Ilapit ang serbisyong medikal sa mga Pilipino

ni Bong Go @Bisyo Magserbisyo | Nov. 23, 2024

Isa sa pinakainiiwasan nating lahat ang magkasakit. Mula nang lumaganap ang pandemya, marami ang natuto na gawing prayoridad ang kanilang kalusugan dahil sa realisasyong katumbas nito ay buhay. Napakahirap magkasakit lalo na kung mahirap at walang mapagkukunan ng pampagamot.

Sa panahon naman ng mga sakuna at kalamidad, tumataas ang insidente ng pagkakasakit lalo na sa mga lugar na binabaha. Naririyan ang panganib na hatid ng dengue, leptospirosis at iba pa. Kaya naman prayoridad ko bilang chairperson ng Senate Committee on Health na mapangalagaan ang kalusugan ng mga Pilipino sa pamamagitan ng mas malakas na healthcare system at serbisyong medikal na malapit sa bawat Pilipino.

Masaya kong ibinabahagi sa inyo na may apat na bagong batas na nalikha para mapaganda ang healthcare facilities at serbisyong medikal sa ilang lalawigan sa buong bansa. Tayo ang principal sponsor ng mga bagong batas na ito kabilang ang Republic Act No. 12068, na nag-upgrade sa Bataan General Hospital and Medical Center sa Balanga City, Bataan para maging multi-specialty hospital. Tinaasan ang bed capacity nito na mula 500 ay naging 1,000.

Sa pamamagitan naman ng RA 12069 ay nai-convert ang Dr. Catalino Gallego Nava Provincial Hospital sa Jordan, Guimaras para maging Level II hospital. Binago ang pangalan nito at tatawaging Dr. Catalino Gallego Nava Medical Center.

Naitatag sa ilalim ng RA 12070 ang isang ospital sa Negros Occidental, ang Victorias City General Hospital.

Isang Level III general hospital naman sa Bay, Laguna na magiging Laguna Regional Hospital ang naitatag sa bisa ng RA 12071.

Inaasahan natin na sa pamamagitan ng mga bagong batas na ito ay mapupunan ang mga kakulangan sa ating healthcare services dahil mas dumami na ang hospital beds, mayroon nang specialized treatments, at nailapit na ang mga pasilidad sa mga kanayunan at maging sa mga lugar na malaki ang populasyon.  

Hindi dapat maging hadlang ang kahirapan para makakuha ng maayos na serbisyong pangkalusugan. Sa mga bagong batas na ito, titiyakin nating mas maraming Pilipino ang maaasahan ang tulong ng gobyerno sa oras ng kanilang pangangailangan. Layunin nating mas mapaabot ang serbisyong medikal sa bawat sulok ng bansa. Lagi ngang sinasabi ng inyong Senator Kuya Bong Go na huwag na nating pahirapan pa ang mga kapwa natin Pilipino na naghihirap na.

Sa kasalukuyan ay naging instrumento na tayo sa pagpasa ng 78 batas na ang layunin ay mapaayos pa ang mga ospital sa buong Pilipinas. Patuloy nating palalakasin ang ating healthcare system para walang Pilipinong maiiwan.

Kaugnay pa rin ng ating adhikain na mapangalagaan ang kalusugan ng ating mga kababayan, noong Huwebes, November 21 ay personal nating sinaksihan ang inagurasyon ng itinayong Super Health Center sa Malvar, Batangas kasama ang mga kapwa ko Batangueño at lingkod-bayan na sina Vice Governor Mark Leviste, Dennis Collantes na kumatawan kay Rep. Maitet Collantes, Mayor Tita Reyes, Vice Mayor Alberto Lat at mga konsehal. Pinangunahan din natin ang pagtu-turnover ng mga bagong ambulansya para sa mga bayan ng Malvar at para na rin sa bayan ng Sta. Teresita na ating isinulong. Matapos ito ay dumiretso tayo sa Batangas City at nagbigay ng tulong sa 2,500 barangay volunteers sa pakikipagtuwang kay Governor Dodo Mandanas.

Tuluy-tuloy din ang ating paglalapit ng serbisyo sa ating mga kababayan. Ipinaabot natin ang ating mensahe ng pakikiisa sa Philippine Councilors League Region 7 4th Quarter Regional Assembly and Seminar na ginanap sa Mandaue City, Cebu noong November 20.

