Magsasaka, todas sa tuklaw ng ahas

News @Balitang Probinsiya | September 2, 2024

Isabela -- Isang magsasaka ang namatay matapos matuklaw ng ahas kamakalawa sa bukid ng Brgy. Laluanan, Tumaini sa lalawigang ito.

Kinilala ang biktima na si Primo Lungayan, nasa hustong gulang at nakatira sa nabanggit na barangay.

Ayon sa ulat, nagtungo sa bukid si Lungayan para kumuha ng labong sa kawayanan, pero hindi na ito nakauwi.

Agad pinuntahan ng kanyang pamilya ang kawayanan at dito natagpuan ang biktima na may apat na tuklaw ng ahas.

Dinala pa ng mga kamag-anak si Lungayan sa ospital, pero idineklara itong dead-on-arrival.

---

BATANG BABAE, SUGATAN SA MOTORSIKLO

AKLAN -- Isang 11-anyos na batang babae ang sugatan nang mabangga ng isang motorsiklo kamakalawa sa Brgy. New Buswang, Kalibo sa lalawigang ito.

Dahil menor-de-edad ay hindi na isinapubliko ng pulisya ang pangalan ng biktima na nakatira sa nabanggit na bayan.

Ayon sa ulat, tumatawid sa kalsada ang biktima nang mabangga ng motorsiklo na minamaneho ng hindi pinangalanang rider.

Nabatid na nagtamo ang biktima ng sugat sa paa at katawan, at agad itong dinala ng mga saksi sa pagamutan. 

Nangako naman ang rider na sasagutin niya ang gastos sa ospital at lahat ng danyos na nangyari sa biktima.

---

HVT SA DROGA, NASAKOTE

GENERAL SANTOS CITY -- Isang HVT na drug pusher ang dinakip ng mga otoridad sa buy-bust operation kamakalawa sa Brgy. Dadiangas sa lungsod na ito.

Ang suspek ay kinilala ng pulisya sa alyas na “Michael”, nasa hustong gulang at residente ng nasabing barangay.

Nabatid na may tinanggap na impormasyon ang mga otoridad na nagbebenta ng shabu si “Michael” kaya naaresto ang suspek sa buy-bust operation.

Napag-alaman na nakakumpiska ang mga otoridad ng mga pakete ng hinihinalang shabu at markadong pera sa pag-iingat ng suspek.

Nakapiit na ang suspek na nahaharap sa kasong paglabag sa Comprehensive Dangerous Drugs Act of 2002.

Teroristang Dawlah Islamiya, nasakote

News @Balitang Probinsiya | August 30, 2024

Maguindanao Del Sur — Isang miyembro ng teroristang Dawlah Islamiya ang nadakip ng mga otoridad kamakalawa sa Brgy. General Salipada, Pentadun sa lalawigang ito.

Hindi na muna pinangalanan ang suspek habang iniimbestigahan ito ng mga otoridad. 

Nabatid na may nagbigay impormasyon sa mga otoridad sa kinaroroonan ng terorista kaya mabilis na rumesponde ang tropa ng pamahalaan at agad itong inaresto sa nasabing barangay.

Hindi naman nanlaban ang suspek nang arestuhin ng mga otoridad.

Sa ngayon ay isinasailalim pa sa taktikal na interogasyon ang nahuling terorista.

---

TRIKE DRIVER, NAGBIGTI SA BAHAY

ANTIQUE -- Isang 38-anyos na tricycle driver ang nagpakamatay sa pamamagitan ng pagbigti kamakalawa sa loob ng kanilang bahay sa Brgy. Abaca, Tobias Fornier sa lalawigang ito.

Dahil sa kahilingan ng pamilya ng biktima ay hindi na isinapubliko ng mga otoridad ang pangalan ng driver na nag-suicide.

Nabatid na ilang kamag-anak ng biktima ang nakatagpo sa nakabiting bangkay nito sa loob ng kanilang bahay.

Ayon sa pamilya ng driver ay wala silang alam na dahilan para magpakamatay ang biktima.

Patuloy ang imbestigasyon ng pulisya para mabatid motibo ng biktima sa pagpapakamatay.

---

2 BIGTIME TULAK, HULI SA DRUG-BUST

NEGROS OCCIDENTAL -- Dalawang bigtime drug pusher ang nadakip sa drug-bust operation ng mga otoridad kamakalawa sa Brgy. Linao, Kabankalan City sa lalawigang ito.

Pansamantalang hindi pinangalanan ang mga suspek habang nagsasagawa ng imbestigasyon ang mga otoridad. 

Ayon sa ulat, may tinanggap na impormasyon ang pulisya na nagbebenta ng shabu ang dalawang suspek kaya agad nagsagawa ng drug-bust operation ang mga operatiba na naging dahilan kaya nadakip ang dalawang pusher.

