Kalagayan ng mga OFW sa HK, tutukan natin

ni Bong Revilla @Anak ng Teteng | August 28, 2024

Personal tayong nagtungo sa Hong Kong noong nakaraang Linggo upang mabisita at makamusta ang napakarami nating overseas Filipino workers (OFWs) doon. 

Hindi ko napansin ang malayong paglalakbay para makarating ng Hong Kong dahil sa unang pagdating pa lamang ay libu-libong kababayan na natin ang sumalubong at lahat ay tuwang-tuwa sa ating pagdating — marami rin ang naluluha dahil sa kaligayahan. 

Ilang grupo ng ating mga kababayan sa Hong Kong ang nakipag-ugnayan sa atin para sa isang meet and greet na agad nating pinagbigyan at hindi nga tayo nagkamali ng pagpapaunlak dahil ramdam na ramdam natin ang kanilang pangungulila sa ating bayan at lalo na sa kanilang mga mahal sa buhay. 

Nawa ay naibsan natin kahit bahagya ang lungkot na nararanasan nila sa kanilang pananatili sa ibang bansa para lamang maitaguyod ang kani-kanilang pamilya dahil hindi biro ang maghanapbuhay abroad — kaya nga sila tinawag na bayani ng makabagong panahon dahil sila ang mga mandirigma na nagbubuwis ng buhay para labanan ang kahirapan. 

Sa totoo lang ay may opisyal tayong lakad sa lugar na iyon nang makipag-ugnayan sa atin ang ilan sa mga kababayan kung saan marami sa mga OFW ang day off at nagtitipun-tipon lang sa isang kilalang lugar sa HK. 

Hindi na tayo nagdalawang-isip at agad nating tinungo ang naturang lugar kung saan nagkukumpulan ang ating mga kababayan at mula doon ay walang humpay na ang ingay at lahat ay sumalubong, yumakap at humalik na daig pa ang kanilang kamag-anak na hindi nila nakita sa napakahabang panahon. 

Bahagya tayong tumigil at nakipagkuwentuhan sa mga kababayang OFW at doon ay medyo napaluha tayo sa iba’t ibang kuwento na kanilang ibinahagi, ngunit sa kabuuan ay maayos naman ang kanilang kalagayan -- lamang ay hindi maiiwasan na may iba tayong kababayan na hindi pinalad sa kanilang pinapasukan at nais na lumipat ng trabaho. 

Inipon naman natin ang lahat ng kanilang mga sumbong at sisikapin nating maiparating sa kinauukulan ang kanilang mga kahilingan sa legal na paraan. 

Sa ilang sandaling pakikipagniig natin sa mga OFW ay kita-kita natin ang kanilang pananabik at dahil dito ay tiyak na muling mauulit ang pagbisita nating ito sa kanila hindi lang sa Hong Kong kundi sa napakarami pang bansa para mabigyan din natin sila ng pagkalinga kahit sandali. 

Ang mga kababayang umiiyak sa ating pagdating ay pawang mga nakangiti na sa kanilang pag-alis na tila punumpuno ng lakas para sa panibagong pakikibaka sa kanilang pananatili roon bilang manggagawa. 

Dahil sa pangyayaring iyon ay nabuo sa aking isipan na ang pagdalaw ko sa kanila ay nagbigay ng malaking kasiyahan at kahit paano ay naibsan ang kanilang pangungulila, kaya sisikapin kong maulit pa ito basta’t itutulot lang ng pagkakataon.

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Tuloy ang pag-abot ng tulong kahit walang kalamidad

ni Bong Revilla @Anak ng Teteng | August 27, 2024

Marami ang nagtatanong sa atin kung kailan tayo magtutungo sa kanilang lugar para mamahagi ng tulong at ang lagi nating pagtitiyak ay huwag silang mainip dahil siguradong maaabot natin sila.

Ito ay matapos nilang mabalitaan na patuloy pa rin tayo sa pagbibigay ng tulong sa iba’t ibang bahagi ng bansa at ang pinakahuli nating dinayo ay ang mga bayan ng Tiaong, Candelaria at Sariaya, na lahat ay nasa lalawigan ng Quezon.

