Darating pa ba si Santa Claus?

ni Bong Revilla @Anak ng Teteng | Dec. 20, 2024

Maraming mga bata ang nagtatanong kung darating pa ba si Santa Claus — masakit na katanungan kung ang makaririnig ay ang mga magulang partikular ang ama ng tahanan dahil sa isang mahalagang papel ang kanilang ginagampanan sa mga anak sa tuwing sumasapit ang Pasko.

Sa dinami-dami ng ating mga kababayang tila hindi pinalad sa panahong ito ng Kapaskuhan dahil sa mga pagsubok na dumaan tulad ng mga kalamidad ay mahirap ipaliwanag sa kanilang maliliit na anak kung darating pa ba si Santa Claus.

Alam naman natin na bahagi ng ating kultura na ang ama ng tahanan ay naglalaan ng panahon para makapaghanda at maibili ng laruan para pasayahin ang Pasko ng kanilang mga anak sa paniniwalang galing ito kay Santa Claus.

Sa mga lugar sa Pilipinas ay maraming mga bata ang hanggang sa kasalukuyan ay umaasang isang araw bago mag-Pasko ay dadalawin sila ni Santa Claus.

Bilang isang tatay ay damang-dama ko ang pighating nararanasan ng mga ama ng tahanan na kapos sa kakayahan para tuparin ang mga pangarap ng kani-kanilang mga anak kahit sa isang simpleng pamasko lamang.

Sa kabila ng napakarami na nating napuntahan lugar para bahaginan ng kahit pang-Noche Buena man lamang ay nagsusumigaw ang katotohanang hindi natin kakayaning bigyan lahat para walang malungkot sa mismong araw ng Pasko.

Nawa ay magsilbing aral din sa mga ama ang pangyayaring ito na lalo tayong magsumikap sa buhay para sa susunod na taon ay matiyak nating mapupuntahan ni Santa Claus ang ating mga anak.

Ngunit, hindi porke kapos tayo sa pinansyal na aspeto ay hahayaan na lamang nating dumaan ang Pasko ng wala lang.

Dapat ay pangunahan natin ang mismong paliwanag sa ating mga anak kung ano talaga ang tunay na kahulugan ng Pasko at idetalyeng mabuti na hindi handa at laruan ang importante bagama’t bahagi ang mga material na bagay ay higit na mahalaga na magkakasama ang buong pamilya.

Pinakamahalagang sabay-sabay tayong dumalo sa misa sa mismong araw ng kapanganakan ni Hesus kasama ang buong pamilya at ipagpasalamat natin ang mga biyayang ipinagkaloob ng Panginoon sa nagdaang taon.

Pagkatapos dumalo ng misa ay dapat ding pagsaluhan ang hapunan kahit walang magarbong handa — dahil kahit simple ay magkakasama at buo ang pamilya.

Ito ang tunay na diwa ng Pasko, ang ipagdiwang ang kaarawan ng ating Panginoon at dapat na maunawaan ng ating mga anak. 

Ipagdasal lang natin sa Panginoon ang kasalukuyan nating pinagdaraanan at unti-unti ay magiging maayos din ang lahat habang maiintindihan ng mga bata kung bakit hindi magagawi si Santa Claus.

Samantala, ayon sa ulat ng Philippine National Police (PNP) ay tumaas ng bahagya ang krimen na may kaugnayan sa Pasko – ito ay dahil sa pressure na kailangan ng panggastos sa Kapaskuhan.

Ngunit hindi tamang gumawa pa ng panlalamang sa kapwa para lamang mairaos ang araw na ito ng masagana — kahit magarbo ang handaan kung galing naman sa masama ay tiyak na hindi ito ikatutuwa ng Panginoon.

Hindi naman kailangang may mamahaling damit o regalo dahil ang mahalaga ay maipadama natin sa kapwa ang pagmamahal. At kung may mga kasamaan tayo ng loob ay mabuting makipagkasundo na bilang pag-alala sa tunay na diwa ng Pasko.

Sa ganitong paraan ay mairaraos natin ito ng maligaya at sinisiguro kong mas masaya ang ganitong uri ng karanasan kumpara sa maraming handa pero sobrang bigat naman ng nararamdaman dahil sa rami ng bagahe sa buhay.

Ayokong magtunog relihiyoso ngunit mahalagang yugto ng ating buhay ang panahong ito at sayang naman kung hindi natin magagawang maging masaya dahil lamang sa kakapusan sa buhay.

Huwag tayong malugmok dahil sa hindi natin maayos na sitwasyon at sa halip ay gamitin natin itong inspirasyon para sa masayang Pasko sa susunod na taon. Maligayang Pasko sa inyong lahat!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Belen, mensahe ng pagmamahal, awa at kababaang-loob

ni Bong Revilla @Anak ng Teteng | Dec. 13, 2024

Labing-isang araw na lamang ay bisperas na ng Pasko, ang araw na pinakahihintay na mismong sentro ng pagdiriwang para salubungin ang Pasko kung saan ginugunita natin ang kapanganakan ng ating Panginoong Hesus.