Napag-alaman na nakakumpiska ang mga otoridad ng 11 pakete ng hinihinalang shabu at markadong pera sa pag-iingat ng mga suspek.

Nakapiit na ang mga suspek na kapwa nahaharap sa kasong paglabag sa Dangerous Drugs Act of 2002.

---

KELOT, NIRATRAT SA RESTAURANT

QUEZON -- Isang 28-anyos na lalaki ang namatay nang pagbabarilin ng dalawang hindi kilalang armadong salarin kamakalawa sa loob ng isang restaurant sa Brgy. Balubal, Sariaya sa lalawigang ito.

Ang biktimang nagtamo ng mga tama ng bala sa katawan ay nakilalang si Michael Badiola, residente ng Brgy. Gibanga sa nabanggit na bayan.

Ayon sa ulat, habang kumakain sa loob ng restaurant si Badiola ay bigla itong nilapitan at pinagbabaril ng mga salarin.

Agad dinala ng mga saksi ang biktima sa ospital, pero idineklara itong dead-on-arrival.

Nagpalabas na ng manhunt operation ang pulisya para madakip ang mga suspek upang masampahan ng kasong murder.

Motornapper, dedbol sa bus

News @Balitang Probinsiya | August 28, 2024

BUKIDNON -- Isang motornapper ang namatay nang bumangga sa isang pampasaherong bus ang ninakaw nitong motorsiklo kamakalawa sa Brgy. Patpat, Malaybalay City sa lalawigang ito.

Sa ngayon ay inaalam pa ng mga otoridad ang pagkakakilanlan ng suspek na nasa hustong gulang.

Ayon sa ulat, tinangay ng suspek ang motorsiklo ng isang lending collector at dahil dito ay ini-report ng biktima sa pulisya ang pagnanakaw ng kanyang sasakyan.

Agad tinugis ng mga otoridad ang suspek hanggang bumangga ito sa isang pampasaherong bus na minamaneho ng hindi pinangalanang driver.

Nabatid na nagtamo ng malaking sugat sa ulo ang suspek dulot ng aksidente na agad nitong ikinamatay.

---

BANGKERO, TEPOK SA KIDLAT

PANGASINAN -- Isang bangkero ang namatay nang tamaan ng kidlat kamakalawa sa karagatang sakop ng Alaminos City sa lalawigang ito.

Sa kahilingan ng kanyang pamilya ay hindi na isinapubliko ng mga otoridad ang pangalan ng biktima na nasa hustong gulang at residente sa nasabing lungsod. 

Ayon sa ulat, habang lulan ng bangka ang biktima, kasama ang isang kaibigan para sumundo ng mga turista sa Quezon Island, ay biglang bumuhos ang ulan at kasunod ang pagkidlat na tumama sa bangkero. 

Dahil sa lakas ng boltahe ng kidlat ay nagtamo ng 3rd degree burns sa katawan ang biktima.

Agad dinala ng kaibigan niya ang biktima sa pagamutan, pero idineklara itong dead-on-arrival.

---

4 TULAK, ARESTADO SA DRUG DEN

ZAMBOANGA CITY -- Apat na drug pusher ang nadakip sa drug-bust operation ng mga otoridad kamakalawa sa isang drug den sa Brgy. Talon-Talon sa lungsod na ito.

Kinilala ang mga suspek na sina Henry Soriano, Rose Hilacio, Alvin Haili at Totoh Jama, pawang nasa hustong gulang at mga nakatira sa naturang barangay. 

Ayon sa ulat, may tinanggap na impormasyon ang mga otoridad na ginagawang drug den ang isang bahay sa naturang barangay kaya agad itong sinalakay at dito nadakip ang mga drug pusher.

Napag-alaman na nakakumpiska ang pulisya ng mga pakete ng hinihinalang shabu at markadong pera sa pag-iingat ng mga suspek.

Nakapiit na ang mga suspek na pawang nahaharap sa kasong paglabag sa Dangerous Drugs Act of 2002.

---

KOMUNISTA, TODAS SA ENGKUWENTRO

ANTIQUE -- Isang miyembro ng New People’s Army (NPA) ang napatay sa naganap na engkuwentro sa pagitan ng tropa ng pamahalaan at mga komunista kamakalawa sa Brgy. Culyat, Valderrama sa lalawigang ito.

Kinilala ang napatay na si alyas “Ka Robron,” miyembro ng NPA na nakabase sa lalawigan.

Ayon sa ulat, sinalakay ng tropa ng pamahalaan ang kuta ng mga rebelde sa naturang barangay at dito naganap ang engkuwentro.

Sa palitan ng putok ng baril ay napatay si “Ka Robron” kaya tumakas ang iba pang NPA.

Patuloy pa rin ang pagtugis ng mga otoridad sa mga tumakas na NPA sa nabanggit na barangay.