Video ng away, na-post sa IG… MISIS KAY BARON: GUSTO MONG MAGPASAKLOLO? TAWAGAN MO SUGAR MOMMY MO!

ni Ador V. Saluta - @Adore Me! | April 7, 2022

Isa na namang kuwentong awayan ng mag-partner ang nasilip ng ilan sa video clip ni Baron Geisler at ng asawa sa Instagram ng aktor nu'ng nakaraang araw.

Nadiskubre ang awayan sa pagitan ng dalawa dahil sa 'di sinasadyang pagpo-post ng aktor sa kanyang Instagram account, dahilan para makarating ito sa vlogger na si Ogie Diaz.

Palaisipan kay Mama Ogs (tawag kay Ogie) kung aksidente ba o sinadyang i-post ni Baron ang away nilang mag-asawa. Bago pa man ito kumalat, ngayo'y burado na ang nasabing video sa IG account ng aktor.

Ani Mama Ogs, "Nakakaloka ito, jusko! Bago pa mabura, eh, ipinakita po namin sa inyo ito, ha?

"Oo, kasi nga, parang... Hindi ko alam kung sinadya o hindi sinadya na mai-post ni Baron Geisler 'yung away nila ng jowa niya."

Habang pine-play nila ang nasabing video clip, tina-translate naman ni Ogie ang pinagsasasabi kay Baron ng jowa niya.

Kuwento pa ni Ogie sa nasabing video clip, "Nasa kama si Baron, tapos parang tumatalak 'yung misis niya, at ang sabi ng misis niya, 'Ano? Gusto mong magpasaklolo? Tawagan mo 'yung sugar mommy mo.'

"'Yung sa buwisit nu'ng misis, isinaboy kay Baron 'yung parang tubig kaya nakita sa binti ni Baron na parang basang-basa siya. Tapos kumalat din sa kama. Ayun nga, sabi ni Baron, 'Sino ba ang kailangan ng rehab?' or 'Sino ba ang kailangang magpa-rehab?' So, parang ang sinasabi ni Baron, 'Hindi ako ang dapat magpa-rehab,' parang ganu'n."

Payo naman ni Ogie, dapat ay hindi na nagbi-video si Baron lalo na sa away nilang mag-asawa.

"Dapat sana ay maayos na 'yan. At oo nga, nakakahiya naman, Baron, na ibini-video mo pa. Dapat, hindi na, pag-usapan n'yo na lang," sey pa ni Mama Ogs.

After ng breakup nila ng madir ng anak… CARLO, IPINAGSIGAWANG SINGLE ULI

ni Ador V. Saluta - @Adore Me! | April 4, 2022

Isa rin sa mga bida ng seryeng How To Move On in 30 Days ay si Carlo Aquino na meron ding karanasan sa breakup sa noo'y kinakasama niyang non-showbiz GF na si Trina Candaza kung saa'y meron silang anak.

Inamin ni Carlo na hanggang ngayo'y tuloy pa rin ang communication nila ni Trina para sa kanilang anak.

Nang kumustahin ng media ang kanyang anak kay Trina na si Enola Mithi sa ginanap na mediacon sa Dolphy Theatre last April 1, napangiti ang mga press sa kanyang sagot.

"Masarap makita ang semilya mo," may himig biro pa ng aktor.

Kambiyo naman niya, "Ha, ha, ha! Sorry, ha? Hindi, ang sarap... kasi meron pa palang ibang pagmamahal na hindi ko pa alam. Ang sarap naman nu'n, 'yung pinagtrabahuhan mo, hindi na lang para sa 'yo, para sa anak mo na."

Ilang days siyang naka-move on sa hiwalayan nila ni Trina?

"Hindi ko alam, eh, dapat ba, may timeline? Wala yatang timeline 'pag ganu'n, eh. Inaano ko lang siguro, inaalagaan ko 'yung present para 'yung past, hindi na mag-jump sa future? Make sense ba 'yun?" balik-tanong niya.

May komento ang aktor sa nasabi niyang wala na raw pag-asang maging present o future pa ang kanyang past.

