Understand na understand mo ba?

PLAYBOY NA AKTOR, GUSTONG KINAIINGGITAN KAYA GINAGAWANG TROPHY ANG MGA GF, PINAGSASABAY-SABAY

Between "maybe" o "yes"… yes talaga!

BABAERONG AKTOR, 'DI PA RIN HAPI SA GF NGAYON, SUMA-SIDELINE PA SA IBA

ni Erlinda Rapadas - @Teka Nga! | February 23, 2021

Blind item:

Likas na ang pagiging babaero at mapaglaro sa pag-ibig ng isang tisoy na hunk actor. Lahat ng kinukursunada niyang female stars sa kanyang network ay nakukuha niya at nagiging GF.

Mula sa isang young actress na ipinareha sa kanya noong nag-uumpisa pa lang siya hanggang sa mga mas sikat at mas magagandang nakasama niya sa kanyang home studio ay napaibig niya.

Ang husay-husay naman kasing magpa-cute at dumiskarte ng guwapo at tisoy na hunk actor. Hindi nararamdaman ng kanyang mga nagiging GF na ginagamit lang sila at ginagawang trophy.

Gusto niyang siya ay kainggitan ng kapwa niya aktor dahil nakukuha niya ang magagandang aktres sa kanilang network.

Paano namang hindi mai-in love ang mga babae sa hunk actor, eh, idinadaan muna kasi niya sa mga regalo at pa-flowers ang kursunadang actress? Pa-impress ang kanyang drama dahil bongga ang setup sa mga unang araw ng kanyang pakikipag-date. Mistula siyang isang prince charming at knight in shining armor ang kanyang galawan habang nanunuyo at hindi pa nakukuha ang tiwala ng female star na gusto niyang jowain.

Pero kapag hulog na hulog na ang loob ng babae sa kanya, doon na makikita ang tunay na kulay ng aktor, tulad na lang ng ginawa niya sa kanyang dating ka-love team na sobrang na-in love sa kanya. Todo-regalo ang young actress ng mga mamahaling gamit at halos sunod-sunuran na lang sa hunk actor. Pero, iniwan pa rin dahil may bagong nakursunadahang aktres na kasama rin nila sa network.

Hindi rin naman nagtagal ang babaerong aktor at bago niyang love interest. May nabola na naman siyang isang maganda at magaling umarteng aktres. Muli, napaikot na naman ng chickboy na hunk actor ang bagong GF. Walang kamalay-malay ang magandang aktres na may milagrong ginagawa ang hunk actor nang makapareha sa pelikula ang isang kontrobersiyal na young actress.

Alam na halos sa buong showbiz ang lihim ng tisoy na hunk actor, pero walang kamalay-malay ang maganda at magaling na aktres na naagaw na sa kanya ang playboy niyang BF.

Ngayon, may bulong-bulungan naman na patuloy pa rin sa paghahanap ng mabibiktima ang babaerong hunk actor. Suma-sideline pa rin siya kapag may mga babaeng nagpaparamdam sa kanya.

Ingat lang dapat ang hunk actor dahil 'pag nahuli siya ng kontrobersiyal na young actress, tiyak na tapos na ang kanilang relasyon. Hindi siya panghihinayangang bitawan ng young actress.

Kinikimkim na lang…

HUNK ACTOR, GINAGAMIT LANG ANG GF NA AKTRES PARA SA CAREER PERO WALANG BALAK PAKASALAN

ni Erlinda Rapadas - @Teka Nga! | February 13, 2021

Blind item:

Marami ang labis na nagtataka kung bakit hanggang ngayon ay hindi pa rin maamoy ng isang sikat na young actress na ang BF niyang aktor ay hindi naman seryoso sa kanya at nakikisakay lang sa gusto ng kanilang mga fans.

Nakakatulong kasi ang sikat na young actress sa kanyang career dahil napag-uusapan siya at nagkakaroon ng publicities. Matagal nang bulung-bulungan sa sirkulo ng showbiz ang pagdududa sa machong image ng aktor. May ilang netizens ang nagsasabing ginagawang cover-up at front lang ng aktor ang nobyang sikat na young actress upang itago ang kanyang lihim.

In denial naman ang young actress at ayaw paniwalaan ang sinasabi ng mga tao sa tunay na pagkatao ng kanyang actor boyfriend. Paniwalang-paniwala ang sikat na aktres na mahal siya ng BF niya.

Marami naman ang nagpupustahan at nagsasabing hinding-hindi mangyayari ang pinapangarap ng young actress na aalukin siya ng kasal ng BF niyang hunk actor. Walang-wala sa plano ng aktor ang magpakasal dahil mawawala na ang kanyang kalayaan at matatali siya sa isang relasyon na hindi niya ginusto.

Kaya 'pag nagpo-post ang young actress ng mga photos nila ng BF niyang actor sa social media, napapansin ng marami na hindi masaya ang aura ng hunk actor. Obvious na napipilitan lang siya talaga.

Super-mega grabeng magtampo…

SIKAT NA AKTRES, FEELING PINAGLARUAN NG GRUPO NG ENTERTAINMENT PRESS, 2 DEKADA NA, 'DI PA RIN NAPAPATAWAD

ni Erlinda Rapadas - @Teka Nga! | February 10, 2021

Blind item:

Malalim at matagal magtanim ng tampo ang isang sikat na sikat na aktres. Matandain ito kapag may taong nakakasamaan ng loob. Tulad ng ginagawa niyang pandededma sa isang grupo ng manunulat sa showbiz.

Matagal na panahon nang hindi niya pinapansin ang mga ito. Mahigit dalawang dekada nang nangyari ang isang insidente kung saan sumama ang kanyang loob.

Isang malaking event 'yun sa showbiz at sa isang production number ng ilang press ay na-spoof siya at inakala ng sikat na aktres na siya ay pinaglalaruan at iniinsulto.

Simula noon, hindi na niya gaanong pinapansin ang grupo ng entertainment press at kahit inimbita siya na dumalo sa mga big events ay diretsahan itong tumatanggi. At kahit Pasko, hindi rin ito nakakaalalang magpadala ng regalo.

Anyway, naiintindihan naman ng mga dinededma niyang entertainment writers ang sentimyento ng sikat na aktres. Sadyang matagal siyang makalimot at hindi basta-basta nagpapatawad. Kahit pa siguro ilang beses maglitanya ang media ng mga naitulong ng mga ito sa kanyang career para siya sumikat noon ay hindi na maaalis ang kanyang tampo. Paninindigan na niya ang kanyang ginawa kahit pa siguro hanggang sa mawala na ang ningning ng kanyang showbiz career.