Sa tulong ng aking staff sa Bayanihan Relief ay regular natin itong ginagawa na tila isang caravan sa maraming lugar sa bansa partikular sa mga naging biktima ng kalamidad na hanggang sa kasalukuyan ay nahihirapang umahon.

Sa pamamagitan ng Assistance to Individuals in Crisis Situation (AICS) ay inayudahan natin ang maraming mahihirap na lahat ay tumanggap ng pantawid-panggastos sa kanilang pang-araw-araw na pamumuhay.  

Mahigit sa 6,000 katao ang nabiyayaan sa pagtungo natin sa naturang lugar at nakatakda pa tayong maglibot sa marami pang barangay na regular naman nating ginagawa may kalamidad man o wala.

Nakakatuwa na sa mga lugar na ating pinupuntahan ay hindi pa rin nawawala ang init ng pagsalubong sa atin ng marami nating kababayan na lalong nagbibigay sa atin ng inspirasyon sa pagpapatuloy ng ginagawa nating serbisyo-publiko.

Sa bawat yakap at halik na ipinagkakaloob ninyo sa akin ay mabilis na napapawi ang aking pagod at maraming salamat sa inyong lahat dahil hindi kayo nagbabago sa akin — kaya makaaasa kayong hinding-hindi rin ako magbabago.

Napakainit ng pagtanggap sa atin ng mga taga-Quezon. Hindi sila magkamayaw sa ating pagdating, nagsisigawan sila sa tuwa na parang sabik na sabik sa atin kaya naman lahat ay pinaunlakan nating makapagpakuha man lamang ng larawan kahit siksikan.

Isa rin ito sa nakatutuwa sa regular nating pag-iikot sa iba’t ibang bahagi ng bansa dahil sa tuwing maluwag ang ating schedule ay sinisikap nating mapuntahan ang mga lugar na naapektuhan ng mga kalamidad — tulad ng bagyo, lindol at iba pa.

Pero, kung wala namang nagdaang kalamidad ay umiikot pa rin tayo para puntahan ang iba pa nating kababayan na nangangailangan gaya nga ng ginawa natin sa lalawigan ng Quezon kung saan ang babait ng mga residente roon.

Hindi pa uso ang pamamahagi ng ayuda ay ginagawa na natin ito, kaya huwag mainip ang iba pa nating kababayan dahil isang araw ay bigla na lamang kaming darating sa inyong mga lugar para mamahagi ng tulong.

Wala naman akong ibang gusto pa sa buhay ko kundi ang mapasaya kayong lahat dahil kapag nakikita ko kayong masaya ay mas dobleng kasiyahan ang aking nararamdaman.

Isa rin ito sa paraan ko para makapagpasalamat sa Panginoon — ang kalingain ang mga kababayan kong mahihirap dahil hindi Niya ako pinababayaan at ang aking pamilya.

Mula bata pa ay biniyayaan na ako ng mapagmahal na magulang na silang nagtaguyod sa akin upang maging artista hanggang sa makilala ako at ngayon ay iniluklok pa ninyong senador kaya marapat lamang na bumawi ako dahil kung hindi sa inyong suporta ay wala ako ngayon sa aking kinalalagyan.

Kaya itong ginagawa kong pag-iikot sa tulong ng aking Bayanihan Relief (BR) ay lalo ko pang paiigtingin para lahat ay aking maabot at mabigyan ng ayuda kahit pa walang kalamidad.

Araw-araw ang aking mga staff sa Bayanihan Relief ay nag-iimpake ng mga relief goods sa panahong hindi kami nakakapag-ikot upang sakaling may dumating na kalamidad ay handa kami anumang oras na may mangailangan ng tulong -- ganyan lang umiikot ang aking buhay.

Kapag may pasok sa Senado ay maaga tayong dumadalo sa mga pagdinig at kung wala naman ay abala tayo sa pagtugon sa ating mga kababayan.

