National flood master plan, nasaan na?

ni Bong Revilla @Anak ng Teteng | August 5, 2024

Totoo man na mas mabilis ang paghupa ng baha ngayon, hindi pa rin tama na mapunta rito ang usapan! Kasi hindi na dapat pinag-uusapan ‘yung paghupa, ang kailangan ay ‘yung hindi na magbabaha. Hindi sapat na mabilis humupa ang baha dahil hindi naman talaga dapat bumabaha.

Dito tumakbo ang talakayan sa isinagawang pagdinig sa Senado at bilang chairman ng Senate Committee ay hinimay nating mabuti hanggang kaliit-liitang detalye kung bakit hindi nareresolba ang pagbaha. 

Nagpatawag tayo ng hearing makaraang dumanas na naman tayo ng grabeng pagbaha kamakailan dulot ng Bagyong Carina na imbes na masolusyunan ay tila mas lumala pa. 

Sa pinakahuling pagdinig na dinaluhan ko sa Senado ay halos isang taon pa lamang ang nakararaan at patungkol din ito sa matinding sitwasyon ng ating mga kababayan na palaging lumulubog sa baha tuwing napapalakas ang pag-ulan.

Kaya sa pagpasok pa lang ng taon ay palagi nating pinapaalalahanan ang mga ahensya na isaayos ang mga imprastruktura at drainage para sa paparating na tag-ulan at La Niña. Ngayon, heto na naman tayo, same problem. Walang pagbabago, nandito tayo at pag-uusapan ang pananalasa ng bagyo tapos palaging maganda ang sinasabing solusyon pero pagdating ng ulan — baha rin.

Sa gitna ng talakayan ay ipinakita natin ang isang footage kung gaano katindi ang epekto ng naturang bagyo sa iba’t ibang rehiyon na sumira ng mga pananim at iba pang kabuhayan.

Noong nakaraang Linggo, nag-conduct tayo ng onsite at aerial inspection sa Caloocan, Malabon, Navotas, Bulacan, Pampanga at kahapon lamang, sa Rizal. Sa Metro Manila, may ilang bahagi na lagpas tao ang naging baha. Umabot pa nga sa bubong ng mga bahay. Sa ilang parte naman ng Central Luzon, lubog din sa baha ang mga bahay at hanapbuhay. May mga lugar, baha pa rin hanggang sa ngayon. Sa CALABARZON, nag-trending din ang naging bilis na pagtaas ng tubig kung saan hindi na nadaanan ang mga kalsada.

Nabatid na sa kabila nang paulit-ulit nating paalala na paghandaan ang paparating na tag-ulan ay tila walang naririnig ang mga ahensyang itinalaga ng pamahalaan para tugunan ang kalagayan at kaligtasan sana ng ating mga kababayan. 

At hanggang sa kasalukuyan ay nananatiling walang integrated national master plan for flood management. Inamin naman ng Department of Public Works and Highways (DPWH) na 18 major river basins sa bansa ay may master plan bawat isa, ngunit hindi ito naging katanggap-tanggap maging sa kapwa ko mga senador dahil nga sa naging resulta kamakailan.

Kung wala kasing integrated national master plan para resolbahan ang baha, patuloy na magiging patse-patse ang ginagawa nating mga proyekto para tugunan ito. Kahit pa matapos ang mga naturang proyekto, kung hindi magiging holistic ang approach, maililipat lang natin sa ibang lugar ang baha.

Dapat ay pang-buong bansa ang solusyon dahil kailangan talaga ng unified master plan at hindi ‘yung tapal-tapal lamang. Isang patunay diyan ‘yung kahit ang daming proyekto ay paulit-ulit pa rin ang baha dahil nga sa hindi ito epektibo.

Lumabas sa pagdinig na nasa 5,500 flood control projects ang pinamahalaan ng DPWH at napakarami pang minor projects ang isinasagawa sa iba’t ibang bahagi ng bansa ngunit hindi naman maramdaman ang resulta.

We think that since there is no integrated national master plan, the projects being mentioned by DPWH are being implemented sparsely. Kumbaga, patse-patse. Kaya siguro nandiyan pa rin ang baha. 

That is why I eagerly call on them to already make the master plan. Kayo na rin ang nagsabi, sa meeting kasama si Pangulong Bongbong Marcos, ang specific instruction niya ay dapat holistic at in integrated manner ang pagresolba natin sa problema sa baha. With that being said, the only way to do that is to have a master plan.

