sa araw ding iyon ay nagkaloob ng tulong ang aking opisina kasama ang ating kaibigang si Philip Salvador para sa 500 residente ng Cebu City na nawalan ng hanapbuhay, katuwang si Acting VM Dondon Hontiveros.

Mula Cebu ay bumiyahe tayo papuntang Davao City at muling inayudahan ang 382 residenteng naging biktima ng sunog. Nakatanggap din sila ng emergency assistance mula sa NHA sa ilalim ng programang ating isinulong para may pambili sila ng materyales sa pagpapatayong muli ng kanilang tahanan. Dumalo rin tayo sa PDP National Assembly na pinamunuan ng aming party chairman na si dating Pangulong Rodrigo Duterte.  

Ipinadala ko naman ang aking Malasakit Team sa iba’t ibang komunidad para maghatid ng tulong sa ating mga kababayang nangangailangan tulad ng 17 residente ng Tagoloan, Misamis Oriental na naging biktima ng sunog.

Binalikan at muling inayudahan natin ang mga nawalan ng tahanan sa Davao del Norte kabilang ang tatlo sa Panabo City; anim sa New Corella; at 16 sa Island Garden City of Samal. May 51 naman sa Brgy. Culiat, Quezon City; at 66 sa Sta. Mesa, Manila. Dagdag pa riyan ang 189 residente sa Bacoor City, Cavite na ang tahanan ay nasira ng kalamidad. Sa ating inisyatiba ay nakatanggap din ang mga ito ng tulong pinansyal upang maipaayos ang kanilang mga bahay.

Nabigyan natin ng tulong ang 340 residente ng Caloocan City na kapos ang kita kasama ang sectoral leaders ng kanilang komunidad.

Tuluy-tuloy din ang ating pagsuporta sa mga nawalan ng hanapbuhay, na sa ating inisyatiba ay nabigyan ng pansamantalang trabaho ng gobyerno. Sa Davao del Sur, naging benepisyaryo ang 651 residente ng Digos City at 563 sa Padada katuwang si VG Riafe Cagas-Fernandez, mga board members, mayors, vice mayors at konsehal ng kanilang mga lugar.

Sa Batangas, nasuportahan natin ang 50 manggagawa sa Mataas na Kahoy kaagapay si VM Jay Ilagan; at 50 sa Nasugbu kasama si BM Armie Bausas. Sa Iloilo, 54 sa Miag-ao, katuwang si VM Doc Mac Napulan; at 88 sa Santa Barbara kaagapay si Coun. Ramon Sullano.

Mga manggagawa rin ang natulungan natin kabilang ang 306 sa Villanueva, Misamis Oriental katuwang si VM Jeric Emano, mga konsehal at mga kapitan ng barangay; 98 sa Pagudpud, Ilocos Norte kaagapay si Mayor Raffy Benemerito; 243 sa Calauag, Quezon kasama ang mga konsehal na sina Marlon Noscal, Melvin Labasan, Marina Umali, Mildred Villareal at ang kanilang 31 kapitan ng mga barangay; at 69 sa Brgy. Caniogan, Pasig City katuwang sina TODA President Enrico Tolentino at Andy Cheng. Dagdag pa rito ang mga natulungan nating 50 katao sa General Trias City, Cavite; 50 sa Binangonan, Rizal at 155 kababaihan sa Tantangan, South Cotabato.

Lubos akong nagpapasalamat sa ating mga kababayan sa patuloy na tiwala at suporta. Ito ay inspirasyon para lalo kong ipagpatuloy ang pagseserbisyo sa inyo. Hindi ko sasayangin ang oportunidad na ibinibigay ninyo sa akin, at sa abot ng aking makakaya ay patuloy kong ipaglalaban ang kapakanan ng bawat Pilipino at magseserbisyo sa aking kapwa lalo na sa mga mahihirap at pinakanangangailangan. Bisyo ko na ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.