Personal din nating pinangunahan noong November 21 ang pamamahagi ng tulong para sa 1,000 PWDs sa Parañaque City na kapos ang kita. Sa ating inisyatiba kasama sina Cong. Edwin Olivarez, Mayor Eric Olivarez, at Vice Mayor Joan Villafuerte ay nabigyan din sila ng financial support ng gobyerno.  

Nasa Davao City tayo kahapon, November 22, at dumalo sa ginanap na Philippine Institute of Certified Public Accountants (PICPA) 79th Annual Convention sa paanyaya ni Convention Chair Napoleon Rocero.  

Sinaksihan naman ng aking opisina ang groundbreaking ng itatayong Super Health Center sa Malitbog, Southern Leyte.

Nagtungo sa iba’t ibang komunidad ang aking Malasakit Team para maalalayan ang iba pa nating mga kababayang nangangailangan tulad ng mga biktima ng sunog kabilang ang 25 sa Surigao City; at 34 sa Banaybanay, Davao Oriental.

Natulungan din ang mahihirap na residente gaya ng 175 sa Calumpit, Bulacan katuwang si Coun. Maureen Torres; 1,000 sa Anilao, Iloilo kaagapay si Mayor Lee Ann Debuque, at 350 pa sa Banate, Iloilo kasama ang mga konsehal ng bayan.

Pinagaan natin ang pasanin ng mga nawalan ng hanapbuhay dahil nabigyan sila ng DOLE ng pansamantalang trabaho tulad ng 310 sa Kalawit, Zamboanga del Norte katuwang si Mayor Salvador Antojado, Jr.; 179 sa Datu Odin Sinsuat, Maguindanao del Norte kaagapay si Mayor Lester Sinsuat; at 582 sa Medina, Misamis Oriental katuwang si Vice Mayor Paolo Magallanes, mga konsehal, at mga barangay captain.

Bukod sa kanilang scholarship grant na ating isinulong, nagkaloob tayo ng dagdag na tulong para sa 37 scholars ng San Fernando City, La Union; 225 sa Pangasinan; at 387 Laoag City.

Natulungan natin ang 60 maliliit na negosyante sa Palanan, Isabela na nakatanggap pa ng tulong pangkabuhayan mula sa DTI.

Sa Tarlac City ay naalalayan natin ang 68 na naging biktima ng kalamidad, na sa ating inisyatiba ay nabigyan ng DHSUD ng tulong pampaayos ng kanilang bahay.

Naabutan din natin ng tulong ang 135 mahihirap sa Tuguegarao City katuwang si Mayor Maila Ting.

Ilapit natin ang serbisyo ng gobyerno, lalo na pagdating sa kalusugan, sa mga nangangailangan nito. Bilang inyong Mr. Malasakit, gagawin ko ang aking makakaya para makatulong dahil bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Kabataan, suportahan at ihanda sa magiging papel sa lipunan

ni Bong Go @Bisyo Magserbisyo | Nov. 20, 2024

Ang ating pambansang bayani at isa sa aking mga idolo na si Dr. Jose P. Rizal ang nagsabing “Ang kabataan ang pag-asa ng bayan.” 

Kaya bilang chairman ng Senate Committee on Youth, prayoridad ko ang edukasyon ng ating mga kabataan na pundasyon ng kanilang mga pangarap. Ito ang susi sa kanilang magandang kinabukasan.

Ito rin ang mensahe ko nang maghatid ako ng tulong sa mga scholars sa University of Perpetual Help System Dalta-Calamba noong November 15: “Mag-aral nang mabuti dahil kayo ang susunod na lider ng bansa.” Nanawagan din ako ng pagkakaisa at pakikipagtulungan upang maisulong ang mga inisyatiba para sa kabataan.

Para maipagpatuloy ng mga kabataan — lalo na ng mga mahihirap — ang kanilang pag-aaral, sinusuportahan natin ang scholarship programs ng gobyerno. Tumutugon ito sa misyon natin na mapagkalooban sila ng inclusive and quality education.

Sa ating adhikain na mas maraming kabataan at estudyante ang matulungan, tayo rin ang isa sa mga may-akda at co-sponsor ng Republic Act No. 11510, na nag-institutionalize sa Alternative Learning System (ALS) para mas mapaganda ang paghahatid ng basic education sa mga pinakamahihirap na estudyante at higit na nangangailangan. Nariyan din ang RA 11984, o ang “No Permit, No Exam Prohibition Act”, na nagbabawal sa mga educational institutions na tanggihan ang mga estudyanteng may pagkakautang na makakuha ng pagsusulit.

