Nasa bahay lang kasama ang mister na character actor at mga anak…

TV HOST-DANCER, NAHAWA SA BISITANG ASYMPTOMATIC, COVID POSITIVE NA RIN

ni Reggee Bonoan - @Sheet Matters | August 7, 2020

BLIND ITEM:

Nag-aalala ang character actor na partner ng kilalang TV host/dancer dahil positibo siya sa Covid-19.

Nasa iisang bahay lang sila kasama ang mga anak nila kaya isa rin ito sa mga inaalala ng character actor dahil nga bata pa ang mga anak nila, pero nakahiwalay naman ng kuwarto ang TV host-dancer.

Mabuti na lang daw nu’ng nakaramdam ng sama ng pakiramdam ang TV host/dancer ay kaagad siyang nagpa-swab test at positibo nga pero asymptomatic naman kaya puwedeng mag-self-quarantine sa bahay nila.

Bukod-tanging ang character actor ang nakakapasok sa kuwarto ng partner pero naka-complete PPE siya with face mask at face shield.

Ang naiisip lang ng mag-partner ay may dumating silang bisita na posibleng asymptomatic din.

Habang isinusulat namin ang balitang ito ay umiigi na ang pakiramdam ng TV host/dancer.

'Di nila naturuan ang puso ng anak…

PARENTS NG YOUNG ACTRESS, TODO-TUTOL NOON SA LASENGGO NIYANG BF, NATANGGAP DIN, PABOR NA 'DI SA EX NA CHICKBOY NAKASAL

ni Erlinda Rapadas - @Teka Nga! | August 3, 2020

BLIND ITEM:

"Mother knows best."

Ito ang dapat daw tandaan kapag pumipili ng lalaking makakasama sa buhay. At tama naman na gabayan ng mga magulang ang kanilang mga anak na babae upang masiguradong hindi magkakamali sa pagpili.

Naalala tuloy namin ang love story ng petite na young actress na na-in love sa matalinong politician na mas may-edad sa kanya. Tinutulan ng parents ni young actress ang relasyon nila. Marami kasi silang nababalitaang nega sa pulitiko, chickboy daw ito at lasenggo.

Pero wala silang nagawa dahil hindi magawang hiwalayan ng young actress ang BF na pulitiko. Sinuway ni young actress ang utos ng kanyang parents at nagpakasal pa rin sa sikat at matalinong pulitiko.

Naging mabait at responsableng asawa naman ang pulitiko. Napatunayan ng partidos ni young actress na hindi totoo ang mga paninira sa kanyang mister. Nakita nilang masaya ang anak at mahal na mahal ng lalaking pinakasalan.

Ngayon, tanggap na tanggap na ng mga kamag-anak ni young actress ang politician na dati ay kanilang inaayawan. Napunta naman kasi sa mas maganda at stable na kalagayan ang petite na aktres.

Naging good influence ang pulitiko sa dating spoiled brat na young actress. Mabuti na lang daw at hindi ang chickboy na dramatic actor ang nakatuluyan nito.

Ayaw mapahiya, eh, di soon, lulutang din naman…

AKTRES, NAG-INGAY NANG LOKOHIN NG MISTER, LUMAMBOT NA NANG MAHIMASMASAN AT TOGETHER AGAIN, SECRET LANG

ni Erlinda Rapadas - @Teka Nga! | August 1, 2020

Blind item:

Matapos mag-ingay noon sa natuklasang pagtataksil ng kanyang mister, bigla na lang nanahimik at ayaw nang pag-usapan pa ng magaling na aktres ang status ng relasyon nila ngayon ng kanyang estranged husband.

Balitang hindi na itinuloy ng aktres ang pagsasampa ng kaso sa mister alang-alang sa kanilang mga anak. At mukhang napakiusapan din daw ito ng kanyang mga in-laws na mabait naman sa kanya.

Ang guessing game ngayon ay kung nagkabalikan na ang aktres at ang kanyang mister pero inililihim lang nila sa publiko. Good catch kasi ang mister ng magaling na aktres dahil bukod sa guwapo ay maganda ang trabaho, super rich pa ang pamilya.

Besides, mukhang lumambot na rin ang puso ng aktres at binigyan ng second chance na magbago ang kanyang husband.

Sabi naman ng ilang nakapaligid sa aktres, press release lang ang lagi nitong sinasabi sa media na hindi niya inaalisan ng karapatan sa kanilang mga anak ang kanyang asawa, kaya nakikita pa ring kasama ng mga anak niya.

Pero may ilang malapit sa aktres ang nagsasabing mukhang may balikan ngang nangyari. Hindi kasi nag-e-entertain ng mga suitors ang aktres. Tiyak na mahihirapan na siyang makatagpo ng lalaking taglay ang mga katangian ng kanyang mister.