Kaya, kailangan nang mabuo at maipatupad ‘yang master plan na iyan. At in the interim, habang wala pa, dapat may mga contingencies kayo para hindi na babaha ulit tuwing uulan.

Sana lang sa susunod na lulutang na ang mga ahensyang ito sa Senado ay solusyon na ang kanilang sasabihin at hindi palusot lang kung bakit bumabaha pa rin.

Anak Ng Teteng!

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Napapanahong batas para sa PWDs, isusulong

ni Bong Revilla @Anak ng Teteng | July 29, 2024

Kailangang-kailangan nang rebisahin ang pagpapatupad ng Batas Pambansa 344, na mas kilala sa tawag na “Accessibility Law” na tumitiyak na lahat ng itinatayong mga gusali, institusyon, establisimyento at mga pampublikong kagamitan ay may mga pasilidad upang mapagaan ang pagkilos ng mga may kapansanan o persons with disabilities (PWDs).

Kaya nga nagsumite tayo ng isang resolusyon noong nakaraang Martes, Hulyo 23, na humihiling sa naaayong komite ng Senado na suriin ang pagkaangkop at pagiging epektibo ng pagpapatupad ng 40 anyos na batas. 

Nais nating matuon kung dapat nang amyendahan ito para mas mapalakas pa ang pagprotekta, pagpapanatili at pagtaguyod sa kapakanan ng PWDs, o kung sa pagpapatupad lamang nagkakaproblema.

Tiyempo ang pagkakahain natin ng resolusyon dahil selebrasyon ito ng Apolinario Mabini Day at sa pagdiriwang ng National Disability Prevention and Rehabilitation Week ngayong linggo para bigyang pansin ang pagrepaso sa matagal at luma nang batas na BP 344. 

Pagdating kasi sa pagpapatupad nito, isang napakalaking pagsubok pa rin na abot-kamay o walang hadlang para sa PWDs ang mga bagay na dapat ay napapakinabangan nila ng buong-buo. May mga gusali at imprastraktura pa ring hindi sumusunod sa pinaiiral na standards para mapagaan ang sitwasyon ng PWD na napakahalaga para sa pang-araw-araw nilang pamumuhay at makamit nila ang kanilang mga adhikain.

Gusto nating i-audit ang mga pasilidad kung compliant ba sila sa batas na ito. Remember, this is a law. It is required for them to provide facilities that are accessible for the use of PWDs.

Ang BP 344 ay ipinatupad noon pang Pebrero 25, 1983 sa ilalim ni Pangulong Ferdinand E. Marcos. Pagkalinga ito sa kapakanan ng PWD upang magawa nilang makasabay sa iba’t ibang aspeto ng daloy ng buhay at sa paghubog sa lipunan kung saan sila kabilang para makapamuhay ng maayos at makakuha ng patas na oportunidad katulad ng ibang walang kapansanan.

Lagi nating tatandaan na walang taong may nais magkaroon ng kapansanan o maging PWD. Ang iba ay isinilang na sa ganitong kalagayan at ang iba naman ay biktima ng malagim na aksidente at hindi mabuti na makadagdag pa tayo sa kanilang mga hamong kinahaharap araw-araw dahil lamang sa hindi tamang pagpapatupad o hindi na napapanahong batas.

Sisikapin nating amyendahan ang napakatagal ng batas sakaling sa gitna ng pag-aaral ay makita nating hindi na talaga ito akma sa kasalukuyang panahon upang makapamuhay ng maayos ang ating mga kababayang may kapansanan.

Ang pinakatiyak ay ang gagawin nating pag-iinspeksyon sa mga gusali at iba pang imprastraktura upang masiguro natin na lahat ay sumusunod sa nararapat na standards para sa PWDs at kung ano ang magiging pananagutan ng mga sumusuway dito.

Iba na ang panahon ngayon, may social media na, kahit sino ay madaling maiparating sa mga kinauukulan ang mga pangyayari.

Hindi naman kasi maikakaila na napakaraming mga establisimyento na hindi tumutugon sa pangangailangan ng mga PWDs – marahil dahil sa kakulangan sa paghihigpit kung paano ito ipatutupad.