Isinulong din natin ang RA 12006, o ang “Free College Entrance Examinations Act”, kung saan hindi na kailangang singilin ng entrance exam fees ng mga pribadong kolehiyo at unibersidad ang mga kuwalipikadong estudyanteng nangunguna sa kanilang klase. Para naman sa mga guro sa pampublikong paaralan, nariyan ang RA 11997, o ang “Kabalikat sa Pagtuturo Act,” na nagtaas sa kanilang teaching supply allowances.

Isa rin ako sa co-author at co-sponsor ng Senate Bill No. 1360 na kung maisabatas ay naglalayon na mapalawak ang sakop ng subsidiya para sa tertiary education sa pamamagitan ng pag-amyenda sa RA 10931, o ang Universal Access to Quality Tertiary Education Act, na naisabatas noong panahon ni dating Pangulong Rodrigo Duterte.

Co-author at co-sponsor din tayo ng SBN 1864, o ang Student Loan Payment Moratorium During Disasters and Emergencies Act, para naman mabigyan ng palugit ang mga estudyanteng may pagkakautang pero hindi makabayad dahil tinamaan ng kalamidad at iba pang sakuna kung maisabatas.

Isinusulong din natin sa Senado ang pagpasa ng SBN 1786, na nag-aatas sa mga pampublikong Higher Education Institutions (HEIs) na magkaroon ng Mental Health Offices sa kanilang campus. Kaugnay ito ng ating adhikain bilang chairperson ng Senate Committee on Health na ang mental health ay dapat bigyan ng sapat na atensyon tulad ng inilalaan natin sa physical health.

At bilang chairperson ng Senate Committee on Sports, payo ko sa mga kabataan ay: “Get into sports and stay away from illegal drugs to keep us healthy and fit!” Matagumpay nating naisulong ang National Academy of Sports sa New Clark City, Capas, Tarlac bilang isa sa mga may-akda at co-sponsor ng RA 11470. Sa NAS, mapagsasabay ng student-athlete ang pag-aaral at pag-eensayo ng walang masasakripisyo.

Principal sponsor at author naman tayo ng SBN 2514, o ang panukalang Philippine National Games (PNG) Act, na naglalayong ma-institutionalize ang isang national sports program para makatuklas ng mga kabataang atleta mula sa mga kanayunan kung maisabatas.

Bilang vice chair ng Senate Finance Committee, isinusulong ko rin ngayon ang dagdag na pondo para sa youth programs upang matulungan ang mga kabataan na magtagumpay sa larangang kanilang pinili at mabigyan ng oportunidad na makapagserbisyo rin sa kapwa.

Samantala, bumisita tayo sa Cagayan de Oro City at pinangunahan ang feeding initiative para sa mga pasyente at staff ng Northern Mindanao Medical Center noong November 16. Kasabay nito ang palugaw at pagbibigay ng tulong ng aking Malasakit Team sa mga pasyente sa JR Borja General Hospital.

Binalikan natin at binigyan ng tulong ang 116 residente na naapektuhan ng kalamidad sa Brgy. Puntod, Cagayan de Oro City noong November 16. Nakatanggap din sila ng emergency housing assistance mula sa NHA na ating isinulong para may pambili sila ng materyales na pampaayos ng kanilang tahanan. Sinaksihan din natin ang groundbreaking ng itatayong Super Health Center sa Brgy. Kauswagan sa CDO pa rin.  

Sa araw ding iyon, dumalo ang aking opisina sa ginaganap na sportsfest sa MSU sa General Santos City. Ang pagdaraos ng naturang palaro ay nasuportahan natin kasama ang Philippine Sports Commission.

Sinaksihan din ng aking opisina noong November 16 ang sportsfest sa Pamantasan ng Lungsod ng Muntinlupa na sinuportahan namin ng PSC. Dumalo rin tayo sa ginanap na SK Basketball and Volleyball League sa Basista, Pangasinan na proyekto ni SK Chair Irra Parazo.

Sa imbitasyon ni Mayor Bernie Palencia, sinaksihan ng aking opisina noong November 18 ang ginanap na South Cotabato Provincial Athletic Association Meet sa Polomolok, South Cotabato.

