Sinakyan, kumita pa… MEGA, NAGKA-ENDORSEMENT DAHIL SA ‘PAGSA-SHARON’ SA MGA HANDAAN

ni Ambet Nabus @Let's See | Dec. 20, 2024

Photo: Sharon Cuneta

Speaking of Megastar Sharon Cuneta, pinanindigan na nito ang very popular na “Sharon” na bansag kapag may gustong mag-take-out o take home kapag may handaan.

Aba’y dapat nga namang makinabang din siya sa naging popular na “bansag o kahulugan ng Sharon” dahil iyon naman talaga ang name niya at sa kanya nagsimula ang lahat ng iyon, might as well use it sa kanyang advantage at pakinabang, ‘noh!

Samantala, may isang insurance company na kinuha na si Mega para maging spokesperson o endorser ng insurance policy, na maganda siyempre ang mga benepisyo.

Napaka-smart ng move ng nasabing insurance company, lalo’t hindi na talaga mawawala sa kultura at tradisyon nating mga Pinoy ang pag-Sharon sa mga handaan, piyestahan, Pasko, at mga okasyon na may pagkain. Hahaha!

Bongga si Mega, ‘di ba?

---

Sobrang kahanga-hanga namang tunay ang mahal nating Star for All Seasons Vilma Santos. Sa gitna kasi ng pagiging super busy nito sa promo ng Uninvited at iba pa niyang iskedyul, talagang tinutukan nito ang paghingi ng updates sa amin tungkol sa pagyao ni Kuyang Ed de Leon.

Ramdam na ramdam namin ang pagmamahal at pag-alala ni Ate Vi sa beteranong kasamahan natin sa panulat na noon pa man ay lantarang Vilmanian at tagapagtanggol nito.

Laging nand’yan si Ate Vi na nakasuporta at nakasaklolo sa mga needs ni Kuyang Ed at mga kapamilya nito, kaya’t masakit din sa kanya ang pagpanaw nito.

Nagkaroon ng cardiac arrest last Wednesday si Kuyang Ed na noon pa ma’y may kondisyon na sa puso at mataas na presyon ng dugo. 

Nakikiramay po kami at ang lahat ng kapwa Vilmates-Vilmanians sa mga naiwan ni Kuyang Ed na itinuring ngang bardagul na may prinsipyo at laging nandiyan sa sinumang umaatake sa isang Vilma Santos.

---

Sobra-sobra rin ang aming pagkagulat sa balitang hinuli at ikinulong ang kumpare naming si Pandi, Bulacan Mayor Enrico Roque, kasama ang konsehal na si Jonjon Roxas at aide nitong si Roel Raymundo.

Hinuli sila sa reklamong rape na noong 2019 pa pala diumano nangyari.

Personal naming kilala at kaibigan ang magaling na mayor. Negosyante pa lang ito ay kasa-kasama na niya kami at nagkaroon pa ng panahon na nagkaroon kami ng bahay sa Pandi dahil sa naging koneksiyon namin noon sa Amana Water Park na siya ang may-ari. 

Ninong din siya ng aking anak, kaya’t sobrang nakakabigla ang balitang hinuli siya at ikinulong.

Napakabigat na pagsubok itong dumating kay Mayor Roque na minamahal din ng showbiz dahil sa pagiging producer nito sa kanyang Cineko Prod.

Lagi siyang sumasali sa Metro Manila Film Festival (MMFF) at sa aming pagkakaalam, co-producer din siya ng isang entry this year. Last year, naging entry nila ang Sharon Cuneta-Alden Richards starrer na Family of Two (FOT). 

Hay, hindi namin alam kung paano magre-react lalo't kilala naming wala sa personalidad ni Enrico ang manamantala, mang-abuso at gamitin ang powers para lang makalamang sa kapwa.

Harinawang mamayani ang hustisya para sa lahat.

Mag-ina, abroad na titira… JOSE, BABU NA RAW SA SHOWBIZ AFTER MAGPAKASAL

ni Ambet Nabus @Let's See | Dec. 19, 2024

Photo: Jose Manalo - TVJ FB

Last Tuesday naman ay pinakasalan na nga ni Jose Manalo ang kanyang long-time GF-partner na dating EB Babes member na si Mergene Maranan.

Sa Boracay sila nagpakasal kasama ang mga piling-piling kaibigan at kaanak.

Matagal nang magkarelasyon ang dalawa at nagbunga na nga ang kanilang pagsasama kung saan madalas, abroad nga sila nagkakasama, marahil ay para maiwasan noon ang intriga.

Matagal nang hiwalay sa kanyang asawa si Jose kung saan may mga anak sila ng ex niyang si Anna Lyn na active rin sa showbiz gaya nina Benj at Nicco Manalo.

Ang couple na sina Ice Seguerra at Liza Diño ang nag-post sa socmed ng mga kaganapan sa kasal kung saan namataan ang EB family nilang sina Bossing Vic Sotto and family, Allan K, Paolo Ballesteros, Maine Mendoza, at marami pang iba.

Ang na-Marites naming tsika ay abroad na umano nagbabalak manirahan sina Mergene at anak, which leads us to asking, “Magre-retire na rin ba si Jose sa work?”

Kumalat din kasi ang tsika na may nabili na umano silang property abroad?

---

SINORPRESA ng OG members ng Eraserheads ang buong UP Community nang mag-perform sila sa ginanap na victory bonfire sa UP Sunken Garden last Monday.