"Ayokong magsalita nang tapos. Kung ano 'yung ibinigay ng universe, siyempre, tatanggapin mo 'yun. Wala ka namang magagawa, 'yun ang nakasulat sa palad mo, eh."

Sa ngayo'y 'single' pa rin daw ang estado ng buhay ni Carlo kahit pa tuluy-tuloy ang komunikasyon nila ng ex.

"Always 'yun, palagi namang 'yun, nanay siya ng anak ko," pahayag ng aktor.

1 week nagkulong sa kuwarto… BARBIE, NAKA-MOVE ON NA KAY DIEGO AFTER 3 MOS.

ni Ador V. Saluta - @Adore Me! | April 3, 2022

Bagama't hiwalay na at nakikitang nagde-date paminsan-minsan, aminado ang aktres na si Barbie Imperial na hindi sila nagkabalikan ng ex na si Diego Loyzaga.

Matatandaang lumayas bigla ng 'Pinas si Diego at iniwan ang ex-GF pagkatapos ng hot issue involving AJ Raval na siyang itinuturong cause ng breakup.

Pagkatapos ng isang buwang 'nursing a broken heart' drama sa US, bumalik si Diego sa bansa na sabi'y all's well na raw sa kanyang ex.

Patunay na okay na ang dalawa ay ang mga playful exchange of comments between Barbie and Diego na nasubaybayan ng kanilang mga fans sa social media. Kaya naman, nag-assume ang mga 'Marites' na may 'something' ulit sa dalawa base sa kanilang online interaction.

Subali't sa panayam kay Barbie sa nakaraang episode ng Magandang Buhay, paglilinaw ng ex ni Diego, "Okay po kasi kami. Hindi naman po kami magkaaway, pero hindi po kami nagbalikan. Friends lang, friends. Kulitan lang."

Dagdag pa niya, "Actually po, before pa nu'ng exchange ng comments na 'yun, nakapag-usap naman po kami nu'ng bumalik siya galing States."

Paglilinaw din niya tungkol sa naging hiwalayan nila ni Diego, "Ako po, parang hinintay ko ng one week, sinolo ko talaga 'yung breakup, as in nasa kuwarto lang ako, sobrang lungkot ko talaga.

"Ako kasi, alam ko po talaga, kapag nasasaktan ako ay mas doble ang sakit para sa nanay ko. So, kinimkim ko munang mag-isa, tapos nu'ng medyo kaya ko nang konti ay doon ko sinabi kay Mama at saka nu'ng sigurado nang break na talaga."

Bagama't hindi pa raw siya nakaka-move-on, aniya'y darating din ang araw na makakalimot din siya.

"Ako po kasi, naniniwala talaga ako na 'yung power ng time na maghi-heal ka talaga. Hindi mo siya kailangang madaliin. Darating at darating talaga siya. So, patience lang talaga na everyday, sasabihin mo sa sarili mo na magiging okay din.

"Ako po kasi, 'yung pinakapinagkakatiwalaan ko talaga na tao, 'yung mama ko, and lahat naman po ng breakup ko, si Mama talaga 'yung nandiyan para sa akin. And minsan, kung hindi ko na po kaya, ite-text ko siya or itsa-chat ko siya na 'Mama, dito ka na lang matulog sa kuwarto ko,'" Barbie relayed.

Humuhugot daw siya ng lakas sa kanyang mother's advice para agarang maka-move on.

"Nu'ng nag-break kami ni Diego, siguro two weeks na sa kuwarto ko siya (Mama) natutulog. And palagi niyang ina-advise sa akin na pray lang at nire-remind niya ako na bata pa ako marami pang mangyayari sa life ko. 'Yung pain, part kasi siya ng pagiging tao at 'di ka magiging ikaw ngayon kung hindi sa pain na na-experience mo sa past.

"Ngayon po, siyempre, sobrang happy na talaga ako. Finally, finally, after three months ng breakup namin, I am okay na, happy," pagtatapos ni Barbie.