Bebot, na-hit and run

by News @Balitang Probinsiya | September 17, 2024

Aklan — Isang 22-anyos na dalaga ang sugatan nang ma-hit and run ng isang tricycle kamakalawa sa Brgy, Poblacion, Kalibo sa lalawigang ito.

Sa kahilingan ng kanyang pamilya ay hindi na isinapubliko ng mga otoridad ang pangalan ng biktima na nakatira sa nabanggit na bayan.

Ayon sa ulat, tumatawid sa kalsada ang dalaga nang mabangga ng isang tricycle, pero imbes tulungan ng driver at dalhin sa ospital ay mabilis na tumakas ang suspek.

Nabatid na nagtamo ang biktima ng malaking pinsala sa paa at katawan, at agad itong dinala ng mga saksi sa pagamutan. 

Nagpalabas na ng manhunt operation ang pulisya para madakip ang tumakas na driver ng tricycle.

---

WANTED NA RAPIST, NASAKOTE

SULTAN KUDARAT -- Isang wanted na rapist ang naaresto ng pulisya kamakalawa sa kanyang hideout sa Brgy. Kabulanan, Bagumbayan sa lalawigang ito.

Hindi muna pinangalanan ang suspek, nasa hustong gulang at pansamantalang nakatira sa nabanggit na barangay habang iniimbestigahan siya ng mga otoridad.

Ayon sa ulat, dinakip ng pulisya ang suspek sa bisa ng warrant of arrest na inisyu ng korte kaugnay sa kinasasangkutan nitong kasong rape sa lalawigan.

Nabatid na nakita ng mga operatiba ang suspek sa nasabing lugar kaya agad itong inaresto.

Hindi naman nanlaban ang suspek at ngayon ay nakapiit na siya sa detention cell ng himpilan ng pulisya.

---

CONSTRUCTION WORKER, NATAGPUANG PATAY

ILOILO -- Isang construction worker ang natagpuang patay kamakalawa sa bukid na sakop ng Brgy. Alugmawa, Lambunao sa lalawiggang ito.

Ang biktima ay kinilala ng mga otoridad na si Rolando Alonday, nasa hustong gulang at residente ng bayan ng Calinog, sa nabanggit na lalawigan.

Nabatid na ilang residente ang nakatagpo sa bangkay ng biktima sa nasabing lugar.

Sa pag-iimbestiga ng pulisya ay napag-alaman na may isang tama ng bala sa ulo ang biktima. 

Patuloy pa ang imbestigasyon ng mga otoridad sa naganap na krimen.

---

NPA, DEDBOL SA ENGKUWENTRO

CAGAYAN -- Isang miyembro ng New People’s Army (NPA) ang napatay sa naganap na engkuwentro sa pagitan ng tropa ng pamahalaan at mga komunista kamakalawa sa Brgy. Baliuag, Penablanca sa lalawigang ito.

Kinilala ang napatay na si alyas “Ka Karl,” miyembro ng komunistang NPA na nakabase sa lalawigan.

Ayon sa ulat, nagpapatrulya ang tropa ng pamahalaan nang tambangan at pagbabarilin sila ng mga komunista.

Dahil dito, gumanti ng putok ang mga otoridad kaya napatay si “Ka Karl.” 

Nang makita ng ibang NPA na napatay ang kanilang kasamahan ay mabilis na tumakas ang mga komunista.

2 drug trafficker, arestado

by News @Balitang Probinsiya | September 14, 2024

Lanao Del Sur — Dalawang drug trafficker ang naaresto ng mga otoridad sa drug-bust operation ng mga operatiba kamakalawa sa Brgy. Poblacion, Marawi City sa lalawigang ito.

Habang iniimbestigahan ay hindi na muna pinangalanan ng pulisya ang dalawang suspek na kapwa nasa hustong gulang at parehong residente sa nasabing lungsod.

Nabatid na naaresto ang mga suspek nang pagbentahan nila ng shabu ang mga operatibang nagpanggap na buyer ng illegal drugs. 

Ayon sa ulat, nakakumpiska ang mga otoridad ng mahigit 100 gramo ng hinihinalang shabu at markadong pera sa pag-iingat ng mga suspek.

Nahaharap ang mga suspek sa kasong paglabag sa Comprehensive Dangerous Drugs Act of 2002.

---

KELOT, PATAY SA SUNOG

QUEZON -- Isang binata ang namatay nang tupukin ng apoy ang kanilang bahay kamakalawa sa Brgy. 9, Lucena City sa lalawigang ito.

Sa kahilingan ng pamilya ng biktima ay hindi na isinapubliko ng mga otoridad ang pangalan ng binatang nasa hustong gulang na nasawi sa sunog sa nabanggit na barangay. 