Ito ay dahil sa noon pa ipinangako ng mga alumni ng Eraserheads na maibalik lang uli ang UAAP men’s basketball title sa UP, kahit nga disbanded na sila, bubuoin nila ang grupo para lang muling magsama-sama sa stage at mag-perform.

At nito ngang muling nag-champion ang UP Maroons sa 87th season, nangyari na ang isa sa pinakabonggang sorpresa ng Eheads na ikinagalak ng lahat.

Sa pangunguna ni Ely Buendia, feeling nasa ‘90s era ang buong UP community. 

Parang wala talagang gusot na nangyari, mga iskandalo at intriga na nagdulot ng disbandment ng maituturing na iconic and the best Pinoy band ng bansa.

Bukod sa men’s basketball, parte rin ng celebration ang mga nag-champion din sa Women’s Badminton at Men’s Track and Field ng UP.

---

PINAG-UUSAPAN ang ganda ng pelikulang My Future You (MFY) ng FranSeth.

Sa ginanap na premiere screening ng pelikula, dinagsa ng mga GenZs ang sinehan sa SM Megamall, lalo’t maraming mga GenZ actor-friends ng FranSeth ang sumuporta gaya nina Jameson Blake, KD Estrada, Alexa Ilacad at mga bagong Regal babies ni Roselle Monteverde.

Napakahusay nga raw ng pagkaka-execute ni Direk Crisanto Aquino ng kakaibang tema ng love story ng dalawang teens na nasa magkaibang panahon.

At this early nga ay sinasabing mangangabog ito come awards night dahil sa mahusay nitong pagkakagawa.

Hindi nga raw nagkamali ang Regal Entertainment na sugalan sina Francine Diaz at Seth Fedelin at lalong hindi nagkamali ang yumaong Regal matriarch na si Mother Lily Monteverde nang aprubahan niya ang project para sa FranSeth.

Considering na walang masyadong big stars sa cast na kinabibilangan nina Almira Muhlach, Christian Vasquez, Bodjie Pascua, Mosang at Izzy Canillo, ang ganda at husay ng pagkagawa ng MFY ang sinasabing magdadala rito sa tagumpay.

Bagay na bagay daw, Bea… DOM, PROUD NA BINITBIT SI SUE SA X’MAS PARTY NG ENDORSEMENT

ni Ambet Nabus @Let's See | Dec. 18, 2024

Photo: Dominic at Sue - Circulated

Oh, ha, lantaran na ring idinispley ni Dominic Roque sa Christmas party ng ineendorso niyang fuel company si Sue Ramirez last weekend.

Ayon sa mga nagpadala ng mensahe sa amin, very sweet at warm na sinalubong ng mga tao ang dalawa lalo na ‘yung may-ari ng kumpanya, na nadamay sa iskandalo ni Dom noong mga nakaraang buwan dahil itinuro pang third party sa breakup nila ni Bea Alonzo.

“Ginawa pa ngang parlor game ‘yung ‘Akin ‘to, atin ‘to’ campaign logo ng company. Game na game na nakisaya ang dalawa,” kuwento ng aming mga sources.

Pinuri nga rin daw ang pagiging accommodating ng dalawa sa mga nagpa-picture at nakipagbiruan sa kanila.

“Bagay na bagay sila, ang ganda nilang tingnan. Sana, magkatuluyan nga sila,” hirit pa ng ilan.

Mukhang komportable nga sina Sue at Dom sa harap ng publiko and yes, nagawa pa nga raw makapag-promote ng dalawa ng Metro Manila Film Festival (MMFF) movie na kasali si Sue, ang The Kingdom (TK).

“Ganu’n ang BF (boyfriend), nakasuporta,” dagdag-komento ng mga nagkuwento sa amin.

Speaking of The Kingdom (TK), very impressive ang napanood naming mga eksena sa movie. Iba ang lengguwahe, iba ang awrahan ni Piolo Pascual na kahit medyo deglamorized ay guwapung-guwapo pa rin on screen. 

Pero nakakagulat ang dramatic moments ni Bossing Vic Sotto, tiyak naming maninibago ang mga manonood sa kanyang seryosong role bilang hari ng isang monarkiya na nagpapatakbo ng bansa.

May mga “what ifs” kang agad mong masasagot kapag napanood mo ang movie, lalo’t naging parte rin ng history ng ating bansa ang pag-exist ng monarchy, bago pa man tayo sinakop ng mga dayuhan. 

Very promising ang pelikula at pasok na pasok ito sa criteria ng Gatpuno Award ng MMFF and of course, sa iba pang mga karangalan at stake.

Bukod kina Piolo at Bossing Vic, magagaling din sina Sid Lucero, Cristine Reyes, Sue Ramirez at mga character actors na kasama nila. 

Winner ang pagkakagamit ng Intramuros sa Maharlika setting at mga props mula sa damit, upuan, mga tela, etc. at ultimo mga tattoo nila sa katawan, nagsasalita at may lamang mga mensahe.

Kapuri-puri ang produksiyon at si Direk Mike Tuviera na mabilis na sinagot ang mga naging katanungan namin sa ilang eksena, pati na ang producer na si Jojo Oconer nang sabihin naming bongga ang accent ng TV interviewer sa isang eksena ni Bossing Vic at kahawig pa ni Dimples Romana. Hahaha!