SIKAT NA AKTRES, GAME NANG HIWALAYAN ANG BABAERONG AKTOR 'PAG UMULIT PA

ni Reggee Bonoan @Sheet Matters | August 24, 2023

BLIND ITEM:

Trulili kaya na binigyan ng ultimatum ng sikat na aktres ang boyfriend niyang aktor din na kapag umulit pa sa ginawa nitong pambababae ay totally iiwanan na niya ito?

Ilang beses na kasing nahuli ng sikat na aktres ang boyfriend niyang aktor na nambababae at ilang beses na rin itong humingi ng tawad sa kanya at nangakong hindi na uulitin, pero naulit na naman.

Kaya sa nth time ay binigyan na ng choice ng sikat na aktres ang boyfriend na aktor na kapag umulit pa sa huling pagkakataon ay wala nang usapang mangyayari dahil ‘babu na’ talaga.

Ayon sa aming source na nakausap ang sikat na aktres, sobrang na-depressed siya sa ginawa ng boyfriend niyang aktor dahil hindi niya inakala na magagawa ito sa kanya kaya panay ang iyak nito noon.

Pero ngayon ay matigas na ang sikat na aktres at kaya na niyang mawala sa buhay niya ang boyfriend na aktor dahil kung paulit-ulit naman daw itong hindi tapat sa kanya, 'di bale na lang.

“Nagsawa na, actually hinahayaan na nga ni (sikat na aktres) si (boyfriend na aktor) kapag nagpapaalam na aalis o may lakad kasama ang friends. Dati kasi, dami pang tanong ni (aktres), ngayon, ‘okay’ na lang ang sagot,” kuwento ng aming source.

Ang dami raw nagpaparamdam sa sikat na aktres, pero hindi nito pinapansin kasi nga loyal siya sa boyfriend niyang aktor.

Si sikat na aktres ay maganda at magaling umarte kaya posibleng hindi na niya kawalan ang boyfriend niyang aktor kapag naghiwalay sila dahil ilang taon na rin naman siyang nagtiis sa pambababae nito.

“Hindi talaga niya kawalan kahit pa sabihing bagay sila,” diin ng aming source.

Abangan ang update ng dalawang ito.

'Di nagmana sa tatay na astig… MALE CELEB NA UTOL NG SIKAT NA AKTRES, GIRL NA GIRL KUMILOS

ni Janiz Navida @ShowbizSpecial | August 21, 2023

BLIND ITEM:

Ewan kung aware ang isang male celeb na kapatid ng sikat na young actress na inoobserbahan siya ng ilang bisita sa isang showbiz gathering dahil sa kanyang malambot na kilos at mga hand gesture na galawan ng mga kabilang sa LGBT community.

To be fair sa male celeb, hindi naman siya ganu'n ka-loud sa pagiging pa-girl at discreet pa rin naman. 'Yun nga lang, sadyang lumalabas pa rin ang kanyang 'natural self' at mababasa nga sa galaw ng kanyang mga kamay at pagkilos ang pagiging 'mahinhin'.

Matangkad ang male celeb kaya talaga namang agaw-pansin siya sa naturang showbiz gathering.

Ang tanong tuloy ng ilang Marites na nag-oobserba sa mga kilos ng male celeb, alam kaya ng kanyang astig na tatay na aktor na may kalambutan ang kanyang unico hijo at tanggap kaya niya ito?

Well, wala namang problema kung 'yun ang sexual orientation ng male celeb. Hindi mo naman ito masisisi dahil puro girlash ang mga ate niya at baka lumaki kasi siya na ang mga ito ang kasa-kasama kaya naimpluwensiyahan siya.

Ang mahalaga naman, hindi nagdadala ng kahihiyan sa pamilya ang male celeb at mukhang smart pa nga ito tulad din ng isang dating child actor na tuluyan nang nagladlad at very much happy ang love life ngayon.

Mala-gangster... BYUTING AKTRES, PINALAYAS SA DRESSING ROOM NG MADIR NG SIKAT NA AKTRES

ni Janiz Navida @ShowbizSpecial | August 13, 2023

BLIND ITEM:

Nalungkot kami sa kuwentong nakarating sa amin na mukhang umakyat na sa ulo ng mga nakapaligid sa young actress ang kasikatang tinatamasa niya ngayon.

Marami nang pinagbidahang serye ang aktres at in fairness, sikat na sikat na talaga siya dahil may napatunayan na hindi lang sa pag-arte kundi maging sa pagiging product endorser, kaya nga mabentang-mabenta rin siya sa mga commercials.

Ganito ang eksena. One time, nasa dressing room ang isang byuting aktres na kasabayan ng sikat na young actress. Pareho silang guests sa isang TV show kaya pinagsama sila sa dressing room.

Pagpasok ng madir ng sikat na young actress, hindi raw nito nagustuhan na may ibang kasama sa dressing room ang kanyang anak kaya nag-dialogue ito ng "Akala ko ba, solo lang ng anak ko ang dressing room na 'to?"

Nagulat ang byuting aktres sa narinig at napaiyak na lang sabay labas ng dressing room.

Walang nagawa ang byuting aktres dahil hindi niya kasama that time ang kanyang manager na sana ay nakapagtanggol sa kanya sa pagpaparinig ng madir ng sikat na young actress.

Napatanong tuloy kami sa source namin kung alam kaya ng sikat na aktres ang ginawa ng kanyang madir na may pagka-gangster pala ang asal, at kibit-balikat na lang ang isinagot ng aming kausap.

Hay, sana lang 'wag masira ang aktres kung ganito pala ang asal ng nanay, ha?!