Maraming kahulugan ang Pasko para sa ating mga kababayan, at sa buong mundo ay kilala ang ating bansa na may pinakamahabang pagsalubong sa araw na ito kasabay ng pagsigla ng ating mga pamilihan.

Kahit walang kaugnayan sa kautusan ng Simbahang Katoliko ay nagkukusa na ang marami nating kababayan na sa unang araw pa lamang ng buwan ng Setyembre ay marami na ang nagpapatugtog ng mga awitin patungkol sa Pasko.

Hindi dahil sa nilalabag natin ang aral ng simbahan ngunit pagpapakita lamang ito ng pagkasabik ng maraming Pilipino sa pagdating ng Pasko, at katunayan maging ang pamahalaan at mga negosyante ay nakikisabay sa pagbibigay ng maagang benepisyo para sa mga manggagawa.

Nitong nagdaang linggo matapos matanggap na ng ilan sa atin ang mga benepisyo tuwing panahon ng Kapaskuhan, partikular sa Metro Manila ay kitang-kita ang pagdagsa ng maraming tao sa mga shopping mall at mga restaurant.

Pero higit sa dinadayo ng ating mga kababayan ay ang mga pandekorasyon na maaaring gamitin para sa Pasko, at isa sa mga nangunguna ay ang iba’t ibang laki ng Christmas tree at magagandang disenyo ng Belen.

Ang Belen ay isa sa pinakamahalagang tampok na inilalagay sa mga simbahan ilang araw bago sumapit ang Pasko na binubuo ng isang nakahigang sanggol sa sabsaban kasama sina Maria at Jose na napapaligiran ng mga pastol at ng kanilang mga tupa.

Makikita rin ang tatlong Haring Mago at mga anghel na nagsisiawit sa itaas na bahagi ng Belen dahil sa pagsilang ng Mesiyas na nagbibigay ng napakalaking mensahe para sa kapayapaan hindi lang sa ating bansa kung hindi sa buong daigdig.

Sa ating bansa ay may ginaganap na Belenismo Festival sa Tarlac na taun-taong dinarayo ng marami na naging dahilan kaya sila tinawag na ‘Belen Capital of the Philippines’ dulot ito ng labis na pagbibigay importansya nila sa Belen.

Ang Belenismo, mula sa salitang Belen ay Spanish word na ang ibig sabihin ay artistikong paggawa ng Belen na hango noong taong 1223, nang si St. Francis of Assisi at ang ilang kasama ay gumawa ng kauna-unahang Belen.

Isa sa pinakaprominenteng simboliko sa pagdiriwang ng Pasko sa Pilipinas ay ang Belen o ang Nativity Scene na galing sa katagang Bethlehem kung saan isinilang si Hesu Kristo at mula noon ang Belen ay nagtataglay na ng mensahe ng pagmamahal, awa at kababaang-loob ng ating Panginoon.

Bukod sa parol na kasama sa Belen na sumisimbolo naman sa liwanag ng tala, na naging gabay ng tatlong Haring Mago para matunton ang kinaroroonan ng sanggol na si Hesus ay naging permanenteng disenyo na rin sa Belen.

Kabilang na nga ang mga simbahan, paaralan at mga establisimyento sa maraming lugar ay makikitaan ng Belen at may pagkakataong naglalakihan pa ang mga ito ng tulad sa sukat ng normal na tao.

Bago magtapos ang dekada 60 hanggang sa unang bahagi ng taong 2000 ay may napakalaking Belen na dinarayo ng marami nating kababayan sa COD building sa Araneta Center ngunit taong 2003 ay inilipat na ito sa Greenhills Shopping Center sa San Juan.

Noong pandemya ay pansamantalang lumamya ang Belen Festival sa Tarlac partikular noong nakaraang dalawang taon pero ngayon ay nagbabalik ang sigla ng pagandahan ng mga gawang Belen.

Hindi basta-basta ang mga lumalahok sa Belen Festival dahil halos lahat ng kumpanya, mga negosyo, pribadong indibidwal at kilalang grupo ay sumasali sa festival na ito sa Tarlac na dinarayo gaya ng sa Panagbenga Festival sa Baguio.

Isa pa sa kapansin-pansin sa mga nagdaang festival na ito ay ang kahusayan at katalinuhan ng ating mga kababayan sa paggawa ng Belen na mula sa iba’t ibang klase ng materyales na hindi mo aakalain. May mga gumagamit lamang ng sako ng bigas, may pinatuyong damo, sawali, kawayan ngunit kapag nalagyan na ng magagandang ilaw ay hindi mo mapipigilang mamangha sa sobrang gaganda.

Hindi lang mga Pilipino ang pinaghahandaan ang paggawa ng Belen dahil ngayon ay itinatampok din ito sa maraming bahagi ng mundo tulad sa gitna ng St. Peter’s Square sa  Vatican, mayroon din sa Metropolitan Museum of Art sa New York City at Carnegie Museum of Arts sa Pittsburgh.