Kung may extra pa tayong oras ay doon lamang natin naisisingit ang paggawa ng palabas sa TV at iba pang showbiz activities dahil may obligasyon din tayo sa ating mga tagasubaybay bilang artista at para may maipamahagi naman tayong ayuda sa iba pa nating kababayan.

Ang pinakapahinga natin sa bahay ay ang paggawa ko ng mga panukalang batas para makatulong naman sa mga manggagawa tulad ng teacher at mga overseas Filipino workers (OFWs) upang madagdagan din ang kanilang mga benepisyo.

Tayo rin ang may-akda na hindi dapat palaging kumukuha ng bagong birth certificate ang sinumang mangangailangan nito — ibig sabihin kahit luma ay may bisa ang dokumentong ito.

Sa dinami-dami ng iniakda natin patungkol sa pakinabang na dapat makuha ng mga senior citizen ay nag-iisip pa tayo ngayon kung paano mapapalakas ang kanilang discount card dahil sa piling mga bayarin lamang ito gumagana, at karaniwan ay binabalewala pa sila ng ibang establisimyento na ayaw magbigay ng diskuwento.

Pangarap ko lang sa ngayon ay maisaayos ko lahat ng mga benepisyo at iba pang maaaring pakinabangan ng mga kababayan sa pamamagitan ng pagsusumite ng mga panukalang batas at sana ay huwag tayong magkaroon ng karamdaman para maisagawa natin ito.

Sa mga manggagawa sa showbiz industry ay hindi rin naman tayo nagpapabaya. Umiiral naman na ang Eddie Garcia Law na nagpalakas nang husto sa karapatan ng mga manggagawa sa showbiz, na atin ding tinutukan.

Marami-rami na rin naman ang iniakda nating batas na ngayon ay pinakikinabangan ng ating mga kababayan at marami pa ang nakasumite na kasalukuyan nating inilalaban ng pukpukan sa Senado. Naniniwala ako na tulad ng mga lumusot nating panukala ay magiging batas din ang mga ito sa tamang panahon.

Sana magkita-kita tayo ‘pag nagawi na ako sa inyong lugar.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Hackers non-stop, mga ahensya ng gobyerno, ligtas pa ba?

ni Bong Revilla @Anak ng Teteng | August 23, 2024

Masyado nang nalalantad sa kahihiyan ang iba’t ibang ahensya ng pamahalaan hinggil sa sunud-sunod na pag-atake ng mga hacker at ngayon ay kinumpirma naman ng Department of Information and Communications Technology (DICT) na nitong nakaraang Miyerkules ay hindi na rin nakaligtas ang website ng Senado.

Noong Martes pa ng gabi natiktikan ng cybersecurity group Deep Web Konek ang ginawang pagpasok ng DeathNote Hackers sa information technology system ng Senado.

Napag-alaman naman ng DICT na kinalikot umano ng grupo ang mga usernames at logs ng mga empleyado sa Senado.

Tiniyak naman ni DICT Asec. Renato Paraiso na naresolba na ang nasabing hacking subalit patuloy pa rin silang nakikipag-ugnayan sa Senado upang mapalakas ang kanilang cybersecurity.

Ilan sa mga ahensya ng gobyerno na na-hack ng nasabing grupo ay ang Bureau of Customs (BOC).

Noong nakaraang taon, na-hack ang Philippine Health Insurance Corp (PhilHealth) kung saan milyun-milyong datos ng mga miyembro ang nakompromiso.

Ang masakit sa sunud-sunod na pangyayaring ito ay tila wala namang paghahandang isinasagawa ang DICT para pigilan ito at sa halip ay proud na proud pa silang inaanunsiyo na may ahensya na namang na-hack.

Nakakaalarma na ang sunud-sunod na pangyayari at ang gustong marinig ngayon ng publiko ay mahuli na ang mga salarin sa likod ng walang humpay na hacking na ito.

Sabagay kamakailan lamang ay may nasakoteng grupo ng mga hacker ang National Bureau of Investigation (NBI) at sa kauna-unahang pagkakataon ay may naaresto, kaya posibleng matimbog din ang mga umatake sa website ng Senado kung ang NBI din ang tututok dito.

