Revilla, inalerto ang DPWH at LGUs sa paghahanda sa pagpasok ng Bagyong Pepito

by Info @Brand Zone | Nov. 15, 2024

Nalulungkot si Revilla dahil hindi pa man nakakabangon ang Northern Luzon ay isang bagyo na naman ang papasok kaya mahalaga na may pre-positioning na ng mga emergency at relief goods at umaasa na walang magiging matinding pinsala sa buhay at ari-arian.

Inalerto ni Senador Ramon Bong Revilla Jr. ang Department of Public Works and Highways (DPWH) at mga Local Government Units na tiyaking nakalatag na ang mga paghahanda pagpasok ng bagyong Pepito sa Sabado.

Ayon kay Revilla na chairman ng Senate Committee on Public Works, dapat paspasan ang clearing operations sa mga lugar na nagkaroon ng landslide at pagguho ng mga puno matapos hagupitin ng bagyong Ofel.

"Eto pa lang nga si Ofel, paparating naman agad itong si Pepito," Revilla said. "So we must spare no time in cleaning up after Ofel and bracing for Pepito, ayon pa sa Senador.

Sinabi ni Revilla na hindi inaalis ng PAGASA na maging super typhoon si Pepito kaya kailangang masiguro na ngayon pa lang malinis at maluwag na ang mga daluyan ng tubig at malinis ang lahat ng mga maaring maging debris.

Nalulungkot si Revilla dahil hindi pa man nakakabangon ang Northern Luzon ay isang bagyo na naman ang papasok kaya mahalaga na may pre-positioning na ng mga emergency at relief goods oras na kailanganin.

Umaasa ang Senador na walang magiging matinding pinsala sa buhay at ari-arian kung ang publiko ay nakahanda.

"We are hoping na wala masyadong pinsala. Preparations are in place," he said. "Pero dapat handa pa rin tayo for whatever that may come. Dapat safe on ground na lahat ng kailangan at mga tauhan, para anuman ang mangyari, agad natin itong matutugunan,” dagdag pa ng Mambabatas.

Lolo’t lola, magdoble-ingat para iwas-budol

ni Bong Revilla @Anak ng Teteng | Nov. 11, 2024

Habang abala tayo sa pagsisikap kung paano mapapagaan ang buhay ng ating mga senior citizen ay sumasabay naman ang mga masasamang-loob na ang biktima mismo ay ang ating mga lolo at lola kaya kailangan ng ibayong pag-iingat.

Kamakailan lang ay nasabat ang hindi bababa sa P5 milyong halaga ng pekeng gatas para sa mga senior citizen at diabetic sa isang bodega sa Cainta, Rizal kasunod ng reklamo ng isang brand.

Sinalakay ng mga tauhan ng National Bureau of Investigation Intellectual Property Rights Division (NBI-IPRD) ang bodega sa loob ng isang subdivision, ayon sa ulat.

Inabot ng mga operatiba ang mga pekeng produkto na naka-pack at handa nang i-deliver sa mga nag-order sa mga ito online sa mas mababang presyo.

Ayon sa NBI, dumulog sa kanilang tanggapan ang isang pagawaan ng espesyal na gatas at nagsumbong na may namemeke ng kanilang produkto.

Nang makumpirma ng NBI-IPRD, agad na ikinasa ang operasyon kung saan nasa 4,000 milk cans ang nakumpiska.

Sa pekeng produkto, nakadikit lamang sa lata ang sticker o label hindi tulad sa orihinal na produkto na nakaimprenta mismo sa lata.

Sasampahan ng reklamong trademark infringement at unfair competition ang kumpanya na nasa likod ng pamemeke sa produkto.

Naghain din ang NBI ng motion for destruction para sirain ang lahat ng pekeng milk products.

Kaya kailangan ng dobleng pag-iingat at tiyaking bumili lamang ng mga produkto mula sa lehitimong supermarkets o tindahan. 

Sayang ang mga benepisyong makukuha ng ating mga lolo at lola katulad ng cash gift para sa mga senior citizen na sasapit sa edad na 80, 85, 90, kung mapupunta lamang sa mga masasamang-loob na nagbebenta ng mga pekeng produkto at posible pang ikamatay ng ating mga senior citizen.

Kaya nga sinikap nating mabigyan ng mga karagdagang benepisyo ang mga senior citizen dahil sa marami sa kanila ang retirado na at wala ng hanapbuhay, kaya napakasakit malaman na sila pa ang puntirya ng mga masasamang-loob.

Sa darating na Enero ay puwede nang simulan ang pamamahagi ng karagdagang benepisyo para sa ating mga lolo at lola -- sisikapin kong ako mismo ang unang magbibigay sa sinumang matatapat ang edad sa 80, 85, 90 at 95 at pagkakalooban natin ng P10,000 dahil umiiral na itong batas na ito.

Kumbaga, ang matagal na paghihintay ng ating mga lolo at lola ay maiibsan na dahil popondohan na ito sa darating na Enero at tuwang-tuwa rin ako dahil ako mismo ang may-akda ng panukalang ito na ngayon ay isa nang ganap na batas.

Napakarami pa nating plano para sa ikagaganda at ikagagaan pa ng buhay ng ating mga senior citizen.

Kasama na ang kapakanan ng mga manggagawa, nurses, teacher at mga overseas Filipino worker (OFWs) na lahat ay araw-araw nating iniisip kung paano mabibigyan ng magandang buhay.

Lahat ng ikabubuti at ikagagaan ng buhay ng ating mga kababayan ay pinagsusumikapan natin sa Senado at napakarami pang nakabinbin na ipagpapatuloy naman natin sa mga darating na panahon.

Sa ngayon ay medyo naagaw lang ang aking pansin hinggil sa pagkakaaresto ng sindikatong nambibiktima ng mga senior citizen kaya mabilis tayong nagpapaalala dahil kahit nasakote na ang mga namumuno sa sindikatong ito ay tiyak na may nakakalat pa rin itong galamay na inaasahang mambibiktima sa panahon ng Kapaskuhan.

Anak ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Edad 80,85,90,95, may cash gift na sa Enero 2025

ni Bong Revilla @Anak ng Teteng | Nov. 9, 2024

Minsan pang napatunayan na mas madaling makausad ang mga biktima ng kalamidad kung lahat tayo ay nagtutulungan tulad ng nangyari sa Paete, Laguna at Lian, Batangas na niragasa rin ng nagdaang Bagyong Kristine ilang linggo na ang nakalipas, kung saan parehong nalubog ang dalawang bayan sa matinding pagbaha.

Noong nakaraang araw ay inatasan natin ang ating Bayanihan Relief (BR) team na pangunahan ang pamamahagi ng tulong sa nabanggit na mga lugar matapos nating matukoy na dalawa sila sa napakaraming nasalanta noong nagdaang bagyo.

Unang tinungo ng ating team ang Paete, Laguna kung saan dinaluhan ni Mayor Ronald Cosico upang magbigay ng relief packs sa mga residente.

Bagama’t hindi tayo nakarating ng personal dahil balik sesyon na tayo sa Senado ay tiniyak nating nakarating ang ipinadala nating tulong.

Kasunod nito ay pinuntahan ng BR team ang Lian, Batangas at dito ay maayos na naipamahagi ang ipinadala nating tulong sa mga residente na lahat ay biktima rin ng pagbaha dulot ng Bagyong Kristine.

Inalalayan naman ang ating BR team ni Vice Mayor Ronin Leviste sa pamamahagi sa mga residente na lahat ay tuwang-tuwa dahil sa napapanahon umano ang pagbibigay na ito sa mga nangangailangan ng tulong.

Sa kasalukuyan ay patuloy ang paghahanda ng ating team sa mga ipapamahagi pa sa mga darating na kalamidad na hindi naman natin hinihiling, pero palagi nating pinaghahandaan.

Ayoko kasing kung kailan may pangangailangan dahil sa kalamidad ay saka magkukumahog para sa mga ipadadalang tulong.

Kaya ang sistema ng BR team — kung walang kalamidad ay abala sa pagbabasta para sa mabilis na pagresponde saan mang bahagi ng bansa.

Hindi ko man napuntahan ng personal dahil sa trabaho natin sa Senado ay tinitiyak

kong makakarating sa mga residente sa bawat bayan ang ipinadala kong tulong.

Pero kung naka-break naman ang sesyon ay personal ko talagang dinadalaw ang ating mga kababayan. Ngunit siyempre bilang senador ay kailangan din tayo sa Senado at abala tayo sa pagdalo para sa mga isinumite nating panukalang batas para sa kapakanan ng mga mamamayan.

Isa sa mga produkto ng ating pagsusumikap sa Senado ay ang pagkakapasa ng RA 11982 o Revilla Law. At sa darating na Enero ay magkakaroon na ng budget para sa mga senior citizen na sasapit sa edad na 80, 85, 90 at 95.  Kung sino man ang aabot sa nasabing mga edad ay mapagkakalooban natin ng P10,000. Kapag umabot ng edad na 100, P100,000 naman ang kanilang makukuha.

Kaya ko lamang nabanggit ay upang maunawaan ninyo na hindi ako basta nagbubutas lang ng upuan sa Senado dahil seryoso akong nagtatrabaho at isa rin sa dahilan kung bakit minsan ay hindi ako nakakapunta ng personal sa pamamahagi ng tulong sa nangangailangan. 

Umasa kayo na hindi ko pababayaan ang ating mga kababayan, lalo na ang mga sinalanta ng kalamidad. At napakarami pa nating isinumiteng panukalang batas na inilalaban natin ng pukpukan hanggang sa kasalukuyan — ang lahat ay puro sa kapakanan ng ating mga kababayan.

Sana lang ay wala ng matinding kalamidad na sumalanta sa atin para tuluy-tuloy lang ang buhay at ligtas ang bawat isa.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com