Kahapon, November 19, personal nating pinangunahan ang pagbibigay ng tulong sa 203 maliliit na negosyante sa Tondo, Maynila na sa ating inisyatiba ay nakatanggap din ng livelihood kits mula sa DTI. Pinangunahan din ng ating tanggapan ang pamamahagi ng tulong para sa 800 mahihirap sa Tanjay City, Negros Oriental na sa ating inisyatiba ay nabigyan ng tulong pinansyal katuwang si Mayor Jose Orlino.

Naging panauhin din tayo sa ginanap na Gawad Pilipino Lingkod Bayan Awards sa paanyaya ni President Dr. Danilo Mangahas. Nagpapasalamat tayo sa ipinagkaloob nila sa atin na parangal bilang isa sa mga Outstanding Senator. With or without award, patuloy lang akong magseserbisyo sa aking mga kapwa Pilipino.

Hindi rin tumitigil ang aking Malasakit Team sa pagbibigay tulong sa ating mga kababayan. Naalalayan natin ang 27 pamilyang nabiktima ng sunog sa Brgy. Tumaga, Zamboanga City.

Sa ating pakikipagkapit-bisig sa DOLE, nabigyan ng tulong at pansamantalang trabaho ang 110 displaced workers sa Isulan, Sultan Kudarat katuwang natin si Mayor Marites Pallasigue.

Nag-abot din tayo ng tulong sa ginanap na Patient Convention: Peace Tayo sa NKTI katuwang si Executive Director Dr. Rose Marie Liquette.

Bilang inyong Mr. Malasakit, patuloy akong magseserbisyo sa mga kapwa ko Pilipino sa abot ng aking makakaya dahil bisyo ko ang magserbisyo, at ako ay naniniwala na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.

Suportahan ang kabataan sa larangan ng palakasan

ni Bong Go @Bisyo Magserbisyo | Nov. 16, 2024

Bilang isang sports enthusiast, atleta, at chairman ng Senate Committees on Sports at on Youth, buung-buo ang suporta ng inyong Senator Kuya Bong Go sa sports development ng ating bansa, at siyempre sa mga atletang kabataan lalo na sa grassroots level.

Unti-unti na nating nararamdaman ang bunga ng ating mga sports advocacy lalo pa’t nasungkit natin ang ating kauna-unahang Olympic double gold medals sa pamamagitan ni gymnast Carlos Yulo na kampeon sa 2024 Paris Olympics. Noon namang 2020 Tokyo Olympics ay nakuha natin ang first-ever gold medal dahil kay Hidilyn Diaz.

Bukod sa angking galing na ipinamalas ng ating mga atleta, bunga rin ang mga ito ng pakikipagtulungan ng iba’t ibang sektor upang isulong ang sapat na suporta sa ating mga pambansang pambato.

Kaya naman sa ginanap na deliberasyon para sa 2025 budget ng Philippine Sports Commission at ng Games and Amusements Board noong November 12, muli nating ipinaglaban na madagdagan ang kanilang pondo. Bilang main sponsor ng sports budget, binigyang-diin natin na mahalaga ang papel ng dalawang ahensyang ito sa pag-unlad ng ating sports, pagsuporta sa ating mga atleta, sa regulasyon ng mga palaro at sa pagpapalawak ng grassroots sports development.

Para sa 2025, ang panukalang budget ng PSC ay nasa PHP1.34 billion. Ipinaliwanag natin na ang malaking bahagi nito ay gagamitin sa rehabilitasyon at upgrading ng sports facilities, pagsuporta sa ating national athletes at kanilang coaching staff, at sa pagdaraos ng mga palaro sa iba’t ibang sulok ng bansa gaya ng Philippine National Games na ating isinusulong na ma-institutionalize bilang principal sponsor at author ng panukalang kamakailan ay naipasa na sa Senado.

Ngayong 2024 ay isinulong natin ang pagpapaayos sa Rizal Memorial Sports Complex at ng PhilSports Arena. Ito ay bilang tugon sa panawagan ng ating mga Olympians na ang suporta sa kanila ng gobyerno ay hindi lang dapat sa aspetong pinansyal. Importante rin ang kanilang mga equipment, pasilidad, pagkain, moral at mental support sa pangkalahatan.

Tiniyak naman natin na ang PSC ay magkakaroon ng sapat na pondo para sa pagtuklas at pagsasanay ng mga kabataang atletang may potensyal na sumabak sa international competitions at makapag-uwi rin ng karangalan para sa ating bansa.