Apektado ang mga empleyado ng Senado hinggil sa naganap na hacking dahil hindi pa natin alam sa ngayon kung ano na naman ang magiging epekto nito — na sana ay wala namang grabe kaya dalangin nating masakote na ang mga walang respetong hacker na ito sa lalong madaling panahon. 

Pilit nating inuunawa ang DICT na hindi talaga sapat ang kanilang kapasidad para pigilan ang pag-atake ng mga hacker ngunit naniniwala ako sa kakayahan ng bagong pamunuan ng NBI na sa tulong ng DICT ay mahuhuli rin ang mga masasamang-loob na ito.

Masyado nang hinahamon ng mga hacker na ito ang kakayahan ng pamahalaan kaya marapat lang na pag-ukulan natin ito ng pansin para maiharap sa media ang pagmumukha ng mga iyan at masampahan ng kaso.

Hangga’t pinapalampas kasi natin ang pag-atakeng ito ng mga hacker ay tiyak na mauulit at mauulit ang kanilang pagtatangka dahil natutuwa silang hiyain ang mga ahensya ng pamahalaan at ipakita sa buong mundo ang ating kahinaan.

Medyo nagpahinga saglit ang mga hacker na ito nang mahuli ng NBI ang ilan sa mga ito at isa nga ay editor pa umano ng kilalang pahayagan kaya ngayon ay muli na namang sumusubok ang mga hacker para patunayang nakatsamba lang ang NBI na makatiklo.

Sana sampulan uli ng naturang ahensya na makatimbog ng hacker at unahin nila ang mga umatake sa Senado para makampante na ang mga empleyado nito.

Sabagay hindi lang naman bansa natin ang may problema sa hacking dahil buong mundo ay dumaranas nito. Ang pagkakaiba lang nareresolba agad sa ibang bansa hindi tulad sa atin na parang pinaglalaruan ang ating mga ahensya ng mga kawatang ito.

Kailangan talagang kumilos, sa ngayon kasi ay talamak pa rin ang text scam at dagsa sa tanggapan ng Anti-Cyber Group ng Philippine National Police (ACG-PNP) ng nagtutungo para magsampa ng reklamo kasi nga wala namang nahuhuli.

Sa kabila kasi ng rehistrado na ang lahat ng SIM card sa bansa ay umaatake pa rin ang mga scammer dahil lantaran ang bentahan ng mga ito at kamakailan lamang ay napakaraming nakumpiska ng pulisya na registered SIM card na ipinagbibili sa murang halaga.

Ang sinasabi natin, kailangan talaga na tutukan ang problemang ito — kung kinakailangang magsagawa ng massive operation para maubos ang mga naturang sindikato ay gawin natin — hindi ‘yung magpepresenta ng huli kapag mainit ang sitwasyon para lang maipakitang nagtatrabaho, pero paghupa ng sitwasyon balik na naman sa panloloko ang mga scammer.

Kung tuluy-tuloy ang pagtugis sa mga hacker at maya’t maya ay may nahuhuli, tiyak na darating ang panahon na titigil na ang mga ‘yan lalo pa at marami na ang nakakasuhan.

Naniniwala naman ako na darating ang panahon na matutukoy na ng DICT ang mga hacker, sana lang ay makipag-ugnayan sila sa NBI para mapabilis ang trabaho.

Sa mga kababayan nating may kaalaman hinggil sa ginagawang ito ng mga hacker ay mangyari lamang na ipagbigay alam sa tanggapan ng mga otoridad upang mapanagot sila sa batas at tuloy ay makatulong sa pagsugpo ng kasamaan sa mundo.

Mabuti at medyo malakas ang ating cybersecurity group sa Senado at agad na natiktikan ang galawan ng mga hacker kaya kahit paano ay nakaporma ang information technology system ng Senado at ngayon ay lalo pa nilang pinalakas ang sistema para hindi magtagumpay ang mga ito.

‘Yung mga na-stress dahil sa hacking na ito ay medyo kumalma na dahil tiyak na ilang araw lang  ay masasakote rin ang mga ‘yan dahil hindi naman tatantanan ‘yan ng pamahalaan.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com