Ayon sa ulat, nakita ng mga residente na biglang sumiklab ang sunog sa bahay ng biktima at mabilis na kumalat ang apoy kaya natupok ang buong kabahayan.

Sa imbestigasyon ay napag-alaman na na-trap sa loob ng kanyang kuwarto ang biktima habang nasusunog ang bahay. 

Sa ngayon ay iniimbestigahan na ng mga otoridad ang sanhi ng sunog sa bahay ng biktima.

---

HVT SA DROGA, NASAKOTE

ILOILO -- Isang high-value target (HVT) na drug pusher ang dinakip ng mga otoridad sa buy-bust operation kamakalawa sa Brgy. Balabag, Pavia sa lalawigang ito.

Ang suspek ay kinilala ng pulisya na si Michael Lopez, nasa hustong gulang at residente ng nasabing barangay.

Nabatid na may tinanggap na impormasyon ang mga otoridad na nagbebenta ng shabu si Lopez kaya naaresto ito sa buy-bust operation.

Napag-alaman na nakakumpiska ang pulisya ng mga 90 gramo ng hinihinalang shabu at markadong pera sa pag-iingat ng suspek.

Nakapiit na ang suspek na nahaharap sa kasong paglabag sa Comprehensive Dangerous Drugs Act of 2002.

Lolo, todas sa hit and run

by News @Balitang Probinsiya | September 12, 2024

Rizal — Isang hindi kilalang lolo ang namatay nang ma-hit and run ng isang Sports Utility Vehicle (SUV) kamakalawa sa Brgy. Cuyambay, Tanay sa lalawigang ito.

Ang biktima ay tinatayang nasa pagitan ng 65-70 ang edad, nakasuot ng long sleeves at short pants. 

Ayon sa ulat, ilang residente ang nakakita na habang tumatawid sa kalsada ay nabangga ito ng kulay gray na SUV.

Nabatid na imbes huminto ay tinakasan umano ng driver ng SUV ang pagkakabangga niya sa biktima. 

Nagpalabas na ng manhunt operation ang pulisya para madakip ang driver ng SUV upang sampahan ng kasong reckless imprudence resulting to homicide at obstruction of justice.

---

ISKUL, NILOOBAN NG AKYAT-BAHAY GANG

AKLAN -- Isang eskwelahan ang nilooban ng mga miyembro ng Akyat-Bahay Gang kamakalawa sa Brgy. Cabangila, Altavas sa lalawigang ito.

Ang nilooban ay ang Cabangila Elementary School sa nasabing barangay. 

Nabatid na walang tao sa naturang paaralan nang pasukin ito ng mga miyembro ng Akyat-Bahay Gang.

Napag-alaman na nakatangay ang mga suspek ng mga laptop at iba pang kagamitan sa loob ng iskul.

Kaugnay nito, naglunsad na ng manhunt operation ang pulisya para madakip ang mga magnanakaw.

---

SUNDALO, TODAS SA AMBUSH

ZAMBOANGA DEL SUR -- Isang sundalo ang nasawi sa naganap na ambush ng mga komunistang New People’s Army (NPA) kamakalawa sa bulubunduking lugar ng Brgy. Tina, Dumalinao sa lalawigang ito.

Hindi na muna pinangalanan ng mga otoridad ang napatay na sundalo ng Philippine Army (PA) hangga’t hindi pa naipapabatid sa pamilya nito ang nangyari sa biktima.

Napag-alaman na nagpapatrulya ang mga sundalo nang bigla silang pagbabarilin ng mga NPA kaya napatay ang biktima.

Dahil dito, agad na gumanti ng putok ang mga tropa ng pamahalaan at mabilis na tumakas ang mga komunista.

Patuloy ang pagtugis ng mga otoridad sa mga tumakas na mga NPA.

---

2 HVT SA DROGA, NASAKOTE

BACOLOD CITY -- Dalawang High-Value Target (HVT) sa droga ang dinakip ng pulisya sa kanilang buy-bust operation kamakalawa sa Brgy. 8 sa lungsod na ito.

Hindi na muna pinangalanan ng mga otoridad ang mga suspek habang iniimbestigahan pa ang mga ito. 

Nabatid na nagpanggap na buyer ng shabu ang mga operatiba, at nang bentahan sila ng droga ng mga suspek ay dito na agad dinakip ng mga otoridad ang dalawang

drug pusher.

Napag-alaman na nakakumpiska ang mga otoridad ng 50 gramo ng hinihinalang shabu at markadong pera sa pag-iingat ng mga suspek.

Nakapiit na ang mga suspek na kapwa nahaharap sa kasong paglabag sa Comprehensive Dangerous Drugs Act of 2002.