Sa talakayan para sa pondo ng GAB, napag-usapan ang isyu ng game-fixing partikular sa basketball na malaki ang epekto sa integridad ng laro. Umapela tayo sa GAB na imbestigahan ang mga ito upang matigil na ang mga ganitong ilegal na aktibidad na nakasisira sa imahe ng Philippine sports.

Napakaimportante para sa akin na mapalakas ang kakayahan ng ating mga atleta at matulungan silang maipakita sa buong mundo ang husay ng manlalarong Pilipino. Bukod sa natututo sila ng disiplina at pag-aalaga ng katawan, mahalagang sandata rin ang sports para mailayo ang ating mga kabataan sa masasamang bisyo. Gaya ng madalas kong ipayo sa kanila, “Get into sports, stay away from drugs to keep us healthy and fit.”

Hindi rin tayo tumitigil sa paglalapit ng serbisyo sa ating mga kababayan. Nasa Tarlac tayo noong November 14 at pinangunahan ang pagbibigay ng tulong sa 1,667 mahihirap na residente, na sa ating pakikipagtuwang kay Gov. Susan Yap ay nabigyan din ng tulong pinansyal. Matapos ito ay binisita natin ang Malasakit Center na nasa Tarlac Provincial Hospital. Nagpalugaw rin tayo sa mga pasyente at staff ng ospital at nagbigay ng dagdag na suporta.

Sa naturang araw din, dumalo ang aking tanggapan sa ginaganap na sportsfest sa Mindanao State University-General Santos City. Ang pagdaraos ng palaro ay ating isinulong kasama ang PSC.

Ang mga kababayan naman natin sa Pampanga ang ating binisita kahapon, November 15, at pinangunahan ang pamamahagi ng tulong para sa 1,600 residente ng Angeles City. Sa ating inisyatiba at sa pakikipagtuwang kay Mayor Carmelo Lazatin, nabigyan din sila ng financial support.

Dumiretso rin tayo sa Rafael Lazatin Memorial Medical Center upang mamahagi ng meryenda sa mga pasyente, kanilang kasama at mga healthcare worker.

Ipinadala ko naman ang aking Malasakit Team sa iba’t ibang komunidad para maalalayan ang ating mga kababayan tulad ng mga biktima ng sunog kabilang ang 42 sa Parañaque City; 134 sa Pasay City; 28 sa Cagayan de Oro City; 14 sa Ormoc City, Leyte; at 91 sa Tondo, Manila City.

Napagkalooban ng tulong ang mga mahihirap na residente at naging benepisyaryo ang 156 sa Padre Garcia, Batangas katuwang si BM Melvin Vidal; at 300 sa Carcar City, Cebu kaagapay si Kap. Schubert Veloso. Sa ating inisyatiba ay nakatanggap din sila ng tulong pinansyal mula sa gobyerno.

Sa ating pakikipagkapit-bisig sa DOLE at katuwang si Coun. Marlene Young, nabigyan ang 59 displaced workers sa Iligan City ng pansamantalang trabaho bukod pa ang naipagkaloob ng aking opisina.

Bukod sa scholarship grant na ating isinulong katuwang ang CHED, nag-abot tayo ng dagdag na suporta sa mga estudyanteng scholars kabilang ang 212 sa Malolos City, Bulacan; at 95 sa Calamba City, Laguna.

Binalikan natin at muling tinulungan ang 17 nawalan ng tirahan sa Gingoog City na nakatanggap din ng emergency housing assistance mula sa NHA na ating isinulong para may pambili sila ng materyales sa pagpapaayos ng kanilang nasirang tahanan.

Minsan lang tayong dadaan sa mundong ito. Anumang tulong ang puwede nating ibigay sa kapwa o anumang karangalan ang maaari nating maialay sa bansa ay gawin na natin ngayon dahil hindi na tayo babalik sa mundong ito. Bilang inyong Mr. Malasakit, patuloy akong susuporta sa ating mga atleta, at magseserbisyo sa lahat sa abot ng aking makakaya. Bisyo ko ang magserbisyo, at naniniwala ako na ang serbisyo sa tao ay serbisyo sa Diyos.

---

Kung mayroon kayong nais idulog o ipaabot sa inyong abang lingkod, maaari kayong sumulat sa BISYO MAGSERBISYO ni Bong Go, BULGAR Bldg., 538 Quezon Ave., Quezon City o mag-email sa bisyo.magserbisyoo@gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran.