Natauhan, hapi na raw sa buhay… WILLIE, UMATRAS NANG TUMAKBONG SENADOR

ni Ambet Nabus @Let's See | Oct. 8, 2024

Marami ang pumupuri ngayon kay Willie Revillame dahil hindi na nga nito itinuloy ang pag-file ng COC sa pagka-senador.

Noon pa kasi nababalita na papasukin na nga ito ni Willie, lalo’t na-identify siya sa partidong sure na sure ang mga boto ng sambayanan, plus talagang matibay ang naging pagkumbinse sa kanya. Pero hindi na nga ito magaganap dahil ayon mismo kay Willie, masaya na siya sa kanyang buhay-TV ngayon.

Aanhin nga naman niya ang mga iskandalo at intriga ng pulitika, ngayong tila nakabalik na uli ang ‘lakas at powers’ niya sa Wil to Win (WTW).

Mas marami pa nga talaga siyang nagagawa without the politics, kaya’t sa TV na lang siya.

Besides, sey pa ng ilang analyst, “‘Yung mga kaibigan n’yang pulitiko all over the country, lalapitan s’ya o s’ya itong lalapitan to sponsor para ma-promote sila o platforms nila. Mas rewarding ‘yun kesa s’ya itong gagastos, ‘noh.”

---

Game ang magka-love team na sina Gab Lagman at Hyacinth Callado o HyGab sa anumang Vivamax project.

For as long as bagay daw sa kanila, maganda ang story at magaling ang direktor, “There’s no problem. I had done a Vivamax project already and my experience was okay naman. But if it’s going to be with Hy, it should be something more special and bagay sa ‘min,” sey ng guwapo at matangkad na si Gab.

Sumang-ayon naman si Hyacinth at sinabing open siya sa mga ganu’ng possibilities. 

At dahil komportableng-komportable na siya kay Gab, “I don’t see any problem with that. There are a bunch of good stories around and showing some skin or sexiness is part of it.”

Kasalukuyang nagbibida si Hyacinth sa series na Chasing Wild (CW) sa Viva TV series

kasama ng iba pang mga love teams gaya nina Heaven Peralejo-Marco Gallo, Jerome Ponce-Krissha Viaje atbp..

“We are just happy na nandito pa rin kami after one year. Mas strong, mas komportable at unti-unting lumalalim ang friendship and we will see kung ano’ng meron sa future,” hirit pa ni Gab sa tukso namin kung may something deeper na ba sa kanila ng ka-love team. 

Parehong laking US ang dalawa pero Pinoy na Pinoy daw ang kanilang mga values sa buhay.

---

Tapos na raw ang laban, may nanalo na…

ALDEN, NAKIPAG-BONDING SA MGA PAMANGKIN NI KATHRYN, IPINOST NI MOMMY MIN

NAGSIMULA na ang promo ng Hello, Love, Again (HLA) by having Kathryn Bernardo and Alden Richards taking active part sa mga mall shows.

Nagkaroon pa ng official poster unveiling last weekend sa Sta. Rosa, Laguna habang may ipinapalabas na movie trailer sa lahat ng media platforms. 

Last month, nagsimula na rin ang advance selling ng tickets ng movie at balitang sold-out na ito.

Pero ang pinakanae-excite ay ang mga fans/supporters ng KathDen sa pagpo-post ni Mommy Min Bernardo ng mga photos and videos sa socmed (social media) having Alden at mga pamangkin ni Kath.

Yes, mismong ang tuwang-tuwa na si Mommy Min ang nag-post nito na bonggang ikinagalak ng mga fans.

“Tapos na ang laban, may nanalo na,” komento pa ng netizen. 

Although noon pa naman laging dumadalaw sa Antipolo residence ng mga Bernardo si Alden Richards at nakikipag-bonding sa mga kapamilya ni Kathryn Bernardo, tila ngayon lang ito mas napag-uusapan.

Lalo lang daw umiingay… VILMA, LUIS AT RYAN, JOIN NA RIN SA POLITICAL DYNASTY, BINA-BASH

ni Ambet Nabus @Let's See | Oct. 6, 2024

Nakakaloka ang mga bumabatikos sa pamilya ni Star for All Seasons Vilma Santos at mga anak nitong sina Luis Manzano at Ryan Christian Recto. 

Sa dami ng mga bashing na ipinukol sa kanila after nilang mag-file ng COC para sa iba’t ibang posisyon sa Batangas province, para bang ngayon lang nangyari na may magkakapamilya na tatakbo sa pulitika. 

At ang pinakanakakabaliw pa ay mukha namang hindi mga botante ng nasabing lalawigan ang mga nag-oopinyon ng kung anik-anik. 

Minsan, masarap patulan pero gaya nga ng laging sinasabi sa anumang larangan na may botohan, ‘talo ang pikon’. 

Grabe, pero mula nang nagkaisip kami in the '70s at naging voter in the '80s, political dynasty in the country is in existence na. Sa dami ng mga brilliant minds at mga lider na labas-masok sa pulitika, hanggang ngayong 2024, ay hindi pa rin naisasabatas ang anti-political dynasty law? 

Sino ba ang dapat sisihin? Sino ba ang dapat managot? 

Hay, naku, ang pamilya ni Ate Vi, mapa-Santos, Recto at Manzano ay nandiyan na sa Batangas nang mahabang panahon. Ate Vi’s good track record as a public servant is a non-issue here. Walang record ng katiwalian, very functional and productive, naisasakatuparan ang mga plataporma, at higit sa lahat, mahal na mahal at mismong mga tao ang naghahanap ng klase ng public service at experience niya sa gobyerno. 

At dahil ‘yan din ang nakagisnang buhay nina Luis at Ryan Christian, saan pa ba sila puwedeng maglingkod at mag-alay ng kanilang dunong, puso at serbisyo? 

Hay, naku, hayaan po nating ang mga taga-Batangas ang sumagot niyan dahil sila itong pinagsisilbihan at nakikinabang o magdurusa man kung sakali. Nagkataon lang talaga na super-sikat si Ate Vi at ang angkan niya, kaya may mga hanash ang iba lalo na ‘yung hindi naman taga-Batangas. 

“Still very relevant,” ang simpleng naidugtong ng mga Vilmates sa present bashing na natatanggap nina Ate Vi, na kung tutuusin daw ay lalo lang nagpapalakas at nagpapaingay sa kandidatura nila, short of saying na napakadali nilang sagutin sa mga gagawin nilang pangangampanya soon.

Sa tinagal-tagal ng panahon na sandamakmak na ang mga pamilyang may puwesto at posisyon sa gobyerno, talagang ngayon lang nag-iingay ang sambayanan sa usaping dynasty? Mag-aral nga kayo ng history ng bansa at matuto nang tama! Aguy!

---

MAHUSAY sumagot ang bidang bagets na si Ryrie Sophia sa soon-to-be shown movie na Mujigae, na ang ibig sabihin sa Korea ay ‘rainbow’.

Produkto ng Little Miss U ng It’s Showtime (IS) ang 5-year-old na matabil na bagets na 'ika nga ni Rufa Mae Quinto ay parang hindi bata kung magsalita. 

Proud nga ang direktor nitong si Randolph Longjas dahil si Ryrie na raw ang bagong Judy Ann Santos ng showbiz.

Samantala, ito ‘yung unang movie ng Korean actor na si Kim Ji-soo na tila rito na sa bansa nagbabalak magpatuloy ng career after nitong masangkot sa iskandalo sa Korea at mawalan ng projects du’n.

“Mabilis mag-memorize ng linya. Mahusay mag-deliver at alam n’ya ang kanyang ginagawa,” sey naman ni Alexa Ilacad na nagsisilbing bida rin sa movie bilang siya ‘yung tita ng bata sa story na nag-aruga rito.

“May pagka-offbeat na sweet ang role ko rito. Very relatable sa mga nanay-nanayan na ayaw maging nanay, gustong maging nanay o walang planong maging nanay,” habol pa ni Alexa.

Showing na ngayong October 9 sa mga sinehan ang MUJIGAE, mula sa Unitel Films.

---

IN the name of love and good advocacy, ibibigay talaga ni Rhian Ramos ang kanyang serbisyo at oras.

Iyan mismo ang kanyang ginawa kamakailan, nang mamigay sila ng 20 livelihood carts sa mapapalad na single mothers sa isang distrito sa Maynila.

Nag-celebrate ng kanyang ika-34th birthday ang magandang aktres na nobya nga ni Cong. Sam Verzosa, ang negosyanteng lalaban sa pagka-mayor ng Maynila.

“Gusto naming maramdaman ninyo rin na may kakampi kayo. ‘Yung feeling na nanalo ka sa raffle, ‘yung napili ka! ‘Yung may sumusuporta at tutulong din sa ‘yo,” masayang mensahe ni Rhian. 

Ang food cart ay tinawag na ‘SioMAYNILA’ na full-packed ng bike, cart, gasul, steamers at iba pang mga kagamitan sa negosyo. Bukod sa siomai ay may kasama rin itong samalamig. 

“Marami pa tayong ipamimigay na mga SioMAYNILA mobile franchise business sa mga kababayan natin. Happy Birthday, Boo (Rhian),” pahayag ni Cong. Sam Verzosa kay Rhian at sa mga nakasama nila noong araw na iyon. 

Nadine, award-winning actress, inayawang makasama uli… SIGAW NG JADINE FANS: JAMES, MAG-ACTING WORKSHOP

ni Ambet Nabus @Let's See | Oct. 3, 2024

Tila nag-boomerang kay James Reid ang naging pahayag nitong hindi pa siya komportable sa mga panahong ito na makatrabaho ang ex niyang si Nadine Lustre.

Sa mga nasagap naming reaksiyon, napintasan at nalait tuloy ang pagka-aktor ni James dahil para sa mas nakakakilala sa kanila, si Nadine ang mas higit na may napatunayan kesa sa kanya bilang solo artist.

Kumpara raw kay James, may magandang track record sa box-office at may artistic merits pa si Nadine dahil naging award-winning actress ito.

Although may balitang babalik si James sa TV, wala pang kumpirmadong project ang aktor. 

“Mag-series na lang muna s’ya sa ibang platform. Mag-acting workshop din at maghanap talaga ng makakatambal na bibitbit sa kanya,” reaksiyon ng mga disgruntled JaDine (James at Nadine) fans na tila hindi natuwa sa naging pronouncement ni James Reid.

Aguy!

---

MIXED reactions ang sambayanan sa balitang nag-file ng Certificate of Candidacy (COC) si Dr. Willie Ong sa pagka-senador.

Umuwi ng bansa ang kanyang maybahay na si Doc Liza para i-represent siya sa pag-file, habang nasa Singapore pa si Doc Willie na patuloy namang bumubuti ang kalagayan sa laban nito sa kanser.

Para sa mga nababahala sa health condition ng doktor, ipinapayo nilang mag-focus na lang ito sa pagpapagaling at pagpapalakas pa. 

“‘Wag na n’yang sayangin ang kanyang energy, talino at puso sa pagpasok sa pulitika. ‘Di ba sinasabi niyang ito ang isa sa mga naging sanhi ng kanyang stress at depression at pagkakasakit, bakit n’ya pa papasukin uli?” komento ng mga netizens sa kanya.

May mga naniniwala namang mas maraming magagawa si Doc Willie kapag may posisyon ito gaya ng pagiging senador at dahil may adbokasiya itong ayusin ang ‘health sector’ ng bansa, may mga nagnanais na siya’y suportahan.

Pero may nangangamba na dahil sa naging pronouncement niya tungkol sa mga pulitikong ‘corrupt’, malamang daw na mahirapan din siya na isulong ang magagandang layunin niya.

Hmmm...

---

FEEL namin ang pagiging laking-probinsiya nitong si Maine Mendoza.

Sa katatapos lang na Bingo Plus event, buong-ningning nitong ipinagsigawang na-experience niya ang ‘perya’. Ito kasi ang konsepto ng ‘Pinoy Drop Ball’ ng naturang platform for digital entertainment na bonggang-bonggang inilunsad, kasabay ng mga popular na line-up gaya ng Bingo, Tongits at Perya Games.

“Let’s just be a responsible gamer. Maging balanse sa tuwa at pagtaya,” habol pa ni Maine na nagsisilbing brand ambassador ng Bingo Plus under DigiPlus.

Dahil sa mas moderno na ang panahon, nag-evolve na rin ang drop ball batay sa mga Pinoy games na ating nakagisnan gaya rin ng Bingo Mega, Color Game at Papula Paputi.

Ang pinaka-exciting part dito ay ang pagkakaroon ng chance to win big multipliers from 2x payout to 3x payout under 15 slots (10, 50, 100, 200) at dahil naka-stream live ito ng 23/7, basta may gadget ay keri mong sumali, makapaglaro at manalo.

Sey nga ni Maine, “Part na po ng ating culture and tradition ang mga game na ganyan. Basta importanteng sa paglilibang natin ay masaya lang tayo.”

---

AYON sa survey ng isang booking platform, pang-lima (5) ang Japan sa mga paboritong puntahan ng mga Pilipinong turista, lalo na ng mga artista natin.

Ramdam ng mga turista na ligtas sila, ngunit tulad ng ibang bansa, hindi perpekto ang Japan.

Kaya naman ang grupong Pinoys Everywhere na samahan ng mga manggagawang Pilipino sa Tokyo ay may babala sa mga turistang Pinoy.

“Mag-ingat sana sila sa mga taxi na may puting plaka na kung tawagin sa Japan ay ‘shirotaku’. Mga turista ang madalas nabibiktima,” payo ng presidente ng grupo na si Jed dela Vega.

Aniya pa, ang mga legal na taxi sa Japan ay may green plate number.

“Kung puti ang plaka, hindi awtorisado ito na pang-negosyo,” payo ni Dela Vega. 

“Halimbawang may aksidente, walang insurance ang pasahero. Maaari pa na madamay sa imbestigasyon kung sakaling may krimen.”

Noong Pebrero, iniulat sa Japan na may mga Hapon at Intsik na nahuli na may negosyong illegal na taxi service sa Haneda Airport.

Gumagamit sila ng reservation website at app para mangontrata ng turista na nais makatipid.

Payo ni Dela Vega, tumawag sa Metropolitan Police Department Traffic Investigation Division sa numerong 03-3581-4321 kung sakali mang magkaproblema sa ilegal na taxi.

“Gusto naming maging masaya at matiwasay ang pagbisita ng mga Pilipino sa Japan,” aniya pa.

Oh, alam na!