Maging ang mga siyudad sa Australia, Canada, Germany, Italy, Poland at United Kingdom ay may kani-kanyang naglalakihang Belen at ang Nativity Scene sa Bethlehem mismo kung saan nagsimula ang lahat, sa Orthodox Church of the Nativity na siya ring plaza ng naturang lugar.

Ngunit, higit sa kagandahang dala ng Belen ay ang tunay na diwa nito bilang paggunita sa kapanganakan ng ating Panginoong Hesus na simbulo ng pagbibigayan at pagpapatawad sa bawat isa bago sumapit ang araw ng Pasko.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Magdoble-ingat sa modus sa Kapaskuhan

ni Bong Revilla @Anak ng Teteng | Dec. 9, 2024

Nagpakalat na ang pamunuan ng Philippine National Police (PNP) ng mga operatiba sa mga pamilihan at matataong lugar para ipatupad ang kaligtasan ng marami nating kababayan na abala sa pamimili sa panahong ito ng Kapaskuhan. 

Higit sa lahat ay nais bigyan ng proteksyon ang ating mga kababayan hinggil sa muling pagbabalik ng iba’t ibang klase ng modus operandi na karaniwang nagiging aktibo tuwing papalapit ang araw ng Pasko.

Ayon sa datos ng PNP, dalawang okasyon sa loob ng isang taon ang ramdam na ramdam ang pagtaas ng krimen, ito ay ang panahon ng enrollment at panahon ng Kapaskuhan.

Lumalabas na muli na namang aktibo ang mga masasamang-loob at ayon umano sa pag-aral ay mas dumami pa ang mga manloloko sa panahong ito kumpara noong wala pang social media.

Sa ulat ng PNP-Anti-Cybercrime Group (PNP-ASG), araw-araw ay tumataas umano ang bilang ng mga nagsasampa ng reklamo laban sa mga manloloko online sa kabila ng umiiral na SIM card registration.

Alalahanin natin na hindi tataas ang krimen kung lahat tayo ay mag-iingat at hindi bibigyan ng pagkakataon ang mga masasamang-loob na tayo ay maging biktima ng kanilang katamarang magtrabaho.

Palagi sana nating isipin na wala namang bagong modus o istilo nang pangungulimbat ang mga kawatan dahil paulit-ulit lang naman ang mga ito ngunit ang biktima ay palaging nandiyan dahil sa kapabayaan.

Karamihan sa mga nagiging biktima ay dahil sa sobrang tiwala sa kapwa, kawalan ng kaalaman sa mga istilo ng kawatan at ang pinakamalala sa lahat ay ang pagpapairal ng tila katangahan.

Karaniwang naglipana sa panahon ng Kapaskuhan ay ang mga nagpapakalat ng pekeng isang libo o limandaang pisong papel na ang madalas biktima ay mga pamilihan, tindero ng balot at mga masahista sa mga spa dahil madilim.

Tiyak na tataas din ang insidente ng snatching, robbery at holdup, lalo pa at uso na ang riding-in-tandem na gumagawa ng mga krimen at walang pakialam kahit masaktan ang biktima maisagawa lang ang pagnanakaw.

Ngayong ilang araw na lamang ay Pasko na, inaasahan ang pagdagsa ng mga namamalimos, may dayo mula sa iba’t ibang probinsya at may peke na karaniwan ay miyembro ng sindikato na nagrerenta ng sanggol para mamalimos.

Hindi naman masamang mamasko at hindi rin masamang mamahagi ng biyaya ngunit mas mabuting kilatisin nating mabuti ang mga bibigyan ng pamasko para hindi tayo mabiktima ng mga mapagsamantala.

Kahit ang dati nang Budol-Budol Gang ay umaatake rin dahil marami pa ring kasambahay ang napapaniwala nila na ang kanilang amo ay kailangan ng pera dahil naaksidente, na ang inosenteng kasambahay ay ibibigay lahat ng puwedeng ibigay ‘yun pala ay modus lamang.

Ang popular na Salisi Gang, kahit hindi Pasko nakakalat ang mga ‘yan at karaniwan silang umaatake sa mga shopping mall, restaurant o food court at binubuo ‘yan ng tatlo hanggang lima katao o mas marami pa.

Paborito ng mga kawatan ang mga masisikip na lugar tulad ng Baclaran at Divisoria o kahit simbahan pa basta siksikan ang mga tao ay tiyak na naglipana riyan ang mga mandurukot kaya dapat ay alerto lalo pa’t malapit na rin ang Simbang Gabi.

Marami sa atin ang maaaring malungkot ang Pasko dahil sa nasalanta ang mga kabuhayan ng nagdaang mga bagyo ngunit magiging malungkot pa tayo kung mabibiktima ng mga kolokoy na ito — kaya doble-ingat!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com