Sabagay, lilinangin naman ang usaping ito at marami pang positibong suhestiyon ang lulutang sa gitna ng talastasan sa Senado na sa huli ay makabubuo ng komprehensibong solusyon hinggil sa mga bagay-bagay na may kaugnayan sa PWDs.

Tulad ng palagi kong sinasabi, wala naman tayong ibang hangad kung hindi ang mapabuti ang kalagayan ng ating mga kababayan — lalo na ang PWDs.

Kamakailan lamang ay dumanas tayo ng isang matinding aksidente nang mapunit ang lamad sa ating Achilles tendon at lahat ng nararanasan ng isang PWD ay ating naranasan, tulad ng paggamit ng wheelchair, saklay at ngayon ay tungkod para matulungan ang aking binti na muling makalakad ng maayos kaya ramdam ko ang hirap.

‘Yung karanasan ko nga bahagi lang ng gamutan matapos akong operahan pero iniinda ko ang hirap, lalo na siguro ‘yung mga kababayan nating may kapansanan na permanente na ang kalagayan sa pang-araw-araw nilang buhay.

Kaya mapalad tayong nasa maayos na katayuan — kaya sana huwag naman nating ipagkait sa kanila ang tulong na magagawa para mapagaan ang buhay ng PWDs.

Anak Ng Teteng!

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Pagbaha sa maraming lugar, dapat busisiin

ni Bong Revilla @Anak ng Teteng | July 26, 2024

Personal na nagtungo si Pangulong Ferdinand Bongbong Marcos, Jr. (PBBM) sa National Disaster Risk Reduction Management Council (NDRRMC) office upang pangunahan ang pagtitiyak sa kaligtasan ng ating mga kababayan sa gitna ng pananalasa ng Monsoon rains na dulot ng Bagyong Carina.

Mahalaga na sa panahong tulad nito ay matiyak ang kaligtasan ng bawat isa. Tuluy-tuloy naman ang evacuation at rescue operations kahit na sadyang overwhelmed ang mga barangay, LGUs, MMDA, at iba pang sangay ng pamahalaan. 

Salamat sa pakikipagtulungan ng bawat isa at magaan na naipaabot ang tulong sa lahat ng nangangailangan.

Tinulungan natin na ma-rescue ang mga kababayan nating stranded upang mabigyan ng iba pang relief goods lalo na ‘yung dinala sa mga evacuation area.

Tulad ng inaasahan, lumipas at nakaraos din tayo sa mga ganitong pagsubok dala ng kalamidad at muli ay napatunayan natin na basta tulong-tulong ay walang imposible.   

Siyempre kasunod nito ay bubusisiin natin, bilang chairman ng Committee on Public Works, ang mga nangyari at dahilan sa likod ng nagaganap na matinding pagbaha. 

Dahil umpisa pa lamang ng taon ay pinaalalahanan na natin ang DPWH at MMDA na isaayos ang mga imprastraktura at drainages, at agaran naman silang tumugon na inihanda na nila ang mga ito. Sa kabila niyan, nakita natin ang matinding epekto at abala ng Habagat. Hindi na dapat ito maulit.

Kung sa ganitong panahon na nagsagawa tayo ng paghahanda ay napakalaki pa rin ng epekto, lalo na siguro kung nagpabaya tayo, marahil ay marami na naman ang nagbuwis ng buhay.

Pero sadyang mapagbiro ang panahon at taun-taon ay nakararanas tayo ng ganitong kalamidad –sabagay tiwala naman ako sa mga Pilipino na malalampasan natin ang mga ganitong pagsubok ng ligtas, ngunit mas mabuti pa rin ang nag-iingat.

Bago pa man nanalasa ang Bagyong Carina ay nauna nang nagbigay ng babala ang Department of Health (DOH) hinggil sa pagtaas ng kaso ng leptospirosis at dengue. 

Tiyak na sa paghupa ng mga baha sa inyong lugar ay tataas din ang bilang ng lamok kaya kailangan ng dobleng pag-iingat dahil nakaligtas nga tayo sa kalamidad, pero baka madale naman tayo ng sakit.

Ang mga kababayan nating hindi naiwasang lumusong sa baha ay makipag-ugnayan na sa mga health center ng barangay upang mabigyan agad ng karampatang lunas at hindi na humantong sa nakamamatay na leptospirosis.

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com