Dyuskoday talaga!!! AKTOR-TV HOST...

PROBLEMADO SA BIYENAN NA SUPER-PAKIALAMERA PATI SA PAGPAPALAKI NILA SA MGA ANAK NG MISIS NA AKTRES

ni Erlinda Rapadas - @Teka Nga! | July 6, 2020

BLIND ITEM:

Sa mga unang taon pa lamang ng pagsasama ng isang sikat na showbiz couple ay problemado na ang actor-tv host sa kanyang mother-in-law na tipong nakikialam sa pamamalakad ng kanilang pamilya. Pati na ang pagdidisiplina sa kanilang mga anak at sa pagpili ng kasambahay ay umeeksena rin ang biyenan niyang babae.

Pero sa point of view naman ng aktres na misis ng actor-tv host ay walang masama kung nagbibigay ng parenting advice at nagmamalasakit ang kanyang mother dear.

Ganunpaman, may pagkakataon na kontra ang aktor sa pakikialam ng kanyang mother-in-law. Pareho naman daw na nasa tamang edad na sila ng kanyang misis at may sarili silang diskarte at house rules para sa mga anak nila. Gusto naman nilang gampanan ang kanilang obligasyon as parents.

Naging problema rin ng misis ng aktor ang pag-eksena ng kanyang mommy sa kanilang pamilya. Minsan ay pinagtatalunan na nilang mag-asawa ang sitwasyon.

Hindi naman magawang diretsahin ng aktor-tv host ang kanyang mother-in-law. Ang premyadong aktres ang naiipit ngayon sa pagitan ng kanyang mister at mommy dearest na may pagka-sensitive pa naman.

Sino ang kanyang kakampihan? Mabait naman at responsible husband ang aktor-tv host. Marespeto ito sa kanyang mother-in-law. Ayaw lang niya na may nakikialam sa pagdidisiplina niya sa kanilang mga anak.

Nawala na ang tinik sa lalamunan niya…

AKTOR, TAMAD NA, BABAERO PA, MISIS NA AKTRES, NASAGAD KAYA NAKIPAGHIWALAY

ni Erlinda Rapadas - @Teka Nga! | July 5, 2020

BLIND ITEM:

Sa halip na habulin at panghinayangan ang paghihiwalay ng aktor at ng aktres na ilang taon ding nagsama at inakala ng lahat na mala-fairytale ang kanilang love story, para sa mga kaibigan ng aktres-producer ay blessing in disguise pa ang nangyari.

Pabor ang mga partidos ng aktres-producer sa kanyang desisyon na hiwalayan ang aktor kahit na may mga anak na sila. Nakikita kasi ng mga kamag-anak ng aktres na batugan at walang ambisyon sa buhay ang aktor.

Binigyan na sila ng negosyo ng partidos ng babae upang may pagkaabalahan, tutal naman ay walang show at projects ang aktor, aba't ang aktres-producer pa rin ang kumikilos at nag-aasikaso ng lahat, pati na ang pagtataguyod sa kanilang mga anak.

Hindi nagbago ang ugali ng aktor kahit marami na silang anak. Tanghali na itong gumigising at laging tinatamad kumilos. Pero dahil sa mahal na mahal ng aktres-producer ang mister, tiniis na lang niya ang lahat at nagpakamartir alang-alang sa kanilang mga anak.

Ngunit may hangganan din pala ang pagtitiis. Hindi na kinaya ng aktres-producer na tamad na nga ang aktor ay nagagawa pang mambabae. Du'n nasagad ang kanyang pasensiya kaya nagdesisyon na makipaghiwalay na sa aktor na ama ng kanyang mga anak.

Tutal naman, kayang-kaya niyang buhayin ang mga anak kahit hindi magbigay ng ayuda ang kanyang ex-husband. Ngayon, deadma ang aktres-producer kahit na todo-displey pa sa social media ang aktor sa bago niyang dyowa!

GUWAPONG AKTOR NA HUMIRIT NG SUPER-TAAS NA TF SA HOME NETWORK...

'DI PINAGBIGYAN, NAG-OBER DA BAKOD, NALAOS NAMAN

ni Erlinda Rapadas - @Teka Nga! | July 2, 2020

BLIND ITEM:

Maraming fans ng dating sikat at guwapong matinee idol ang labis na nanghihinayang ngayon dahil unti-unti na siyang nawawala sa sirkulasyon. Wala na siyang tv shows at pelikula. Kung kailan pa naman niya kailangang kumita para itaguyod ang kanyang mga mahal sa buhay, saka pa naindulto ang kanyang career.

Nagsara na ang network na kanyang nilipatan. Wala na siyang aasahan pang trabaho sa pinanggalingang network. Wala rin siyang fallback o ibang trabahong puwedeng gawin kahit dalhin pa niya abroad ang kanyang pamilya.

Hindi naman kasi siya nakapagtapos ng anumang kurso. May naipundar man siyang bahay mula sa kanyang kinita sa pag-aartista at dati ay may sosyo siya sa negosyo ng ilang kaibigan sa showbiz, pero dahil gumagastos din araw-araw at walang pinagkakakitaan, unti-unti na ring nababawasan ang kanyang ipon.

May ilang nagmamalasakit na netizens ang nagsabi na maling-mali ang naging desisyon ng guwapong aktor at ng kanyang manager nang iwan niya ang network kung saan siya nagsimula. Markado at magaganda ang mga projects na ibinigay sa kanya noon. Bida siya palagi at malaki ang kanyang talent fee.

Nang mag-expire na ang kontrata ng guwapong aktor sa dating network, nag-demand ng sobrang taas na talent fee ang kanyang manager, bukod pa sa ibang demands at kondisyones. Pero hindi na kinagat at pinatulan ng network. Ni hindi na siya hinabol at pinapirma ng bagong kontrata. Kaya, no choice kundi lumipat na siya ng network kung saan marami siyang kakumpitensiya.